Mu mars 2020, Organisation mondiale de la santé yatâ ti coronavirus timbevo tiena tia mu nza yayansoni, bantu ka beri’â banzaka ko ti virus yo mbo yaketi nata nsobolo mu nza yayansoni mpe mbo yaketi zingila mvula zazingi. Milio za bantu, na Mbangi za Yehova zakaka mpe, bayizi bwabana na misamu mianeti coronavirus ntiana, mia tikolela, mia mutima, na mia mbongo. Bwe Mbangi za Yehova zayizi kubamana, mpe zahanina lubakusu?

 Mu lutwalusu lwa komite ya bantwarisi ya Timvuka titwarisaka tia Mbangi za Yehova, bayizi kubika komite yôka 950 za lubakusu mu bungu dia coronavirus. Mpangi zakaka, zayizi baka lubakusu lwa Komite ze ku bizunga biawu, mpe bakaka babaka lubakusu lwa guvernema. Komite za lubakusu zayizi kubika mpe lubakusu lwa lunene.

 Mu tifwani, tazonzela mio mita yôka ku Paraguay. Mu bungu dia mbaya ya neti coronavirus, zurnale yimosi ya têle ti: “Bisi-Paraguay babingi bê na nsatu ku nzo zawu.” Kâ komite ya lubakusu ya ku Paraguay yakabika bikunku bia bidia, na bima biakaka bitariri bunkete mu bungu dia tumingu twole. Muna tikunku kampe 16 375 FCFA tiafwa.

 Bantu bahanaka lubakusu bwe basaka mu tikengerela na mu kengerela bantu bakaka mu bungu dia coronavirus? Maske balwataka mpe ka bakwenda bundakane ko. Mbo batalaka mpe ti compagnies zihanaka bidia tala ti bunkete zisarilaka, mpe mesures barrières zi zitisaka. Mbo balombaka kwe bô bakwe simbi bima mu lwata maske na bima biakaka, na mu saka désinfecter kaminio zawu na mbuka zi batûlaka bidia. Bô bakwizi turisaka bima, ka babundakanaka na mpangi zeto ko.

 Mu janvier 2021, komite ya bantwarisi yayizi dukisa lutangu lwa mbongo yôka 25 millions de dollars (U.S.D.) mu hana lubakusu mu ntangu ya coronavirus. Filiale na komite za lubakusu mbo zisarilaka mbongo zo na ndwenga, mpe mbo bakakulaka ntalu ya bima bia mfumu bi basumbaka. Mu tifwani, ku Chili, mpangi zikubikaka lubakusu zadingiri mu sumba 750 kilogrammes za madezo. Kâ ntalu ya madezo yayizi naka ha manima kwa ma ngonda mosi! Bu batamburi mu sumba madezo mango ha manima ma heures zole ntalu yanaka, bite bia nkari biabatêle ti muntu wumosi watumini madezo, kâ ma kakarisi. Buna, kani basumbila zo mu ntalu ya naka ntiana bu baketi za sumbila, bitê bia nkari biavutulu ma tekela mpangi zeto mu ntalu ya ngonda ya yôka!

 Kâ, mpangi zeto bu zakâla mu bonga madezo, titê tia nkari tiayêla mu kala mu batekela mo buna bu bawisana, mu bungu ti wabakwikisila ti bima bakabaka na kondo kwa buderede ntiana organizsio zakaka. Ha manima ma lusambulu lwa nkufi ku nsia mutima, mpangi yimosi yatâ kwe titê tia nkari ti muna timvuka tia bayuriri mu zaba bantu bê na nsatu lubakusu. Mpangi zavutu tâ ti mu bungu dia tikulu na ntûkulu ya muna muntu, muna tikunku tia bima mbo tiaketi bâ na bima bivulu sarilaka makanda. Mpangi zo zatâ kwe titê tia nkari ti Mbangi za Yehova luzolo lwa mutima zisarilaka mu hana lubakusu. Yandi wayituku. Titê tia nkari tiatambula mu kokesa ntalu, kâ mpe tiaheni 400 kilogrammes ya madezo mu mo ma baketi vutu sumba.

 Lusu, mpangi ya yikento ye mufwiri ku Libéria na bantu 5 mu kanda diandi kabâka. Lumbu timosi mu pari bu keri diaka mpe bu keri tangaka verse ya tilumbu, mutekolo’andi we na mvula 7 wayizi bakula ti bio ni bidia bia mansukina biasala nawu. Yandi wayula: “Ngano nti tudia?” Lusu wamutêla ti watisambirila mu bungu dia musamu wo, mpe lukwikulu lwabâ nandi ti Yehova mbo kaketi bahana bio biabâ nawu nsatu. Ha manima ma midi kwa, Lusu wabaka mbila ya mukuluntu wumosi wa timvuka mu kwe bonga bidia. Yandi watâ: “Mutekolo’ani zebi ti Yehova tusambulu kawâka mpe mvutu kahaninaka to, mu bungu ti wahenini mvutu mu tusambulu twani.”

 Ku Congo (Kinshasa), mukento wumosi bâka penpene na kanda dimosi die Mbangi za Yehova. Bu kamona kanda dio diabaka bidia biatûka kwe mpangi zawu, watâ: “Ha manima ma coronavirus mbo tubâ Mbangi za Yehova mu bungu ti mpangi zawu lwaka zababelokele mu ntangu yi ya mpasi.” Bakala diandi diamuyula: “Ngano mbo kwizi bâ Mbangi ya Yehova mu bungu dia nkutu yimosi ya loso?” Yandi wavutula: “Kâni, kâ nkutu yo ya loso tidimbu tiena tia luzolo lwa matieleka.”

 Tala ti Mbangi za Yehova zayizi lenda mu kulu hana lubakusu kwe mpangi zawu zabêle na nsatu lubakusu mu ntangu yi ya coronavirus ni mu bungu dia makabu meno. Matondo mu makabu ma lwaheni bu lwasariri mpila zi bazonzelaka mu donate.pr418.com.