1. Mu bungu dia nti ntangu zakaka bisari bia Yehova bilendi mona ti bawu kaka kwa bena?

NTANGU zakaka, babîngi ha kati dieto mbo bamonaka ti bawu kaka bena. Kwe bantu bakaka mbanzulu zo ka zizingilaka ko. Kâ kwe bantu bakaka mbanzulu zo ntangu yayingi zibongaka. Bu tubâka ha kati dia bantu tulendi mona ti beto kaka twena. Kwe bantu bakaka musamu wa mpasi wubâka mu sa bindiku mu timvuka tia môna. Bakaka mbo beri bâka tintwari na bantu ba kanda diawu, kâ mbo bamonaka ti bawu kaka bena mu ntangu yi bakwe bâka mala na kanda diawu. Bakaka mbo batomo bâka bawu kaka mu bungu ti muntu wu bazolo bahombesa. Bakristo bakaka, nsungula bô bayizi zaba matieleka ka ntama ko, mbo bamonaka ti bawu kaka bena mu bungu ti bantu ba kanda diawu na ndiku zawu zilembo sarilaka Yehova, mbo babakalaka peleko mbo babakwamisaka.

2. Ntia biyuvu tuhanina mvutu?

² Yehova, misamu mieto miamiansoni mia kazebi mpe mia kabakulaka. Bu tubâka na mbanzulu za bukaka, Yehova za kabakulaka mpe zololo katubakisa mu telamana zo. Ngano Yehova bwe katubakisilaka? Nti tulendi sa mu tibakisa? Bwe tulendi bakisila bantu bakaka mu timvuka bamonaka ti bawu kaka bena? Tataluzuleno mvutu za biyuvu bio.

3. Bwe Yehova kasongela ti Eliya keri belokelaka lwaka?

³ Yehova zololo ti bisari biandi biabiansoni biabâ mu nsayi. Penepene kena na muna muntu mu beto, mpe bu tubâka mu tiari peleko ba nôka, wa kazabaka. (Mik. 145:18, 19) Banza’eti  mpila Yehova yi kabelokela lwaka mbikuri Eliya. Tisari tio tia kwikama tiazinga mu ntangu ya mpasi ya bala ba Israele. Mu ntangu yîna, bisari bia Yehova nguria kwamisa beri bia kwamisaka, mpe mbeni za ngolo zeri telamanaka Nzambi, zadinga mu honda Eliya. (1 Mit. 19:1, 2) Mu bungu ti Eliya mbo keri banzaka ti yandi kaka kwa wasâla mu mbikuri zazansoni zeri sarilaka Yehova, kampe musamu wo watomo vutu mu nôkesa. (1 Mit. 19:10) Na manzangu mamansoni Nzambi wasa tima mu bakisa Eliya. Yehova watambika mbazi mu tindisa Eliya ti, keri’â yandi kaka ko mu bungu ti bala ba Israele babingi beri kô beri sarilaka Yehova na kwikama kwakwansoni.​—1 Mit. 19:5, 18.

4. Ngano Marke 10:29, 30, bwe yita songela ti Yehova mbo kabelokelaka lwaka bantu bahombesaka lubakusu lwa kanda peleko lwa ndiku zilembo mu sarilaka?

⁴ Yehova zebi ti, bu tusolaka mu mu sarila, bakaka ha kati dieto bima biabingi bahombesaka. Mu bima bi tulendi hombesa, mwe na lubakusu lwa kanda dieto na lwa ndiku zeto zilembo sarilaka Yehova. Mu bungu ti kampe lwaka lweri nandi, ntumwa Piere wayula Yezu ti: ‘Beto tameni sisa biabiansoni mu ku landa, nti tubaka?’ (Mat. 19:27) Na nsayi yayansoni Yezu wabatêla ti mbo baketi baka kanda dia timpeve dia dinene. (Tanga Marke 10:29, 30.) Mpe Yehova Tata’eto dia ku mazulu, wakanisina ti mbo kabakisa bô bazololo mu mu sarila. (Mik. 9:10) Tazonzeleno mwa misamu mibakisaka mi tulendi yirika mu baka lubakusu lwa Yehova bu tutelamanaka mbanzulu za bukaka.

5. Mu bungu dia nti we musamu wa mbote mu banzaka mu mpila Yehova yi kakubakisilaka?

⁵ Banza mu mpila Yehova yi kata ku bakisila. (Mik. 55:22) Mbo wukubakisa mu mona ti ka wena nge kaka ko. Mpangi mosi ya yikento ya mpumpa ye na nkumbu Carol, * mpe we yandi kaka mu matieleka, têle ti: “Bu nidimbitilaka mu mpila Yehova yi kakumbakisilaka mu korela ntangu za mpasi, mbo wukumbakisaka mu bakula ti ka ndiena meno kaka ko. Mpe mbo nibâka na lukwikulu ti ntangu zazansoni Yehova mbo kakumbakisa.”

6. Ngano 1 Piere 5:9, 10, bwe yilendi tindisila bô batelamanaka mbanzulu za bukaka?

 ⁶ Banza mu mpila Yehova yi katâ bakisila mpangi ze na mbanzulu za bukaka. (Tanga 1 Piere 5:9, 10.) Hiroshi, mpangi mosi ya yibakala yeri Mbangi ya Yehova yandi kaka mu kanda diandi tûka mvula zazingi, têle ti: “Mu timvuka, ka wena mpasi ko mu zaba ti bantu babansoni misamu mie nawu. Zaba ti beto bansoni ngolo tuta sarila mu sarila Yehova, kulendi tindisa bantu balembolo na kanda mu matieleka.”

7. Ngano lusambulu bwe lukubakisilaka?

⁷ Tatamana mu sambilaka, mu tangaka Bibila na mu kwendaka ku tukutakanu. Fweti tomo tâka kwe Yehova mio mi ta mona ku mutima. (1 Pi. 5:7) Massiel we mpangi ya ntwenia ya yikento, mbo keri timonaka yandi kaka mu bungu ti bantu ba kanda diandi ka beri’â sarilaka Yehova ko. Têle ti: “Tima tia mfunu tiakumbakisa mu telamana mabanza mani ma bukaka ni tusambulu twa ngolo kwe Yehova”. Vutulu yika: “Weri nguria Tata mu bungu dia meno, mbala zazingi ndieri mu sambilaka bilumbu biabiansoni mpe mbo ndieri mu têlaka ka bwe ndieri monaka ku mutima.”

8. Ngano ntangulu ya Zu dia Nzambi na dimbitila bwe kukubakisilaka?

⁸ Bilumbu biabiansoni, tangaka Zu dia Nzambi mpe dimbitilaka mu binsamu bisongelaka ti Yehova nge kazololo. Bianca, mpangi ya yikento yafweti telamana nzonzolo zinôkesaka zeri tûkaka kwe bantu ba kanda diandi, têle ti: “Tanga Bibila na dimbitila mu binsamu bia Bibila na binsamu bia luzingu bia bisari bia Yehova, biakorela misamu mia mpasi ntiana mi nita korela, mbo kutomo kumbakisaka.” Bakristo bakaka mbo basimbaka verse za Bibila mu mutu zitomo tindisaka, ntiana Mikunga 27:10 na Izaya 41:10. Bakaka mbo bawâka enregistrement audio bu bakubikaka tukutakanu peleko bu basaka ntangulu ya Bibila. Mbo batâka ti bu basilaka bo, mbo wubabakisaka mu lembo mona ti bawu kaka bena.

9. Ngano tifu tia kwendaka ku tukutakanu bwe tikubakisila?

⁹ Sa miamiansoni mi lenda mu kwendaka ku tukutakanu ntangu zazansoni. Programe mbo yikutindisa, mpe lendi kwizi longoka mu zaba mpangi zaku. (Ebr. 10:24, 25) Massiel, wu tutokolo zonzelaka têle ti: “Ni bu sa ti wa nkatika wa yembama ndieri, nabonga nzengolo ya kwendaka ku tukutakanu twatwansoni twa timvuka na ya hanaka mvutu. Tifu tio tiakumbakisa mu bâ penepene na bampangi mu timvuka.”

10. Mu bungu dia nti we mfunu mu sa bindiku na Bakristo ba kwikama?

¹⁰ Sa bindiku na Bakristo bakaka ba kwikama. Sa bindiku na bantu ba mu timvuka balendi  ku bakisa mu longoka misamu miakaka. Lulendi bâ na mvula peleko na ntukulu za swaswana. Bibila mbo ditubambulaka ti ndwenga kwe “bantu ba nuna” zena. (Yobe 12:12) Bantu ba nuna mpe balendi longoka misamu miamingi kwe ntwenia za kwikama ze mu timvuka. Davide weri ntwenia yôka Yonatane, kâ musamu wo ka wabakabakasa ko mu bâ na tindiku tia ngolo. (1 Sam. 18:1) Davide na Yonatane bahanasana lubakusu mu sarila Yehova ntono misamu mia mpasi. (1 Sam. 23:16-18) Mpangi ya yikento ye nkumbu Irina, mpe we yandi kaka Mbangi mu kanda diandi, têle ti: “Mpangi zeto zilendi tomo kwizi bâ kanda dieto dia timpeve peleko bampangi na bayaya. Yehova lendi ba sarila mu bâ kanda die neto nsatu.”

11. Ngano nti fweti sa mu bâ na bindiku bia ngolo?

¹¹ Sa bindiku bia môna ka wena musamu wa fioti ko, nsungula tala ti ba yembama twena. Ratna, we mpangi ya yikento ya yembama mpe yalongoka matieleka ntono nkwamusu, têle ti: “Nafweti bakula ti lubakusu lwa mpangi zani za timvuka lweri nani nsatu.” Wulendi bâ musamu wa mpasi mu zonzela misamu mie naku ku mutima kwe muntu wakaka, kâ bu mu zonzela mio, lulendi kwizi bâ nguria ndiku. Ndiku zaku zizololo zakutindisa mpe zakuyika moko, kâ we nawu wabazabikisa ka mu ntia mpila balendi ku bakisila.

12. Ngano tisalu tia samuna bwe tilendi ku bakisila mu sa bindiku bia mbote?

¹² Mpila mosi ya nguria ya mbote mu sa bindiku ni mu samunaka na Bakristo bakaka. Carol, wu tutokolo zonzelaka têle ti: “Nayizi baka ndiku zazingi za zibote bu ndieri vulu samunaka na mpangi za zikento na bu tweri saka bima biakaka mu tisalu tia Yehova. Mu mivu mialanda, Yehova wakumbakisa mu nzila ya ndiku zo.” Ntangu zazansoni, musamu wa mbote kwa wubâka mu sa bindiku na Bakristo ba kwikama. Yehova mbo kasarilaka ndiku za mpila yo mu ku tindisa mu ntangu yi bâka wa nôka, mu tifwani bu bâka na mbanzulu za bukaka.​—Bin. 17:17.

13. Ngano muna muntu mu timvuka ntia dema die nandi?

¹³ Muna muntu mu timvuka dema die nandi dia sala ngatu mu timvuka mwabâ luzolo na tidzunu, mpe na kani muntu ka wutimonandi yandi kaka. (Za 13:35) Misamu mi tuyirikaka na mi tutâka milendi tomo tindisa bantu bakaka! Mpangi mosi ya yikento yatâ ti: “Bu nayizi zaba matieleka, timvuka tiayizi bâ kanda diani. Ka naketi’â kwizi bâ Mbangi ya Yehova ko tala ti lubakusu lwa Mpangi zo kâni.” Ngano nti lendi sa mu bakisa bantu balembolo na kanda mu timvuka ngatu bamona ti Mpangi zawu bawu bazololo?

14. Nti lendi sa mu sa tindiku na bantu ba môna?

¹⁴ Yêla mu sa tindiku na bantu ba môna mu timvuka. Na nsayi yayansoni, tulendi batika mu bwanaka bantu ba môna mu timvuka. (Rom. 15:7) Kâ, ka tusukisinakandi kwa mu ba hana mbote. Tuzololo tasa bindiku bia ngolo mpe bizingilaka. Buna, bâ na nsayi mpe songela ti bô ba môna ba zololo. Yêla mu bakula misamu mi bata bwabana na mio kâ, zitisa misamu mia luzingu lwawu. Kwe bakaka, musamu wa mpasi wena mu zonzela mabanza mawu, buna kutomoandi ba sa tiya mu zonza. Kâ ba yulaka biyuvu bia fioti-fioti, mpe na luvivululu kêla mvutu zawu. Mu tifwani, lendi ba yula ka bwe bayizi zabila matieleka.

15. Bakristo ba yela bwe balendi bakisila bantu bakaka mu timvuka?

¹⁵ Bantu babansoni mu timvuka mbo bakulaka mu timpeve mu ntangu Bakristo ba yela,  nsungula bakuluntu, babasongelaka ti bawu ba kipaka. Melissa wu bakurisa mu matieleka kwe nguri’andi têle ti: “Mbo nitomo tondaka mpangi za zibakala zeri ntiana batata mu bungu dia meno, beri yôkesaka ntangu na meno mpe beri kunsongelaka ti meno bakipaka tûka mivu. Ntangu zazansoni zi nizoloko mu zonza na muntu, mbo kubâka muntu wu ndendi kwe tala.” Mauricio, mpangi ya yibakala yeri monaka ntiana yandi bayambirika mu bungu ti mulongi’andi wa Bibila wabika matieleka, têle ti: “Bakuluntu basongela ti meno beri kipaka mpe batomo kumbakisa. Mbo beri vulu zonzaka nani. Mbo beri samunaka nani, mbo beri kunzonzelaka bimvwama bia timpeve bi beri bakaka mu ndongokolo’awu ya Bibila mpe mbo beri saka sport na meno.” Melissa na Mauricio bayizi sala tisalu tia ntangu zazansoni.

16-17. Ngano nti biakaka tulendi sa mu bakisa bantu bakaka?

¹⁶ Lubakusu lufwanakane. (Nga. 6:10) Leo we misionere ku mbuka ye mala na kanda diandi têle ti: “Vula-vula, nsatu yibâka neto batuyirika musamu wa mbote mu ntangu yifwanakane. Mbo nibambukaka lumbu timosi ti nasa accident mu kaminio. Mu ntangu yi nakâla ku nzo, mbo ndieri vulu bâka na lwaka. Kâ, bantu bole ba kwelana bakuntikisa ku nzo’awu ngatu tadia tima tintwari. Ka nasala bambuki ko ka nti tadia, kâ mbo nibambukaka ti meno batomo wirikila na nsayi yayansoni. Mpe, nayizi tomo mona bubote!”

¹⁷ Beto bansoni mbo tuzoloko mu yôkesaka ntangu na Mbangi zakaka na mu zonzelaka binzonzi bi tuwâka, ntiana ku tukutakanu twa timvuka na ku tukutakanu twa tunene. Kâ, Carol wu tutokolo zonzelaka têle ti: “Mbo nitimonaka me kaka ku tukutakanu twa timvuka na twa tunene.” Mu bungu dia nti? Vutulu tâ ti: “Ni bu sa ti mafunda ma mpangi bakunzingirilaka, vula-vula mbo bavulu bâka tintwari na makanda mawu. Meno bu nibamonaka, mbo nitomo timonaka meno kaka.” Kwe bakaka musamu wa mpasi wubâka mu kwenda ku tukutakanu bu bafwiluluku bakala peleko mukento. Ngano muntu zebi wuta bwabana na misamu mia mpila yo? Ngano lendi mu tikisa mu yôkesa ntangu na kanda diaku bu lusa tima titariri Yehova?

18. Ngano bwe tulendi sarila 2 Bisi-Korente 6:11-13 mu ntangu yi tusongelaka ndiambu?

 ¹⁸ Yôkesaka ntangu na bantu bakaka. Yêla mu yôkesaka ntangu na mpangi za swaswana nsungula na bô balendi timona bawu kaka. Tuzololo ‘tatomo zibula mitima mieto’ nsungula kwe bantu ba mpila yo. (Tanga 2 Bisi-Korente 6:11-13.) Melissa wu tutokolo zonzelaka têle ti: “Musamu wa nsayi kwa wubâka mu ntangu ndiku zitutikisaka ku nzo zawu mu yôkesa ntangu na kanda diawu peleko mu sa nzietolo tintwari.” Ngano mu timvuka tiaku muntu we mo wu lendi songela ndiambu?

19. Mu ntia ntangu wubâka mfunu mu yôkesaka ntangu na Bakristo bakaka?

¹⁹ Ntangu zakaka, Bakristo bakaka mbo bazolo mu bâ tintwari na beto. Wulendi bâ musamu wa mpasi kwe bakaka mu bâ na bantu ba kanda diawu balembolo Mbangi za Yehova mu ntangu yi badiaka malaki ma nsi peleko ma mabundu ma bungungu. Bilumbu biakaka bie kô kwe bantu bakaka bi batomo bâka mu tiari ntiana tilumbu ti bafwilulu bakala peleko mukento. Bu tuyôkesaka ntangu na mpangi zibwabanaka na misamu mia mpila yo, mbo tusongela ti bawu tutomono zolo.​—Flp. 2:20.

20. Ngano misamu mia tâ Yezu mu Matie 12:48-50, bwe milendi tu bakisila bu tubâka na mbanzulu za bukaka?

²⁰ Misamu miamingi mie kô milendi sa ti Mukristo watimona yandi kaka ntangu zakaka. Kâ, kani kabwe, ka tufweti’â tazimbakanaka ko ti Yehova misamu mio mia katomono zaba. Mbo katuhanaka bio bie neto nsatu, vula-vula mu nzila ya mpangi zeto za Bakristo. (Tanga Matie 12:48-50.) Buna, mbo tusongelaka ti Yehova tutondaka mu bungu dia timvuka bu tusarilaka ngolo mu bakisa mpangi zeto. Mu mbanzulu ni mbanzulu zi lendi bâ neto, tufweti zabaka ti ka twena beto kaka ko mu bungu ti ntangu zazansoni Yehova ha lweka lweto kena!