1. Ngano nani watuhana luzingu?

YEHOVA wena “Nzambi ya moyo.” (Yeremi 10:10) Yehova watusala, mpe ni Yandi watuhana luzingu. Bibila ditele ti: ‘Nge wasala biabiansoni, na wazolo ti biabe, ni biayiluku mpe.’ (Nzabukusu 4:11) Tala ti ba moyo twena, mu bungu ti Yehova wawaya bo. Luzingu nguria kabu dia ntalu diena dia Nzambi.​—Tanga Mikunga 36:9.

2. Ngano nti tufweti sa mu lenda luzingu lweto?

² Yehova tu hanaka bio bie neto nsatu mu bâ ba moyo, ntiana bidia na mamba. (Bisalu 17:28) Kâ Yehova zololo mpe luzingu lweto lwabâ lwa mbote. (Bisalu 14:15-17) Mu lenda luzingu lweto, tufweti tumama mu misiku miandi.​—Izaya 48:17, 18.

3. Ngano Yehova nti kasa mu ntangu Kayine kahonda Abele?

³ Bibila ditulongese ti, luzingu lweto na lwa bantu bakaka, ntalu lwena kwe Yehova. Tabongeno tifwani tia Kayine mwana wa ntete wa Adame na Eva. Kayine waba na nkesi mu mpangi’andi Abele. Yehova wamulonga ti, nkesi zandi ka zimutumandi. Kâ Kayine ka wila Yehova ko. Kayine “wabwila mpangi’andi mu nitu mpe wamuhonda.” (Mbatukulu 4:3-8) Yehova wasemba Kayine bu kahonda Abele. (Mbatukulu 4:9-11) Nkesi na diki bifu bia mbi biena: bilendi tu nata mu ba na miangu mpe na mutima ngolo. Muntu ka wulendi â wabaka luzingu lwa mankululu ko tala ti bifu ni bio bie nandi.  (Tanga 1 Za 3:15.) Mu tâ Yehova nsayi, tufweti longoka mu zolo bantu babansoni.​—1 Za 3:11, 12.

4. Ngano mosi wa misiku kumi nti wuta tu longesa mu ntalu ya luzingu?

⁴ Ha manima ma mafunda ma mvula, Yehova bu kahana misiku kumi kwe Mose, Yehova wasongela ti luzingu ntalu lwena kwe Yandi. Mosi wa misiku miango weri: “Kufweti â honda muntu ko.” (Lubambu 5:17) Tala ti muntu wawaya mu honda mpwana’andi, yandi mpe honda bafweti muhonda.

5. Ngano Nzambi ntia mabanza me nandi mu bungu dia katula kwa zimi?

⁵ Ngano Nzambi ntia mabanza me nandi mu bungu dia katula kwa zimi? Ni lubâ luzingu lwa mwana we mu kati dia moyo wa nguri’andi, ntalu lwena kwe Yehova. Musiku wahana Yehova kwe bala ba Israele weri tâka ti, tala ti muntu wubotase mukento we na zimi mpe mwana wufwiri, muntu wuna bafweti mu honda. (Tanga Ndukulu 21:22, 23; Mikunga 127:3.) Wutulongese ti, katula kwa zimi musamu wa mbi wena.​—Tala note ya 28.

6, 7. Ngano bwe tusongela kwe Yehova ti luzingu ntalu lwena kwe beto?

⁶ Bwe tusongela kwe Yehova ti luzingu lweto na lwa bantu bakaka ntalu lwena kwe beto? Ka tufweti â tasa tima ko titûla luzingu lweto peleko lwa bantu bakaka mu mpasi. Mu tifwani, ka tufweti â nwa fumu na bima bia ngolo ko mu bungu ti, nitu’eto bibebesaka mpe bilendi tu honda.

⁷ Yehova watuhana nitu na luzingu. Tufweti kipaka nitu’eto na luzingu lweto mu mpila yo yi zololo Yehova. Tala ti ka tukipaka nitu’eto ko, ka tubâ ba verela ko ha meso ma Nzambi. (Bisi-Rome 6:19; 12:1; 2 Bisi-Korente 7:1) Ka tulendi â tabâ bisari bia Yehova ko watuhana luzingu, tala ti kwe beto luzingu ka lwena ntalu ko. Musamu wa mpasi wena mu losa bifu bia mbi. Kâ Yehova mbo  katubakisa, tala ti tusiri ngolo, mu bungu ti, luzingu tuzitisaka.

8. Ngano nti tufweti sa mu lembo tûla luzingu lweto na lwa bantu bakaka mu mpasi?

⁸ Tulongokele ti, luzingu kabu diena dia ntalu. Yehova lukwikulu lwe nandi mu beto: Yehova zebi ti ka tusa tima ko ti tûla luzingu lweto na lwa bantu bakaka mu mpasi. Mu tifwani: mayela tusaka bu tunataka kaminio peleko moto. Ka tusaka nsaka za mbi peleko za miangu ko. (Mikunga 11:5) Tufweti tomo kipaka nzo’eto ngatu yalembo mwisa bantu mpasi. Yehova watuma kwe Bala ba Israele ti: “Tala ti tungiri nzo, fweti tûla mwana tikaku ha zulu muluri.” Mu bungu dia nti? Mu bungu ti Yehova watâ ti muntu bu waketi bwa, dema diadiansoni kwe munkwa nzo dia keti bâ.​—Lubambu 22:8.

9. Ngano bwe tufweti bongelaka bibulu?

⁹ Mpila mpe yi tubongelaka bibulu mfunu yena kwe Yehova. Yehova tu bikiri nzila mu honda bibulu ngatu tadia peleko ngatu bialembo tu mwisa mpasi. (Mbatukulu 3:21; 9:3; Ndukulu 21:28) Kâ, ka twena na nswa ko mu honda bibulu mu nsaka peleko mu nsayi.​—Bingana 12:10.

10. Ngano bwe tuzabiri ti menga mena tidimbu tia luzingu?

¹⁰ Menga ma mulongo mena kwe Yehova mu bungu ti tidimbu tiena tia luzingu. Kayine bu kahonda Abele, Yehova wamutela ti: “Menga ma mpangi’aku yawula mata yawula tuka mutoto tii kwe meno.” (Mbatukulu 4:10) Menga ma Abele meri tidimbu tia luzingu lwandi. Yehova wasemba Kayine mu bungu ti wahonda Abele. Ha manima ma delize, Yehova wabambula ti menga mena tidimbu tia luzingu. Yehova watâ kwe Noa na kanda diandi ti: “Bibulu biabiansoni . . . lulendi dia. Kâ, ka lufweti â lwadia musunia  na luzingu lwandi, peleko menga mandi, ko.” (Mbatukulu 1:29; 9:3, 4) Yehova wahana Noa na kanda diandi nzila mu dia bibulu; kâ wabayimina mu dia musunia na menga, mu bungu ti menga mena tidimbu tia luzingu

11. Ngano ntia musiku wutariri menga Yehova kahana kwe Bala ba Israele?

¹¹ Ha manima ma mvula 800 bu katâ kwe Noa ti ka diandi menga, Yehova wavutu hana ntumunu kwe bala ba Israele ti: Wô “bakiri tibulu peleko nuni yi badiaka, ku mbingu, fweti tsamuna menga ha mutoto mpe fweti ma zika.” Yehova wayika: “Ka lufweti â lwadia menga ma musunia ni musunia ko.” (Levitike 17:13, 14) Yehova wazolo ti, ntangu zazansoni bisari biandi biamonaka ti menga ma mulongo mena. Bisari bia Nzambi biaba na lenda dia dia musunia, kâ ka menga ko. Bu beri hondaka bibulu mu dia, bafweti tsamuna menga ha mutoto.

12. Ngano bwe Bakristo bafweti mwinaka menga?

¹² Mivu fioti miayôka ha manima ma lufwa lwa Yezu, bantumwa na bankuluntu ba timvuka tia Yerusaleme bavukana. Bafweti sola ntumunu za Musiku, wu bahana kwe bala ba Israele, za fweti sarila Bakristo. (Tanga Bisalu 15:28, 29; 21:25.) Yehova wababakisa mu bakula ti, menga ntalu kwa mabâka ha meso mandi, mpe kwe Bakristo menga ma mulongo mena. Bakristo ba mu ntangu yina ka beri â dia menga ko mpe ka beri â ma nwaka ko. Ka beri â mpe dia musunia wulembolo tomo tsona menga ko. Dia na nwa kwa menga weri musamu wa wunene, nsinsa na sambila biteki peleko sarila bunsuza. Tuka ntama Bakristo bakala mu diaka mpe mu nwaka menga. Mpe mu ntangu yi, Yehova zololo ti bisari biandi biamonaka ti menga ma mulongo mena.

13. Mu bungu dia nti Bakristo balembo yikaka menga?

¹³ Ngano wuzololo tâ ti Bakristo bafweti kala mu yika  menga? Yee. Yehova wahana ntumunu ti ka tufweti dia menga ko mpe ka tufweti ma nwa ko. Tala ti doktere ku telele ti kunwandi malavu, ngano mbo titûla mo mu ntumbu? Kâni! Mpila mosi mpe, bu tulembo diaka mpe nwaka menga, ka tutambulaka ko mu yika menga.​—Tala note ya 29.

14, 15. Bwe Bakristo babongelaka luzingu; Ngano Bakristo kolama bakolamaka kwe Nzambi mu yika luzingu lwawu bula? Bangula.

¹⁴ Ngano nti tusa tala ti doktere tu telele ti mbo tufwa, tala ti ka batuyikiri â menga ko? Muna muntu fweti bonga nzengolo tala ti tumama katumama mu musiku wa Nzambi wutariri menga. Bakristo luzingu lwa batomo zitisaka, mu bungu ti kabu dia Nzambi diena. Ntiangu badingaka bababukila mu mpila zakaka mu vukisa luzingu lwawu. Kâ, ka batambulaka ko babayika menga.

¹⁵ Mbo tusaka mina mifwanakane mu ba na tikolela tia mbote. Kâ, ka tutambulaka ko batuyika menga, mu bungu ti menga mena tidimbu tia luzingu, mpe ma mulongo me kwe Nzambi. Ka tukolamaka kwe Yehova ko mu yika luzingu lweto bula mu bungu ti, tumama kwe Yehova kuyôkele mfunu. Yezu watâ ti: “Wô zololo kavukisa luzingu lwandi mbo kahombesa lo, kâ wô hombesa luzingu lwandi mu bungu dia meno mbo kavukisa lo.” (Matie 16:25) Kwe Yehova tutumamaka mu bungu ti Yandi tuzololo, mpe Yandi zebi mio miyôkele bubote mu beto. Ntiana Yehova, kwe beto mpe luzingu ntalu lwena, mpe lwa mulongo lwena.​—Bahebre 11:6.

16. Mu bungu dia nti bisari bia Nzambi bimutumamanaka?

¹⁶ Bisari bia Nzambi bizololo mu tumama mu musiku wutariri menga. Ka badiaka menga ko mpe ka banwaka menga ko. Bisari bia Nzambi ka biyikaka menga ko, mpe  ka bihanaka menga kwe muntu ko, mu bukusu. * Kâ mu bungu ti luzingu lwa bazololo, mbo batambulaka mpila yakaka mu bukusu. Bisari bia Nzambi bie na lukwikulu ti Mvangi ya luzingu na ya menga zebi mio miyôkele bubote mu bawu. Bwe tabanza, ngano Nzambi misamu miyôkele bubote mu beto mia kazebi?

17. Ntia nsalulu ya yimosi ya menga yeri tambulaka Yehova kwe bala ba Israele?

¹⁷ Musiku wahana Nzambi kwe bala ba Israele mu nzila ya Mose watâ ti: “Luzingu lwa musunia mu menga lwena, mpe meno lwa niluheni ha zulu ziku [autel], ngatu lasa nsalulu ya zibika masumu, mu bungu ti menga mahanaka mulemvo wa masumu.” (Levitike 17:11) Bala ba Israele bu beri sumukaka, bweso bwa ba nawu mu lomba mulemvo kwe Yehova mu nzila ya mukayulu wa tibulu. Nganga-Nzambi ndambu menga ma tibulu keri tsamunaka ha zulu ziku dia tempelo. Yo ni nsalulu ya yimosi ya menga yeri tambulaka Yehova kwe bala ba Israele.

18. Ntia bweso bwe neto mu nzila ya mukayulu wa Yezu?

¹⁸ Yezu wakabisa musiku wa mukayulu wa bibulu. Ngano bwe kasa? Yezu wahana luzingu lwandi, peleko menga mandi, mu bungu dia mulemvo wa masumu meto. (Matie 20:28; Bahebre 10:1) Luzingu lwa Yezu nguria ntalu lwabâ: Yehova wavumbula Yezu kwe ba fwa, mpe mu nzila ya mukayulu wa Yezu, Yehova lendi hana bweso kwe bantu babansoni bwa baka luzingu lwa mankululu.​—Za 3:16; Bahebre 9:11, 12; 1 Piere 1:18, 19.

19. Ngano nti tufweti sa mu bâ “ba verela mu menga ma bantu babansoni”?

 ¹⁹ Yehova watuhana luzingu, mpe matondo tuvutulaka mu bungu dia kabu dio dia toma. Ntiangu tutelaka bantu ti, tala ti timinu tie nawu mu Yezu balendi baka luzingu lwa mankululu. Bantu ba tuzoloko, mpe mbo tusaka mio mi fwanakane mu balongesa bwe balendi bakila luzingu lwa mankululu. (Ezekiele 3:17-21) Ntiana ntumwa Paulo, tulendi tâ ti: “Wa verela ndiena mu menga ma bantu babansoni, mu bungu ti ka nakolama ko mu lu samunina luzolo lwa Nzambi.” (Bisalu 20:26, 27, NWT) Buna, tazonzelaka Yehova kwe bantu bakaka, mpe tabatela ti, kwe Yehova, luzingu ntalu lwena. Mu mpila yo mbo tusongela ti luzingu na menga bia tuzitisaka.