Ha kati dia milio za bantu ba ku Amérique latine, milio zazingi za bantu bê na zu diawu mpe bê na bikulu biawu. Babingi mu bawu bê mpangi zeto mu timinu, mpe tikulu tiawu tia batomo zoloko. Mu bakisa bantu mu zaba matielaka ma Bibila, mikanda babangulaka mpe bakabaka mu mazu yôka 130 ma bazonzaka ku Amérique latine. a Ntono miamiansoni, mpangi zeto zakaka nkwamusu babwabanaka na zo mu bungu ti Yehova basolaka mu sarila mpe bikulu bilembo delakanaka na Bibila bakalaka, bie nsangu mu makanda mawu. Bwe basarilaka makabu maku mu ba bakisa?

 Ku Mexique, mpangi zeto za kanda dia Huichol, ku miongo mia ku Jalisco, bayizi kala, mu buzitu, mu sa nsalulu za mabundu zeri vwezaka ngindu’awu. b Kâ bantu bayizi babakila nkesi. Mu tilumbu tia 4 décembre 2017, mukangu wa bantu wakotela Mbangi za Yehova na bantu bakaka babâ na bawu. Bawu babakuma, mpe bimvwama biawu na nzo zawu bayizi bia mwangasa, mpe babakanikina lufwa bu baketi kâla.

 Mbangi za Yehova za mimvuka miakaka zayizi lungisa nsatu za mfunu za mpangi zawu. Kâ, ngano nti biafwanana mu sa ngatu bakâla ku nzo zawu? Mpangi yimosi yi batâka nkumbu Augustìn yitêle: “Ka tabâ na mbongo za fwanana ko mu bâ na nzonzi (avocat), mpe ka tazaba ko nani taketi sikirila mu baka malongi matariri mfundusu.”

 Mu bungu ti timpwanza tia nsambululu tia mpangi zeto tiakota ku ntontolo, filiale ya Amérique centrale yayizi kubika misamu mu ntinu. Ntete, balomba kwe mfumu za luyalu mu tomo taluzula musamu. Ha manima, bawu babaka nswa wa Timvuka titwarisaka (komite ya bantwarisi) mu sala tintwari na tisalu titariri misiku tia Biro ya Yinene mu lomba mfundusu mu nkumbu ya mpangi zeto za kanda dia Huichol. Musamu wango banata wo ku Nzo ya mfundusu ya yinene, tribinale yiyôkele bunene ku Mexique.

 Ekipe yimosi ya mu nza ya nzonzi yakubika mabanza, ma beri bangurilaka ti mu bungu ti bafweti zitisaka Bisi-hata, makanda mawu beni mafweti zitisaka, mpe mafweti kengerelaka timpwanza tia muna muntu. Nswa mia bantu ka miena na ndilu ko.

 Mu tilumbu tia 8 juillet 2020, Nzo ya mfundusu ya yinene yazenga musamu mpe yahana mpemba kwe Mbangi za Yehova. Nzo ya mfundusu ya yinene yalomba ti bô babansoni babakuma ku hata diawu babahana nzila ya kâla mu makanda mawu. Agustín, wu batokolo zonzela, wavutula matondo mu bungu dia yandi beni na bantu bakaka: “Matondo mamingi tuta vutula mpe nsayi yayingi ye neto mu mio miyirikiri mpangi zeto mu bungu dia beto! Tala ti ka batubakisi’â ko, ka taketi’â sa kani tima ko.”

 Mpangi zeto za ku San Juan, ku Ilumán, hata dimosi die ku mudimba (vallée) wa Otavalo, ku bâka bantu babingi ba kanda dio, babwabana mpe na nkwamusu za mpila yo. Mu 2014, bu bamana ba hana nswa mifwanane, bawu babatika ntungulu ya Nzo ya Nsambululu. Kâ mukangu wa bantu yôka 100 babâ mu lutumu lwa mupelo wumosi, bayizi tuma Mbangi za Yehova mu ngolo ngatu babika ntungulu. Bantu ba makanda mawu mpe babalomba mu bika mu kutakanaka mu bungu dia nsambululu.

 Bisalu bia mfundusu bia filiale ya Équateur na Biro ya Yinene basala ha timosi mu nwanina mpangi zeto mu bungu dia mvwezolo ya timpwanza tiawu tia nsambululu. Mpangi zeto zanata musamu ku tribinale. Buna bantu babika mu kwamisa mpangi zeto mpe babahana nswa wa vutu kutakanaka na wa manisa ntungulu ya Nzo ya Nsambululu. Kâ mu kengerela nswa mia mpangi zeto mu bilumbu bikwiza, nzonzi zeto zalomba kwe tribinale zakaka ziyôkele bunene mu bonga nzengolo mu musamu wo wa mfunu: Bantu ba ku mahata ngano bafweti zitisa nswa mia bantu mia mu nza mitariri nswa mia muntu?

 Mu tilumbu tia 16 juillet 2020, Tribinale ya Misiku ya ku Équateur, tribinale yiyôkele bunene mu nsi yo, yataluzula musamu. Mpangi ze nzonzi za mfundusu ku Équateur zamonekesa timvuka. Mu bungu dia misiku mia timbevo tia coronavirus, bayizi zonza tûka nsi zazingi mu vidéoconférence. Yo ni mbala ya ntete ku tribinale yi bahana nswa kwe ekipe ya nzonzi za mfundusu yimonekesaka Mbangi za Yehova za mu nza mu zonzela mabanza mawu mu mpila yo. c Ekipe yazonzela nzengolo za toko bonga tribinale za mu nza mu bungu dia musamu wo, mu singasa ti muntu we mu kanda dia bantu ba mahata ka wufweti’â wakala nswa mia yandi beni ko.

 Mpangi zeto za ku mudimba wa Otavalo timina die nawu mu wâ nzengolo ya Tribinale ya Misiku. Lubakusu lu babakiri lwatomo ba simba mutima. César, we mukuluntu mu timvuka tia Quechua ku Ilumán, têle: “Yehova kwa, mu nzila ya organizasio’andi, yirikaka misamu mia minene mu bungu dia bantu ba fioti.”

 Nzonzi zazansoni za musamu wo Mbangi za Yehova zena, mpe nsayi ye nawu ya hana lubakusu lwawu lwa mpamba. Kâ, kubika mfundusu yo na mabanza mamansoni mu nwanina musamu wo ku tribinale, ntangu yayingi kwalomba na mbongo. Mu bungu dia mfundusu ya ku Mexique, nzonzi zeto na mpangi zakaka bayôkese heures yôka 380 mu kubama, mpe kampe heures yôka 240 mu bangula mikanda mu ntêlo za ku Mexique. Kampe nzonzi 40 za nsi za swaswana zayôkesa heures za nkatika zazingi mu kubika mfundusu yo ya ku Équateur. Bwe babakilaka mbongo zi basarilaka mu nwanina mpangi zeto? Mu makabu ma lusaka ma mpila na mpila mu site ya donate.pr418.com. Matondo mu bungu dia lukabu lweno.