1. Nti Yehova kamonaka kwe kanda diandi?

YEHOVA “kanda diandi dia kazololo.” (Mik. 149:4) Diangana musamu wo nkatika nsayi wututâka! Yehova mbo kamonaka bifu bieto bia mbote; lenda dieto, mpe mbo katubakisaka mu kwizi bâ ndiku zandi. Tala ti tutatamane mu bâ ba kwikama kwe Yandi, mbo katatamana mu bâ penepene na beto ntangu zazansoni!​—Za 6:44.

2. Mu bungu dia nti bantu bakaka bamonaka wo musamu wa mpasi mu kwikila ti Yehova bawu kazololo?

² Bantu bakaka balendi tâ ti: ‘Wa nzebi ti Yehova kanda diandi diadiansoni dia kazololo, kâ bwe ndendi bêla na lukwikulu ti Yehova meno kazololo?’ nti bilendi sa ti bantu bakaka batiyula tiyuvu tio? Oksana * wamona mpasi zazingi bu keri wa fioti, têle ti: “Nsayi yayingi yabâ nani bu nabatusu mpe bu nayizi bâ mupasuri-nzila. Kâ, ha manima ma mvula 15, nabatika mu bambukila misamu mia mbi miakunturila bu ndieri wa fioti. Nayizi banza ti Yehova keri’â vutu kuntambulaka ko, mpe mbo ndieri monaka ti ka nafwanakana ko kakunzolo.” Yua, mpangi ya yikento ye mupasuri-nzila, wabwabana mpe na misamu mia mpasi bu keri wa fioti, têle ti: “Nayizi tihana kwe Yehova mu bungu ti weri nani namutâ nsayi. Kâ, mbo ndieri kwikilaka ti kani kabwe ka lendi’â kakunzolo ko.”

3. Nti tutaluzula mu timoko ti?

³ Ntiana Bakristo ba kwikama batuzonzele ngabu yi, nge mpe Yehova Yandi tomono zolo, kâ lendi bâ na ntembe ti nge kazololo. Mu bungu dia nti fweti bêla na lukwikulu ti Yehova nge katomo kipaka? Mpe nti bilendi ku bakisa bu bâka na mbanzulu ti Yehova ka ku zololo’â ko? Tataluzuleno mvutu za biyuvu bio.

4. Mu bungu dia nti ntembe mu luzolo lwa Yehova ze za mbi?

⁴ Luzolo ngolo luhanaka. Tala ti lukwikulu lwe neto mu luzolo lwa Yehova na mu lubakusu lwandi, mbo wututuma mu mu sarila mu mutima’eto wawansoni ntono misamu mieto mia mpasi mia luzingu. Ku lweka lwakaka, tala ti ntembe ze neto ti Yehova beto kakipaka, ‘ka tubâ na ngolo zazingi ko.’ (Bin. 24:10) Tamana bâ ba nôka, mpe tala ti ka tusiri’â na timinu ko mu luzolo lwa Yehova, ka tubâ na lenda ko dia telamana Satana.​—Efz. 6:16.

5. Nti biaturila mpangi zakaka zeri na ntembe mu luzolo lwa Nzambi?

⁵ Ntembe zayizi petesa timpeve tia Bakristo bakaka ba kwikama ba mu ntangu ya beto. Mukuluntu we na nkumbu James têle ti: “Ni bu sa ti ku Betele ndieri salaka, mpe mu timvuka tia zu dia nzenza kwe meno ndieri samuninaka, mbo ndieri tiyulaka tala ti Yehova mbo keri yangalalaka mu misamu mi ndieri yirikaka mu bungu dia Yandi. Ha manima, nayizi tiyula tala ti tusambulu twani twa keri wâka.” Eva, we mu tisalu tia ntangu zazansoni têle ti: “Nayizi mona ti musamu wa mbi wena mu bâ na ntembe mu luzolo lwa Yehova, mu bungu ti mbanzulu za mpila yo mbo zisobesaka misamu miamiansoni mi lendi yirika mu tisalu tiandi. Mbo zisobesaka mpe nsatu zeto za misamu mia timpeve, mpe mbo zikatulaka nsayi’eto ya sarila Yehova.” Michael, we mupasuri-nzila wa ntangu zazansoni mpe we mukuluntu, têle ti: “Tala ti kukwikilaka ko ti Yehova nge kakipaka, mbo hambuka na Yandi.”

6. Nti tufweti sa mu ntangu yi tubâka na ntembe mu Luzolo lwa Nzambi?

⁶ Binsamu bio bisongele bwe mabanza ma mbi malendi bebesela timpeve. Ngano nti tufweti sa bu tubâka na ntembe mu luzolo lwa Nzambi? Tufweti kulu za losa! Lomba kwe Yehova kakubakisa mu yingasa mbanzulu zo za maniongo mu ‘tidzunu tia Nzambi tikeba mutima’aku na mbanzulu zaku.’ (Mik. 139:23; note; Flp. 4:6, 7, NWT) Mpe bambukaka ti, ka wena nge kaka ko mu bâ na mbanzulu zo. Mpangi zakaka za kwikama mbo zitelamanaka mbanzulu za mbi. Bisari bia Yehova bia mu ntangu ya ntama mpe biatelamana mbanzulu za mpila yo. Tataleno nti tulendi longoka mu tifwani tia ntumwa Paulo.

7. Ntia misamu Paulo keri na mio?

⁷ Ngano ntangu zakaka mbo monaka ti madema me naku mamingi mena, mpe kulendaka ko mu yirika misamu miamiansoni mi wayaka? Tala ti ni bo, mbo lenda mu bakula Paulo. Lwaka lweri nandi, ka mu bungu dia timvuka timosi’â ko, kâ mu bungu dia bimvuka biabiansoni. (2 Kor. 11:23-28) Ngano timbevo tie naku tivulu ku katulaka nsayi’aku? Paulo ‘lusende mu nitu’ lweri mu mwisaka mpasi, kampe timbevo tieri nandi, mpe weri nandi tiawa. (2 Kor. 12:7-10) Ngano ntangu zakaka mbo bâka wa nôka mu bungu dia misamu mi lembanaka mu yirika? Ntangu zakaka Paulo mpe ni bo keri monaka. Watitâ muntu wa bunsana, mu bungu ti mbo keri nwanaka mu yirika misamu mia sungama.​—Rom. 7:21-24.

8. Nti biabakisa Paulo mu telamana misamu miandi mia mpasi?

⁸ Ntono misamu mia mpasi minôkesaka mi kabwabana na mio, Paulo watatamana mu sarila Yehova. Ngano nti biamuhana ngolo mu sila bo? Ni bu sa ti wazaba ti muntu wa masumu weri, timinu tia ngolo tieri nandi mu nkûlulu. Kani dia Yezu ditâka ti ‘bô babansoni basarilaka timinu mu Yezu [. . .] mbo babaka luzingu lwa mankululu’ dia katomo zaba. (Za 3:16; Rom. 6:23) Wa matieleka, Paulo timinu tieri nandi mu nkûlulu. Mbo keri kwikilaka ti Yehova mbo katomo zoloko mu lemvokela bantu bayirika masumu ma manene tala ti basobele mabanza.​—Mik. 86:5.

9. Nti tuta longoka mu misamu mia tâ Paulo mie mu Bisi-Ngalate 2:20?

⁹ Paulo timinu mpe tieri nandi ti Nzambi watomo mu zolo mu bungu ti wahana Mwana’andi mu bungu dia yandi. (Tanga Bisi-Ngalate 2:20.) Tataleno mabanza matindisaka ha nsuka ya verse yo. Paulo watâ ti: ‘Mwana Nzambi [. . .] watomo kunzolo [watiheni] yandi beni, mu bungu dia meno.’ Paulo ka mona ko ti Nzambi ka lendi’â kamuzolo ko mu bungu ti wa nkatika wa mbi weri. Ka yizi’â bâ na mabanza ema ko: ‘Mbo nibakulaka mu bungu dia nti Yehova kazololoko mpangi zani, kâ ka lendi’â kakunzolo ko.’ Paulo wabambula Bisi-Rome ti: ‘Bu tweri kwa basumuki, Kristo wafwa mu bungu dia beto.’ (Rom. 5:8) Diangana luzolo lwa Nzambi ka lwena na ndilu ko!

10. Nti tuta longoka mu misamu mie mu Bisi-Rome 8:38, 39?

¹⁰ Tanga Bisi-Rome 8:38, 39. Paulo nkatika lukwikulu lweri nandi mu ngolo za luzolo lwa Nzambi. Watsoneka ti ‘ka kwena tima ko tilendi tu hambasa na luzolo lwa Nzambi.’ Paulo wazaba bwe Yehova kabongela kanda dia Israele na luvivululu lwalwansoni. Wazaba mpe bwe Yehova kamusongela tiari tia lemvokela. Misamu mia tâ Paulo, mu bukufi tulendi mia têla ebu: ‘Tûka Yehova ti katambikila  Mwana’andi mu bungu dia meno, ngano mfweti vutu bâ na ntembe mu luzolo lwandi?’​—Rom. 8:32.

11. Ni bu sa ti Paulo wayirika masumu ntiana ma bazonzele mu 1 Timote 1:12-15, mu bungu dia nti kabêla na lukwikulu ti Nzambi wamuzolo?

¹¹ Tanga 1 Timote 1:12-15. Kampe ntangu zeri kô Paulo zi keri fwemaka bu keri banzaka misamu mia mbi mi kayirika ntete kabâ Mukristo. Ntiangu wulembolo musamu wa nzitukulu bu katitâ ‘wa ntete mu bankwa-masumu!’ Ntete kazaba matieleka, Paulo wakwamisa Bakristo bu keri kwe ba dingi mu mahata mamansoni, watûla bakaka mu maboloko, mpe watambula ti bakaka babahonda. (Bis. 26:10, 11) Ngano lendi banza bwe Paulo keri monaka bu keri bwabanaka na ntwenia yeri Mukristo yi bahonda bibuti mu bungu ti yandi watambula babahonda? Paulo wanionga mu bungu dia misamu mia mbi mi kayirika, kâ wazaba ti ka keti’â soba misamu miayôka ko. Watambula ti Kristo wafwa mu bungu dia yandi, mpe na lukwikulu lwalwansoni watsoneka ti: ‘Mu bweso bwa Nzambi ndie bu bu ndiena.’ (1 Kor. 15:3, 10) Ntia malongi tuta baka? Fweti bâ na lukwikulu ti, Kristo wafwa mu bungu dia nge, mpe wasa ti wabaka bweso bwa bâ na tindiku tia ngolo na Yehova. (Bis. 3:19) Misamu mia mfunu kwe Yehova ni mio mi tuyirikaka bwawu bu na mu bilumbu bita kwiza, ka misamu mia mbi’â ko mi tayirika mu ntama, ni bu sa ti tûka ntama twe mbangi ya Yehova peleko kâni.​—Iza. 1:18.

12. Bwe 1 Za 3:19, 20 yitubakisila tala ti ebu tumonaka ka twena ntalu ko mpe ka batuzololo’â ko?

¹² Bu dimbitilaka ti Yezu wafwa mu bungu dia masumu maku, lendi kwizi tâ ti: ‘Ka nimonaka ko ti mfwanakane mu baka kabu dio dia ntalu.’ Mu bungu dia nti lendi bêla na mabanza mo? Mutima’eto wulembolo wa lunga wulendi tu wubakasa, wulendi sa ti tamona ti ka  twena ntalu ko, mpe ka batuzololo’â ko. (Tanga 1 Za 3:19, 20.) Mu ntangu za mpila yo, tufweti bambukaka ti ‘Nzambi yôkele mitima mieto.’ Ni bu sa ti ebu tumonaka ti Yehova ka tu zololo’â ko peleko ka tu lemvokela ko, Tata’eto dia ku mazulu beto kwa katiri zolo, mpe mbo katulemvokela. tufweti sarila ngolo mu kwikila ti Yehova beto kazololo. Mu sila bo, tufweti vulu longokaka Zu diandi, tufweti mu sambilaka ntangu zazansoni, mpe tufweti kutakanaka ntangu zazansoni na kanda diandi dia kwikama mu nsambululu. Mu bungu dia nti bima bio bie mfunu?

13. Bwe ndongokolo ya Zu dia Nzambi yitubakisilaka? (Tala kaku tie na mutu-diambu “ Bwe Zu dia Nzambi dibabakisilaka.”)

¹³ Longokaka Zu dia Nzambi bilumbu biabiansoni, mpe mbo kwizi tomo bakula bifu biabingi bia toma bia Yehova. Mbo kwizi bakula ti nge katomono zolo. Wamana tomo dimbitilaka mu Bibila bilumbu biabiansoni, lendi kwizi bâ na mabanza ma nguria ma delakana, mbo ‘sungika’ mbanzulu zaku na mutima’aku. (2 Tim. 3:16) Mukuluntu we na nkumbu Kevin, weri monaka ti kabâ ntalu ko, têle ti: “Bu natanga mpe bu nadimbitila Mikunga 103, nayizi baka lubakusu mu sungika mpila’ani ya banza, mpe nayizi bakula bwe Yehova kakumbongelaka mu matieleka.” Eva, wu tutokolo zonzela, têle ti: “Ku nsuka ya tilumbu, mbo nibongaka ntangu mu banza nti biyôkele mfunu kwe Yehova. Tifu tio mbo tisaka ti nabâ na tidzunu tia mutima, mpe timinu tiani mbo tiyikamaka ngolo.”

14. Bwe lusambulu lulendi tu bakisila?

¹⁴ Sambilaka ntangu zazansoni. (1 Tes. 5:17) Tala ti zololo wabâ ndiku na muntu, wufwanakane wavulu zonzaka nandi mpe wamutêlaka ka bwe monaka ku mutima. Mpila mosi kwa mpe na tindiku tieto na Yehova. Bu tumutêlaka mbanzulu zeto za ku mutima na maniongo meto mu lusambulu, mbo tusongelaka ti lukwikulu lwe neto mu Yandi mpe tuzebi ti beto kazololo. (Mik. 94:17-19; 1 Za 5:14, 15) Yua, wu tutokolo zonzela, têle ti: “Bu nisambilaka Yehova, ka nisukinaka ko kwa mu mu têla misamu mikunturiri mu tilumbu. Mbo nimuziburilaka mutima’ani, mpe mbo nimutêlaka misamu mi nimonaka ku mutima. Malembe-malembe, ka nikwizi’â monaka Yehova ntiana mfumu ya tisalu ko, kâ ntiana Tata ditomono zolo bala bandi.”​—Tala kaku tie na mutu-diambu “ Ngano dia weka tanga?”

15. Ngano bwe Yehova katusongelaka luzolo lwandi?

¹⁵ Kutakanaka na ndiku za kwikama; mpangi zo kabu diena dia Yehova. (Zaki 1:17) Tata’eto dia ku mazulu mbo kasongelaka ti muna muntu mu beto kazololo bu katuhanaka kanda dia timpeve dia bampangi ‘basongelaka  luzolo ntangu zazansoni.’ (Bin. 17:17) Mu mukanda’andi kwe Bisi-Kolose, Paulo wazonzela Bakristo bakaka bamubakisa, mpe wabatâ “lubakusu lutindisaka.” (Kol. 4:10, 11, NWT) Yezu Kristo mpe, nsatu lubakusu yeri nandi mpe watonda mu bungu dia lubakusu lu kabaka kwe ndiku zandi, bambazi na bantu.​—Like 22:28, 43.

16. Bwe ndiku za kwikama zilendi tu bakisila mu pusana kwe Yehova?

¹⁶ Ngano mbo dingaka, mpe mbo tambulaka lubakusu lwa ndiku zaku za mu timvuka? Bu tuzonzelaka mabanza meto kwe ndiku ya yela, ka wuta zolo tâ ko ti timinu tia fioti tie neto; kâ wulendi tu kengerela. James wu tutokolo zonzela, têle ti: “Tindiku tia mbote na Bakristo ba yela tiatomo kumbakisa. Mabanza ma mbi bu makunzungasaka mutu, ndiku zo za ntalu mbo zikungwirikilaka na luvivululu lwalwansoni, mpe mbo zikuntêlaka ti meno bazololo. Bu basilaka bo, mbo nibakulaka ti Yehova meno kazololo, mpe meno kakipaka.” Diangana mfunu wena mu kurisa na mu simbirila tindiku tia ngolo na mpangi zeto za timpeve!

17-18. Nani tufweti wirikila, mpe mu bungu dia nti?

¹⁷ Satana zololo ti tabika mu sarila misamu mia sungama. Zololo ti takwikila ti Yehova ka tu zololo’â ko, mpe ka wufwanakane’â ko ti Yehova katuvukisa. Kâ ntiana bu tumweni, miamiansoni mio ka miena mia matieleka ko.

¹⁸ Yehova nge kazololo. Nkatika ntalu wena ha meso mandi. Tala ti mu tumamane, mbo “tatamana mu bâ mu luzolo lwandi” ntangu zazansoni, ntiana bwa sa Yezu. (Za 15:10, NWT) Buna, kuwirikilandi Satana peleko mutima’aku wukusembaka. Kâ, wirikila Yehova monaka misamu mia mbote kwe muna muntu mu beto. Bâ na lukwikulu ti “kanda diandi dia kazololo,” na nge mpe mu kati!