Mbangi zakaka za Yehova mbo zisarilaka teknolozi mu tatamana mu bâ penepene na bantu ba kanda diawu peleko na Mbangi za Yehova zakaka. Kâ, Mukristo wa yela wufweti bâ na malongi ema mu mutu: “Muntu we na meso ma tia musamu wa mbi wumonaka mpe mbo wuswamaka, kâ muntu wulembolo na mayela ku matu wutatamanaka mu kwenda mpe mpasi wumonaka.”​—Bingana 27:12.

Mbo tubakulaka ti Yehova zololo katukengerela. Buna, ka tusaka tindiku ko na bantu basaka tihambula, na bô ba bakatula mu timvuka, peleko na bantu basingasaka ndongosolo za bungungu. (Rom. 16:17; 1 Kor. 5:11; 2 Za 10, 11) Bantu bakaka bê mu timvuka, kampe ka bena na ndiatulu ya bunsungu ko. (2 Tim. 2:20, 21) Bu tusolaka ndiku, tufweti bâka na mabanza mo mu mutu. Kâ, wulendi bâ musamu wa mpasi mu sola ndiku za mbote bu tusarilaka applications zibakisaka mu tsoneka message.

Musamu wo nkatika mfunu wena nsungula bu tudingaka mu sola ndiku za mbote mu timvuka tia bantu babingi mu tutsonekenaka message. Bakristo bakaka bakota mu bimvuka bio bia bantu babingi bayizi bâ mu tiari. Bwe mpangi ye mu timvuka tie na bantu 100 peleko 1 000 kalendi sila keba? Musamu wa mpasi wena mu zaba timuntu peleko timpeve tia muna muntu mu kati dia bimvuka bia mpila yo. Verse ya Mikunga 26:4 mbo yitâka ti: “Ka nisaka tindiku na bambaki ko, mpe bantu baswekaka bifu biawu nidiokaka.” Ngano ka wuta tu lwengesa ko ti tufweti sarilaka kwa applications zo mu tsonekenaka bantu ba tutomono zaba?

Ni bu sa ti mu timvuka tia fioti kena, Mukristo wufweti sa keba mu ntangu yi kayôkesaka mu tsoneka, mpe fweti zaba ka ntia misamu bantu bata zonzela. Ka twena na nsatu ko ya karisaka mvutu mu musamu ni musamu wu bata zonzela, ni bu sa ti ntangu ya fioti peleko yayingi wubonga. Paulo walwengesa Timote mu bungu dia bantu bê na lwaza na bakotaka misamu mia ngana. (1 Tim. 5:13) Lumbu ti mpe, tulendi bâ ntiana bantu bo mu nzila ya teknolozi.

Mukristo wa yela ka wutâka peleko ka wudingaka ko mu wâ misamu mibetolaka Bakristo bakaka, mpe ka wudingaka ko mu wâ na mu zonzela misamu miawu mia mansweki. (Mik. 15:3; Bin. 20:19) Mpe mbo wusaka keba mu yika lunungu mu misamu, na mu zonzela misamu mi kalembolo zaba tala ti mia matieleka miena peleko kâni. (Efz. 4:25) Bidia bia timpeve biabingi tubakaka, mpe nsangu zi tulendi kwikila zazingi tubakaka mu jw.org na mu programe’eto ya ngonda zazansoni ya JW Télédiffusion^®.

Mbangi za Yehova zakaka mbo zisarilaka applications zibakisaka mu tsoneka message mu teka, mu sumba na mu sa publicité za bima peleko mu hana bantu bisalu. Mio misamu mia nkari miena, ka mitariri’â nsambululu’eto ya Yehova ko. Bakristo balembolo zolo mu bâ “mu luzolo lwa mbongo” kani kabwe, ka basarilaka mpangi zawu ko mu baka mbongo.​—Ebr. 13:5.

Kâ, ngano bwe tutâ mu bungu dia nsalulu ya applications zibakisaka mu tsoneka message mu musamu watariri ndombolo ya mbongo ngatu tabakisa bampangi bê na zo nsatu peleko babwiriri kuba dia nza (catastrophe naturelle)? Mpangi zeto za tuzololo mpe za tukipaka, ntiangu tudingaka mu ba bakisa na mu ba tindisa. (Zaki 2:15, 16) Kâ, tamana sarila timvuka tia bantu babingi mu tutsonekenaka message, mbo wubâ musamu wa mpasi kwe filiale na kwe timvuka mu ba bakisa. (1 Tim. 5:3, 4, 9, 10, 16) Mpe lukwikulu lwe neto ti ka kwena muntu ko mu beto wuzololo kasongela ti ni yandi basolele mu kipa bampangi.

Tuzololo tayirikaka misamu minataka mukembo kwe Nzambi. (1 Kor. 10:31) Buna, tala ti nzengolo bongele ya sarila application yi batsonekenaka message peleko tima tiakaka tia teknolozi, dinga mu zaba ka ntia misendo mia mbi bilendi nata, mpe sa keba.