1. Ntia musamu milongoki mia Yezu mialonga kwe pôka dia bantu mu yirika?

PÔKA dia bantu dia babakala na bakento batûka mu nsi zazingi mpe beri zonzaka mazu ma swaswana bakutakana. Musamu wa nzitukulu wayilama muna lumbu tîna. Tikunku tia Bayuda tiayizi bâ na lenda dia zonza mu mazu ma bantu bo batûka mu nsi zazingi! Musamu wo wa nzitukulu weri kwe pôka dio dia bantu, kâ Bayuda bo ntia misamu beri ba têlaka, mpe ntumwa Piere ntia musamu wayôka nzitukulu katâ? Bantu bo balongoka ti mbo baketi baka mvukulu bu baketi sarila timinu tiawu mu Yezu Kristo. Musamu wo watomo ba simba mutima, mpe wasa ti bayula tiyuvu eti: “Bwe tufweti sa?” Mpe Piere wabavuturila ti: “Muna muntu mu beno kabatusu.”​—Bis 2:37, 38.

2. Nti tutaluzula mu timoko ti? (Tala tifwani ha tinima tia ntete.)

² Misamu mialanda mpe mia nzitukulu mieri. Kampe bantu 3 000 bayizi batusu mu tilumbu tio, mpe bayizi bâ milongoki mia Kristo. Yo yeri mbatukulu ya tisalu tia tinene tia kubika milongoki tia tuma Yezu kwe milongoki miandi. Tii lumbu ti milongoki miandi mbo misalaka tisalu tio. Mu ntangu yi ya beto ka tulendi’â tabakisa muntu ko mu batusu mu tilumbu timosi. Tulendi yôkesa ngonda zazingi, muvu wumosi peleko mivu miamingi ngatu mulongoki kalungisa kani dio. Tala ti na muntu longokaka Bibila, wa tomono zaba ti tisalu tiatingi tifwanakane mu sala mu bakisa muntu mu kwizi bâ mulongoki wa Kristo. Mu timoko ti, mbo tutaluzula misamu mi lendi sa mu kwizi bakisa mulongoki’aku wa Bibila mu batusu.

3. Tintwari na Matie 28:19, 20, ngano mulongoki nti wufweti sa mu batusu?

³ Ntete kabatusu, mulongoki wa Bibila wufweti sarila misamu mi longesaka Bibila. (Tanga Matie 28:19, 20.) Mulongoki bu wusarilaka misamu mi kalongokaka, mbo kakwizi bâka ntiana muntu wa mayela wa zonzela Yezu mu tifwani tiandi, watunga nzo ha zulu tari. (Mat. 7:24, 25; Like 6:47, 48) Bwe tulendi bakisila mulongoki mu sarila mio mi kalongokaka? Tazonzeleno misamu mitatu.

4. Bwe tulendi bakisila mulongoki mu sarilaka ngolo bilumbu biabiansoni ngatu kabatusu? (Tala mpe kaku tie na mutu-diambu “ Bakisa mulongoki’aku mu bâ na makani na mu lungisa mo.”)

⁴ Bakisa mulongoki mu bâ na makani. Mu bungu dia nti fweti sila bo? Tabongeno tifwani: Tala ti nzietolo ya yila tasa mu kaminio, lendi vulu kwe kangame mu mbuka za toma mu nzila. Buna kunôka ko mu bungu ti mbo mona ti titini tisiri naku ka tiena tia tila ko. Mpila mosi mpe, mulongoki wa Bibila wamana bâ na makani ma kalendi lungisa ho nkatika bendo, mbo kamona ti kani dia baka bateme ka diena mpasi ko mu lungisa. Sarila kaku tie na mutu-diambu “Kani” tie mu buku dia Bâ mu nsayi ntangu zazansoni! Bakisa mulongoki’aku ngatu kabâ na makani. Ha nsuka ya muna timoko, zonzeleno kani dilendi bakisa mulongoki’aku mu sarila misamu mi kalongokele. Tala ti kani diakaka die naku mu bungu dia mulongoki’aku, tsoneka dio ha mbuka yi batsonekene “Kani diakaka.” Vulu sarilaka titini tio tia ndongokolo, ngatu wataluzulaka na mulongoki’aku makani ma kalendi lungisa ho nkatika bendo na ma kalendi lungisa ku matu.

5. Tintwari na Marke 10:17-22, nti Yezu kalomba kwe mvwama yimosi, mpe mu bungu dia nti?

⁵ Bakisa mulongoki’aku mu sa nsobolo mu luzingu lwandi. (Tanga Marke 10:17-22.) Yezu wazaba ti mbo waketi bâ musamu wa mpasi kwe mvwama yimosi mu teka bimvwama biandi biabiansoni. (Mak. 10:23) Kâ Yezu watêla bakala dio mu sa nsobolo za zinene mu luzingu lwandi. Mu bungu dia nti? Mu bungu ti Yezu  yandi kazolo. Ntangu zakaka, mbo tulembanaka mu tindisa mulongoki mu sarila misamu mi kata longoka mu bungu ti mbo tumonaka ti kena wa kubama ko mu sa nsobolo zifwanane. Ntangu yayingi yidinganaka kwe bantu bakaka mu katula bifu bia ntama na mu lwata timuntu tia môna. (Kol. 3:9, 10) Kâ lwamana kulu zonzela musamu wu kafweti sila nsobolo, mulongoki wulendi kulu batika mu sa nsobolo. Bu lusa timoko tia mpila yo, mbo songela ti yandi kipaka.​—Mik. 141:5; Bin. 27:17.

6. Mu bungu dia nti tufweti yulaka mabanza ma mulongoki?

⁶ Musamu wa mfunu wena mu yula mabanza ma mulongoki mu misamu mi kata longoka. Biyuvu bio mbo bitubakisa mu zaba misamu mi bakulaka mulongoki na nkwikulu zandi. Wamana vulu silaka bo, mbo wubâ musamu wa fioti mu zonzela misamu mi bâka mpasi kwe yandi mu tambula. Mu buku dia Bâ mu nsayi ntangu zazansoni! biyuvu bi bayurilaka mabanza ma mulongoki biabingi bie mo. Mu tifwani, mu timoko tia 04 mwe na tiyuvu: “Ngano Yehova bwe kamonaka bu sarilaka nkumbu’andi?” Mpe mu timoko tia 09 mwe na tiyuvu: “Ntia misamu zololo wasambirilaka?” Ku mbatukulu, wulendi bâ musamu wa mpasi kwe mulongoki’aku mu hanina biyuvu bio mvutu. Lendi mu bakisa kasarila verse na bifwani bia buku mu hana mvutu.

7. Bwe lendi tomo sarila bimbangi na binsamu bia bantu?

⁷ Mulongoki’aku bu wumana bakula nti kafweti sa, sarila bimbangi na binsamu bia bantu mu mu tindisa. Mu tifwani, tala ti mulongoki’aku ka kwizaka ntangu zazansoni ko ku tukutakanu, lendi mu songela video ye na mutu-diambu, Yehova wakunkipa ye mu timoko tia 14 mu kaku tie na mutu-diambu “Zaba biakaka.” Mu bimoko biabîngi bia buku dia Bâ mu nsayi ntangu zazansoni! mbo baka bimbangi na binsamu bia mpila yo mu kaku tia “Yika ndilu” peleko tia “Zaba biakaka.” * Sa keba mu fwanakasa mulongoki’aku na muntu wakaka bu bâ na nzonzolo eyi: “Tala ti yandi bwa kasa, nge mpe lendi bwa sa.” Bika mulongoki yandi beni kabanzila bo. Kâ zonzeleno mabanza ma nguri mabakisa muntu wa mu video mu sarila ndongosolo za Bibila. Lendi zonzela verse ya mfunu peleko musamu wa mfunu wa yirika muntu wa mu video. Ntangu zazansoni, tala ti bulendi bâ tomo singasa mpila Yehova yi kabakisila muntu wo.

8. Bwe tulendi bakisila milongoki mieto mu zolo Yehova?

⁸ Bakisa mulongoki’aku mu kwizi zolo Yehova. Ngano bwe lendi bwa sila? Dinga misamu mimubakisa mu mona bifu bia Yehova. Bakisa mulongoki’aku mu bakula ti Yehova Nzambi ya nsayi yena yibakisaka bô bamuzololo. (1 Tim. 1:11; Ebr. 11:6) Songela mulongoki ti mbo kabaka ndandu bu kasarila misamu mi kata longoka, mpe mu bangurila ti ndandu zo mbo zisongelaka ti Yehova Yandi kazololo. (Iza. 48:17, 18) Mu ntangu mulongoki’aku kakwe yiki luzolo lwandi mu Yehova ngolo, mbo kakwizi zolo mu sa nsobolo zifwanakane.​—1 Za 5:3.

9. Tintwari na Marke 10:29, 30, nti bilendi bakisa muntu mu hombesa bima ngatu kabatusu?

⁹ Mulongoki wa Bibila wufweti tambula mu hombesa bima biakaka tala ti zololo kabatusu. Ntiana mvwama yi tutokolo zonzela, milongoki miakaka mifweti hombesa bima biawu. Tala ti bisalu biawu ka bikwelanaka na mitieno mia Bibila ko, kampe bafweti bia soba. Kampe  babingi bafweti bika bindiku biawu na bantu balembolo zolo Yehova. Bakaka mpe balendi ba yambirika kwe bantu ba kanda diawu balembo zoloko Mbangi za Yehova. Yezu wazaba ti, wulendi bâ musamu wa mpasi kwe bantu bakaka mu tambula misamu mio. Kâ, wakanisina kwe bô bamulanda ti ka banionga ko. Yehova mbo kabasenda bu kabahana kanda dia timpeve dia luzolo. (Tanga Marke 10:29, 30.) Bwe lendi bakisila mulongoki’aku wa Bibila mu baka kabu dio dia toma?

10. Ntia musamu ta longoka mu tinsamu tia Manuel?

¹⁰ Sa tindiku na mulongoki’aku. Musamu wa mfunu wena mu songela kwe mulongoki’aku ti yandi kipaka. Mu bungu dia nti? Tazonzeleno misamu mia tâ Manuel, bâka ku Mexique. Bu kata bambukila ntangu yi keri longokaka Bibila, têle ti: “Ntangu zazansoni, ntete tabatika ndongokolo, mulongi’ani mbo keri kundiyulaka: ‘Bwe kwa batêle?’ Wakumbakisa mu lembo bâ na lwaka, na mu mu ziburila mutima’ani mu misamu miakaka. Nayizi bakula ti, meno keri tomo belokelaka lwaka.”

11. Ngano milongoki mieto ntia ndandu milendi baka bu bayôkesaka ntangu na beto?

¹¹ Yôkesaka ntangu na milongoki miaku ntiana Yezu bu keri yôkesaka ntangu na milongoki miandi. (Za 3:22) Tala ti bufwanakane, tikisa mulongoki’aku wa Bibila ku nzo mu kabana tima tia dia peleko mu tala télédiffusion ya ngonda. Mulongoki’aku mbo katomo zolo wamutikisa nsungula mu ntangu ndiku zandi na kanda diandi yi badiaka malaki ma dibundu dia bungungu, mpe yi kalendi mona ti yandi kaka kwa wena. Kazibwe bâka ku Ouganda, têle ti: “Mbo nita banza ti misamu mingi ndieri longokaka mu Yehova mu ntangu yi ndieri yôkesaka na mulongi’ani yôka mu ntangu ya ndongokolo’eto.” Vutulu tâ ti: “Namona ka bwe Yehova kakipilaka kanda diandi, mpe ka bwe die na nsayi. Mpe ni bo ndieri dingaka luzingu lwani lwabâ.”

12. Mu bungu dia nti tufweti natinaka bisamuni bia swaswana bu tukwe twarisaka ndongokolo ya Bibila?

¹² Nataka bisamuni bia swaswana bu kwe twarisa ndongokolo ya Bibila. Ntangu zakaka  tulendi mona ti bubote bwingi mu kwe twarisa ndongokolo ya Bibila beto kaka, peleko mu lembo soba mpangi yituturisa. Ni bu sa ti musamu wa mbote wena kwe beto mu sila bo, tamana nataka bisamuni bia swaswana, mbo tubakisa mulongoki’eto. Dmitrii bâka ku Moldavie, têle ti: “Bisamuni biabiansoni bieri kwizaka ku ndongokolo’ani, mbo beri bangulaka misamu mu mpila za swaswana. Misamu mio miakumbakisa mu bakula misamu mi tweri longokaka mu mpila zazingi. Ka nayizi’â bâ na bunkuta ko mu ntangu yi nayenda ku lukutakanu mu mbala ya ntete, mu bungu ti natizabila mpangi zazingi.”

13. Mu bungu dia nti tufweti bakisilaka milongoki mieto mu kwizaka ku tukutakanu?

¹³ Bakisa mulongoki’aku mu kwizaka ku tukutakanu twa timvuka. Mu bungu dia nti? Mu bungu ti Yehova mbo kalombaka kwe bisari biandi biakutakanaka; musamu wo, mu nsambululu’eto wena. (Ebr. 10:24, 25) Mpe, mpangi zeto, kanda dieto dia timpeve diena. Bu tubâka nawu ku tukutakanu, mbo wubâka ntiana beto tuta dia nawu bima bia toma ku nzo. Tala ti bakisi mulongoki’aku wa Bibila mu kwizaka ku tukutakanu, mbo mu bakisa mu sa tima tia nkatika mfunu tinataka ku bateme. Kâ, wulendi bâ musamu wa mpasi kwe mulongoki’aku mu kwizaka ku tukutakanu. Ngano buku dia Bâ mu nsayi ntangu zazansoni! bwe dilendi bakisila mulongoki’aku mu telamana musamu ni musamu wulendi mu kabakasa mu kwizaka ku tukutakanu?

14. Bwe lendi tindisila mulongoki’aku mu kwizaka ku tukutakanu?

¹⁴ Sarila timoko tia 10 tia buku dia Bâ mu nsayi ntangu zazansoni! mu tindisa mulongoki’aku. Ntete bamanisa mu tsoneka buku di, balombele kwe bisamuni biakaka mu sarila timoko tio na milongoki miawu. Batêle ti timoko tio tiabakisi milongoki miawu mu kwizaka ku tukutakanu. Ka wuta zolo tâ ko ti fweti kêla kwa timoko tia 10 mu tikisa mulongoki’aku mu kwiza ku tukutakanu. Tala ti bulendi bâ, kulu mu tikisa, mpe mu tikisaka ntangu zazansoni. Milongoki mia Bibila mia swaswana miena, mpe misamu mia swaswana babwabanaka na mio. Buna, dinga mu zaba nsatu za mulongoki’aku, mpe tala ka bwe lendi mu hanina lubakusu lufwanakane. Kunôkandi tala ti mulongoki’aku ntangu kata bonga mu kwiza ku tukutakanu. Bâ na luvivululu, kâ tatamana mu mu tikisaka.

15. Ntia bunkuta mulongoki’eto kalendi bâ na bo?

¹⁵ Ngano mbo bambukaka bunkuta bweri naku bu weri banzaka ti Mbangi ya Yehova kwizi bâ? Kampe mbo weri banzaka ti ka waketi’â lenda ko mu samuna. Kampe mbo weri tînaka ti kanda diaku peleko ndiku zaku zakutelamana. Tala ti ni buna, lendi bakula misamu mi monaka mulongoki’aku wa Bibila ku mutima. Yezu watâ ti bantu bakaka balendi bâ na bunkuta bwa mpila yo. Kâ, watindisa milongoki miandi ti ka babikandi bunkuta bwabakabakasa mu sarila Yehova. (Mat. 10:16, 17, 27, 28) Bwe Yezu kabakisila milongoki miandi mu telamana bunkuta bwawu? Mpe bwe lendi landila tifwani tiandi?

16. Bwe tulendi kubikila milongoki mieto mu zonzelaka timinu tiawu?

¹⁶ Malembe-malembe kubika mulongoki’aku mu zonzela timinu tiandi. Milongoki mia Yezu kampe lwaka lwalwingi lweri nawu bu kabatambika mu kwe samuna. Kâ, Yezu wababakisa bu kabatêla kwe baketi samunina, mpe ntia nsangu baketi samuna. (Mat. 10:5-7) Bwe lendi landila tifwani tia Yezu? Bakisa mulongoki’aku mu zaba ka kwe kalendi samunina. Mu tifwani, mu yula tala ti muntu kazebi wuzololo  mu longoka matieleka ma Bibila. Ha manima mu bakisa mu zonzela misamu mi katâ mu mpila yilembolo mpasi. Tala ti wufwanakane, lulendi sarila nandi bikaku bia buku dia Bâ mu nsayi ntangu zazansoni! bie na mitu-diambu “Tala ti bakutêlele” na “Tala ti bakuyuriri.” Bu silaka bo, kubikaka mulongoki’aku mu sarilaka Bibila mu hana mvutu zilembolo mpasi mu bakula na buzitu bwabwansoni.

17. Bwe tulendi sarila Matie 10:19, 20, 29-31 mu bakisa milongoki mieto mu sikirilaka Yehova?

¹⁷ Bakisa mulongoki’aku mu sikirila Yehova. Yezu watâ kwe milongoki miandi ti Yehova mbo kaketi ba bakisa mu bungu ti bawu kazololo. (Tanga Matie 10:19, 20, 29-31.) Bambula mulongoki’aku ti Yehova mbo kamubakisa mpe. Lendi mu bakisa mu sikirila Yehova bu sambilaka nandi mu bungu dia makani mandi. Franciszek bâka ku Pologne têle ti: “Mulongi’ani mbo keri vulu zonzelaka makani mani mu tusambulu twandi. Bu namona ka bwe Yehova kahanina mvutu mu tusambulu twa mulongi’ani, na manzangu mamansoni nayizi batika mu sambila. Nayizi mona lubakusu lwa Yehova mu ntangu yi nalomba bilumbu ku tisalu tiani tia môna mu kwenda ku tukutakanu twa timvuka na ku lukutakanu lwa lunene.”

18. Ngano Yehova bwe kabongelaka tisalu ti salaka milongi mia Bakristo?

¹⁸ Yehova milongoki mieto mia Bibila mia katomo kipaka. Zebi mpe tisalu tia ngolo ti salaka milongi mia Bakristo mu bakisa bantu mu pusana kwe Yandi, mpe bawu kazololo. (Iza. 52:7) Tala ti bwawu bu kutwarisaka ndongokolo ya Bibila ko, lendi bakisa milongoki mia Bibila mu batusu bu kwe turisaka bisamuni biakaka mu ntangu yi batwarisaka ndongokolo.