1, 2. Mu nge, mu bungu dia nti lusambulu die kabu dia toma, Mu bungu dia nti wena mfunu mu zaba misamu mi tâka Bibila mu bungu dia lusambulu?

MU KATI dia luyalanganu lwa nza (univers), Mutoto wa fioti wena. Yehova bu katalaka mutoto, makanda mena ntiana têla dia mamba. (Mikunga 115:15; Izaya 40:15) Ni bu sa ti ba fioti twena mu kati dia luyalanganu lwa nza, Mikunga 145:18 na 19 yitele: “Yehova ha lweka lwa bô bamutâka mbila [bamusambilaka] kena, lwa bô babansoni bamutâka mbila mu matieleka. Nsatu za bô bamutinaka kalungisaka mpe ndiyawululu zawu kawâka, mpe vukisa kabavukisaka.” Yehova, Mvangi ya nkwa ngolo zazansoni, zololo kapusana kwe beto: zololo kabâ ndiku’eto! Zololo mpe kawâka tusambulu tweto! Lusambulu diena kabu dia toma mpe bweso bwa bunene bwa tuhana Yehova beto bansoni.

² Kâ Yehova mu tu wâ, tufweti mu zonzela mu mpila yi kazololo. Tataluzuleno misamu mi tâka Bibila mu bungu dia lusambulu.

3. Mu bungu dia nti fweti sambilaka Yehova?

³ Yehova zololo tamusambilaka. Ngano bwe tuzabiri wo? Tanga Bisi-Filipe 4:6, 7. Banza’eti musamu wuta ku tela Nzambi wayirika: Mfumu yiyôkele bunene ku mazulu na ha mutoto nge katomo kipaka mpe zololo wamuzabikisa mbanzulu zaku na misamu miaku.

4. Mu bungu dia nti tufweti vulu sambilaka Yehova?

 ⁴ Mu nzila ya lusambulu, tindiku tiaku na Yehova mbo tikula. Ndiku bu zivulu zonzelaka mabanza mawu, maniongo mawu mpe misamu miawu mia ku mutima, tindiku tiawu mbo tikwizi tomo bâka ngolo. Mpila mosi mpe na Yehova bu tumusambilaka. Mu Bibila, Yehova mbo katutêlaka misamu mi kabanzaka, misamu mi kamonaka ku mutima mpe misamu mi kayirika mu bilumbu bita kwiza. Lendi vulu zonzaka nandi, lendi mpe mu tela misamu miaku mia ku mutima. Wamana bwa sa, tindiku tiaku na Yehova mbo titomo bâ ngolo.​—Zaki 4:8.

5. Ngano bwe tuzabiri ti, Yehova ka wâka tusambulu twatwansoni ko?

⁵ Ngano Yehova tusambulu twatwansoni twa kawâka? Kâni. Mu ntangu ya mbikuri Izaya, Yehova watâ kwe bala ba Israele: “Tusambulu twatwingi lusaka, kâ ka niwâka ko: moko meno ma fuluka mena mu menga.” (Izaya 1:15) Tala ti ka tusiri â keba ko, tulendi yirika  misamu mituhambasa na Yehova. Buna, Yehova ka wâ tusambulu tweto ko.

6. Mu bungu dia nti timinu tie nguria mfunu? Bwe lendi songela ti timinu tie naku mu Nzambi?

⁶ Tala ti tuzololo Yehova kawâ tusambulu tweto, tufweti ba na timinu mu Yandi. (Marke 11:24) Ntumwa Paulo watâ ti: ‘Diangana, tala ti timinu pele, ka balendi â bamutâ nsayi ko, mu bungu ti wô pusanaka kwe Nzambi fweti kwikila ti kô kena, mpe wena wô sendaka bô bamudingaka mu mutima wawansoni.’ (Bahebre 11:6) Kâ, ka wufweni â ko mu tâ ti timinu tie neto mu Nzambi. Tufweti wa songela, bu tutumamaka kwe Yandi bilumbu biabiansoni.​—Tanga Zaki 2:26.

7. (a) Mu bungu dia nti tufweti bâka ba kuluka mpe tufweti baka na buzitu bu tusambilaka Yehova? (b) Bwe tulendi songela bunsungu bweto bu tu sambilaka?

⁷ Bu tusambilaka Yehova, tufweti bâka ba kuluka mpe tufweti baka na buzitu. Mu bungu dia nti? Mu bungu ti, tala ti tuzololo tazonza na mutinu peleko na prezida, tufweti ba na buzitu. Yehova wena Nzambi ya Nkwa Ngolo Zazansoni. Tufweti mu zonzesaka na buzitu bwabwingi mpe tufweti bâka ba kuluka. (Mbatukulu 17:1; Mikunga 138:6) Tufweti sambilaka mpe Yehova ku nsi’a mutima. Tamana sarila bunsungu, ka tukarila musamu mosi ko mu tusambulu.​—Matie 6:7, 8.

8. Bu tusambilaka mu bungu dia musamu, ngano nti tufweti sa?

⁸ Bu tusambilaka mu bungu dia musamu we neto, tufweti mpe sala tintwari na tusambulu tweto. Mu tifwani, tamana lomba kwe Yehova bio bitufwanakane mu zinga, ka tufweti â tabâ bilenga ko. Ka tufweti â takelaka bima biatuka ku zulu ko tala ti tulendi sala. Tufweti tihana mu salu mpe tufweti tambula salu ni salu ti tulendi sa. (Matie 6:11; 2 Bisi-Tesalonike 3:10) Ngano nti tufweti sa tala ti, tusambiri Yehova ngatu katubakisa mu bika nsalulu ya mbi?  Tufweti dioka misamu miamiansoni milendi tukotesa mu ntontolo. (Bisi-Kolose 3:5) Bwawu bu, tahana mvutu mu biyuvu bi tuvulu tiyulaka mu bungu dia lusambulu.

9. Ngano nani tufweti sambilaka? Ngano Za 14:6 nti yitulongesaka mu bungu dia lusambulu?

⁹ Nani tufweti sambilaka? Yezu watulongesa mu sambilaka “Tata’eto we ku mazulu.” (Matie 6:9) Yezu wavutu tâ ti: ‘Meno ni nzila, na matieleka, na luzingu. Ka kwena muntu ko wulendi kwenda kwe Tata, tala ti ka yôkele â kwe meno ko.’ (Za 14:6) Tufweti sambilaka kwa Yehova. Mpe tufweti mu sambila mu nzila ya Yezu peleko mu nkumbu ya Yezu. Ngano bwe wuta zolo tâ? Wuzololo tâ ti Yehova mu tambula tusambulu tweto, tufweti zitisa salu ti kahana kwe Yezu. Ntiana bu talongokele wo, Yezu wayiza ha mutoto ngatu katukûla mu masumu na mu lufwa. (Za 3:16; Bisi-Rome 5:12) Yehova mpe wamutumba Mfumu Nganga-Nzambi mpe Mfundisi.​—Za 5:22; Bahebre 6:20.

10. Ngano ntia mpila tufweti sambirilaka?

¹⁰ Ngano tufweti sambilaka kwa ba telama? Kâni. Yehova ka tulombaka ko tasambilaka kwa ba telama, ba fukama peleko ba zakala. Bibila ditulongese ti, tulendi sambila Nzambi mu mpila ni mpila ya zitama. (1 Ntangu 17:16; Nehemi 8:6; Daniele 6:10; Marke 11:25) Musamu wa mfunu kwe Yehova, ka mpila yi tusambirilaka ko, kâ mbanzulu zeto. Tulendi tumbula zu bu tusambilaka peleko tulendi sambila ku nsi’a mutima, huma ni huma ha tubâ mpe, mu mwini peleko mu mpimpa. Tulendi bâ mpe na lukwikulu ti Yehova mbo katuwâ ni bu sa ti bakaka ka bata tuwâ ko.​—Nehemi 2:1-6.

11. Ntia misamu tulendi zonzela kwe Yehova mu lusambulu?

 ¹¹ Ntia misamu tulendi sambirilaka? Tulendi sambila mu bungu dia misamu miamiansoni, mpasi miabâ kwa mia delakana na luzolo lwa Nzambi. Bibila ditele: ‘tala ti tumulombele tima buna bu kazololo, beto kawilaka.’ (1 Za 5:14) Ngano tulendi sambila mu bungu dia tima tia beto beni? Yee. Sambila Yehova kwena ntiana timoko na ndiku ya mutima. Tulendi mu zonzela misamu mitusaka mpasi ku mutima mpe na mbanzulu zeto. (Mikunga 62:8) Tulendi mu lomba mpeve santu ngatu yatubakisa mu yirika misamu mia mbote. (Like 11:13) Tulendi mu lomba mpe ndwenga ngatu tabonga nzengolo za mbote, na ngolo za telamana mpasi zeto. (Zaki 1:5) Tufweti mu lomba mpe mulemvo mu bungu dia masumu meto. (Bisi-Efeze 1:3, 7) Tufweti sambirilaka mpe bampwana’eto; mu tifwani tulendi sambirila kanda dieto na mpangi zeto za timvuka.​—Bisalu 12:5; Bisi-Kolose 4:12.

12. Ntia misamu tufweti toko sambirilaka?

¹² Ntia misamu tufweti toko sambirilaka? Yehova na luzolo lwandi. Tufweti vutulaka matondo mamingi kwe Yehova mu bungu dia misamu miamiansoni mi kayirikaka mu beto. (1 Ntangu 29:10-13) Bwe tuzabiri wo? Yezu bu kabâ ha mutoto, walongesa milongoki miandi mu sambilaka. (Tanga Matie 6:9-13.) Tufweti toko sambilaka mu bungu dia nkumbu ya Nzambi ngatu yabâ ya santu (wuzololo tâ ti, bantu babongela yo ya mulongo), Timfumu tiandi tizi mpe luzolo lwandi lwasalama ha mutoto. Yezu watâ ti, bu tumana lomba misamu mia mfunu, buna tulendi lomba bima bia beto beni mu lusambulu. Tamana tûla Yehova ha tibuka tia ntete mpe na luzolo lwandi, mbo tusongela ti Yehova mfunu kena kwe beto mpe luzolo lwandi mfunu lwena.

13. Ngano lusambulu lweto lufweti bâ lwa lukufi peleko lwa lula?

 ¹³ Ngano lusambulu lweto lufweti bâ lwa lukufi peleko lwa lula? Bibila ka ditâka bula bwa lusambulu ko. Lusambulu lweto lulendi bâ lwa lula peleko lwa lukufi, mpila mosi na musamu we neto. Mu tifwani, ntete tadia, lusambulu lulendi bâ lwa lukufi. Kâ, lusambulu lweto lulendi bâ lwa lula bu tuvutulaka matondo kwe Yehova peleko bu tumuzonzelaka mpasi zeto. (1 Samwele 1:12, 15) Ka tuzolo â ko tasa tusambulu  twa tula mu timonekesaka ntiana bantu bakaka ba mu mbandu ya Yezu. (Like 20:46, 47) Yehova tusambulu to, ka tumutâka nsayi ko. Tusambulu tweto tufweti tukaka ku mutima, wo ni musamu wa mfunu.

14. Ngano tufweti vulu sambilaka? Nti wuta tulongesa mu bungu dia Yehova?

¹⁴ Ngano tufweti vulu sambilaka? Yee. Yehova tutelele tavulu mu zonzesaka. Bibila ditele ti, tufweti “sambilaka ntangu zazansoni,” tufweti “tatamana mu lusambulu” mpe tufweti “sambilaka ntangu basiri ntangu.” (Matie 26:41; Bisi-Rome 12:12; 1 Bisi-Tesalonike 5:17) Yehova zololo katuwâka. Tulendi mu vuturila matondo mu bungu dia luzolo lwandi mpe mu bungu dia misamu mi kayirikaka mu beto. Tulendi mpe mu lomba katutwarisa, katubomba mpe katuhana ngolo. Tamana bongela lusambulu  ntiana bweso, mbo tusambilaka Yehova ntangu zazansoni.

15. Mu bungu dia nti tufweti tâka “amene” ha nsuka ya lusambulu?

¹⁵ Mu bungu dia nti tufweti tâka “Amene” ha nsuka ya lusambulu? “Amene” yizololo tâ ti “ni buna” peleko “wabela bô.” Bu tutâka “amene” mbo tusongelaka ti ba nsungu twena, mpe musamu wu tutele wa tutomono banza. (Mikunga 41:13) Bibila ditulongese ti, musamu wa mbote wena bu tutâka “amene” (tulendi tumbula zu peleko ku nsi’a mutima) ha nsuka ya lusambulu lwa bantu babingi, mu bungu ti mbo tusongelaka ti tutamburi misamu mi batele.​—1 Ntangu 16:36; 1 Bisi-Korente 14:16.

16. Ngano Yehova tusambulu tweto twa kahaninaka mvutu?

¹⁶ Ngano Yehova tusambulu tweto kahaninaka mvutu? Yee. Bibila ditele ti, ni Yehova kwa “wâka lusambulu.” (Mikunga 65:2) Yehova tusambulu twa mafunda ma bantu ba nsungu kawâka mpe twa kahaninaka mvutu mu mpila zazingi.

17. Ngano Yehova bwe kasarilaka mbazi zandi na bisari biandi bie ha mutoto mu hana mvutu mu tusambulu tweto?

¹⁷ Mu hana mvutu mu tusambulu tweto, Yehova mbazi zandi na bisari biandi bie ha mutoto kasarilaka. (Bahebre 1:13, 14) Mu tifwani, bantu babingi bayizi sambila Nzambi mu bakula Bibila, mpe ha manima Mbangi mosi ya Yehova yayizi ba tala mu ba longesa. Bibila disongese ti, bambazi salu basalaka mu salu tia samuna “nsangu za mbote.” (Tanga Nzabukusu 14:6.) Mpe, babingi ha kati dieto tayizi sambila mu bungu dia musamu mpe ha manima mpangi mosi yayizi tu natina lubakusu lwa ba neto nsatu.​—Bingana 12:25; Zaki 2:16.

18. Ngano Yehova bwe kasarilaka mpeve santu’andi na Bibila mu hana mvutu mu tusambulu tweto?

 ¹⁸ Mu hana mvutu mu tusambulu tweto, Yehova mpeve santu’andi mpe kasarilaka. Bu tumulombaka lubakusu mu telamana musamu, Yehova mbo kasarilaka mpeve santu’andi mu tu twarisa na mu tu hana ngolo. (2 Bisi-Korente 4:7) Yehova mbo kasarilaka mpe Bibila mu hana mvutu mu tusambulu tweto na mu tu bakisa mu bonga nzengolo za mbote. Bu tukwe tangi Bibila, tulendi baka verse zitubakisa. Yehova lendi sarila muntu wuhana mvutu ku tukutakanu, yita zonzela musamu we neto nsatu mu wâ. Yehova lendi sarila mpe nkuluntu ya timvuka ngatu yatuzonzela mabanza ma Bibila ma bâ neto salu.​—Bisi-Ngalate 6:1.

19. Ntangu zakaka mu bungu dia nti tubanzaka ti, Yehova ka tahana mvutu mu tusambulu tweto ko?

¹⁹ Kâ ntangu zakaka tulendi tiyula ti: “Mu bungu dia nti Yehova keka lembo hanina mvutu mu tusambulu twani?” Yehova zebi ka ntia ntangu, mpe ka bwe kahanina mvutu mu tusambulu tweto. Yandi mpe zebi misamu mio mie neto nsatu. Ntangu zakaka, tufweti tatamana mu lusambulu ngatu tamusongela ti ba nsungu twena mpe timinu tie neto mu Yandi. (Like 11:5-10) Ntangu zakaka mpe, mbo kahana mvutu mu tusambulu tweto mu mpila ya nzitukulu. Mu tifwani, tala ti tusambiri mu bungu dia musamu wuta tu mwisa mpasi, kani kakatula wo, Yehova lendi tuhana ngolo za korela.​—Tanga Bisi-Filipe 4:13.

20. Mu bungu dia nti tufweti vulu sambilaka Yehova?

²⁰ Nguria bweso bwena bwa sambilaka Yehova! Tulendi kwikila ti beto kawâka. (Mikunga 145:18) Tamana vulu sambilaka Yehova mu mutima wumosi, tindiku tieto na Yandi mbo tikwizi bâ ngolo.