Ntumwa Paulo watsonekena ndiku’andi Timote bu katâ: ‘Nikulombele ha meso ma Nzambi, ma Kristo Yezu na ma bambazi basolo mu landa malongi mo mu buderede, nge ku se munsola.’—1 Tim. 5:21.

Mu tu bakisa mu zaba bambazi bo ni banani, tatoko zonzela bambazi balembolo mu tikunku tio. Wa matieleka, ka bêna Bakristo ba tumbu ko. Mu ntangu ntumwa Paulo yi katsoneka kwe Timote, mvumbukulu ya Bakristo ba tumbu ka yabatika ko. Mu ntangu yîna bantumwa na Bakristo ba tumbu ka beri’â bivangu bia timpeve ko, ntiangu tulendi tâ ti bawu ka beri’â ‘bambazi ba solo’ ko.—1 Kor. 15:​50-54; 1 Tes. 4:​13-17; 1 Za 3:2.

‘Bambazi ba solo’ ka zena mbazi ko za kolama mu ntangu ya delize. Mbazi zo zalanda Satana zayizi bâ bademo, mpe zayizi bâ mbeni za Yezu. (Mba. 6:2; Like 8:​30, 31; 2 Pi. 2:4) Mu bilumbu bita kwiza, mbo babakanga mvula 1000 mu abime, mpe ha manima mbo babahonda mankululu na Satana.—Yude 6; Nza. 20:​1-3, 10.

Ntiangu, bambazi bo ba solo ba zonzela ntumwa Paulo balendi bâ bambazi basalaka tintwari na Nzambi na Yezu Kristo.

Mafunda na mafunda ma mbazi za kwikama ze ku zulu. (Ebr. 12:​22, 23) Mbazi zo za kwikama zazansoni Yehova ka bahanaka tisalu timosi ko. (Nza. 14:​17, 18) Mu tifwani Yehova walomba kwa kwe mbazi yimosi kahonda binwani 185000 bia Bisi-Asiri. (2 Mit. 19:35) Kâ mbazi zazingi balendi za hana dema dia ‘totakasa na dia dukisa mu Timfumu tiandi [Yezu] bô bakwe nati bantu bakaka mu masumu, na bô bakwe se bubi.’ (Mat. 13:​39-41) Mbazi zakaka balendi za hana dema dia kutakasa Bakristo ba tumbu ku zulu. (Mat. 24:31) Mbazi zakaka mpe balendi za hana dema dia ‘tu kengerela mu nzila zeto.’—Mik. 91:11; Mat. 18:10; fwanakasa na Matie 4:11; Like 22:43.

‘Bambazi ba solo’ ba bazonzelaka mu 1 Timote 5:21 kampe ni mbazi zi bahana dema dia kipa bimvuka, na dia hana lubakusu mu misamu miamiansoni mieri tarilaka bimvuka. Ntumwa Paulo, wahana malongi ma ndwenga matariri bakuluntu masa ti bampangi mu timvuka babahana buzitu. Ntumwa Paulo watâ, bakuluntu bafweti bâ na buderede peleko ka basandi munsola, mpe ka bafweti’â babonga nzengolo ko tala ti ka batomono’â banza mu bunsungu ko. Ntumwa Paulo wabasongela mu bungu dia nti bafweti landila malongi mo. Yandi watâ ti bakuluntu mpangi zawu basarilaka ‘ha meso ma Nzambi, ma Yezu kristo na ma bambazi ba solo.’ Wuzololo tâ ti Yehova, Yezu na bambazi ba solo tala batalaka mu ntia mpila bakuluntu bakipilaka timvuka, buna mbazi zakaka tisalu tiawu ni tia bakisa bimvuka, wuzolo tâ mbo bakengerelaka bisari bia Yehova, mbo bahanaka lubakusu mu tisalu tia samuna, mpe mbo batâka mio mi bamonaka kwe Yehova.—Mat. 18:10; Nza. 14:6.