1. Ngano Yehova nti kasa mu bungu dia muna muntu mu beto?

YEHOVA wabenda muna muntu mu beto. (Za 6:44) Banza’eti ka bwe wuta zolo tâ. Yehova bu keri kwe taluzuri miliare za bantu wamona tima tia ntalu mu nge​—mutima we na bunsungu mpe na lenda dia kurisa luzolo mu Yandi. (1 Nta. 28:9) Yehova nge kazebi, nge kabakulaka mpe nge kazololo. Ntia mpila lutindusu!

2. Ngano Yezu ntia tifwani kasarila mu songela ka bwe Yehova kabelokelaka muna muntu mu beto lwaka?

² Yehova nge katomo belokelaka lwaka, mpe mbo kabelokelaka mpangi zaku zazansoni ze Bakristo lwaka. Mu tu bakisa mu bakula musamu wo, Yezu wafwanakasa Yehova na muvungi. Tala ti timeme timosi tiwumukini mu bia 100, ngano muvungi nti wusa? Mbo ‘kasa sisa bia luvwa na vwa (99) [. . .] ku mongo mu kwe tomba tîna tiwumukini.’ Mu ntangu muvungi wumona timeme tio, ka bakila tio nkesi ko mu bungu ti wumuka tiwumukini. Mbo kabâ mu nsayi. Ntia malongi tuta baka? Muna timeme mfunu tiena kwe Yehova. Yezu watâ: ‘Tata’eno mpe we ku mazulu ni bo kazololo ti kani wumosi mu bala ba ka wuwumukandi.’​—Mat. 18:12-14.

3. Nti tuzonzela mu timoko ti?

³ Kani kabwe ka tuzololo’â ko ti tanôkesa mpangi zeto. Bwe tulendi sila keba mu lembo fwemesa bantu bakaka? Mpe nti tulendi sa tala ti muntu wutuyirikiri musamu wa mbi? Mu timoko ti mbo tuhanina biyuvu bio mvutu. Kâ ntete, tataleno ‘bala’ ba bazonzele mu Matie tikapu tia 18 ni banani.

4. Ngano ‘bala ba’ ni banani?

⁴ ‘Bala ba’ ni milongoki miamiansoni mia Yezu. Ntono mvula zawu, bena ‘ntiana bala ba fioti’ mu bungu ti bazololo mu baka ndongosolo za Yezu. (Mat. 18:3) Ni bu sa ti kuma kwa swaswana batûka, bikulu bia swaswana bie nawu, mbanzulu za swaswana ze nawu mpe timuntu tia swaswana tie nawu, babansoni timinu basarilaka mu Kristo. Yandi mpe bawu katomono zolo.​—Mat. 18:6; Za 1:12.

5. Ngano Yehova bwe kamonaka bu bafwemesaka peleko bu bamwisaka muntu wa kanda diandi mpasi?

⁵ Bala bo babansoni ntalu bena kwe Yehova. Mu bakula ka bwe Yehova kamonaka mu bungu dia bala bo, tataluzuleno mpila yi tubongelaka bala. Ntalu bena kwe beto. Mbo tuzoloko mu ba kengerela, mu bungu ti ka bena na ngolo ko, ka bazebi’â misamu ko, mpe ka bena na ndwenga ze na bantu ba kula ko. Ni bu sa ti ka tuzololo’â ko bamwisaka muntu ni muntu mpasi, mbo tutomo bâka mu nkesi, bu bamwisaka mwana wa fioti mpasi. Mpila mosi mpe, Yehova zololo katukengerela. Mbo kafwemaka peleko mbo kabâka mu nkesi bu bafwemesaka peleko bu bamwisaka muntu wa kanda diandi mpasi!​—Iza. 63:9; Mak 9:42.

6. Tintwari na 1 Bisi-Korente 1:26-29, nza bwe yibongelaka milongoki mia Yezu?

⁶ Mu ntia mpila yakaka milongoki mia Yezu miena ntiana ‘bala’? Mu nza ntia mpila bantu bê mfunu? Bamvwama, bantu ba nsangu na bamfumu. Kâ, milongoki mia Yezu ka bavulu’â mia bongelaka bo ko. Bantu mu nza mbo bababongelaka ntiana bala ba fioti bena, balembolo mfunu. (Tanga 1 Bisi-Korente 1:26-29.) Yehova ka babongelaka bo ko.

7. Ngano Yehova bwe kazololo tabongelaka mpangi zeto?

⁷ Yehova bisari biandi biabiansoni bia katomono zolo, ni bu sa ti tûka ntama bimusarilaka peleko kâni. Mpangi zeto zazansoni ntalu zena kwe Yehova, buna zifweti bâ mpe ntalu kwe beto. Tuzololo tabâ na luzolo mu bungu dia “timvuka tiatiansoni tia bampangi”. Ka tufweti’â tatalaka bidiri ko. (1 Pi. 2:17, NWT) Tufweti bâka ba kubama mu sa miamiansoni mu ba kengerela na mu ba belokelaka lwaka. Tala ti tubakuri ti muntu tufwemese peleko tumwisini mpasi, ka tufweti’â tabongela wo ntiana musamu wa mpamba-mpamba ko, mpe ka tufweti’â tatâ ko ti muntu wo fwema buna kwa wukwe fweme mpe fweti wa zimbakana. Mu bungu dia nti bantu bakaka balendi fwemena? Kampe mu bungu dia ntukulu zawu, mpangi zakaka mbo zimonaka ti bantu bakaka batomono ba yôka. Bakaka ba môna bena mu timvuka, mpe ka beka’eti longoka ko ti bafweti lemvokela makuba ma bantu bakaka. Mu musamu ni musamu wulendi bwa, tufweti sa miamiansoni mi tulenda mu sa tidzunu. Tufweti mpe zaba ti, muntu wuvulu fwemaka mu bungu dia misamu mi yirikaka bantu bakaka fweti bakula ti ka bwena bubote ko, mpe fweti sarila ngolo mu soba tifu tio. Fweti sila bo mu bungu dia tidzunu tia yandi beni na mu bungu dia mbote ya bantu bakaka.

8. Ntia tifu tieri na bantu, tianata nsobolo kwe milongoki mia Yezu?

⁸ Mu bungu dia nti Yezu kazonzela ‘bala ba’? Mu bungu ti milongoki miandi miamuyula tiyuvu eti: ‘Ngano nani yôkele mu Timfumu tia mazulu?’ (Mat. 18:1) Mu ntangu yîna Bayuda babingi beri zoloko ti bantu babanza ti mfunu bena. Muntu wumosi wa bakala wa mayela watâ ti: “Baka mukembo wa bantu mpe bâ wa zabakana, bio ni bima bieri mfunu kwe bawu.”

9. Ngano milongoki mia Yezu nti miafweti sa?

 ⁹ Yezu wazaba ti Bayuda babingi beri banzaka ti mfunu wena mu yôka bantu bakaka, mpe milongoki miandi miafweti sarila ngolo mu soba mbanzulu za mpila yo. Wabatêla ti: ‘Wô we mukuluntu, ha kati dieno, kabâ ntiana muleke; mboko wô we mfumu kabâ ntiana tisari.’ (Like 22:26) Mbo tubâka ntiana ‘baleke’ mu ntangu yi tumonaka ti bantu bakaka batuyôkele. (Flp. 2:3) Tamana kurisa tifu tio, kampe ka tufwemesa bantu bakaka ko.

10. Ntia malongi ma Paulo tufweti sarilaka?

¹⁰ Mu misamu miakaka mpangi zeto zazansoni zituyôkele. Ka wubâka mpasi ko mu bakula bu tutûlaka mabanza meto mu bifu biawu bia mbote. Tufweti sarilaka malongi ma hana Paulo kwe Bisi-Korente matâka ti: ‘Nani diangana ta sa luswaswanu mu nge na bakaka? Nti bie naku bi walembo baka mu baka? Tala ti baka kwa wabaka bio, nti ta sila lulendo ntiana’eti ka wabaka bio mu baka ko?’ (1 Kor. 4:7) Buna, kani kabwe ka tudinga ko ti batalaka kwa beto peleko bantu babanza ti tubayôkele. Mu tifwani, mpangi za zibakala ze na lenda dia tâka binzonzi bia mbote peleko mpangi za zikento ze na lenda dia batikaka ndongokolo zazingi za Bibila, zifweti hanaka mukembo wawansoni kwe Yehova.

11. Ntia malongi Yezu katuhana mu tifwani tia mutinu na ngamba’andi?

¹¹ Ha manima ma mwa ntangu, Yezu bu katêla milongoki miandi ti ka bafwemesakandi bantu bakaka, wabahana tifwani titariri mutinu wumosi na ngamba’andi. Mutinu wayambula mfuka ya yinene yaketi lembo lenda ngamba yo mu futa. Ha manima ngamba yo yi balemvokela ka yeri’â zoloko ko mu yambula mfuka ya fioti ya ngamba yakaka. Ku nsuka mutinu watûla ngamba yo ya mbi ku boloko. Ntia malongi tuta baka? Yezu watâ ti: ‘Tata’ani die ku mazulu ni bo mpe kabongela muna muntu mu beno tala ti ka lulemvokele’â mpangi zeno ko mu mutima wa mukaka.’​—Mat. 18:21-35.

12. Tala ti tukariri mu lemvokela, ngano bwe tulendi mwisina bantu bakaka mpasi?

¹² Misamu mia yirika ngamba yo miamumwisa mpasi, kâ miamwisa mpe bantu bakaka mpasi. Wa ntete, wamwisa mpwann’andi weri mpe ngamba mpasi bu ‘kaye mu tuba mu boloko.’ Wa nzole, wafwemesa ngamba zakaka zamona musamu wu kayirika. Mu ntangu ‘bampwana’andi ba beri salaka bu badzukula bo, bunsana bwatomo ba baka.’ Mpila mosi mpe, nsalulu zeto mbo zimwisaka bantu bakaka mpasi. Tala ti muntu wutuyikiri musamu wa mbi mpe tukariri mu mu lemvokela, ngano ntia musamu wulendi tula? Mbo tumumwisa mpasi, mu bungu ti tukariri mu mu lemvokela, mpe na kondo kwa zaba ka tumusongela luzolo ko. Mpe, bantu bakaka mu timvuka mbo babâ na lwaka bu bamona ti, na muntu wo wutuyikiri musamu wa mbi ka tuta wisana ko.

13. Nti ta longoka mu tifwani tia mpangi mosi ye mupasuri-nzila?

¹³ Bu tulemvokelaka mpangi zeto, mbo tumonaka bubote mpe bantu bakaka mbo bamonaka bubote. Musamu ni wo waturila mpangi yimosi ya yikento ye mupasuri-nzila mpe yitutâ nkumbu Crystal. Mpangi yakaka ya yikento yamulwekesa mu timvuka. Crystal têle ti: “Ntangu zakaka misamu mia ngolo mi keri kuntêlaka mbo mieri kundwekesaka ntiana bu lwekesaka mbele. Ka ndieri’â zoloko ko bakuntûla na yandi mu tisalu tia samuna. Nayizi batika mu hombesa luhemo lwani na nsayi’ani mu tisalu tia samuna.” Crystal mbo keri monaka ti nswa wabâ nandi wa fwema. Kâ ka lunda diki ko mu bungu dia mpangi yo, mpe ka tomo’â tihana mu mabanza mandi ko na mu tiari tiandi. Mu bungu dia nti? Mu bungu ti wa kuluka weri mpe wasarila malongi ma Bibila ma kabaka mu timoko tia Nzo ya Zangama ya Munkengi ya 15 octobre 1999, tieri na mutu-diambu “Pardonnez de tout votre cœur.” Walemvokela  mpangi yo. Crystal têle ti: “Bwawu bu mbo nita bakula ti beto bansoni ngolo tusarilaka mu sa nsobolo, mpe Yehova wa kubama wena mu tu lemvokelaka ntangu zazansoni. Nayizi mona ntiana meno bakatula dema ha mahembo. Nayizi vutu bâ na nsayi’ani.”

14. Tintwari na Matie 18:21, 22, kampe ntumwa Piere ntia musamu keri telamanaka, mpe ntia malongi ta baka mu mvutu ya hana Yezu?

¹⁴ Tuzebi ti tufweti lemvokelaka, mu bungu ti wo ni musamu wa mbote mu yirika. Kâ wulendi bâ musamu wa mpasi kwe beto mu yirika. Kampe ntumwa Piere ntangu zakaka ni bo keri monaka. (Tanga Matie 18:21, 22.) Ngano nti bilendi bakisa? Musamu wa ntete, banza mbala Yehova zi keka ku lemvokela. (Mat. 18:32, 33) Ka tufwanakane’â ko mu baka mulemvo’andi, kâ mbo katulemvokelaka kwa mpamba. (Mik. 103:8-10) Mpila mosi, ‘beto mpe tufweti zolosono beto na beto.’ Mulemvo ka tiena tima ko ti tulendi sola mu songela peleko kâni. Mfuka ye neto kwe mpangi zeto ya ba lemvokela. (1 Za 4:11) Musamu wa nzole, banza musamu wuyôkaka bu tulemvokelaka. Mbo tubâka na lenda dia bakisa muntu wutulwekese, dia sa ti timvuka tiabâ mu bumosi, dia kengerela tindiku tieto na Yehova na dia katula dema ha mahembo meto. (2 Kor. 2:7; Kol. 3:14) Mpe wa ntatu, sambila Muntu wututumaka mu lemvokela. Kubikandi ti Satana kabebesa tindiku tieno tia mbote na mpangi zeno. (Efz. 4:26, 27) Lubakusu lwa Yehova lwe neto nsatu tala ti tuzololo mu lembo bwa mu mutambu wa Satana.

15. Tintwari na Bisi-Kolose 3:13, nti lendi sa tala ti fwemene mu bungu dia musamu wuyirikiri mpangi mosi?

¹⁵ Ngano nti bilendi yôka tala ti mpangi yakaka yiyirikiri musamu wutomono ku fwemesa? Ngano nti fweti sa? Sarila ngolo zaku zazansoni mu karisa tidzunu. Sambila Yehova mpe mu têla ka bwe ta mona. Mu lomba kasakumuna muntu wukufwemese, mpe mu  lomba kakubakisa mu mona bifu bia mbote bie na mpangi yo​—bifu Yehova bi kazoloko kwe yandi. (Like 6:28) Tala ti kuta lenda ko mu mu lemvokela, dinga mpila ya mbote ya zonza kwe mpangi yo. Ntangu zazansoni, musamu wa mbote wubâka mu banza ti, kampe, mpangi yitufwemese ka yiweyi’â ko mu tu fwemesa. (Mat. 5:23, 24; 1 Kor. 13:7) Bu mu zonzela, mu songela ti kuta mu kwikisila ko ti mabanza ma mbi ma bêle nandi. Kâ, tala ti ka ta zolo ko mu sa tidzunu? ‘Tatamana mu mu korela’. Tatamana mu bâ na luvivululu mu mpangi yo. (Tanga Bisi-Kolose 3:13.) Musamu wuyôkele mfunu kulundandi diki, mu bungu ti dilendi bebesa tindiku tiaku na Yehova. Kani kabwe kubikandi tima tiakufwemesa. Bu sila bo, mbo songela ti Yehova Yandi zololo yôka bima biabiansoni.​—Mik. 119:165.

16. Ngano muna muntu mu beto ntia dema die nandi?

¹⁶ Mbo tutomo tondaka Yehova mu bungu ti lenda die neto dia mu sarila na mpangi zeto ntiana ‘twila’ dimosi die na ‘muvungi’ wumosi! (Za 10:16) Buku dia Organisés pour faire la volonté de Jéhovah, tinima tia 165, mbo ditâka: “Mu bungu ti bumosi nsayi bukutâka, dema die naku dia yika moko mu simbirila bo mu timvuka.” Buna tufweti longoka “mu mwina mpangi zeto mu mpila Yehova yi kabamwinaka.” Kwe Yehova, beto bansoni ‘bala ba’ ntalu twena. Ngano ni bo mwinaka mpangi zaku? Yehova mbo kamonaka, mpe mbo kazoloko misamu miamiansoni mi yirikaka mu ba bakisa na mu ba kipa.​—Mat. 10:42.

17. Ntia nzengolo tubonga?

¹⁷ Mpangi zeto za tuzololo. Buna tabongeno nzengolo ya lembo ‘tambila bampwana’eto tima ti batêla kuba, keti tilendi ba bwisa.’ (Rom. 14:13) Mbo tusongelaka ti mpangi zeto zituyôkele, mpe mbo tuzoloko mu ba lemvokela mu mutima wa mukaka. Ka tubikandi ti bantu batufwemesa. Kâ, tasoleno mu dinga “bima bisingasaka tidzunu na bima bitukurisaka beto na beto.”​—Rom. 14:19, NWT.