Ntete kafwa, mu bungu dia nti Yezu katêla misamu mia tâ Davide mie mu Mikunga 22:1?

Mu misamu mia mansukina mia tâ Yezu ntete kafwa, mwe na misamu mi katâ mu Matie 27:46: ‘Nzambi’ani, Nzambi’ani, nti [kundiyambirikiri]?’ Bu katâ bo, Yezu walungisa misamu mia tâ titsoniki tia Mikunga Davide mu Mikunga 22:1. (Mak. 15:34) Ka wubâ musamu wa mbote ko mu banza ti tala ti Yezu ni bo katâ ni mu bungu ti wa nionga weri, peleko timinu tiamukondo. Yezu watomo bakula ka mu bungu dia nti kafweti fwila, mpe wazolo mu fwa. (Mat. 16:21; 20:28) Wazaba mpe mu ntangu ya lufwa lwandi, Yehova mbo kaketi bika mu mu kengerela. (Yobe 1:10) Ntiangu Yehova kabika mu kengerela Yezu ngatu katatamana mu songela tifu tiandi tia kwikama, ni bu sa ti lufwa lwandi lwa mpasi lwaketi bâ.​—Mak. 14:35, 36.

Buna, mu bungu dia nti Yezu katêla misamu mie mu verse yo ya Mikunga? Ni bu sa ti ka tutomono’â zaba ko, tataluzuleno mwa misamu milendi bangula kampe mu bungu dia nti katêla bo. *

Yezu bu katâ misamu mio, ngano mbo keri zolo songelaka ti Yehova ka keti’â mu kakula ko mu lufwa lwandi? Wafwanakana Yezu kafuta nkûlulu na kondo kwa lubakusu lwa Yehova. Muntu wa tinsuni weri, mpe wafwanakana kafwa mu bungu dia bantu babansoni.​—Ebr. 2:9.

 Bu katâ mwa misamu mia verse yo ya Mikunga, ngano Yezu wazolo ti bantu babanza mu misamu miamiansoni mie mu tikapu tio? Tifu tia Bayuda tieri mu simba bikapu bia Mikunga mu mutu. Bu beri bambukilaka verse yimosi ya Mikunga, lenda dieri nawu dia bambukila tikapu tiatiansoni tia Mikunga. Tala ti mabanza ni mo meri na Yezu, buna mbo kaketi bakisa milongoki miandi mia Bayuda, mu bambukila moyo mbikululu zazingi zitariri lufwa lwandi, ze mu kati dia tikapu tio tia Mikunga. (Mik. 22:7, 8, 15, 16, 18, 24) Mpe ku nsuka ya tikapu tio tia Mikunga, mbo bakembelaka Yehova mpe mbo bamuzonzelaka ntiana Mutinu wa mutoto wawansoni.​—Mik. 22:27-31.

Bu katâ misamu mio mia Davide, ngano Yezu mbo keri dingaka mu songela ti ka yirika musamu ko? Ntete bamuhonda, Yezu wakorela mfundusu ya bungungu yi bamukwikisila ti Nzambi kavweza. (Mat. 26:65, 66) Mfundusu yo yi basa mu ntinu-ntinu mu mpimpa, ka yeri’â kwelanaka na mitieno ko. (Mat. 26:59; Mak. 14:56-59) Bu kayula tiyuvu tio, kampe Yezu mbo keri dingaka mu songela ti ka yirika na kani musamu wa mbi ko, mpe ka wafwanakana ko bamuhonda.

Ngano Yezu mbo keri bambulaka bantu ti, ni bu sa ti Davide, we titsoniki tia tikapu tio tia Mikunga wamona mpasi, ka weri’â zolo tâka ko ti Yehova keri’â vutu mu tambulaka ko? Tiyuvu tia Davide ka tieri’â zolo tâka ko ti ka sâla na timinu ko. Bu kamana yula tiyuvu tio, watâ ti lukwikulu lweri nandi mu Yehova mu vukisa kanda diandi na mu tatamana mu sakumuna dio. (Mik. 22:23, 24, 27) Mpila mosi mpe, ni bu sa ti Yezu, “Mwana Davide,” wamona mpasi ha poto dia matimuna, ka weri’â zolo tâka ko ti Yehova keri’â vutu mu tambulaka ko.​—Mat. 21:9.

Ngano Yezu mpasi zi keri monaka keri zonzelaka, mu bungu ti Yehova keri’â vutu mu kengerelaka ko ngatu katomo songela ti wa kwikama weri? Ku mbatukulu ka dieri’â kani dia Yehova ko ti Mwana’andi wamona mpasi mpe wafwa. Musamu wo ha manima ma bukolo bwa Adame na Eva kwa wayizi bâ mfunu. Yezu ka yirika na kani musamu wa mbi ko, kâ wafwanakana kamona mpasi mpe kafwa mu hana mvutu mu biyuvu bia nata Satana na mu futa nkûlulu yeri mfunu mu kûla bima bia hombesa bantu. (Mak. 8:31; 1 Pi. 2:21-24) Ngatu musamu wo walungana, wafwanakana ti mu mbala ya ntete, kwabâ mwa ntangu Yehova yi kaketi lembo kengerela Yezu.

Ngano Yezu mbo keri yêlaka mu bakisa milongoki miandi, mu tûla mabanza mawu mu musamu Yehova wu kamubikila kafwila mu mpila yo? * Yezu wazaba ti lufwa lwandi, ntiana timpumbulu ha poto dia matimuna, mbo lwaketi sa ti bantu babingi batâ makuba. (1 Kor. 1:23) Tala ti milongoki miandi miatûla mabanza mawu mu musamu wa matieleka wa fwila Yezu, mbo baketi bakula nguria nsasa ya lufwa lwandi. (Nga. 3:13, 14) Mbo baketi zaba ti keri’â timpumbulu ko, kâ Muvukisi.

Ni bu sa ti ka tutomono’â zaba ko ka mu bungu dia nti Yezu katêla misamu mio, mbo keri bakulaka ti misamu mi keri bwabanaka na mio, luzolo lwa Yehova mieri lungisaka mu bungu dia yandi. Ntangu fioti ha manima, Yezu bu kamana tâ misamu mia verse yo ya Mikunga, watâ ti: “Wulungane!” (Za 19:30; Like 22:37) Wa matieleka, mwa ntangu Yehova yi kalembo mu kengerela, yabakisa Yezu mu lungisa misamu miamiansoni mi bamutambikila. Yamubakisa mpe mu lungisa misamu miamiansoni mi batsoneka ‘mu [Musiku] wa Mose, mu Bambikuri na mu Mikunga’ mu bungu dia yandi.​—Like 24:44.