BÊNO NA MESO MA TIA!
Miangu mia mu politike—Bibila bwe ditâka?
Miangu mu misamu mia politike mu nza, bantu mita tuma mu bâ na lwaka.
Mfumu za politike 39 zi bahondele ku Mexique na miangu mia mpila zakaka biakotese vwandi mu ntangu ya vote ya mivu mia 2023-2024.
Ku Europe miangu miamingi miatulumukini mu misamu mia politike ka ntama ko, ntiana bu baketi honda mfumu ya guvernema ya ku Slovaquie mu tilumbu tia 15 mai 2024.
Ku États-Unis, Donald Trump, mfumu ya ntama, baketi mu honda mu tilumbu tia 13 juillet 2024.
Mu bungu dia nti miangu mieka miamingi mu misamu mia politike? Ngano mbo miwa? Bibila bwe ditâka?
Tihambula mu politike tia babikula
Bibila dia bikula mu bungu dia ntangu ya beto, yidelakane na “bilumbu bia mansukina,” ti bantu babingi mbo baketi bâ na ndiatulu zaketi tulumuna miangu na kondo kwa tiwisa.
“Mu bilumbu bia mansukina, ntangu za ’mpasi mu vivirila zibâ kô. Bantu [. . .] ka babâ na tifu tia vutulaka matondo ko, ka babâ ba kwikama ko, mbo bakondo [. . .] tiwisa, [. . .] mbo babâ na mutima ngolo, mbo [. . .] bateka bampwana’awu, mbo babâ na tungu, mbo babâ na lulendo lwalwingi.”—2 Timote 3:1-4.
Bibila diabikula mpe misamu ntiana vwandi dia bantu na dia politike mu ntangu yo. (Like 21:9, note) Kâ, miangu mia mu politike na tihambula, ka bizingila mankululu ko.
Nsuka ya miangu mia mu politike
Bibila disongele ti Nzambi mbo kayingasa guvernema zazansoni za bantu, mpe mbo kazakasa guvernema’andi ya ku zulu.
“Nzambi ya ku zulu mbo yizakasa timfumu [. . .] tikosakasa bimfumu bio biabiansoni [biakaka] mpe mbo tisukisa bio, mpe tiawu kaka kwa tiyâla ntangu zazansoni.”—Daniele 2:44.
Timfumu tia Nzambi mbo titomo vukasa bantu mpe mbo tizakasa tidzunu mu nza.
Mfumu’andi, Yezu Kristo, “Mfumu ya Tidzunu,” bamutâka, mpe mbo kasa ti ‘tidzunu ka tisukandi.’—Izaya 9:6, 7.
Bwawu bu mpe, bantu ba katwarisaka bawu balongokaka bwe babêlaka mu tidzunu. Buna, Bibila ditêle: “Mu mbele zawu za muzingu, mbo bayirika nsengo mpe mu madionga mawu mbo bayirika nkakulu. Ka ku bâ kanda ko dinwanisa kanda diakaka mpe ka bavutu’â longoka muzingu ko.”—Izaya 2:3, 4.
Mu zaba misamu miakaka, tanga mutu-diambu wa “Ngano Timfumu tia Nzambi ntia misamu tilungisa?” mpe tala video ya Ngano Timfumu tia Nzambi ni nti?