1. Ngano nani lendi tu tela mpila ya yibote ya sambila Nzambi?

MABUNDU mamingi matâka ti matieleka malongesaka matariri Nzambi. Kâ, ka wena buna ko, mu bungu ti mabundu misamu mia swaswana malongesaka mu Nzambi na mu mpila ya mu sambila. Bwe tuzabila mpila ya yibote ya sambila Nzambi? Yehova kwa lendi wa tu tela.

2. Ngano bwe zabila mpila ya yibote ya sambila Nzambi?

² Yehova watuhana Bibila. Mu nzila ya Bibila tulendi longoka mpila ya yibote ya sambila Nzambi. Buna, longoka dio. Yehova mbo kakubakisa mu baka mbote za ndongosolo zandi mu bungu ti nge kazololo​—Izaya 48:17.

3. Ngano nti Nzambi kazololo tasa?

³ Bantu bakaka mbo batâka ti, mabundu mamansoni Nzambi ma katambulaka. Kâ, Yezu ka longesela buna ko. Yezu watâ ti: ‘Ka yandi wuna ko kuntaka: “Mfumu, Mfumu,” lendi kota mu Timfumu tia ku mazulu, kâ yandi wuna sarilaka luzolo lwa Tata’ani we ku mazulu.’ Tufweti zaba luzolo lwa Nzambi ni lwe mpe tasarila lo. Diena diambu dia mfunu, mu bungu ti Yezu wafwanakasa bantu bakolamaka kwe Nzambi na bimpumbulu, bantu “basarilaka mbi.”​—Matie 7:21-23.

4. Ngano Yezu bwe katâ mu mpila ya sambila Nzambi?

⁴ Yezu walongesa milongoki miandi ti, wena musamu wa mpasi mu sarila luzolo lwa Nzambi. Yezu watâ ti: ‘Koteleno ku mwelo wa fioti; bungu ti, ya yinene na ya sârila ye nzila yinataka ku mfukulu, babingi mpe balandaka  yo; mwelo wa fioti na nzila ya mfinka ku luzingu yinataka, bake na bîngi balandaka yo.’ (Matie 7:13, 14) Nzila ya mfinka ni mpila ya yibote ya sambila Nzambi yinataka ku luzingu lwa mankululu. Nzila ya yinene, ni mpila ya yibi ya sambila Nzambi yinataka ku lufwa. Kâ, Yehova zololo ti na kani muntu ka wufwandi. Ntiangu kahanaka bweso kwe bantu babansoni bwa longoka mu mu zaba.​—2 Piere 3:9.

5. Ngano bwe lendi zabila bô basambilaka Nzambi mu mpila ya yibote?

⁵ Yezu watâ ti, tulendi zaba bô basambilaka Nzambi mu mpila ya yibote mu nzila ya nkwikulu zawu na ya nsalulu zawu. Yezu watâ ti: ‘Mu mbutu zawu lubazabila.’ Wavutu tâ ti: ‘Muti ni muti wa mbote mbutu za mbote wubutaka.’ (Matie 7:16, 17) Ka wutele â ko ti, bisambiri bia Nzambi bia matieleka bia lunga biena. Kâ, ngolo basaka mu sarila mbote. Tatala bwe tubazabila.

6, 7. Mu bungu dia nti nsambululu ya matieleka yifweti tuka mu Bibila? Ngano tifwani tia Yezu nti titulongesaka?

⁶ Nsambululu’eto yifweti tuka mu bibila. Bibila ditele ti: ‘Miamianso miatsonoko, kwe Nzambi miatuka; salu mpe miena mu longesa, mu semba, mu sungika, mu kubika mu ndiatulu ya buderede, ngatu muntu wa Nzambi wabâ wa lunga mu sala salu ni salu tia mbote.’ (2 Timote 3:16, 17) Ntumwa Paulo watsoneka kwe Bakristo ti: ‘Bu lwawiri tambula zu dia Nzambi di talusamunini, ka lwabongela dio ko ntiana zu dia bantu; kâ ntiana buna bu die zu dia Nzambi.’ (1 Bisi-Tesalonike 2:13) Nsambululu ya matieleka yifweti tuka kwa mu Zu dia Nzambi, Bibila. Ka yitukaka mu mbanzulu za bantu ko, mu tikulu ko, mpe mu tima tiakaka ko.

⁷ Misamu miamiansoni mia longesa Yezu, mu Zu dia  Nzambi miatuka. (Tanga Za 17:17.) Yezu matsonoko keri vulu tangumunaka. (Matie 4:4, 7, 10) Bisambiri bia Nzambi bia matieleka tifwani tia Yezu bilandaka: misamu miamiansoni mi bilongesaka mu Bibila mitukaka.

8. Mu nzonzolo ya Yezu, nani tufweti sambila?

⁸ Yehova kwa tufweti sambilaka. Mikunga 83:18 yitele ti: “Nge nkumbu’aku Yehova, nge kaka we Watomo Zangama ha mutoto nsi wa mukaka.” Yezu wazolo ti bantu balongoka mu zaba Nzambi ya matieleka ni nani, mpe Yezu wabazabikisa nkumbu ya Nzambi. (Tanga Za 17:6.) Yezu watâ ti: ‘Ni Yehova Nzambi’aku kwa fweti kunda [sambila], ni Yandi kaka kwa fweti sarila salu tia mulongo.’ (Matie 4:10) Bisambiri bia Nzambi bia matieleka tifwani tia Yezu bilandaka. Yehova kwa bisambilaka. Nkumbu’andi bisarilaka mpe bizabikisaka. Mbo bilongesaka mpe mio mi yirika Nzambi mu bungu dia bantu.

9, 10. Ngano bwe tusongelaka kwe bakaka ti bawu tuzololo?

⁹ Tufweti ba na luzolo lwa matieleka mu bakaka. Yezu walongesa kwe milongoki miandi ti, bazolosono bawu na bawu. (Tanga Za 13:35.) Tufweti zolosono, ni bu tuba mu makanda na mahata ma swaswana, ni bu tuba mvwama peleko mputu, mpe ni bu tusa lukolo lwa lula peleko lwa lukufi. Luzolo lweto lufweti tuvukasa, mpe tufweti bâ ntiana bankazi na bibusi. (Bisi-Kolose 3:14) Ntiangu tulembo nwanaka mizingu mpe tulembo hondaka bantu. Bibila ditele ti, mbo tuzaba “bala ba Nzambi na bala ba Diabulu” mu ebu: ‘kanso lembo sarilaka buderede, kena wa Nzambi ko; na wô mpe lembo zoloko mpwana’andi.’ Bibila divutulu tâ ti: tufweti zolosono beto na beto. Ka wena ko ti ntiana Kayine: watuka kwe nkwa mbi, wahonda mpangi’andi.​—1 Za 3:10-12; 4:20, 21.

 ¹⁰ Mbo tusarilaka ntangu’eto, ngolo zeto mpe na bima bie neto mu titindisaka na mu tibakisaka beto na beto. (Bahebre 10:24, 25) Mbo tukwe ‘[se] bubote kwe babansoni.’​—Bisi-Ngalate 6:10.

11. Mu bungu dia nti tufweti tambula ti, ni mu Yezu kwa tulendi bakila mvukulu?

¹¹ Tufweti tumamaka kwe Yezu, mu bungu ti ni mu yandi kwa tulendi bakila mvukulu. Bibila ditele ti: ‘Ka kwena muntu wakaka ko wu balendi vukila; mu bungu ti ku nsia mazulu, ka kwena nkumbu yakaka ko . . . yilendi tuvukisa.’ (Bisalu 4:12) Mu timoko tia 5, tayizi longoka ti, Yehova watambika Yezu ha mutoto ngatu kahana luzingu lwandi mu nkululu mu bungu dia bantu batumamaka. (Matie 20:28) Yehova wasola Yezu ngatu kabâ Mutinu ha zulu mutoto. Ntiangu Bibila ditâka ti, tala ti tuzololo tazinga ntangu zazansoni, tufweti tumamaka kwe Yezu.​—Tanga Za 3:36.

12. Mu bungu dia nti tufweti lembo kotaka misamu mia politike?

¹² Ka tufweti â takotaka misamu mia politike ko. Yezu ka kota misamu mia politike ko. Bu bamufundisa kwe mfumu ya Bisi-Rome Pilate, Yezu watâ ti: ‘Timfumu tiani, ka tiena tia nsi [nza] yi ko.’ (Tanga Za 18:36.) Ntiana Yezu, ba kwikama twena mu Timfumu tia Nzambi tie ku mazulu. Ntiangu, kuma ni kuma ku tubâka, ka tukotaka misamu mia politike ko. Kâ, Bibila ditulombele tatumamaka kwe ‘tuyalu twa zangama,’ wuzololo tâ ti kwe guvernema. (Bisi-Rome 13:1) Mbo tutumamaka mu misiku mia nsi za tubelaka. Kâ, mu ntangu misiku miango mitelamanaka misiku mia Nzambi, mbo tulandaka tifwani tia bantumwa batâ ti: ‘Bubote, bu tulemvokele [tumama] kwe Nzambi na bu tulemvokele kwe bantu!’​—Bisalu 5:29; Marke 12:17.

13. Ngano ntia musamu tusamunaka mu bungu dia Timfumu tia Nzambi?

 ¹³ Tufweti kwikilaka ti Timfumu tia Nzambi kwa tinata nsobolo za mbote mu misamu mia nza. Yezu watâ ti “nsangu za mbote za Timfumu” mbo zisamunu mu mutoto nsi wa mukaka. (Tanga Matie 24:14, NWT.) Ka kwena guvernema ko ye na lenda mu yirika mio mi yirika Timfumu tia Nzambi mu bungu dia bantu. (Mikunga 146:3) Yezu watulongesa mu sambilaka mu bungu dia Timfumu tia Nzambi mu mpila eyi: ‘Bika Timfumu tiaku tizi. Bika luzolo lwaku lwasalama ha mutoto ntiana kwa ku mazulu.’ (Matie 6:10) Bibila ditele ti Timfumu tia Nzambi mbo tifukisa guvernema zazansoni za bantu, mpe Timfumu tia Nzambi mbo tizinga ntangu zazansoni.​—Daniele 2:44.

14. Mu nge, banani basambilaka Nzambi mu mpila ya yibote?

¹⁴ Bwawu bu, tiyula: “Ngano banani babakilaka ndongosolo zawu zazansoni mu Bibila? Ngano banani bazabikisaka nkumbu ya Nzambi? Ngano mu ntia dibundu bantu batomo zolosonoko bawu na bawu? Ngano banani bakwikilaka ti, Nzambi watambika Yezu ha mutoto mu vukisa bantu? Ngano banani balembo kotaka misamu mia politike? Ngano banani basamunaka ti, Timfumu tia Nzambi kwa tiyirika misamu mia bantu?” Mbangi za Yehova kwa.​—Izaya 43:10-12.

15. Ngatu Nzambi katambula nsambululu’eto, nti tufweti sa?

¹⁵ Ka wufweni â ko mu kwikila ti Nzambi kô kena; mu bungu ti bademo mpe kwikila bakwikilaka ti Nzambi kô kena. (Zaki 2:19) Ngatu Nzambi katambula nsambululu’eto, tufweti sarilaka mio mi katutelaka.

16. Mu bungu dia nti tufweti kala dibundu dia bungungu?

 ¹⁶ Ngatu Nzambi katambula nsambululu’eto, tufweti kala dibundu dia bungungu. Mbikuri Izaya watâ ti: “dukeno muna . . ., mpe tatamaneno mu bâ ba verela.” (Izaya 52:11; 2 Bisi-Korente 6:17) Tufweti losa miamiansoni mie tintwari na dibundu dia bungungu.

17, 18. Ngano “Babilone ya Yinene” ni nti? Mu bungu dia nti tufweti kulu duka mu dibundu dia bungungu?

¹⁷ Ngano dibundu dia bungungu ni nti? Ni mabundu mamansoni malongesaka kwe bantu mpila ya sambila Nzambi yilembo delakanaka na Zu dia Nzambi. Mu Bibila, dibundu dia bungungu ni ‘Babilone ya Yinene.’ (Nzabukusu 17:5) Mu bungu dia nti? Mu bungu ti ha manima ma delize, ni ku hata dia Babilone ndongosolo za bungungu zabatikila. Ndongosolo zango zayizi yangana ha mutoto wa mukaka. Mu tifwani, bantu ba ku Babilone, Nzambi zitatu zitatu beri sambilaka. Mpe mu ntangu yi mabundu mamingi malongesaka ti Nzambi wena butatu (trinité). Kâ, Bibila ditomono songela ti: Nzambi yimosi kwa yena ya matieleka, Yehova, mpe Yezu wena mwana’andi. (Za 17:3) Bantu ba ku Babilone beri kwikilaka ti, muntu bu wufwaka, tima tie mu yandi tilembo fwaka, ntangu zakaka mbo tikwendaka ku benga dia tiya. Kâ, bungungu bwena.​—Tala note za 14, 17 tii 18.

¹⁸ Nzambi wazabikisa ti, ntamana mabundu mamansoni ma bungungu mbo mafuka. (Nzabukusu 18:8) Ngano bakuri mu bungu dia nti fweti kulu duka mu dibundu dia bungungu? Yehova ku lombele waduka mo, ntete ntangu yatiyôkela.​—Nzabukusu 18:4.

19. Wamana bonga nzengolo ya sarila Yehova, bwe Yehova kakukipila?

¹⁹ Wamana bonga nzengolo ya duka mu dibundu dia  bungungu, ndiku zaku na bantu ba mu kanda diaku, kampe ka babakula nzengolo’aku ko. Balendi ku mwisa mpe mpasi. Kâ Yehova ka ku yambirika ko. Mbo bâ mu kanda dia dinene dia nza ya mukaka, mwe bantu batomono zolosono. Mbo ba na tivuvu tia zinga ntangu zazansoni mu nza ya môna. (Marke 10:28-30) Kampe lumbu tieko, ndiku zaku na bantu ba mu kanda diaku batelamanaka nzengolo’aku, mbo bakwizi longoka Bibila.

20. Mu bungu dia nti kwe mfunu mu sambila Nzambi mu mpila ya yibote?

²⁰ Ntamana Nzambi mbo kakatula mbi, mpe Timfumu tiandi mbo titwarisa mutoto. (2 Piere 3:9, 13) Nsayi yayingi! Bantu babansoni mbo basambila Yehova mu mpila yi kazololo. Bwawu bu, sa nsobolo zifwanakane mu sambila Nzambi mu mpila ya yibote.