1-2 Nani lendi bakisa mulongoki wa Bibila mu batusu?

AMY bâka ku Fidji têle ti: “Misamu mi ndieri longokaka mu Bibila mia ndieri tomo zoloko, nazaba ti matieleka meri. Kâ, bu nabatika mu vukana na bampangi, ni buna kwa nabatika mu sa nsobolo zifwanakane ngatu nabatusu.” Tifwani tia Amy titomono songela mfunu ya matieleka ema: Mulongoki wa Bibila mbo wutomo sa nsobolo zifwanakane ngatu wabatusu, tala ti wubakiri lubakusu lwa bantu bakaka mu timvuka.

² Bisamuni biabiansoni bilendi sala ngatu timvuka tiakula. (Efz. 4:16) Mupasuri-nzila wumosi we na nkumbu Leilani, bâka ku Vanuatu, têle ti: “Tingana tie kô titâka ebu: Mwana ka wena wa muntu wumosi ko. Mbo nita banza ti wa matieleka wena mu musamu wutariri kubika kwa milongoki; vula-vula, timvuka tisalaka ngatu muntu wizi mu matieleka.” Bantu ba kanda, bandiku, na baprofesere mbo basalaka ngatu babakisa mwana mu kula mpe mu yela. Mbo basilaka bo, bu batindisaka mwana, mpe bu bamulongesaka malongi ma mfunu. Mpila mosi mpe, bisamuni mbo bihanaka malongi, mbo bitindisaka, mpe mbo bihanaka tifwani tia mbote kwe milongoki mia Bibila mu ba bakisa mu batusu.​—Bin. 15:22.

3. Nti ta longoka mu misamu mi têle Ana, Dorin, na Leilani?

³ Mu bungu dia nti tisamuni titwarisaka ndongokolo ya Bibila tifweti tambula lubakusu lu lendi hana bisamuni biakaka kwe mulongoki? Ana, we mupasuri-nzila wa wunene ku Moldavie, têle ti: “Musamu wa nkatika wa mpasi wena kwe muntu wumosi mu lungisa nsatu zazansoni za mulongoki wa Bibila.” Dorin, we mupasuri-nzila wa wunene ku nsi yo kwa mpe, têle ti: “Vula-vula,  bisamuni biakaka mbo bitâka misamu misimbaka mutima wa mulongoki, misamu mi naketi lembo banza mu tâ.” Leilani vutulu tâ ti: “Luzolo na tiya tu basongelaka kwe mulongoki tulendi mu bakisa mu zaba kanda dia Yehova.”​—Za 13:35.

4. Nti tutaluzula mu timoko ti?

⁴ Kâ, lendi tiyula: ‘Ngano bwe meno ndendi bakisila mulongoki wa Bibila mu kula, ni bu sa ti ka meno’â ko nitwarisaka ndongokolo’andi?’ Tataleno nti tulendi sa mu ntangu yi batutikisaka mu kwe twarisa ndongokolo ya Bibila, mpe nti tulendi sa mu ntangu mulongoki wubatikaka mu kwiza ku tukutakanu. Mbo tutala mpe bwe bakuluntu balendi bakisila milongoki mia Bibila mu batusu.

5. Ntia dema die naku tala ti bakutikisi mu kwe twarisa ndongokolo ya Bibila?

⁵ Mu musamu wutariri ndongokolo ya Bibila, ni mulongi we muntu wa ntete we na dema dia bakisa mulongoki mu bakula Zu dia Nzambi. Tala ti mulongi wukutikisi mu mu turisa, fweti bâ tibakisi. Tisalu tiaku ni mu mu yika moko. (Ekl. 4:9, 10) Bwe lendi hanina lubakusu ngatu ndongokolo ya Bibila yabâ ya mbote?

6. Mu ntangu yi bakutikisaka mu bungu dia ndongokolo ya Bibila, bwe lendi sarila malongi me mu Bingana 20:18?

⁶ Kubama mu bungu dia ndongokolo ya Bibila. Musamu wa ntete, yula kwe mulongi kakutêla misamu mitariri mulongoki. (Tanga Bingana 20:18.) Lendi yula biyuvu ebi: “Ngano mulongoki bwe kena? Ntia musamu luzonzela? Ntia kani die naku mu bungu dia ndongokolo ya lumbu ti? Mu ntangu yi tulongoka, ngano musamu we kô wu mfweti tâ peleko wu mfweti lembo tâ? Nti bilendi tindisa mulongoki mu kula?” Wa matieleka, mulongi ka zonzela misamu mia mansweki ko mitariri mulongoki, kâ misamu mi kazonzela, milendi bakisa. Misionere yimosi ya yikento ye na nkumbu Joy, mbo kabâka na bimoko bia mpila yo na bantu bamuturisaka mu bungu dia ndongokolo ya Bibila. Têle ti: “Timoko tia mpila yo mbo tibakisaka muntu wukunturisi mu bâ na nsatu ya bakisa mulongoki, mpe mu zaba ka ntia musamu kafweti tâ mu ntangu ya ndongokolo.”

7. Mu bungu dia nti fweti kubamana mu bungu dia ndongokolo, ni bu sa ti ka nge’â ko twarisa yo?

⁷ Tala ti bakutikisi mu kwe twarisa ndongokolo ya Bibila, mbo wubâ musamu wa mbote tala ti kubamane mu bungu dia timoko ti luzonzela. (Ezd. 7:10) Dorin, mpangi ya yibakala yi tuzonzeleke ku matu yitêle ti: “Mbo nibâka mpe na nsayi mu ntangu mpangi yikunturisaka yi kubamaka mu bungu dia ndongokolo. Buna lendi hana mabanza mu mpila ya mbote.” Musamu wakaka, mulongoki mbo wumona ti beno bole lutomono kubama, mpe mbo tibâ tifwani tia mbote kwe yandi. Ni bu sa ti ka wena na lenda ko mu kubama mu bungu dia  timoko tiatiansoni, bonga mwa ntangu mu taluzula mabanza ma nguri ma timoko.

8. Bwe lendi bêla na lukwikulu ti lusambulu lu sa mu bungu dia ndongokolo ya Bibila lwa delakana lwena?

⁸ Lusambulu nkatika mfunu lwena mu bungu dia ndongokolo ya Bibila, buna toko banza misamu mi tâ tala ti bakulombele wasa lusambulu. Bu sila bo, lusambulu lwaku mbo lutomo delakana. (Mik. 141:2) Hanae, bâka ku Japon, mbo kabambukilaka tusambulu tweri saka mpangi ya yikento yeri turisaka mulongi’andi wa Bibila. Yandi têle ti: “Nayizi mona ti tindiku tia ngolo tieri nandi na Yehova, mpe nayizi bâ na nsatu ya bâ ntiana yandi. Nayizi mona ti meno kazolo mu ntangu yi keri zonzelaka nkumbu’ani mu tusambulu tu keri saka.”

9. Tintwari na Zaki 1:19, nti lendi sa mu bâ mpangi ya mbote yibakisaka mu ntangu ya ndongokolo ya Bibila?

⁹ Yika mulongi moko mu ntangu yi kata kwe twarisi ndongokolo ya Bibila. Omamuyovbi, we mupasuri-nzila wa wunene ku Nigéria, têle ti: “Mpangi ya mbote yihanaka lubakusu, mbo yilandaka ndongokolo. Mbo yitâka mabanza ma mbote, kâ ka yizonzaka bwabwingi ko, mpe mbo yibambukaka ti ni mulongi we mutu-masini wa ndongokolo.” Bwe lendi zabila ka mu ntia ntangufweti zonza mpe bwe lendi hanina lubakusu mu ndongokolo? (Bin. 25:11) Tomo wirikilaka mu ntangu mulongi na mulongoki yi bata kwe zonze. (Tanga Zaki 1:19.) Mu ntangu yo mbo bâ wa kubama mu hana lubakusu. Kâ, fweti sarila lenda dia swasikisa. Mu tifwani, kufweti’â wazonza bwabwingi ko, kufweti’â wazenga mulongi bu kata kwe zonze ko, peleko kufweti’â wazonzela musamu wa swaswana na timoko ko. Kâ, lendi tâ mwa musamu, lendi hana tifwani, peleko lendi yula tiyuvu mu bakisa mu bangula musamu wu bata zonzela. Ntangu zakaka, lendi banza ti ka wena mfunu ko mu yika musamu. Kâ, tala ti sîkiri mulongoki mpe mu songele luzolo, mbo mu bakisa mu kula.

10. Bwe misamu mi wabwabana na mio milendi bakisila mulongoki wa Bibila?

¹⁰ Zonzela misamu mi wabwabana na mio. Tala ti wufwanakane, lendi zonzela kwe mulongoki bwe wazabila matieleka, bwe watelamana musamu wa mpasi, peleko bwe wamwina lubakusu lwa Yehova mu luzingu lwaku. (Mik. 78:4, 7) Wulendi bâ ti mulongoki misamu ni mio ke na mio nsatu mu wâ. Misamu mio milendi yika timinu tiandi ngolo peleko milendi mu tindisa mu tatamana mu sarila ngolo ngatu kabatusu. Milendi mu bakisa mpe mu zaba ka bwe kalendi telamana ntontolo zi kata bwabana na zo. (1 Pi. 5:9) Gabriel, bâka ku Brésil mpe bwawu bu we mupasuri-nzila, mbo kata bambukila nti biamubakisa bu keri longokaka Bibila. Têle ti: “Bu ndieri wâka binsamu bia bampangi, mbo ndieri bakulaka ti Yehova mpasi zeto za kamonaka. Tala ti balenda mu telamana zo, buna meno mpe lenda dieri nani dia telamana zo.”

11-12. Mu bungu dia nti tufweti bwaninaka mulongoki wukwizaka ku tukutakanu na tiya twatwansoni?

¹¹ Ngatu mulongoki wa Bibila wabatusu, wufweti kwizaka ntangu zazansoni ku tukutakanu twa timvuka mpe fweti twa bakila ndandu. (Ebr. 10:24, 25) Kampe, mbala ya ntete mulongi mbo kamutikisa. Mu ntangu yi kakwiza, beto bansoni tulendi mu tindisa mu tatamana mu kwiza ku Nzo ya Nsambululu. Ngano mu ntia mpila tulendi bwa sila?

¹² Bwana mulongoki na tiya twatwansoni. (Rom. 15:7) Tala ti mulongoki wumweni ti bubote bamubwanaka ku tukutakanu, lendi tatamana mu kwizaka ku Nzo ya Nsambululu. Kutomoandi mu kwamisa, mu hana mbote na tiya twatwansoni, mpe mu songela kwe mpangi zakaka. Mu zonzesa mu bungu ti mulongi’andi keka’eti tula ko peleko bisalu kata sala mu Nzo ya Nsambululu. Tomo teka kutu mu misamu mi tâ mulongoki, mpe mu songela luzolo. Ngano mbwanunu’aku ya mbote ntia ndandu yilendi nata? Tala tifwani Dmitrii, wabatusu ka ntama ko mpe bwawu bu tibakisi mu tisalu tiena. Bu kabambukaka mbala’andi ya ntete yi kayiza ku lukutakanu, têle ti: “Mpangi yimosi ya yibakala wakumona bu ndieri kêlaka ku Nzo ya Nsambululu, mpe na nsayi yayansoni wakunata mu kati. Mpangi zazingi zayiza mu kwi kungana mbote. Nayizi tomo yituku. Nsayi yayizi tomo kumbaka, mpe nayizi zolo ti bilumbu biabiansoni bia lumingu kwa bâka tukutakanu. Misamu mi namona kûna ka natoko’â mia mona ko.”

13. Ntia nsobolo ndiatulu’aku yilendi nata kwe mulongoki wa Bibila?

¹³ Songela tifwani tia mbote. Ndiatulu’aku yilendi bakisa mulongoki wa Bibila mu kwikila ti matieleka kabakiri. (Mat. 5:16) Vitalii, we mupasuri-nzila ku Moldavie, têle ti: “Nayizi longoka bwe bantu bakaka mu timvuka babêlaka, babanzilaka mpe badiatilaka. Misamu mio miasa ti nakwikila ti Mbangi za Yehova dibundu dia matieleka diena.”

14. Ngano tifwani tiaku bwe tilendi bakisila muntu mu tatamana mu kula?

¹⁴ Ngatu mulongoki wabatusu, wufweti sarilaka misamu mi kalongokaka. Ntangu zakaka musamu wa mpasi wubâka. Mu ntangu mulongoki wumonaka ndandu zi bakaka bu sarilaka mitieno mia Bibila, lendi kwizi bâ na nsatu ya landa tifwani tiaku. (1 Kor. 11:1) Tala tifwani tia Hanae, wu tuzonzele ku matu. Têle ti: “Mbo ndieri monaka ti bampangi, misamu mi ndieri longokaka mia beri sarilaka. Nayizi mona ka bwe ndendi tindisila bantu, bwe ndendi lemvokela mpe bwe ndendi songela luzolo. Ntangu zazansoni, bubote bwa bantu kwa beri zonzelaka. Nayizi zolo mu landa tifwani tiawu.”

15. Bwe Bingana 27:17 yitubakisilaka mu bakula ka mu bungu dia nti tufweti sa tindiku na mulongoki wa Bibila, mu ntangu yi kata kwe tatamane mu kwiza ku tukutakanu?

 ¹⁵ Sa tindiku na mulongoki. Mu ntangu mulongoki wutatamana mu kwizaka ku tukutakanu, tatamana mu mu songela luzolo. (Flp. 2:4) Lendi dinga mu tomo mu zaba. Lendi mu têla ti nsayi ye naku mu bungu dia nsobolo zi kata sa, lendi mu yula biyuvu bitariri ndongokolo’andi ya Bibila, kanda diandi na tisalu tiandi; kâ sa keba mu mu yula biyuvu bilendi mu fwisa nsoni. Bimoko bia mpila yo bilendi sa ti lwabâ penepene. Mu ntangu yi bâ ndiku na mulongoki, lendi mu bakisa mu batusu. (Tanga Bingana 27:17.) Hanae, bwawu bu, mupasuri-nzila wa ntangu zazansoni wena. Bu kabambukaka mbala’andi ya ntete yi kayenda ku tukutakanu, têle ti: “Bu nayizi bâ na bandiku mu timvuka, nayizi batika mu kêlaka tukutakanu na timina diadiansoni, mpe mbo ndieri kwa kwendaka ni bu sa ti wa fwatika ndieri. Mbo ndieri zoloko mu yôkesaka ntangu na ndiku zani za môna, mpe bakumbakisa mu tûla nsuka mu bindiku bieri nani na bantu ba talembo bâ nkwikulu zimosi. Nayizi zolo mu bâ penepene na Yehova mpe na mpangi za timvuka. Ha manima, nayizi bonga nzengolo ya batusu.”

16. Nti biakaka lendi sa mu bakisa mulongoki wa Bibila mu bâ na nsayi, b wukwizaka ku tukutakanu?

¹⁶ Mu ntangu mulongoki wuta kwe tatamane mu kula mpe mu sa nsobolo, mu bakisa mu mona ti yandi mpe muntu wa timvuka wena. Lendi sila bo, bu songela ndiambu. (Ebr. 13:2) Denis, bâka ku Moldavie, bu kabambukilaka ntangu yi keri mulongoki têle ti: “Meno na mukento’ani, mbala zazingi batutikisa mu yôkesa ntangu na bampangi. Tamona ka bwe Yehova kababakisila, mpe watutindisa. Ntangu yatubakisa mu kwikila ti tazolo mu sarila Yehova, mpe luzingu lwa mbote lweri tu kêlaka.” Mu ntangu mulongoki wa Bibila wukwizi bâka tisamuni, lendi mu lomba lwasamuna nandi. Diego, we tisamuni ku Brésil, têle ti: “Mpangi zazingi zeri kundombaka mu kwe samuna nawu. Mpila ya mbote yeri mu tomo ba zaba. Bu nasila bo, nayizi tomo longoka misamu miamingi, mpe nayizi tomo bâ penepene na Yehova mpe na Yezu.”

17. Ngano bakuluntu bwe balendi bakisila milongoki mia Bibila?

¹⁷ Bâka na ntangu mu bungu dia milongoki mia Bibila. Bakuluntu, luzolo lweno lulendi bakisa milongoki mu batusu. Ngano lendi vulu zonzaka na milongoki mia Bibila mu ntangu ya tukutakanu? Mbo bamona ti bawu kipaka tala ti bambukiri nkumbu zawu, nsungula mu ntangu yi bahanaka mvutu ku tukutakanu. Ngano lendi kubika programe’aku mu kwe turisa tisamuni mu ntangu yi kakwe hana ndongokolo ya Bibila kwe muntu? Lendi bakisa mulongoki  mu mpila yi ta lembo kekolo. Jackie we mupasuri-nzila ku Nigéria, têle ti: “Milongoki miamingi miyitukuku bu mibakulaka ti mpangi yikunturisi ku ndongokolo’awu mukuluntu wena. Mulongoki mosi wa Bibila watâ ti: ‘Kani kabwe, pastere diani ka lendi’â kayirika musamu wa mpila yo ko. Yandi bamvwama kwa kakwe talaka, mpe mu kwe ba tala bafweti toko mu futa!’” Bwawu bu mulongoki wo, wayika kwizaka ku tukutakanu.

18. Ngano bakuluntu bwe balendi lungisila dema diawu die mu Bisalu 20:28?

¹⁸ Kubika mpe tindisa mulongi wa Bibila. Bakuluntu, dema dieno diena dia kubika bisamuni mu tomo sala tisalu tia samuna na tia twarisa ndongokolo ya Bibila. (Tanga Bisalu 20:28.) Tala ti mpangi yi lwena yitînini mu twarisa ndongokolo ya Bibila ha meso maku, lendi mu lomba mu twarisa yo. Jackie, wu tuzonzele ku matu têle ti: “Bakuluntu mbo bavulu kundiyulaka nsangu za milongoki miani mia Bibila. Mu ntangu yi nibwabanaka na misamu mia mpasi mu twarisa ndongokolo ya Bibila, mbo bakunganaka malongi makumbakisaka.” Bakuluntu balendi yirika misamu miamingi mu tindisa milongi mia Bibila mu tatamana. (1 Tes. 5:11) Jackie vutulu tâ: “Mbo nibâka mu nsayi mu ntangu bakuluntu bakuntindisaka, mpe bakuntêlaka ti tisalu tia ngolo ti nisalaka tia bazololo. Misamu mia mpila yo mbo mikundembekaka mutima, ntiana kwa mamba ma tiozi mu ntangu ya mwini wa ngolo. Masîka mawu mbo mayikaka lukwikulu lwani mpe mbo mayikaka nsayi yi nibakaka mu tisalu tia twarisa ndongokolo ya Bibila.”​—Bin. 25:25.

19. Ntia nsayi beto bansoni tulendi baka?

¹⁹ Ni bu sa ti bwawu bu ka tutwarisaka ndongokolo ya Bibila ko, tulendi bakisa muntu mu kula mu timpeve. Ni bu sa ti ka tuzonza bwabwingi ko, tulendi yika mulongi moko mu misamu mi tutâ mi tutomono kubika mu ntangu yi kakwe twarisi ndongokolo ya Bibila. Tulendi sa tindiku na milongoki bu mikwizaka ku Nzo ya Nsambululu, mpe tulendi bâ bifwani bia mbote mu bungu dia bawu. Bakuluntu balendi tindisa milongoki bu babâka na ntangu mu bungu dia bawu, mpe balendi tindisa milongi bu bakwe bakubiki na bu bakwe ba sîki. Wa matieleka, nsayi yayingi yibâka neto mu ntangu yi tulendi yirika musamu, ni bu wubâ wa fioti, mu bakisa muntu mu zolo Yehova na mu mu sarila.