1. Tintwari na Matie 24:9, mu bungu dia nti tufweti lembo yituku tala ti nza yituyinini?

YEHOVA watusala ngatu tazoloko mpe batuzoloko. Buna, mu ntangu muntu wubâka na diki mu beto, mbo wutufwemesaka kampe mbo wututâka mpe bunkuta. Mu tifwani, mpangi ya yikento ye na nkumbu Georgina, bâka ku Europe, têle ti: “Bu ndieri na mvula 14, nguri’ani yina keri kundiyinaka mu bungu ti Yehova ndieri sarilaka. Mbo ndieri monaka ti bakundosa, mpe nayizi batika mu banza ti ka ndiena muntu wa mbote ko.” * Mpangi ya yibakala yi batêle nkumbu Danylo têle ti: “Mu ntangu bambulumbulu yi bakuntwa, bakumfinga mpe bakuntêla ti mbo batomo kumwisa mpasi mu bungu ti Mbangi ya Yehova ndiena, nayizi bâ mu bunkuta mpe nayizi moneka buzoba.” Diki dia mpila yo mbo ditufwemesaka, kâ ka tumonaka wo wa nzitukulu ko. Yezu wa katitêla ti mbo baketi tu yina.​—Tanga Matie 24:9.

2-3. Mu bungu dia nti bayininaka milongoki mia Yezu?

² Nza milongoki mia Yezu yiyinaka. Mu bungu dia nti? Mu bungu ti ntiana Yezu, ka ‘twena bisi-mutoto-nsi ko.’ (Za 15:17-19) Ntiangu ni bu sa ti guvernema za bantu tuzitisaka, mbo tukalaka mu sambila zo na mu sambila bidimbu bimonekesaka zo. Yehova kwa tusambilaka. Mbo tusingasaka nswa we na Nzambi wa tuma bantu, kâ Satana na tinima tiandi, ka batambulaka nswa wo ko. (Mba. 3:1-5, 15) Mbo tusamunaka ti ni Timfumu tia Nzambi kwa tiyirika misamu mia bantu, mpe mbo tusamunaka ti ntamana Timfumu tiango mbo tifukisa bantu babansoni batelamanaka tio. (Dan. 2:44; Nza. 19:19-21) Nsangu zo za mbote zena kwe bantu  ba lembama, kâ za mbi zena kwe bankwa-mbi.​—Mik. 37:10, 11.

³ Mbo batuyinaka mpe mu bungu ti misiku mia Nzambi tutumamanaka. Misiku mio ka mikwelanaka na ndiatulu ya mbi ya nza yi ko. Mu tifwani, bantu babingi batambulaka ndiatulu ya nkatika ya mbi yifwanakane na ya bantu ba fukisa Nzambi ku Sodome na Gomore! (Yude 7) Mu bungu ti misiku mia Bibila tutumamanaka mitariri ndiatulu za mpila yo, bantu babingi batumonaka buzoba mpe mbo batâka ti ka tubikaka bantu ko, bayirika misamu buna bu bazololo!​—1 Pi. 4:3, 4.

4. Ntia bifu bituyikaka ngolo mu ntangu bantu yi batuyinaka?

⁴ Ngano nti bilendi tu bakisa mu korela bu batuyinaka na bu batufingaka? Tufweti bâ na timinu tia ngolo ti Yehova mbo katubakisa. Timinu tieto tilendi ‘honda tiya twa madionga mamansoni ma nkwa-mbi.’ (Efz. 6:16) Kâ, ka twena kwa na nsatu timinu ko. Nsatu luzolo mpe ye neto. Mu bungu dia nti? Mu bungu ti ‘luzolo ka lubakaka nkesi ko.’ Miamiansoni lukorelaka mpe miamiansoni luvivirilaka. (1 Kor. 13:4-7, 13) Bwawu bu tataluzula bwe luzolo mu Yehova, mu mpangi zeto na mu mbeni zeto mpe lulendi tu bakisila mu korela yina ku batuyinaka.

5. Bwe luzolo lwa Yezu mu Tata’andi lwamuyikila ngolo?

⁵ Mu mpimpa ntete mbeni zandi zamuhonda, Yezu watâ kwe milongoki miandi mia kwikama ti: ‘Tata Yandi nzololo. Buna bwa kuntuma Tata, ni buna mpe nikwe se.’ (Za 14:31) Luzolo lwa Yezu mu Yehova lwamuyika ngolo mu kubama mu telamana mpasi zeri mu kêlaka. Luzolo lweto mu Yehova, lulendi tu bakisa mu sila bo.

6. Tintwari na Bisi-Rome 5:3-5, bwe bisari bia Yehova bimonaka bu bakorelaka mu ntangu nza yibayinaka?

⁶ Ntangu zazansoni, luzolo lwa Yehova mbo lubakisaka bisari biandi mu korela nkwamusu. Mu tifwani, mu ntangu nzo ya mfundusu ya yinene yalomba kwe bantumwa ti babika mu samuna, luzolo lwa Nzambi lwabatuma mu ‘[tumamana] Nzambi na bu [batumamane] bantu.’ (Bis. 5:29; 1 Za 5:3) Ni luzolo lwa ngolo lwa mpila yo lubakisaka mpangi zeto lumbu ti, mu ntangu yi babatelamanaka ku guvernema za ngolo. Mu ntangu nza yituyinaka, ka tunôkaka ko, kâ mbo tubâka mu nsayi.​—Bis. 5:41; tanga Bisi-Rome 5:3-5.

7. Nti tufweti saka mu ntangu bantu ba makanda meto batutelamanaka?

⁷ Kampe ntontolo ziyôkele ngolo kwe beto ni zo zitûkaka kwe bantu ba makanda meto. Mu ntangu yi tubatikaka mu zolo matieleka, bantu bakaka ba makanda meto balendi banza ti, wubakasa batuwubakase. Bakaka mpe balendi banza ti lawuka tuta lawuka. (Fwanakasa na Marke 3:21.) Balendi tu sila mpe miangu. Ka tufweti’â tayituku ko bu tumonaka misamu mia mbi mia mpila yo. Yezu watâ ti: ‘Bô balwe nzo mosi, mbo batituka batantu beno.’ (Mat. 10:36) Wa matieleka, ni bu sa ti bantu ba makanda meto mu mpila ya mbi batubongelaka, beto ka tubabongelaka ntiana mbeni zeto ko. Kâ luzolo lweto mu Yehova bu lukulaka, luzolo lweto mu bantu mpe mbo lukulaka. (Mat. 22:37-39) Kani kabwe, ka tudiata misiku na mitieno mia Bibila ko mu tâ kwa muntu nsayi.

8-9. Nti biabakisa mpangi mosi ya yikento mu bâ wa kwikama ntono nkwamusu za ngolo?

⁸ Georgina, wu tutokolo zonzela, wabâ na lenda dia bâ wa kwikama ntono nkwamusu za ngolo zeri tûkaka kwe nguri’andi. Georgina banguri ti: “Nguri’ani na meno, tabatika mu longoka Bibila na Mbangi za Yehova. Kâ, ha manima ma ngonda 6 bu ndieri dingaka mu kwenda ku tukutakanu, nguri’ani wayizi tomo soba. Nayizi dzukula ti na ba-aposta kayizi sa tindiku mpe mbo keri sarilaka nzonzolo’awu bu keri kunzonzelaka. Mbo keri kumfingaka, kundzutaka nsuki,  mbo keri mpe kunkangaka tiwumunu mpe mbo keri losaka mikanda miani na mabuku mani. Ha manima, bu nayizi bâ na mvula 15, nayizi batusu. Nguri’ani wayêla mu kunkabakasa mu sarila Yehova bu kakuntûla mu nzo zi bakipilaka ntwenia ziyirikaka misamu mia mbi, bakaka banwaka bima bia ngolo peleko bakaka bê bimpumbulu. Nkwamusu mbo zibâka nguria mpasi tala ti kwe muntu wufweti ku zolo mpe wufweti ku kipa zitûkiri.”

⁹ Ngano Georgina bwe kalendela mu korela? Têle ti: “Tilumbu nguri’ani ti kakumbalukila, ni tilumbu ti namanisa mu tanga Bibila dia mukaka. Mu ntangu yîna nayizi tomo bâ na lukwikulu ti matieleka nabaka, mpe mbo ndieri monaka ti nkatika penepene ndieri na Yehova. Mbo ndieri vulu mu sambilaka, mpe me keri wâka. Bu ndieri bêlaka mu nzo yîna, mpangi ya yikento yakuntikisa ku nzo’andi mpe talongoka Bibila tintwari. Mu ntangu yo yayansoni, mpangi za zikento na za zibakala mbo zeri kundiyikaka ngolo ku Nzo ya Nsambululu. Nayizi bâ na tibuka mu makanda mawu. Nayizi mona mu me beni ti Yehova yôkele mbeni ni mbeni mu ngolo.”

10. Ntia lukwikulu lulendi bâ neto mu Yehova Nzambi’eto?

¹⁰ Ntumwa Paulo watsoneka ti ‘ka kwena tima ko tilendi tu hambasa na luzolo lwa Nzambi, lwe mu Kristo Yezu, Mfumu’eto.’ (Rom. 8:38, 39) Ni bu sa ti ku lendi bâ mwa ntangu yi tumona mpasi, Yehova mbo katatamana mu bâ ku lweka lweto mu tu tindisa na mu tu yika ngolo. Mpe ntiana bu songele wo tinsamu tia Georgina, Yehova mbo katubakisaka mu nzila ya kanda dieto dia ntalu dia timpeve.

11. Bwe luzolo lwa zonzela Yezu mu Za 15:12, 13 lwaketi bakisila milongoki miandi? Hana tifwani.

¹¹ Mu mpimpa ntete kafwa, Yezu wabambula milongoki miandi ti bazolosono bawu na bawu. (Tanga Za 15:12, 13.) Wazaba ti luzolo mbo lwaketi ba bakisa mu tatamana mu bâ mu bumosi na mu korela yina ku beri ba yinaka. Tabongeno tifwani tia timvuka tia Tesalonike. Buna kwa bu tiabutuka, babatika mu ba kwamisa. Kâ mpangi za timvuka tio zayizi bâ bifwani bia luzolo na bia tifu tia kwikama. (1 Tes. 1:3, 6, 7) Paulo wabatindisa mu tatamana mu songela luzolo mu mpila yiyôkele. (1 Tes. 4:9, 10) Luzolo mbo lwaketi ba tuma mu bomba bantu bê mu tiari na mu tindisa bantu ba nôka. (1 Tes. 5:14) Balanda ntumunu za Paulo, mu bungu ti mu mukanda’andi  wa nzole wu katsoneka kampe ha manima ma mvula yimosi, Paulo wabatêla ti: ‘Luzolo lwa muna muntu mu beno mu bampangi kula luta kula.’ (2 Tes. 1:3-5, NWT) Luzolo lwawu lwababakisa mu korela mpasi na nkwamusu.

12. Mu ntangu ya muzingu, bwe mpangi za ku nsi yimosi zasongela luzolo kwe bampwana’awu?

¹² Tazonzeleno tifwani tia Danylo wu tutokolo zonzela, na mukento’andi. Mu ntangu muzingu wadituka ku hata diawu, mbo beri tatamanaka mu kwenda ku tukutakanu, mu sarila ngolo zawu zazansoni mu samuna na mu kabana bidia bi beri bakaka na mpangi zakaka. Lumbu timosi, bambulumbulu beri na mata bayenda ku nzo ya Danylo. Danylo têle ti: “Bakundomba nabika mu vutu bâ Mbangi ya Yehova. Bu nakala, bakungana nkuba mpe bakundiyôkesela kela ha mutu. Ntete benda basâ tu kebesa ti mbo baketi kâla mu kwizi vukasa nitu mu ngolo na mukento’ani. Kâ mpangi zeto zasarila manzangu mu tu kotesa mu masini ngatu twenda ku hata diakaka. Kani kabwe, ka nisâ zimbakana luzolo lwa kunsongela mpangi zo za ntalu ko. Mpe bu tatûla ku hata dia môna, mpangi za hata dio zatuhana bidia, zatubakisa mu baka tisalu na nzo! Ha manima tayizi bâ na lenda dia bwana mpangi zeri diokaka mbuka yeri muzingu.” Tinsamu tio tisongele ti Iuzolo lwa bukristo lulendi tu bakisa mu korela mu ntangu yi batuyinaka.

13. Ngano mpeve santu bwe yitubakisilaka mu tatamana mu tisalu tieto tia Yehova ni bu sa ti bantu yina batuyinaka?

¹³ Yezu watâ kwe milongoki miandi ti bazolo mbeni zawu. (Mat. 5:44, 45) Ngano musamu wa fioti wena? Na kani fioti! Kâ, na lubakusu lwa mpeve santu ya Nzambi, bulendi bâ. Mu mbutu ya mpeve ya Nzambi mwe luzolo, luvivululu, nsayi ya sarila mbote, bulembami mpe na tifu tia tiyimina. (Nga. 5:22, 23) Bifu bio mbo bitubakisa mu korela bu batuyinaka. Bantu babingi beri tu telamanaka basoba mabanza mu bungu ti bakala, mukento, mwana peleko muntu wu babandakane wasongela bifu bio. Mpe bantu babingi beri tu telamanaka bayizi bâ mpangi zeto. Buna, tala ti musamu wa mpasi wena kwe nge mu zolo bantu bakuyinaka mu bungu ti Yehova sarilaka, sambila Yehova kakuhana mpeve santu. (Like 11:13) Mpe bâ na lukwikulu ti nzila ya Nzambi ni yo kwa yiyôkele bubote.​—Bin. 3:5-7.

14-15. Bwe Bisi-Rome 12:17-21 yabakisila Yasmeen mu songela luzolo kwe bakala diandi ntono telamana ku keri mu telamanaka?

¹⁴ Tataleno tifwani tia Yasmeen, bâka ku  Moyen-Orient. Bu kayizi bâ Mbangi ya Yehova, bakala diandi wabanza ti wawunakana mpe wayêla mu mu kabakasa mu sarila Nzambi. Wamufinga, mpe watêla bantu ba kanda, mfumu ya dibundu yimosi na nganga yimosi mu mu têla ti mbo baketi mu mwisa mpasi, mpe mu mu kwikisila ti kanda diandi keri mwangasaka. Ku lukutakanu lwa timvuka, bakala diandi wafinga bampangi! Yasmeen mbo keri vulu kwe diri mu bungu ti mu mpila ya mbi beri mu bongelaka.

¹⁵ Ku Nzo ya Nsambululu, kanda dia timpeve dia Yasmeen mbo dieri mu tindisaka mpe mbo dieri mu yikaka ngolo. Bakuluntu bamulomba kasarila malongi me mu Bisi-Rome 12:17-21. (Tanga.) Yasmeen têle ti: “Musamu wa mpasi weri. Kâ nalomba lubakusu kwe Yehova, mpe nasa miamiansoni mi nalenda mu sarila misamu mi tâka Bibila. Buna, bu keri losaka mvindu mu tikuku mbo ndieri saka bunkete. Bu keri kumfingaka mbo ndieri mu hanaka mvutu na bulembami bwabwansoni. Mpe bu keri bêlaka mbo ndieri mu kipaka.”

16-17. Ngano ntia misamu ta longoka mu tifwani tia Yasmeen?

¹⁶ Yasmeen wabaka ndandu mu bungu ti bakala diandi kasongela luzolo. Têle ti: “Bakala diani wabatika mu tomo bâ na lukwikulu mu meno mu bungu ti wazaba ti matieleka kwa nitâka. Wabatika mu kungwirikila na buzitu bwabwansoni bu tweri zonzelaka misamu mitariri dibundu, mpe watambula tasa tidzunu mu kati dia nzo. Bwawu bu mbo kakuntindisaka mu kwenda ku tukutakanu twa timvuka. Luzingu lwa mu kanda dieto lwatomono toma mpe nkatika tidzunu tie neto. Bwawu bu nzololo ti bakala diani kazibula mutima mu matieleka mpe tasarila Yehova tintwari.”

¹⁷ Tifwani tia Yasmeen tisongele ti luzolo ‘miamiansoni lukorelaka [. . .] miamiansoni lusilaka vuvu, miamiansoni luvivirilaka.’ (1 Kor. 13:4, 7) Diki dilendi bâ ngolo mpe dilendi fwemesa, kâ luzolo luyôkele ngolo. Tala ti tusongele luzolo kwe bantu bakaka, balendi bika mu tu kwamisa. Bu tutatamanaka mu songela luzolo mbo tutâka Yehova nsayi. Kâ ni bu sa ti bantu batukwamisaka batatamane mu tu yina, tulendi tatamana mu bâ mu nsayi. Mu bwe?

18. Mu bungu dia nti tulendi bâ mu nsayi bu batuyinaka?

¹⁸ Yezu watâ ti: ‘[Nsayi kwe beno], bo bantu bu balubelaka.’ (Like 6:22) Ka tusolaka ko ti batuyina. Ka tuzololo’â ko ti batukwamisaka mu bungu dia timinu tieto. Buna, mu bungu dia nti tulendi bêla mu nsayi mu ntangu yi batuyinaka? Tataleno misamu mitatu. Musamu wa ntete, mu  ntangu yi tukorelaka, Nzambi mbo katutambulaka. (1 Pi. 4:13, 14) Musamu wa nzole, timinu tieto mbo tikwizi bâka nguria ntalu mpe mbo tikwizi bâka ngolo. (1 Pi. 1:7) Musamu wa ntatu, mbo tukwizi baka musendo wuyôkele​—luzingu lwa mankululu.​—Rom. 2:6, 7.

19. Mu bungu dia nti bantumwa babâ mu nsayi bu bamana ba zwanda bisikoti?

¹⁹ Ntangu fioti ha manima ma mvumbukulu ya Yezu, bantumwa bamona nsayi yi kazonzela. Bu bamana ba zwanda bisikoti, babayimina mu vutu kwe samuni. Kâ bayizi bâ mu nsayi. Mu bungu dia nti? Mu bungu ti ‘bweso ba bwa, bwa korela mpasi mu bungu dia nkumbu ya Yezu.’ (Bis. 5:40-42) Luzolo mu bungu dia mfumu’awu lwayôka ngolo bunkuta bweri nawu mu bungu dia mbeni zawu zeri ba yinaka. Mpe basongela luzolo lwawu bu beri kwe tatamane mu samuna nsangu za mbote. Mpangi zazingi lumbu ti zita tatamana mu sarila Yehova na kwikama kwakwansoni ntono mpasi. Bazebi ti Yehova ka zimbakana tisalu tiawu ko, na luzolo lu basongela mu bungu dia nkumbu’andi.​—Ebr. 6:10.

20. Nti tuzonzela mu timoko tita landa?

²⁰ Mu nza yi ya mbi, bantu mbo batatamana mu tu yina. (Za 15:19) Kâ, ka tufweti’â tabâ na bunkuta ko. Ntiana bu tumona wo mu timoko tita landa, Yehova mbo kayika ngolo mpe mbo kakengerela bisari biandi bia kwikama. (2 Tes. 3:3) Buna, tatatamaneno mu zolo Yehova, mu zolo mpangi zeto na mu zolo mpe mbeni zeto. Bu tulanda malongi mo, mbo tutatamana mu bâ mu bumosi, timpeve tieto mbo tibâ ngolo, mbo tuhana nkembo kwe Yehova mpe mbo tusongela ti luzolo lutomono yôka yina ku batuyinaka mu ngolo.