1-2. Tintwari na 1 Timote 6:20, nti bahana kwe Timote?

BIMA bieto bia ntalu tuvulu lundisaka kwe bantu bakaka ngatu bakipa bio. Mu tifwani, tulendi lundisa mbongo zeto ku banque. Bu tusaka bo, mbo tukekoloko ti mbongo zeto batomo za lunda ngatu zalembo zimbakana peleko balembo za laba. Tubakuri, lundisa tima tia ntalu kwe muntu bwe wuta zolo tâ.

² Tanga 1 Timote 6:20. Ntumwa Paulo wabambula Timote ti tima tia ntalu bamuhana​—luzabu lwa matieleka lwa makani ma Nzambi mu bungu dia bantu. Yehova wahana Timote bweso bwa ‘samuna Zu dia Nzambi’ na bwa ‘sala tisalu tia samuna nsangu za mbote.’ (2 Tim. 4:2, 5) Paulo walomba kwe Timote mu kengerela bio bi bamulundisa. Ntiana Timote, bima bia ntalu batuhana. Ngano bima biango ni bie? Mpe mu bungu dia nti tufweti kengerela bima bio bia ntalu bia tu hana Yehova?

3-4. Mu bungu dia nti matieleka ma Bibila me ntalu?

³ Yehova watuhana matieleka ma ntalu me mu Zu diandi, Bibila. Matieleka mo ntalu mena kwe beto mu bungu ti mbo matulongesaka bwe tulendi bêla na tindiku tia mbote na Yehova, mpe mbo matubangurilaka bwe tulendi bêla na nsayi ya matieleka mu luzingu. Mu ntangu yi tukwikilaka matielaka mo na yi tusarilaka mo, mbo tukûlukaka mu bungamba bwa ndongosolo za bungungu na bwa nsalulu za mbi.​—1 Kor. 6:9-11.

⁴ Musamu wakaka wusongelaka mu bungu dia nti matieleka ma Zu dia Nzambi me ntalu ni wena’eti, Yehova kwe bantu ba kuluka kwa kasongelaka mo, bô bê na “mabanza ma delakana.”  (Bis. 13:48, NWT) Bantu ba kuluka mbo batambulaka ti ni ngamba ya kwikama na ya ndwenga yitulongeseka mu nzila ya Bibila mu ntangu yi. (Mat. 11:25; 24:45) Ka tulendi’â tabakula Bibila ko tala ti ka batubakisi’â ko, mpe ka kwena tima ko tiyôkele bakula kwa Bibila mu ntalu.​—Bin. 3:13, 15.

5. Ngano Yehova nti kavutu tu hana?

⁵ Yehova watuhana mpe bweso bwa longesa matieleka na makani mandi kwe bantu bakaka. (Mat. 24:14) Nsangu za Yehova zi tusamunaka nguria ntalu zena mu bungu ti mbo zibakisaka bantu bizi babâ mu kanda dia Yehova, mpe mbo zibahanaka bweso bwa baka luzingu lwa mankululu. (1 Tim. 4:16) Ni tusamuna kwakwingi ni tusamuna fioti, lubakusu tuta hana mu tisalu tiyôkele mfunu mu ntangu yi. (1 Tim. 2:3, 4) Ntia mpila nsayi mu sala tintwari na Nzambi!​—1 Kor. 3:9.

6. Nti biaturila bantu bayizi lembana mu sa keba?

⁶ Mu ntangu ya Timote, Bakristo bakaka ka beri’â zolo bweso bwawu bwa sala tintwari na Nzambi ko. Mu bungu ti Demase wazolo nza, wahombesa bweso bwa sala tintwari na Paulo. (2 Tim. 4:10) Fizele na Hermozene kampe bayizi yambirika tisalu tiawu tia samuna mu bungu ti bunkuta bweri nawu bwa mona mpasi za mona Paulo. (2 Tim. 1:15) Imene, Alekzandre, na Filete bayizi bâ ba-aposta mpe babika mu sarila Yehova. (1 Tim. 1:19, 20; 2 Tim. 2:16-18) Kampe, bantu bô babansoni timpeve tia ngolo tieri nawu; kâ ha manima, bayizi bika mu banza ti bima bia ba hana Yehova ntalu bieri.

7. Satana nti kayêlaka mu sa mu tu nata tayirika mio mi kazololo?

⁷ Ngano bwe Satana kayêlelaka mu sa ti tayambirika bima bia ntalu bia tu hana Yehova? Tatala mpila zi sarilaka Satana. Satana mbo kasarilaka tele, filme, Internet na mikanda ngatu tabanza peleko tadiatila mu mpila yitunata mu bika mu zolo Yehova malembe malembe, peleko mu bika mu tumama mu misiku miandi. Satana mbo kayêlaka mu tutâ bunkuta mu bungu dia misamu mi tâka bantu mu beto peleko mu bungu dia nkwamusu zitukwizila, ngatu tabika mu samuna. Satana mbo kayêlaka mpe mu tu nata tawirikila “nzonzolo za ntembe ziba tâka ‘luzabu’ mu bungungu,” za ba-aposta, ngatu twizi tabika matieleka.​—1 Tim. 6:20, 21, NWT.

8. Nti tulendi longoka mu misamu miaturila Daniel?

⁸ Tala ti ka tusiri’â keba ko, tulendi kwizi bika matieleka. Tatala misamu miaturila Daniel, * wazolo mu bula jeux vidéo. Yandi têle: “Nabatika mu bula jeux vidéo mu  ntangu yi ndieri na mvula 10. Ha mbatukulu , mbo ndieri bulaka jeux vidéo zilembolo za mbi. Kâ, malembe malembe, nabatika mu bula jeux vidéo za miangu na za bunganga.” Bilumbu biabiansoni, kampe mbo keri yôkesaka 15 heures mu bula jeux vidéo. Daniel vutulu tâ ti: “Ku nsi’a mutima’ani, nazaba ti jeux vidéo zi ndieri bulaka na ntangu yi ndieri yôkesaka mu bula zo, tindiku tiani na Yehova zeri bebesaka malembe malembe. Kâ, nayizi bâ na mutima wa ngolo mpe nayizi banza ti mitieno mia Bibila ka mieri’â kuntarilaka ko.” Tala ti ka tusiri’â keba ko, nsaka zilendi tu nata mu lembo simbirila matieleka. Musamu wo wamana tu turila, tulendi hombesa bima bia ntalu bia tu hana Yehova.

9. Tintwari na 1 Timote 1:18, 19, Paulo na nani keri fwanakasaka Timote?

⁹ Tanga 1 Timote 1:18, 19. Paulo wafwanakasa Timote na tinwani, mpe wamulomba ‘kanwana muzingu wa mbote.’ Paulo keri’â zonzelaka muzingu wu nwanaka bantu ko, kâ muzingu wa timpeve keri zonzelaka. Bwe Bakristo banwaninaka muzingu ntiana binwani? Ngano ntia bifu bifwanane takurisa bu twe binwani bia Kristo? Tataleno ndongosolo tanu (5) zi tulendi baka mu tifwani tia Paulo. Ndongosolo zo zilendi tu bakisa mu kengerela matieleka.

10. Ngano tifu tia bâ wa kwikama kwe Nzambi ni nti, mpe mu bungu dia nti twe na tio nsatu?

¹⁰ Kurisa tifu tia bâ wa kwikama kwe Nzambi. Tinwani tia mbote tia kwikama tibâka. Mbo tikwizi nwanaka ngolo mu kengerela muntu wu kazololo peleko tima tie ntalu kwe yandi. Paulo watindisa Timote mu kurisa tifu tia bâ wa kwikama kwe Nzambi​—wuzololo tâ kabâ wa kangama kwe Nzambi. (1 Tim. 4:7) Luzolo lweto na kwikama kweto mu Nzambi bu kubâ ngolo, nsatu’eto ya kengerela matieleka mbo yikula.​—1 Tim. 4:8-10; 6:6.

11. Mu bungu dia nti twe na nsatu tifu tia tiyimina?

¹¹ Kurisa tifu tia tiyimina. Tinwani tifweti sarilaka ngolo mu bâ wa kubama mu bungu dia muzingu. Timote weri na timpeve tia ngolo mu bungu ti walanda malongi matûka kwe Nzambi ma mu hana Paulo, mu dioka nsatu za mbi, mu kurisa bifu bi zololo Nzambi na mu bâka tintwari na Bakristo bakaka. (2 Tim. 2:22) Tifu tia tiyimina tieri dinganaka. Tifu tia tiyimina tie neto nsatu mu nunga muzingu na nsatu zeto za nitu. (Rom. 7:21-25) Tifu tia tiyimina mpe tie neto nsatu mu soba timuntu tieto na mu kurisa bifu bia mbote. (Efz. 4:22, 24) Mpe bu tubâka ba fwatika, ha manima ma tisalu tia ngolo, tulendi bâ na nsatu ya tituma mu ngolo mu kwenda ku lukutakanu.​—Ebr. 10:24, 25.

12. Bwe tulendi tomesena mpila’eto ya sarila Bibila?

¹² Tinwani tifweti longoka mu sarila binwanunu biandi. Mu tomo lenda, fweti bia sarilaka ntangu zazansoni. Beto mpe nsatu ye neto ya kwizi tomo zaba mu sarila Zu dia Nzambi. (2 Tim. 2:15) Tulendi dia zaba mu sarila mu nzila ya tukutakanu tweto. Kâ, tala ti tuzololo tawisa bantu bakaka ti matieleka ma Bibila ntalu mena, tufweti bâ na tifu tia longokaka Bibila beto beni. Tufweti sarila Zu dia Nzambi mu yika timinu tieto ngolo. Wuzololo tâ ti ka tufweti’â tatangaka kwa Bibila ko. Tufweti dia dimbitilaka mpe tufweti dingaka mu mikanda mieto mpila yi tulendi tomo bakurila na yi tulendi tomo sarila Matsonoko. (1 Tim. 4:13-15) Buna, mbo tutomo sarila Zu dia Nzambi mu longesa bantu bakaka. Wuzololo tâ ti ka tusukina kwa mu batangila verse za mpamba ko. Tuzololo tabakisa bantu bakaka mu bakula na mu zaba bwe balendi sarila verse ze mu Bibila.  Dieka bo, bu tuvulu longokaka Bibila, tulendi kwizi bâ milongi miyôkele bubote.​—2 Tim. 3:16, 17.

13. Tintwari na Bahebre 5:14, mu bungu dia nti tufweti bâ na lenda dia swasikisa?

¹³ Bâ na lenda dia swasikisa. Tinwani tifweti bâ na lenda dia zaba misamu mia mbi milendi mu turila mpe fweti mia dioka. Beto mpe tufweti zaba misamu milendi tu natina mpasi mpe tufweti sa miamiansoni mi tulenda mu dioka mio. (Bin. 22:3; tanga Bahebre 5:14.) Mu tifwani, tufweti solaka nsaka za zibote. Mu tele mbo bavulu songelaka filme za fuluka mu ndiatulu ya mbi. Ndiatulu yo mbo yifwemesaka Nzambi mpe mbo yinataka misendo mia mbi. Buna, mbo tudiokaka nsaka za mpila yo, mu bungu ti malembe malembe zilendi wolesa luzolo lweto mu Yehova. Tuzebi ti Yehova ndiatulu ya mbi kayinaka, mpe bantu bê na ndiatulu yo mpasi bamonaka mpe bapwana’awu bamwisaka mpasi.​—Efz. 5:5, 6.

14. Bwe lenda dia swasikisa diabakisila Daniel?

¹⁴ Daniel, wutuzonzeleke, wabatika mu bakula ti bula jeux vidéo za miangu na za bunganga musamu wa mbi weri. Wayizi dinga mu Watchtower Library mikanda milendi mu bakisa mu yirika musamu wo. Ngano ntia nsobolo miamunatina? Wayizi bika mu bula jeux vidéo za mbi. Wayizi bika mpe mu bulaka tintwari na bantu bakaka mu Internet. Daniel têle ti: “Kani nayôkesaka ntangu mu bula jeux vidéo, nabatika mu yôkesaka ntangu peleko mu sa bima tintwari na ndiku za mu timvuka.” Bwawu bu Daniel mupasuri-nzila mpe mukuluntu wena.

15. Mu bungu dia nti binsamu bia bungungu bie bia mbi??

¹⁵ Ntiana Timote, tufweti bakulaka ti nsangu za bungungu za ba-aposta mpasi zinataka. (1 Tim. 4:1, 7; 2 Tim. 2:16) Mu tifwani, ba-aposta balendi yêla mu yangasa binsamu bia bungungu mu mpangi zeto peleko balendi yêla mu tu kotesa ntembe ngatu talembo bâ na lukwikulu mu organizasio ya Yehova. Binsamu bia mpila yo bilendi kotesa timinu tieto tiozi. Tufweti saka keba mu lembo kwikilaka binsamu bia mpila yo. Mu bungu dia nti? Mu bungu ti binsamu bia mpila yo “bantu bê na mbanzulu za mbi mpe balembolo na butieleka” bayangasaka bio; mpe kani diawu ni mu batika mu “bakana na mu saka ntembe.” (1 Tim. 6:4, 5, NWT) Bazololo ti takwikila  bungungu bwawu ngatu talembo bâ na lukwikulu mu mpangi zeto.

16. Ntia bima bilendi tu wubakasa tufweti losa?

¹⁶ Losa bima biwubakasaka. Ntiana “tinwani tia mbote tia Yezu Kristo,” Timote watula mabanza mandi mu tisalu tia samuna, kani kadinga bimvwama na makani makaka ma luzingu. (2 Tim. 2:3, 4, NWT) Ntiana Timote, ka tulendi’â tabika bivwama ko biatuwubakasa. “Ngolo za bungungu za bimvwama” zilendi wolesa luzolo lweto mu Yehova, matondo meto mu bungu dia Zu dia Nzambi na nsatu’eto ya zonzelaka dio kwe bantu bakaka. (Mat. 13:22) Tufweti bâ na luzingu lulembolo na nkaka mpe tufweti sarila ntangu’eto na ngolo zeto mu “tatamana [. . .] mu toko dinga Timfumu.”​—Mat. 6:22-25, 33, NWT.

17-18. Ngano nti tulendi sa mu kengerela tindiku tieto na Yehova?

¹⁷ Bâ wa kubama mu sala na manzangu. Tinwani tifweti tizabilaka nti kafweti sa mu tikengerela. Tala ti tuzololo takengerela bima bia tu hana Yehova, tufweti sarila manzangu mamansoni bu tumonaka misamu milendi tu natina mpasi. Ngano nti bilendi tu bakisa mu sarila manzangu? Tufweti tizabilaka bwe tu sa nkwamusu bu zitula.

¹⁸ Mu tifwani, tisari tia misitu tie na ndwenga, mbo titungaka mwa nzo ha ndeko musitu’andi ntete ntangu ya mvula ya tula. Mu bungu dia nti? Ngatu kaswama mu ntangu yi noka mvula. Beto mpe, tulendi dinga tatizabila mpila yi “tuswamina” peleko nti tusa tala ti tumweni misamu mia bunsuza, mia miangu na mia ba-aposta mu Internet peleko mu tele. Tala ti tukubamane mu misamu milendi tu turila, tulendi sarila manzangu mu kengerela tindiku tieto na Yehova na mu tatamana mu bâ ba verela ha meso mandi.​—Mik. 101:3; 1 Tim. 4:12.

19. Ntia tusakumunu tubaka tala ti tukengerele bima bia ntalu bia tu hana Yehova?

¹⁹ Tufweti kengerela bima bia ntalu bia tu hana Yehova, matieleka ma Bibila na bweso bwa longesa mo kwe bantu bakaka. Bu tusila bo, mbo tubâ na ngindu ya mbote, luzingu lwa mbote na nsayi ya bakisa bantu bakaka mu zaba Yehova. Na lubakusu lwa Yehova, mbo tulenda mu kengerela bio bi katulundisa.​—1 Tim. 6:12, 19.