Lukutakanu lwa lunene lwa 2020 lwa nzitukulu lwabâ—mbala ya ntete yabâ ya sa lo enregistrer mpe ya yôkesa lo mu Internet mu bungu dia mpangi za mu nza yayansoni! Kâ, ku Malawi na ku Mozambique, mpangi zazîngi zalanda lukutakanu lwa lembo Internet. Ngano bwe wulendi bêla?

 Komite ya bantwarisi na komite ya ndongosolo zahana nzila ngatu ku Malawi na ku Mozambique, programe yayôkela mu tele na mu radio. Mu bungu dia nti basila bo? Malawi yimosi yena ya nsi ze na Internet yiyôkele ntalu mu nza. Buna Mbangi za Yehova ka zazingi’â ko ze na lenda dia bâ na Intenet. William Chumbi, mpangi ya komite ya filiale ya ku Malawi, têle: “Mpila zi tulendi hanina bidia bia timpeve kwe mpangi zeto ni radio na tele kwa.” Luka Sibeko mpe, we mu komite ya filiale ya ku Malawi, têle: “Mpangi zeto zazîngi ka zaketi’â lenda ko mu landa lukutakanu lwa lunene tala ti ka lwayôka mu radio na mu têle ko.” Ku Mozambique mpe, mpangi ndambu kwa zaketi bâ na lenda dia sumba telefone za fwanana, mpe Internet nkatika ntalu yena.

 Mu bungu dia coronavirus, tele zakaka na radio zabatika mu yôkesaka programe zeto za lumingi. a Mpangi zeto zalomba ntangu yakaka mu yôkesa lukutakanu lwa bilumbu bitatu.

 Ku Malawi, mpangi zeto zabwabana na nkwamusu. Tele na radio heure yimosi kwa zihanaka, mu bungu ti ka bazololo’â ko ti bantu bafwatikaka bu balandaka programe zawu. Kâ mpangi zeto zasongela ti tisalu tieto ndandu tinataka kwe bantu babansoni. Mu ntangu ya confinement mpe, nsangu za mbote za Bibila tuhanaka kwe bantu mu ba tindisa, mpe bawu wubakisaka mu bâ bantu ba mbote na mu bâ na luzingu lwa kanda lwa mbote. Musamu wo wabawisa; buna talenda mu baka ntangu yakaka mu yôkesa programe’eto.

 Ku Malawi, lukutakanu lwa bilumbu bitatu mu tele na mu radio lwayôkela, mpe milio za bantu balanda lo mu nsi yayansoni. Ku Mozambique, lukutakanu lwa lunene mu tele lwayôkela na radio za 85.

 Mu nsi zo za zole, bayizi dukisa lutangu lwa mbongo lwa 28 227 dollars (kampe 16 356 000 FCFA) b mu yôkesa programe mu tele, na lutangu lwa 20 000 dollars (kampe 11 589 000 FCFA) mu yôkesa yo mu radio. Ntalu ya yôkesela programe ku mahata yeri ya 15 dollars (kampe 8 600 FCFA), mboko mu radio ya hata diadiansoni 2 777 dollars (kampe 1 609 000 FCFA).

 Mpangi zeto zatomo sarila ngolo mu tomo sarila mbongo za makabu. Mu tifwani ku Malawi, balendele mu lomba babakokesela ntalu ya 30%, mpe yababakisi mu sa économie ya 1 711 dollars (kampe 990 000 FCFA). Ku Mozambique, radio zakaka zatamburi mu kokesa ntalu zawu mu bungu ti Mbangi za Yehova busungu zisarilaka, mpe kaziyôkesaka ntangu ko mu futa.

 Mpangi zeto zatomono bâ mu nsayi bu zalendi lukutakanu lwa lunene mu tele na mu radio. Patrick, mukuluntu wumosi ku Malawi, têle: “Timvuka titwarisaka tuta tomo tonda mu mio mi tita yirika mu bungu dia beto mu ntangu yi ya coronavirus.” Isaac, we ku Malawi mpe, têle: “Radio kwa ye neto, buna matondo tuta vutula ku organizasio ya Yehova bu yasariri radio ngatu talanda lukutakanu. Mu bungu dia musamu wo, kanda diani diadiansoni dialendi lukutakanu lwalwansoni. Kwe beto, nkatika tidimbu tiabêle tia luzolo lwa Yehova mu bungu dia kanda diandi.”

 Lukutakanu lwa lunene lwa 2020 ni lwa ntete lwa bêle tisamuni timosi tia ku Mozambique. Yandi têle: “Misamu miamiansoni mi bakubikiri mu landa lukutakanu lwa lunene miakumbamburi ti Yehova ni Nzambi ya Nkwa Ngolo Zazansoni. Coronavirus ka yamukabakase’â ko mu tu hana bidia bia timpeve, mpe wayizi bia kungana mu nzo’ani. Lukwikulu lwe nani ti di ni dibundu dia matieleka.”

 Mukuluntu wumosi wu batâka nkumbu Wyson wutêle: “Nzololo navutula matondo kwe ngamba ya kwikama, yita tu kipa mu ntangu yi ya coronavirus. Tizunga ti tubâka, timosi tiena tiyôkele mu bumputu mu nza, mpe misamu mi bakubikiri mu landa lukutakanu lwa lunene mu tele na mu radio miatubakisi, beto tuta bwabana na misamu mia mbaya, mu tomo landa programe.”

 Mu bungu dia lukutakanu lwa lunene lwa 2021, komite ya bantwarisi na komite ya ndongosolo, nzengolo ni yo kwa mpe zavutulu bonga: lukutakanu lwa lunene mbo luyôka mu tele na mu radio mu mbuka zakaka. Bwe babakilaka mbongo mu kubika tukutakanu twa tunene? Mu makabu ma lusaka mu bungu dia tisalu tia mu nza, ma luvulu silaka mu donate.pr418.com. Matondo mamingi mu bungu dia lukabu lweno.