Paulo watsoneka ti: “Mu nzila ya musiku, meno wa fwa ndiena mu mio mitariri musiku, ngatu nabâ wa moyo mu bungu dia Nzambi.”​—Nga. 2:19, NWT.

Musamu wa tsoneka Paulo mbo weri kwelanaka na musamu wa nguri wu kazonzela kwe bimvuka bia ku Ngalate, hata diabâ mu lutumu lwa Bisi-Rome. Bakristo bakaka ba ku hata dio, ndongosolo za bungungu sobesa zeri ba sobesaka. Bantu ba mpila yo mbo beri longesaka ti, wafwanakana mu tumamana Musiku wa Mose mu baka mvukulu, nsungula musiku wutariri zenga kwa tinama tia bubakala. Kâ Paulo wazaba ti, Nzambi keri’â vutu lombaka kwe bantu ko babazenga tinama tiawu tia bubakala. Na lukwikulu lwalwansoni Paulo wasongela ti ndongosolo zo za bungungu zeri, mpe wayika timinu tia bampangi ngolo mu nkûlulu ya Yezu Kristo.​—Nga. 2:4; 5:2.

Bibila mbo ditomo tâka ti muntu bu wufwaka ka wuvutu’â zabaka na kani musamu ko, peleko ka wuvutu’â monaka buma ko. (Ekl. 9:5) Paulo bu katâ ti: “Mu nzila ya musiku meno wa fwa ndiena,” ebu keri zolo tâka ti Musiku wa Mose ka wa vutu’â bâ na lutumu ko mu yandi. Kâ, Paulo lukwikulu lweri nandi ti mu nzila ya timinu tiandi mu bungu dia nkûlulu wayizi “bâ wa moyo mu bungu dia Nzambi.”

Nsobolo yo mu luzingu lwa Paulo, yayizi salama “mu nzila ya musiku.” Mu bwe? Wayizi toko bangula ti: ‘Muntu, ka bisalu bia musiku’â ko bimusungikaka; kâ [timinu] kwa mu Yezu Kristo.’ (Nga. 2:16) Wa matieleka, Musiku wasala tisalu tia mfunu. ‘Paulo wabangurila Bisi-Ngalate ti: ‘Yikama [. . .] wayiza, mu tulumuna masumu, na tii ha kwizila [nkuna yi bakanisina].’ (Nga. 3:19) Wa matieleka, Musiku wayizi tomo songela ti bantu bê na masumu ka baketi’â lenda ko mu zitisa Musiku mu mpila ya lunga, mpe wasongela ti bantu nsatu yeri nawu ya mukayulu wa mankululu mpe wa lunga. Musiku wabakisa bantu mu bakula ti ni Kristo weri “nkuna.” Bu tusarilaka timinu mu Yezu Kristo, Nzambi lendi tâ ti ba sungama twena. (Nga. 3:24) Paulo mabanza ni mo meri nandi, mu bungu ti ni mu nzila ya Musiku kayizi bêla na lenda dia tambula na dia tûla timinu mu Yezu. Ni mu mpila yo Paulo kayizi fwila ‘mu nzila ya musiku’ mpe kayizi ‘bâ wa moyo mu bungu dia Nzambi.’ Musiku ka wavutu’â bâ na lutumu ko mu yandi, kâ Nzambi weri mu tumaka.

Paulo wazonzela mabanza ma mpila yo mu mukanda’andi kwe Bisi-Rome. ‘Mpangi zani: lwafwiri kwa musiku mu nitu ya Kristo. [. . .] Takulukiri mu musiku bu tweri ba fwa mu mio mi takangamana.’ (Rom. 7:4, 6) Verse zo na Bisi-Ngalate 2:19, mbo zisongelaka ti Paulo keri’â zonzelaka lufwa lwa muntu ko wu basembele mu bungu ti ka zitisi’â Musiku ko. Kâ, timpwanza keri zonzelaka. Musiku ka weri’â vutu mu tumaka ko mpe ka weri’â vutu tumaka bantu bakaka ko beri ntiana yandi. Bayizi bâ na timpwanza mu bungu dia timinu tiawu mu nkûlulu ya Kristo.