Mu muvu wa 2020 katastrofe zazingi zabwiri, mpe timbevo tia coronavirus tiabatikiri mu yalangana mu nza ya mukaka. Bwe Mbangi za Yehova zahanini lubakusu kwe bantu ba bwiriri misamu mio?

 Mu muvu wa tisalu wa 2020, a komite ya bantwarisi ya Timvuka titwarisaka yayizi tambula mu sarila kampe 16 200 000 000 FCFA (milio 28 za dollars) b mu bungu dia katastrofe. Bayizi za sarila mu bungu dia katastrofe 200 zayizi bwila bantu—timbevo tia coronavirus, bitembo bia ngolo, niamba ku Afrique, nsatu ya ku Venezuela, bisihu bia ngolo (sécheresse) ku Zimbabwe. Mbongo za makabu, bayizi za sarila mu sumba bidia, mamba, nzo, binkuti, basariri zo mu bukisa bantu, mu sa bunkete, mu tomesa na mu vutu tunga nzo zakaka. Tazonzeleno bifwani bia bisalu bia lubakusu biasalamane.

 Coronavirus. Mu nza ya mukaka, timbevo tio tianatini mpangi zeto nsobolo mu tinsuni, mu mbanzulu na mu musamu wa mbongo. Mu ba bakisa, komite za lubakusu yôka 800 bayizi kubika mu nza ya mukaka. Komite zadingiri mu zaba nsatu za mpangi zeto, mpe zaheni nsangu zifwanakane mu bakisa komite ya bantwarisi mu zaba bwe bafweti twarisila tisalu tia lubakusu.

 Mu muvu wo wawansoni, komite za lubakusu zayizi bakisa bantu babingi mu baka bidia, mamba, bisalulu bia bunkete na bilongo. Mu mbuka zakaka, komite za lubakusu zasariri tintwari na bakuluntu ba bimvuka mu bakisa bampangi ngatu babaka lubakusu lwa luyalu lwa hata.

 Bantu balembolo Mbangi za Yehova bayizi mona tisalu tieto tia lubakusu. Mu tifwani, Field Simwinga, we commissaire ya tizunga tia Nakonde, ku Zambie, watêle kwe mpangi zeto: “Matondo mamingi tuta lu vuturila mu lubakusu lufwanane lu luheni kwe makanda ma bwiriri musamu wu.”

 Nsatu ku Angola. Timbevo tia coronavirus tiasiri ti bidia biamanga ku Angola, mpe ntalu za bima zanaka. Musamu wa nguria wa mpasi wayikiri kwe mpangi zeto zazîngi mu sumba bidia.

 Bayizi lomba kwe filiale ya Brésil mu tambika bidia kwe mpangi zeto za ku Angola. Mu sarila makabu mu mpila ya mbote, mpangi zeto zayizi dinga mu zaba bwe balendi sumbila bima mpe balendi bia tambikila mu ntalu ya mbote; buna bayizi sumba bima mu bikunku bia binene (en gros). Bampangi bayizi tambika koli ya 20 kilo ya bibia kampe mu 13 200 FCFA (22 dollars) kwa. Bima bi bayizi tambika ni loso, madezo na mafuta (huile). Tii lumbu ti, kampe koli za 33 544 beka tambika—wuzololo tâ 654 tonnes. Bima bio na biakaka biayizi hana bampangi, biasiri ti badikila bantu 50 000!

 Ngano mpangi zeto bwe zabongele lubakusu lo? Alexandre, bâka ku mbuka ya hengama ku Angola, têle: “Kwe meno tidimbu tiena tita songela ti Yehova me kazololo, mpe ka ndiena me kaka ko. Ntalu ndiena mu organizasio ya Yehova!” Mariza, nguri yisansaka bala yandi kaka, têle: “Yehova bidilu biani bia kawîri. Nimutondele, Yandi na organizasio’andi!”

 Bisihu bia ngolo ku Zimbabwe. Mu muvu wa tisalu wa 2020, ku Zimbabwe bisihu bia ngolo biatomono singana, mpe bantu babingi bayizi bâ na nsatu ya yôka. Mbangi za Yehova zazingi zalembolo bâ na bidia bia fwanana.

 Komite za lubakusu za 5 bayizi kubika mu bakisa mpangi zeto mu baka bidia. Bisamuni biabingi biayizi hana lubakusu mu kubika nkutu za bidia na mu tûla bidia mu kati; bakaka bayizi hana kaminio zawu ngatu basarila zo. c Mu muvu wa tisalu wa 2020, kampe 414 936 600 FCFA (691 561 dollars) bayizi sarila ngatu zabakisa mu dikila bantu yôka 22 700!

 Makanda makaka ka mabêle’â na bidia ko mu ntangu yi bayizi ba hana lubakusu. Bidia bu biatûriri, mpangi zeto zakembele Yehova. Bakaka babatikiri mu tanga mikunga mieto mia nsambululu.

 Ku mbuka yimosi, mpangi zole ze mifwiri zabêle ku lukutakanu lwa organizasio yimosi yakanisini mu bakisa bantu mu baka bidia. Kâ, mu bungu ti babatikiri mu zonzela misamu mia politike ku lukutakanu lo, mpangi zo zabongele nzengolo ya lembo tambula misamu mi babalombele ngatu babaka bidia. Bu badinga mu katuka ku lukutakanu lo, bayizi ba sehesela, mpe babatêlele ti: “Ka luvutuandi kâla kwe beto ngatu taluhana bidia!” Kâ, tumingu twole kwa twayôkele, mpangi zeto zanatini mpangi zo za zikento bidia—ntete ekipe za organizasio yo zatûla!

 Tisalu tia lubakusu tiasalamane ku Zimbabwe tiayizi hana timbangi tia mbote. Mu tifwani, tazonzeleno Prisca, bâka ku hata dia fioti. Ntono mpasi zaneti bisihu bia ngolo, Prisca wasamuni bilumbu biabiansoni bia mercredi na bia vendredi, ni bu sa ti ntangu yi basalaka nsaba yabêle. Bantu ba babâka hata dimosi bamusehesele, bu batêle: “Mbo fwisa kanda diaku nsatu mu bungu dia tisalu tiaku tia samuna.” Prisca wabavuturila: “Kani kabwe, Yehova ka yambirikaka bisari biandi ko.” Ntangu ka yayingi’â ko yayôkele, mu bungu dia tisalu tia lubakusu tia Organizasio’eto tiasalamane, yandi wabakiri bima bia mfunu. Bantu bakaka ba babâka hata dimosi bayizi tomo yituku, buna bayizi mu têla ti: “Nzambi ka ku yambikiri’â ko, tuzololo tatomo mu zaba.” Bantu bango ba 7 bata landaka tukutakanu tweto tuta yôkaka mu radio.

 Bu tuta kwe pusane ku nsuka, mbo tutatamana mu bwabana na katastrofe. (Matie 24:3, 7) Matondo mamingi tuta vutula mu bungu dia makabu meno ma luta hanaka na luzolo lwalwansoni mu donate.pr418.com. Lubakusu mata hanaka mu sala tisalu tia lubakusu mu ntangu yifwanane.