1-2. a) Ntumwa za zitatu za Yezu ntia ntumunu zabaka, mpe nti zasa? b) Nti tutaluzula mu timoko ti?

HA MANIMA ma pake ya muvu wa 32 M.B., ntumwa Piere, Zaki, na Za babâ bambangi ba timona-meso tia nzitukulu. Ha zulu mongo watomo zangama kampe mongo wa Hermone, Yezu watituka ha meso mawu. ‘Diri tiandi tiayizi [kenga] ntiana ntangu. Binkuti biandi biayizi miamia ntiana mutsamina.’ (Mat. 17:1-4) Ku nsuka ya timona-meso, bawâ Zu dia Nzambi dia tâ ti: ‘Wu ni Mwana’ani, wu ntomono zolo, [. . .] wu ntamburi, mu wirikileno.’ (Mat. 17:5) Ntumwa zo za zitatu zasongela mu ndiatulu’awu ti bawirikila Yezu. Tuzololo talanda tifwani tiawu.

² Mu timoko tiayôkele talongekele ti wirikila Yezu wuzololo tâ ti tufweti bika mu yirika misamu miakaka. Mu timoko ti mbo tutaluzula misamu miole mia tâ Yezu mi tufweti yirika.

3. Tintwari na Matie 7:13, 14, ngano nti tufweti sa?

³ Tanga Matie 7:13, 14. Yezu wazonzela mielo miole mia swaswana minataka ku nzila zole za swaswana, mosi wa “munene” mpe wakaka wa “mfinka.” Ka kwena nzila ya ntatu ko.  Beto beni tufweti sola ka ntia nzila tudiatila. Yo ni nzengolo yiyôkele mfunu yi tulendi bonga mu bungu ti nzila yimosi kwa yinataka ku luzingu lwa mankululu.

4. Bwe lendi zonzela nzila ya “yinene”?

⁴ Tufweti zabaka luswaswanu lwe ha kati dia nzila zo za zole. Bantu babingi bê mu nzila ya “yinene.” Musamu wa tiari ni wena’eti bantu babingi batatamanaka mu diatila mu nzila yo mpe basolaka mu landa misamu mi yirikaka bantu badiatilaka mu nzila yo. Ka babakulaka ko ti muntu wudingaka ti bantu badiatila mu nzila yo ni Satana Diabulu, mpe ku lufwa yinataka.​—1 Kor. 6:9, 10; 1 Za 5:19.

5. Bantu bakaka ntia ngolo basarila mu baka nzila ya “mfinka,” mpe bwe basa mu batika mu diatila mu nzila yo?

⁵ Mu bungu dia nzila ya “mfinka” Yezu watâ ti bantu ka babingi’â ko babakaka yo. Mu bungu dia nti? Musamu wa mbote ni wena’eti, mu verse yita landa, Yezu walwengesa milongoki miandi mu mbikuri za bungungu. (Mat. 7:15) Bantu bakaka mbo batâka ti mabundu mamingi me kô, mpe mamîngi mbo matâka ti matieleka malongesaka. Mu bungu ti mabundu mamingi me kô, bantu babingi baniongaka peleko babâka na mabanza yeko-yeko, mpe ka badingaka nzila yinataka ku luzingu ko. Kâ nzila yo bantu balendi ya baka. Yezu watâ ti: ‘Lwamana [tumama mu] zu diani, wa matieleka, mbo lubâ milongoki miani. Mbo luzaba mpe butieleka, butieleka mpe mbo buluhana timpwanza.’ (Za 8:31, 32) Musamu wa mbote wena bu walembolo sa ntiana bu saka bantu babingi; kâ wadingiri mu zaba matieleka. Musamu wakaka, wabatikiri mu sa ndongokolo ya Zu dia Nzambi na bunsungu bwabwansoni ngatu wazaba mio mi kalombaka mu beto, mpe wawirikiri ndongosolo za Yezu. Musamu wakaka, walongokele ti Yehova zololo ti talosa ndongosolo za mabundu ma bungungu, mpe tabika nsalulu na malaki ma mabundu mo. Wavutulu longoka mpe ti ka wena musamu wa fioti ko mu yirika misamu mi tu lombaka Yehova na mu bika nsalulu zi kalembo tambulaka. (Mat. 10:34-36) Kampe ka wabêle’â musamu wa fioti ko kwe nge mu sa nsobolo zifwanakane. Kâ watatamane mu bungu ti Tata’aku die ku mazulu dia zololo mpe zololo mu mu tâ nsayi. Mbo kayangalalaka mu bungu dia nge!​—Bin. 27:11.

6. Tintwari na Mikunga 119:9, 10, 45, 133, nti bilendi tu bakisa mu tatamana mu diatila mu nzila ya mfinka?

⁶ Ngano nti bitubakisa mu tatamana mu diatila mu nzila ya mfinka? Tabongeno tifwani. Mu nsi zakaka mbo batûlaka bikaku mu nzila za mfinka ziyôkeleka ha zulu mongo mu kengerela tinati na kaminio’andi. Tikaku tio mbo tibakisaka tinati mu lembo pusana ha sukisini nzila na mu lembo losa kaminio. Diangana, binati biabîngi ka biniongaka ko mu bungu dia tikaku tio! Mitieno mia Yehova mie mu Bibila, miena ntiana tikaku tio. Mbo mitubakisaka mu tatamana mu diatila mu nzila ya mfinka.​—Tanga Mikunga 119:9, 10, 45, 133.

7. Bwe bantwenia bafweti mwinaka nzila ya mfinka?

⁷ Bantwenia, ngano mbo lubanzaka ti, ka lwena na timpwanza ko bu lulandaka mitieno mia Yehova? Satana zololo ti lwabanzilaka bo. Zololo ti lwatûla mabanza meno mu misamu mi yirikaka bantu badiatilaka mu nzila ya yinene, bamonekenaka ntiana bawu bê na nsayi ya luzingu. Lendi sarila misamu mi yirikaka bampwana’eno ku lukolo peleko mi lumonaka mu Internet, mu lusongela  ti bima bie kô luhombesaka bilendi lu tâ nsayi. Satana zololo ti lwabanza ti mitieno mia Yehova mbo milukabakasa mu tomo mona nsayi ya luzingu. * Kâ bambukakeno ti: Satana ka zololo’â ko ti bantu badiatilaka mu nzila’andi babakula ti ku lufwa kwa yinataka. Yehova Yandi, watomo songela misamu mi ta kêla bantu bô badiatilaka mu nzila yinataka ku luzingu.​—Mik. 37:29; Iza. 35:5, 6; 65:21-23.

8. Ngano bantwenia nti balendi longoka mu tifwani tia Olaf?

⁸ Dimbitila’eti mu misamu mi lendi longoka mu tifwani tia ntwenia yimosi ya bakala ye na nkumbu Olaf. * Bampwana’andi ba beri kotaka bamusa tiya ngatu kasa bunsuza. Bu katâ ti Mbangi za Yehova mitieno mia ndiatulu mia Bibila balandaka, bala ba bakento  ba keri kotaka na bo bamutebesa, mpe badinga mu mu wisa mu vukasa nandi nitu. Kâ, Olaf watatamana mu yirika misamu mia sungama. Musamu ka ni wo wo’â ko kwa beri mu silaka tiya. Olaf têle ti: “Profesere zani mbo zeri kuntêlaka ti nafweti kwenda ku universite mu bungu ti bantu mbo bakunzitisa. Bakuntêla ti tala ti kâni ka naketi’â lenda luzingu lwani ko.” Ngano nti biabakisa Olaf mu telamana tiya to? Têle ti: “Nayizi kurisa tindiku tia ngolo na mpangi ze mu timvuka. Mpangi zo zayizi bâ kanda diani. Nayizi batika mu tomo longokaka Bibila na bunsungu bwabwansoni. Bu ndieri kwe tatamane mu tomo kwe longoke, nayizi tomo vutu kwikila ti matieleka nabaka. Ha manima, nabonga nzengolo ya tatamana mu sarila Yehova.”

9. Bantu bazololo mu diatila mu nzila ya mfinka nti bafweti sa?

⁹ Satana zololo ti kakukatula mu nzila yinataka ku luzingu. Zololo ti walanda bantu babîngi badiatilaka mu nzila ya yinene ‘yinataka ku mfukulu.’ (Mat. 7:13) Kâ, mbo tutatamana mu diatila mu nzila ya mfinka tala ti tutatamane mu wirikila Yezu na mu bongelaka nzila yo ntiana tima titukengerelaka. Bwawu bu tataluzuleno tima tiakaka tia tu lomba Yezu mu yirika.

10. Tintwari na Matie 5:23, 24, ngano ntia tima Yezu katulomba mu yirika?

¹⁰ Tanga Matie 5:23, 24. Yezu wazonzela musamu weri nkatika mfunu kwe Bayuda ba kwikama beri mu wirikilaka. Banza’eti muntu we wa kubama ku Tempelo mu hana tibulu mu mukayulu kwe Nganga-Nzambi. Tala ti mu ntangu yo bambukiri ti musamu we nandi na mpwana’andi, fweti toko sisa mukayulu’andi mu kwenda kwe mpwana’andi. Mu bungu dia nti? Ntia tima tiyôkele mfunu yôka mukayulu wu tuhana kwe Yehova? Yezu watomo tâ ti: ‘Yenda lwatoko wisana na mpwana’aku.”

11. Ngano Yakobe nti kasa mu sa tidzunu na yaya’andi.

¹¹ Tulendi baka malongi ma mbote mu mpila ya sila tidzunu, bu tutaluzula musamu watula mu luzingu lwa Yakobe. Yakobe bu kaye yôkesa mvula 20 ku mbuka yakaka, Nzambi mu nzila ya mbazi, wamulomba mu kâla ku mbuka yi kabutukila. (Mba. 31:11, 13, 38) Kâ, musamu weri kô. Yaya’andi Ezawu kani dieri nandi dia mu honda. (Mba. 27:41) Mu bungu dia musamu wo, Yakobe bunkuta bwabwingi bweri nandi na lwaka. (Mba. 32:7) Ngano Yakobe nti kasa mu sa tidzunu na yaya’andi? Ntete-ntete, wasambila Yehova mu bungu dia musamu wo. Ha manima, watambika kabu kwe Ezawu. (Mba. 32:9-15) Mpe Yakobe, bu kamona Ezawu, wamusongela buzitu. Ka sukisina ko kwa mu fukama ha meso ma Ezawu mbala mosi peleko mbala zole, kâ mbala nsambwari! Na kuluka mpe na buzitu bwabwansoni, Yakobe wasa tidzunu na yaya’andi.​—Mba. 33:3, 4.

12. Ntia malongi tuta baka mu tifwani tia Yakobe?

¹² Mbo tubakaka malongi mu mpila Yakobe yi kakubamana mu bwabana na yaya’andi Ezawu. Na kuluka kwakwansoni. Yakobe walomba lubakusu kwe Yehova. Ha manima, wasarila misamu mi kalomba bu kasa miamiansoni mi kalenda mu sa tidzunu na yaya’andi. Bu babwabana, Yakobe ka dinga ko mu zaba ka nani weri na mpemba peleko kâni. Kani dieri nandi, ni mu sa tidzunu na yaya’andi. Bwe tulendi landila tifwani tia Yakobe?

13-14. Tala ti tufwemese mpangi’eto, nti tufweti sa?

¹³ Beto tukwe diatiri mu nzila ya luzingu,  mbo tuzoloko mu bâ mu tidzunu na mpangi zeto. (Rom. 12:18) Nti tufweti sa bu tubakulaka ti mpangi ye kô tufwemese? Ntiana Yakobe, tufweti sambila Yehova na bunsungu bwabwansoni. Tulendi mu lomba mu sakumuna ngolo zi tusarila mu sa tidzunu na mpangi’eto.

¹⁴ Tufweti bonga mpe ntangu ya titaluzula. Tulendi tiyula biyuvu ebi: ‘Ngano wa kubama ndiena mu tûla lulendo lwani ha ndeko, mu lomba mulemvo na kuluka kwakwansoni ngatu nasa tidzunu? Ngano Yehova na Yezu bwe bamona tala ti mbongele nzengolo ya sa tidzunu na mpangi’ani?’ Mvutu zeto zilendi tu tuma mu wirikila Yezu na mu monekena mpangi’eto na kuluka kwakwansoni ngatu tasa tidzunu. Mu musamu wo, tulendi landa tifwani tia Yakobe.

15. Bwe mutieno we mu Bisi-Efeze 4:2, 3 wulendi tu bakisila mu sa tidzunu na mpangi’eto?

¹⁵ Banza’eti, ngano misamu mbo miaketi yôkela mu mpila ya mbote tala ti Yakobe wasarila lulendo bu kabwabana na yaya’andi? Kampe kâni. Mu ntangu yi tukwe talaka mpangi’eto mu yirika musamu we neto, tufweti bâka ba kuluka. (Tanga Bisi-Efeze 4:2, 3.) Bingana 18:19 mbo yitâka ti: “Mpangi yi bafwemese, misamu mia ngolo mibâka nandi yôka mumvuka wa ngolo; mbakananu ze kô ze ntiana miti mi bakangilaka mbuka ya ngolo yikengerelaka.” Bu tulombaka mulemvo kwe muntu wulendi mu bakisa mu sa ti tidzunu na beto.”

16. Ntia musamu tufweti banzaka, mpe mu bungu dia nti?

¹⁶ Tufweti tomo banzaka mpe misamu mi tutâ kwe mpangi’eto na mu mpila yi tutêla mio. Bu tumana kubama, tufweti kwe monekena muntu wu tufwemese na kani dia vutu karisa tindiku tia mbote na yandi. Ha mbatukulu, lendi tu têla misamu mia ngolo mitusa mpasi. Mbo wubâ musamu wa fioti mu baka nkesi peleko mu songela ti ni beto twe na mpemba, kâ tamana sila bo, ngano mbo tusa tidzunu? Kâni. Bambukaka ti sa tidzunu na mpangi’aku wutomono yôka mfunu na zaba ti ka nani we na mpemba peleko kâni.​—1 Kor. 6:7.

17. Nti lendi longoka mu tifwani tia Gilbert?

¹⁷ Mpangi yimosi we na nkumbu Gilbert wasarila ngolo zazingi mu singasa tidzunu. Têle ti: “Ka tweri’â tomo wisanaka ko na  mwana’ani wa mukento. Kampe mvula zole zike nayôkesa mu mu zonzela na buzitu bwabwansoni, mpe mu tidzunu ngatu tavutu karisa tindiku tieto.” Ngano Gilbert nti kavutu sa? “Ntete nazonza na mwana’ani, nasambila mpe nabambuka ti ka nafweti’â baka nkesi ko tala ti têle misamu mia mbi. Nafweti bâ wa kubama mu lemvokela. Nalongoka mu lembo tinwaninaka mu bâ na mpemba, mpe nayizi bakula ti nafweti singasa tidzunu.” Ngano ntia ndandu zamoneka? Gilbert têle ti: “Lumbu ti tidzunu tia mutima tie nani mu bungu dia tindiku tia mbote tie nani na bantu babansoni ba kanda diani.”

18-19. Tala ti muntu fwemese ntia nzengolo fweti bonga, mpe mu bungu dia nti?

¹⁸ Ngano ntia nzengolo fweti bonga tala ti bakuri ti mpangi yakaka ya Mukristo fwemese? Landa malongi ma Yezu matutindisaka mu sa tidzunu. Zonzela musamu wo kwe Yehova, mpe sikirila lubakusu lwa mpeve santu’andi mu sa tidzunu. Bu sila bo, mbo bâ mu nsayi, mpe mbo kwizi mona ti Yezu ta wirikila.​—Mat. 5:9.

¹⁹ Mbo tutomo tondaka Yehova tu hanaka lutwalusu lwa luzolo mu nzila ya mfumu ya timvuka, Yezu Kristo. (Efz. 5:23) Ntiana ntumwa Piere, Zaki na Za, bika tabonga nzengolo ya ‘wirikila Yezu.’ (Mat. 17:5) Tumweni ka nti tufweti sa mu sa tidzunu na mpangi ya Mukristo yi tufwemese. Bu tusarila malongi ma tubakiri, mpe bu tutatamana mu diatila mu nzila ya mfinka yinataka ku luzingu, mbo tubaka tusakumunu bwawu bu, mpe na nsayi yilembolo nsuka mu bilumbu bita kwiza.