1-3. (a) Bantu babingi bwe bamwinaka tisalu tiawu? (b) Ntia biyuvu tutaluzula mu timoko ti?

KWAKWANSONI mu nza, bantu tisalu tia ngolo basalaka mu lungisa nsatu zawu na za kanda diawu. Bantu babingi balembo zoloko tisalu tiawu, bakaka mpe lwaka lubâka nawu bu bakwendaka lumbu basiri lumbu ku tisalu. Tala ti nge mpe ni bo monaka ngano nti lendi sa mu tomo mona tisalu tiaku tia mbote? Ngano nti bilendi ku bakisa mu yangalala mu tisalu tiaku?

² Yehova tu telele ti: “Bantu babansoni badia, banwa, mpe bamona nsayi mu tisalu tiawu tia ngolo. Kabu dia Nzambi diena.” (Ekleziaste 3:13) Yehova watusala na nsatu ya sala. Yandi zololo ti bisalu bieto biatunatinaka nsayi.​—Tanga Ekleziaste 2:24; 5:18.

³ Ngano nti bilendi tu bakisa mu yangalala mu tisalu tieto? Ntia mpila tisalu Bakristo bafweti kala? Bwe tulendi bela na mabanza ma delakana mu tisalu tieto na nsambululu’eto kwe Yehova? Mpe, ntia tisalu tiyôkele mfunu?

4, 5. Bwe Yehova kamwinaka tisalu?

⁴ Yehova Yandi beni zololo mu sala. Mbo tutangaka mu Mbatukulu 1:1: “Ha mbatukulu Nzambi wasala  zulu na mutoto.” Bu kasala mutoto na bima biabiansoni bie ha mutoto, ha manima Nzambi watâ ti biabiansoni bi kasala bia “nkatika bia mbote” bieri. (Mbatukulu 1:31) Mvangi’eto nsayi yeri nandi mu bima bi kasala.​—1 Timote 1:11.

⁵ Yehova kani kabwe kabikiri’â ko mu sala. Yezu watâ ti: ‘Tata’ani, [na tii] bwawu bu, mu sala kena.’ (Za 5:17) Yehova bima bia nzitukulu kasaka. Ka tuzebi’â bima biabiansoni bi kasaka ko, kâ biakaka bia tuzebi. Mu tifwani, Yehova mbo kasolaka bantu babâ mu Timfumu mu yâla na Mwana’andi, Yezu Kristo. (2 Bisi-Korente 5:17) Mbo kakipaka bantu mpe mbo kabatwarisaka. Mu nzila ya tisalu tia samuna mu nza ya mukaka milio za bantu balongokaka mu mu zaba, mpe vuvu tie nawu mu zinga ntangu zazansoni ku paradi ha mutoto.​—Za 6:44; Bisi-Rome 6:23.

6, 7. Ngano Yezu ntia mpila tisari tiena?

⁶ Ntiana kwa Tata’andi, Yezu zololo mu sala. Ntete kizi ha mutoto, Yezu wabâ “tisari tia mbote” tia Nzambi: wayizi sala tintwari na Tata’andi bu keri salaka bima biabiansoni ku zulu na ha mutoto. (Bingana 8:22-31; Bisi-Kolose 1:15-17) Mu ntangu yi keri ha mutoto, Yezu watatamana mu sala tisalu tia ngolo. Mu buntwenia bwandi Yezu walongoka tisalu tia mabaya. Mbo keri salaka chaise, meza na nzo. Yezu wayizi tomo bâ tisari tia mbote mu tisalu tiandi, ntiangu bantu bayizi mu tâ nkumbu ya “tisari tia mabaya.”​—Marke 6:3.

⁷ Kâ, tisalu tiatomo yôka mfunu kwe Yezu bu keri ha mutoto ni tia samuna nsangu za mbote na tia longesa kwe bantu Yehova ni nani. Mvula tatu na ndambu zeri nandi mu lungisa tisalu tiandi tia samuna, mpe mbo keri salaka salu tia ngolo: mu pari na pari keri batikaka mpe mu nkokela keri manisaka.  (Like 21:37, 38; Za 3:2) Yezu wadiata nkama za kilomètre mu nzila za fuluka mu poussière mu kwe zonzela nsangu za mbote kwe bantu babingi.​—Like 8:1.

8, 9. Mu bungu dia nti Yezu keri zoloko tisalu tiandi?

⁸ Kwe Yezu tisalu tia Nzambi tieri ntiana tifu tia dia. Tisalu tio lenda na ngolo tieri mu hanaka. Bilumbu biakaka bu keri salaka tisalu tia ngolo mu bungu dia Yehova, Yezu keri’â bâka na ntangu ya dia ko. (Za 4:31-38) Ntangu zazansoni mbo keri bakisaka bantu mu longoka mu zaba Tata’andi. Ntiangu katâ kwe Yehova ti: “Nge nakembele ha mutoto, tisalu ti wakungeni mu sala, tia namanisi.”​—Za 17:4, NW.

⁹ Wa matieleka,Yehova na Yezu tisalu tia ngolo basalaka, mpe nsayi bamwinaka tio. Tuzololo tabâ “bilandi bia tifwani tia Nzambi,” mpe tuzololo ‘tatomo landaka ntambi’ za Yezu. (Bisi-Efeze 5:1, NW; 1 Piere 2:21) Ntiangu tuyêlaka mu sala tisalu tia ngolo mpe tusaka mio miamiansoni mi tulenda mu sa.

10, 11. Ngano nti bilendi tu bakisa mu bâ na mabanza ma mbote mu tisalu tieto?

¹⁰ Beto twe bisambiri bia Yehova, mbo tusalaka tisalu tia ngolo mu lungisa nsatu zeto na za bantu ba kanda dieto. Tuzololo tamonaka nsayi mu tisalu tieto, kâ ntangu zakaka musamu wa mpasi wena. Ngano nti tulendi sa tala ti tisalu tieto ka titutâka nsayi ko?

¹¹ Bâ na mabanza ma mbote. Kampe ka tulendi’â tasoba tisalu ko peleko tasala kwa ntangu fioti, kâ tulendi soba mpila yi tumwinaka misamu. Bu tubakula misamu mi tu lombaka Yehova, misamu mio milendi tu bakisa. Mu tifwani: Yehova mbo kalombaka kwe mfumu-kanda,  kasa mio miamiansoni mi kalenda mu lungisa nsatu za kanda diandi. Diangana, Bibila ditele ti muntu wulembo lungisaka nsatu za kanda diandi “yôkele muntu wulembolo na timinu mu bubi.” (1 Timote 5:8, NW) Tala ti nge mfumu-kanda yena mbo salaka tisalu tia ngolo ngatu kanda diaku dia baka bima bifwanakane. Ni bu zolo, ni bu lembo zolo tisalu tiaku, zebi ti bu lungisaka nsatu za kanda diaku Yehova tâka nsayi.

12. Ngano ntia ndandu ze kô tala ti, tisari tia mbote wena mpe tie na bunsungu?

¹² Bâ tisari tia mbote mpe bâ na bunsungu. Musamu wu wulendi ku bakisa mu mona nsayi mu tisalu tiaku. (Bingana 12:24; 22:29) Ntete, mfumu’aku ya ku tisalu yilendi ku sila mutima. Bamfumu bazololo bisari bie na bunsugu mu bungu ti ka bilabaka mbongo, bisalulu na ntangu ko. (Bisi-Efeze 4:28) Musamu wuyôkele mfunu ni mu zaba ti, tala ti nge tisari tia mbote tiena mpe tie na bunsungu, Yehova wa kamonaka. Lendi bâ “na ngindu ya mbote,” mu bungu ti, zebi ti nsayi tâka kwe Nzambi yi zololo.​—Bahebre 13:18; Bisi-Kolose 3:22-24.

13. Ntia mbote zakaka ze kô tala ti bunsungu bwe neto ku tisalu?

¹³ Zaba ti ndiatulu’aku ku tisalu yilendi kembesa Yehova. Wu ni musamu wakaka wulendi sa ti tamona nsayi mu tisalu tieto. (Tite 2:9, 10) Ndiatulu’aku ya mbote yilendi hana nsatu ya longoka Bibila kwe bampwana’aku.​—Tanga Bingana 27:11; 1 Piere 2:12.

14-16. Ngano ntia misamu tufweti banzaka mu ntangu yi tusolaka tisalu?

¹⁴ Bibila ka dihanaka lutangu lwa bisalu ko Mukristo bi kalendi tambula peleko bi kalendi kala. Kâ, Bibila mbo dihanaka mitieno milendi tu bakisa mu bonga  nzengolo za mbote mu ntangu yi tufweti sola tisalu. (Bingana 2:6) Tabongakeno ntangu ya dimbitilaka mitieno mio bu tutiyulaka biyuvu bita landa.

¹⁵ Ngano tisalu tio mbo ti kuntuma mu sa tima tia mbi ha meso ma Yehova? Talongokele nsalulu zi yinaka Yehova ntiana bwivi na bungungu. (Ndukulu 20:4; Bisalu 15:29; Bisi-Efeze 4:28; Nzabukusu 21:8) Mbo tusaka keba mu lembo tambulaka tisalu tilembo kwelanaka na mitieno mia kubika Yehova.​—Tanga 1 Za 5:3.

 ¹⁶ Ngano tisalu tio mbo tisingasaka peleko mbo titumaka nsalulu zi yiminaka Yehova? Mu tifwani bakutelele wasala tisalu tia bwanaka bantu ku lupitalu lu bakaturilaka mazimi. Ka wena musamu wa mbi ko mu bwanaka bantu. Kâ, mabanza ma Yehova mu musamu wutariri katula kwa zimi ma zebi. Ntiangu, ni bu sa ti ka nge’â ko katulaka bantu mazimi, ngano ha meso ma Yehova kufundusu’â ko?​—Ndukulu 21:22-24.

17. Ngano nti bilendi tu bakisa mu bonga nzengolo zitâka Nzambi nsayi?

¹⁷ Tamana bika mitieno mia Nzambi miatutwarisa, ‘lenda dieto dia swasikisa mbo disala mu zaba mbote na mbi.’ (Bahebre 5:14, NW) Tiyulaka: “Tala ti ntamburi tisalu tio, ngano nsololo’ani mbo yisobesa Bakristo bakaka mu mpila ya mbi? Ngano tisalu tio mbo tikuntuma mu bâ mala na muntu wu takwelana, na bala bani, peleko mu kwenda ku nsi yakaka? Ngano ntia misendo tinata kwe bawu?”

18. Mu bungu dia nti ntangu zakaka wena musamu wa mpasi mu tûla nsambululu’eto ha tibuka tia ntete?

¹⁸ Mu bungu ti mu “ntangu za mpasi mu vivirila” twena, ntangu zakaka wulendi bâ musamu wa mpasi mu tûla nsambululu’eto kwe Yehova ha tibuka tia ntete. (2 Timote 3:1, NW) Mu baka tisalu na mu lunda tio wulendi bâ musamu wa mpasi. Tufweti kipaka kanda dieto, kâ tuzebi ti nsambululu’eto yifweti bâka ha tibuka tia ntete. Ka tulendi’â tabika bima bia tinsuni ko biabâ bima biyôkele mfunu mu luzingu lweto. (1 Timote 6:9, 10) Buna, bwe tutomo ‘zabila bima biyôkele mfunu,’ na mu tatamana mu lungisa nsatu za kanda dieto?​—Bisi-Filipe 1:10, NW.

19. Ngano bwe tifu tieto tia silaka Yehova mutima tilendi tu bakisila mu bâ na mabanza ma delakana mu tisalu?

 ¹⁹ Sila Yehova mutima’aku wawansoni. (Tanga Bingana 3:5, 6.) Tuzebi ti, Nzambi tomono zaba nti bie neto nsatu, mpe beto katomo kipaka. (Mikunga 37:25; 1 Piere 5:7) Zu diandi ditutelele ti: ‘Ndiatulu’eno ka yibandi mu luzolo lwa mbongo. Yangalaleno kwa bio bie neno, bungu [Nzambi] watâ ti: “Kani kabwe, ka nikubika ko, kani kabwe ka nikuyambirika ko.”’ (Bahebre 13:5) Yehova ka zololo’â ko ti, ntangu zazansoni tabâka na lwaka mpe tatiyulaka bwe tusa mu lungisa nsatu za kanda dieto. Mbala zazingi, Nzambi wasongela ti lenda die nandi dia lungisa nsatu za bisambiri biandi. (Matie 6:25-32) Tisalu ni tisalu ti tusala, ntangu zazansoni tufweti longokaka Zu dia Nzambi, tufweti samunaka nsangu za mbote mpe tufweti kwendaka ku tukutakanu tweto.​—Matie 24:14; Bahebre 10:24, 25.

20. Bwe tulendi tatamana mu nata luzingu lulembolo nkaka?

²⁰ Kwika meso maku mu tima timosi. (Tanga Matie 6:22, 23.) Wuzololo tâ ti, tatamana mu nata luzingu lulembolo nkaka, ngatu watûla mabanza maku mu tisalu tiaku tia Yehova. Tuzebi ti, buzoba bwena bu tubika mbongo, luzingu lwa mbote peleko bima bia nsangu bia ntangu yi biabâ bima bitomono yôka mfunu yôka tindiku tieto na Nzambi. Ngano nti bitubakisa mu tûla bima bitomono yôka mfunu ha tibuka tia ntete? Tufweti sa mio miamiansoni mi tulenda mu lembo bâ na mfuka. Tala ti mfuka ze naku, batika mu futa zo peleko futa zo zazansoni. Tala ti ka tusiri’â keba ko, bima bia tinsuni mbo bitudia ntangu’eto, mpe tulendi kondo ntangu ya sambila, ya longoka na ya kwe samuna. Ka tuzololo’â ko tahana nzila kwe bima bia  tinsuni biakotesa nkaka mu luzingu lweto. Kâ, tuzololo tayangalalaka mu bima bia nguri ntiana, ‘bidia na binkuti.’ (1 Timote 6:8) Bubote bwena ntangu zazansoni mu bongaka ntangu ya taluzula musamu ni musamu we neto, mu zaba tala ti tulendi yôkesa ntangu yayingi mu sarila Yehova.

21. Mu bungu dia nti tufweti tomo sola bima bi tutûlaka ha tibuka tia ntete?

²¹ Tomo solaka bima bi tûlaka ha tibuka tia ntete. Tufweti sarilaka ntangu’eto, ngolo zeto na bima  bieto bia tinsuni na ndwenga. Tala ti ka tusiri’â keba ko, bima bilembolo tomo bâ mfunu ntiana lukolo peleko mbongo, mbo bitudia ntangu yayingi. Yezu watâ ti: “Tatamaneno mu toko dinga Timfumu.” (Matie 6:33, NW) Nsololo zeto, bifu bieto, na makani meto na bisalu bieto bia lumbu na lumbu, mbo bisongelaka nti bitomono yôka mfunu kwe beto.

22, 23. (a) Ngano ntia tisalu tiyôkele mfunu kwe Mukristo? (b) Ngano nti bitubakisa mu zolo salu tieto?

²² Tisalu tieto tiyôkele mfunu ni mu sarilaka Yehova na mu samunaka nsangu za mbote. (Matie 24:14; 28:19, 20) Ntiana Yezu, tuzololo tasaka miamiansoni mi tulenda mu bungu dia salu tia samuna. Bantu bakaka mbo basobaka mbuka ya bela mu kwe hana lubakusu ku mbuka yita dingana bisamuni biabingi. Bakaka mbo balongokaka zu dia nzenza mu samuna kwe bantu bazonzaka zu diango. Moka na bantu bô basarilaka ngolo za mpila yo, mpe bayulaka biyuvu. Mbo ba kutêla ti, luzingu lwa nsayi mpe lwa mbote lwe nawu yôka lwatoko bâ nawu.​—Tanga Bingana 10:22.

²³ Lumbu ti, babingi ha kati dieto bayôkesaka ntangu yayingi ku tisalu peleko babâka na bisalu biabingi, ngatu balungisa kwa nsatu za nguri za makanda mawu. Musamu wô Yehova wa kazebi, mio miamiansoni mi tusaka mu kipaka kanda dieto, Yehova mia kazoloko. Tatatamana mu landa tifwani tia Yehova na tia Yezu mu bâ bisari bia mbote, mu tisalu ni tisalu ti tusala. Mpe tabambukaka ti, tisalu tieto tiyôkele mfunu ni sarila Yehova mpe na mu samunaka nsangu za mbote za Timfumu tia Nzambi. Tio ni tisalu titutâ nkatika nsayi.