1, 2. Ngano nti tufweti sa mu tatamana mu bâ mu luzolo lwa Nzambi?

BETO bansoni tuzololo tabâka na tikolela tia mbote, mpe na ngolo. Ntiangu tudingaka mu dia bidia bia mbote, mu saka sport ntangu zazansoni mpe tutikipaka. Ngolo zazingi zidinganaka mu sa mio miamiansoni, kâ mu bungu ti mbote tubakilaka mio, ka tubikaka ko. Kâ, tufweti bâ mpe na tikolela tia mbote, mpe na ngolo mu musamu wakaka.

² Talongokele mu zaba Yehova, mpe mbatukulu ya mbote yena. Kâ bwawu bu, tufweti tatamana mu kobesa tindiku tieto na Yandi. Yude watindisa Bakristo mu “tatamana mu bâ mu luzolo lwa Nzambi” mpe wababangurila ka bwe basa. Wabatela: “Titungeno ha zulu timinu tieno tia nkatika tia santu.” (Yude 20, 21, NW) Ngano bwe tulendi sa mu bâ na timinu tia ngolo?

3-5. (a) Ngano Satana ntia mabanza kazololo wabâ na mo mu ntumunu za Yehova? (b) Ngano ntia mabanza me naku mu bungu dia misiku na mitieno mia Yehova?

³ Musamu wa mfunu wena tala ti lukwikulu lwe naku ti, ka kwena tima ko tiyôkele kwe nge tala ti ka tumama  kwe Yehova ko. Satana zololo ti wabanza ti ntumunu za hana Yehova nkatika mpasi zena mu zitisa. Zololo mpe wabanza ti, mbo bâ mu nkatika nsayi tala ti nge beni bongele nzengolo ya misamu mia mbote na mia mbi. Tuka ku nsaba ya Edene, misamu ni mio kayêlaka mu nata bantu bakwikila. (Mbatukulu 3:1-6) Lumbu ti mpe, Satana tatamane mu sarila mu mpila yo.

⁴ Ngano Satana mpemba ye nandi? Ngano ntumunu za Yehova boloko diena? Kâni. Tabonga tifwani: Ku mpaka yimosi ya yinene takwe zebe. Kâ bu tasusumuka, mweni tikaku tia tila tita ku kabakasa mu kwenda ku lweka lwakaka lwa mpaka. Kampe mbo tiyula: “Mu bungu dia nti bata kunkabakasa mu kwenda ku mbuka yo?” Kâ mu ntangu yo, wiri ngo-mbulu yita bima ku mbuka yo yakaka ya tikaku. Ngano mbo tatamana mu bâ na mabanza mo? Nsayi yayingi ye naku, tikaku tio bu tita ku kengerela ngatu walembo bâ bidia bia ngo-mbulu! Ntumunu za Yehova zena ntiana tikaku tio, mpe Diabulu ntiana ngo-mbulu yo. Zu dia Nzambi ditulwengese: “Bêno na mabanza meno ma mbote, bêno na meso ma tia! Mutantu’eno Diabulu zieta kata kwe ziete ntiana ngo-mbulu yita dinga yadia muntu.”​—1 Piere 5:8, NW.

⁵ Yehova zololo tabâ na luzingu luyôkele bubote. Ka zololo’â ko ti Satana katuhuna. Ntiangu katuhana misiku na mitieno ngatu katukengerela mpe katutâ nsayi. (Bisi-Efeze 6:11) Zaki watsoneka: “Wô vwikaka meso mandi mu musiku wa lunga, wa timpwanza, mpe saka fuki . . ., weka muntu wusarilaka mio. Mpe mbo kabâka na nsayi mu mio mi kayirikaka.”​—Zaki 1:25, NW.

6. Ngano nti bisa ti tabâ na lukwikulu ti bima biabiansoni bi tu lombaka Yehova ni bio biyôkele bubote mu bungu dia beto?

⁶ Bu tuyirikaka mio mi tu lombaka Yehova, luzingu lweto mbo lukwizi tomaka, mpe tindiku tieto na  Yandi mbo tikwizi bâka ngolo. Mu tifwani, bu tuvulu mu sambilaka, ntiana bu katulombaka, mbo tukwizi bakaka ndandu. (Matie 6:5-8; 1 Bisi-Tesalonike 5:17) Bu tutumamanaka ntumunu’andi ya kutakanaka mu mu kunda mpe mu titindisaka beto na beto, nsayi yayingi yi bâka neto. Mpe bu tusalaka salu tia samuna na tia longesa buna bufwanane, nsayi mpe yi bâka neto. (Matie 28:19, 20; Bisi-Ngalate 6:2; Bahebre 10:24, 25) Tamana bongaka ntangu ya banzaka bwe bima bio bitubakisilaka mu bâ na timinu tia ngolo, mbo tubâ na lukwikulu ti, bima biabiansoni bi tu lombaka Yehova ni bio biyôkele bubote mu bungu dia beto.

7, 8. Nti bitubakisa mu lembo bâ na bunkuta bwa misamu mia mpasi milendi tu turila?

⁷ Tulendi bâ na bunkuta bwa bwabana na misamu mikotesa timinu tieto mu ntontolo, mpe mibâ nguria mpasi  kwe beto. Tala ti mabanza ni mo me naku, bambuka mio mia tâ Yehova: “Meno ni Yehova, Nzambi’aku, yikulongesaka mu bungu dia mbote’aku, Wô ku twarisaka mu nzila yi fweti landa. Tala ti ntumunu zani za wayizi sila keba! Konga, timinu tiaku mbo tiaketi kwizi bâ ntiana nzari, mpe buderede bwaku ntiana matuma (vagues) ma mubu.”​—Izaya 48:17, 18.

⁸ Tamana tumamana ntumunu za Yehova, tidzunu tieto mbo tibâ ntiana nzari yilembo yumaka, mpe buderede bweto (ndiatulu’eto ya yibote) mbo bubâ ntiana matuma ma mubu malandasanaka mu kwizi mwangana mu malembe ha kumu. Mu musamu ni musamu wututurila, tulendi bâ ba kwikama kwe Yehova. Bibila dikanisini ti: “Losa dema diaku kwe Yehova, mpe mbo kakuyika moko. Kani kabwe ka bika ko ti muntu wa sungama wabwa.”​—Mikunga 55:22.

9, 10. Ngano bâ muntu wa yela bwe wuta zolo tâ?

⁹ Tala ti kobese tindiku tiaku na Yehova, mbo ‘sa ngolo mu bâ muntu wa yela.’ (Bahebre 6:1, NW) Kâ bâ wa yela bwe wuta zolo tâ?

¹⁰ Ka tukwizi’â bâka kwa Bakristo ba yela ko bu tukwizi nunaka. Mu kwizi bâ ba yela, tufweti sa ti Yehova kabâ ndiku’eto ya mutima mpe tamwinaka misamu ntiana bu kamwinaka mio Yandi. (Za 4:23) Paulo watsoneka: ‘Bô be mu lutumu lwa nitu, bima bi babindamanaka ni bia nitu; konga, bô be mu lutumu lwa mpeve, ni bia mpeve babindamanaka.’ (Bisi-Rome 8:5) Nsaka na bimvwama ka bibongaka tibuka tia tinene ko mu luzingu lwa muntu wa yela. Tima tibongaka tibuka tia ntete mu luzingu lwandi, ni tisalu tiandi mu bungu dia Yehova, mpe mbo kabongaka nzengolo za ndwenga. (Bingana 27:11;  tanga Zaki 1:2, 3.) Ka bikaka tima peleko muntu ko wamutuma mu sa tima tia mbi. Muntu wa yela misamu mia mbote mia kazebi, mpe zololo kasarilaka mio.

11, 12. (a) Ngano Paulo bwe katâ mu musamu wutariri “lenda dia swasikisa” dia Mukristo? (b) Bangula ka mu bungu dia nti muntu wukwizi bâ Mukristo wa yela bamufwanakase na muntu wusaka sport.

¹¹ Ngolo zazingi zifwanakane mu kwizi bâ muntu wa yela. Paulo watsoneka: “Bidia bia dema bia bantu ba yela biena, bia bô be na lenda dia swasikisa di basarilaka mu zaba mbote na mbi.” (Bahebre 5:14, NW) Ntelo ya “sarila” mbo yitunata tabanza mpila yi kubamanaka muntu wusaka sport.

¹² Bu tumonaka lenda di bâka na muntu wusaka sport, mbo tuzabaka ti ntangu yamufwanakana mu toko yêlaka bima bi kalendaka mu sa. Ka butuka na lenda dio ko. Mu ntangu yi butukaka mwana, ka zabaka mu tomo sarila moko mandi na malu mandi ko. Kâ ntangu bu yikwe yôke, mwana mbo wukwizi longokaka mu simba bima mpe mu kwe yende. Bu kakwe yukusu nitu, lendi kwizi bâ muntu wutomono zaba mu sa sport. Mpila mosi mpe, mu kwizi bâ Mukristo wa yela, ntangu yidinganaka mpe tufweti yuku.

13. Ngano nti bitubakisa mu longoka mu banzaka ntiana Yehova?

¹³ Mu buku di, tayizi taluzulula bwe tulendi banzila ntiana Yehova mpe bwe tumwina misamu ntiana Yandi. Tayizi bakula mpe nsasa ya mitieno mia kubika Yehova, mpe tayizi longoka mu zolo mio. Bu tubongaka nzengolo, mbo tutiyulaka: “Ntia misiku peleko ntia mitieno mia Bibila midelakane na musamu wu? Ngano bwe ndendi mia sarila? Ngano Yehova nti kazololo meno nasa?”​—Tanga Bingana 3:5, 6; Zaki 1:5.

14. Ngano nti tufweti sa mu tunga timinu tieto?

¹⁴ Kani kabwe, ka tufweti’â tabika mu tunga timinu tieto mu Yehova ko. Bu tudiaka bidia bia mbote mbo tukwizi  bâka na ngolo. Mpila mosi mpe, longoka mu zaba Yehova mbo kutubakisa mu bâ na timinu tia ngolo. Bu tayizi batika mu longoka Bibila, tayizi longoka matieleka ma nguri matariri Yehova na nsalulu zandi. Kâ, ha mamina, tufweti bakula bima bia ndilu ya yôka. Paulo ni bo keri zolo tâka, bu katsoneka: “Bidia bia dema bia bantu ba yela biena.” Bu tukwe sariri misamu mi tulongokaka, mbo tukwizi bâ na ndwenga zazingi. Bibila ditele: “Ndwenga ni tima tiyôkele.”​—Bingana 4:5-7; 1 Piere 2:2.

15. Mu bungu dia nti we mfunu mu zolo Yehova na mpangi zeto?

¹⁵ Muntu wulendi bâ na tikolela tia mbote mpe na ngolo, kâ mu tatamana mu bâ na tikolela tia mbote mpe na ngolo, zebi ti fweti tatamana mu tikipaka. Mpila mosi mpe, muntu wa yela wuzebi ti fweti sa ngolo zazingi mu lunda tindiku tiandi tia ngolo na Yehova. Paulo tu bamburi: “Titaluzulakeno ntangu zazansoni mu zaba tala ti mu timinu lwena; tifimpakeno beno beni ntangu zazansoni ntia mpila bantu lwena.” (2 Bisi-Korente 13:5, NW) Kâ, ka wufweni’â ko mu bâ na timinu tia ngolo. Luzolo lweto mu Yehova na mu mpangi zeto mpe lufweti tatamana mu kula. Paulo watâ: ‘Ni bu nibâ . . . na luzabu, ni bu nibâ kwa na timinu tia fwanana mu vumuna miongo, namana kondo luzolo, ka ndiena tima ko.’​—1 Bisi-Korente 13:1-3.

16. Ngano Satana nti kazoloko beto tabanzaka?

¹⁶ Satana zololo ti tabanzaka ti, kani kabwe ka tulendi’â tatâ Yehova nsayi ko. Satana zololo ti takota mu bunokena mpe tabanzaka ti misamu mieto ka milendi’â miayilama ko. Yandi mpe ka zololo’â ko tasikirila mpangi zeto za mu timvuka. Mpe ka zololo’â ko tabâ mu nsayi. (Bisi-Efeze 2:2) Satana zebi ti mabanza ma mbi malendi tusa bubi mpe malendi wolesa tindiku tieto na  Yehova. Kâ, Yehova watuhana tima timosi mu tu bakisa mu nwanisa mabanza ma mbi: Yehova watuhana vuvu.

17. Mu bungu dia nti vuvu tieto tie tima tia mfunu?

¹⁷ Mu 1 Bisi-Tesalonike 5:8, Bibila difwanakase vuvu tieto na mpu yikengerelaka mutu wa mbulumbulu ku muzingu. Mbo ditâka mpu yo “vuvu tia mvukulu.” Bâ na vuvu mu makani ma Yehova mutima’eto kukengerelaka mpe mbo kutubakisaka mu telamana mabanza ma mbi.

18, 19. Ngano bwe vuvu tia Yezu tiasa ti katomo bâ na ngolo?

¹⁸ Vuvu tia Yezu tiamuhana ngolo. Mu mpimpa ya mansukina yi kayôkesa ha mutoto, wafwanakana katelamana mpasi zazingi. Ndiku’andi mosi yayizi mu teka. Ndiku’andi yakaka yayizi tâ ti ka mu zebi’â ko. Ndiku zakaka zamuyambirika mpe zadioka. Bantu ba nsi’andi bayizi bâ mbeni zandi, mpe bayizi lomba bamutimuna mpe bamuhonda. Ngano nti biamubakisa mu korela misamu mio mia mpasi? “Mu bungu dia nsayi yi  bakubika ku matu mandi, wakorela poto dia matimuna, bu kalembo mona nsoni, mpe wayizi zakala ha lweka lwa lubakala lwa tibuka tia Timfumu tia Nzambi.”​—Bahebre 12:2, NW.

¹⁹ Yezu wazaba ti, bu kaketi tatamana mu bâ wa kwikama, mbo kaketi kwizi zitisa Tata’andi, mpe mbo kaketi songela ti Satana ngungu yena. Vuvu tio nguria nsayi tieri mu tâka. Wazaba mpe ti ntangu fioti kwa yasala mu vutu monana na Tata’andi ku mazulu. Vuvu tio bakisa tieri mu bakisaka mu vivirila. Ntiana Yezu, tufweti tûlaka mabanza meto mu vuvu tieto. Mpila yo mbo yitubakisa mu korela misamu miamiansoni milendi tu turila.

20. Nti bikubakisa mu bâ na mabanza ma mbote?

²⁰ Yehova timinu tiaku na luvivululu lwaku kamonaka. (Izaya 30:18; tanga Malaki 3:10.) Kanisini ‘mu hanina mvutu mu nsatu za mutima’aku.’ (Mikunga 37:4) Buna tûla mabanza maku mu vuvu tiaku. Satana zololo  ti walembo vutu bâ na vuvu, mpe wabanza ti makani ma Yehova kani kabwe ka malungana ko. Kâ, tufweti telamana mabanza ma mbi! Tala ti batikiri mu mona ti vuvu tiaku ka tisiri’â ngolo ko, lomba kwe Yehova kakubakisa. Bambuka mi tâka Bisi-Filipe 4:6, 7: ‘Ka lumonandi mutima lwaka. Kâ mu miamiansoni, mu lusambulu na mu ndiyawululu, za luvukasa na tusambulu twa matondo, lombeno bi lukekolo kwe Nzambi. Mboko, tidzunu tia Nzambi, tiyôkele mayela mamansoni, mbo tikêla mitima mieno na mbanzulu zeno, mu Kristo Yezu.’

21, 22. (a) Ngano Yehova ntia kani die nandi mu bungu dia mutoto? (b) Ngano ntia nzengolo bongele?

²¹ Vulu bongaka ntangu ya banzaka bima bia mbote bita tu kêla ku matu. Ntamana, bantu babansoni mbo bakunda Yehova. (Nzabukusu 7:9, 14) Banza luzingu lubâ mu nza ya môna. Mbo lubâ lwa nkatika lwa nzitukulu! Satana na bademo bandi, na mbi yayansoni mbo yizimbakana. Kuvutu’â bâ na timbevo ko mpe kufwa ko. Bilumbu biabiansoni mbo batika mu vumbukaka na tikolela tia tibote mpe na nsayi ya bâ wa moyo. Bantu babansoni mbo basala tintwari mu sa ti mutoto wabâ paradi. Mbo badia bidia bia mbote mpe mbo babâ na tibuka ti balendi bela na kondo kwa bunkuta. Bantu ka bavutu’â bâ na mitima mia ngolo ko mpe ka bavutu’â bâ na miangu ko. mbo basarila mbote bawu na bawu. Dieka bo, bantu babansoni ha mutoto mbo babâ na “timpwanza tia nkembo tia bala ba Nzambi.”​—Bisi-Rome 8:21, NW.

²² Yehova zololo ti kabâ ndiku’aku ya mutima. Buna, sa miamiansoni mi lenda mu mu tumamana mpe mu pusanaka malembe malembe kwe Yandi bilumbu biabiansoni. Wa matieleka, muna muntu ha kati dieto katatamana mu bâ mu luzolo lwa Nzambi ntangu zazansoni!​—Yude 21.