Ngano na bunsungu bwabwansoni watengi bimoko bia Nzo ya Zangama ya Munkengi bia muvu wu? Tala ti ni bo, hanina biyuvu ebi mvutu:

Ntia tifwani Yehova katuhanaka mu mpila ya bongela bakento?

Mbo kababongelaka na kondo kwa tihambula, ka saka ko ti babakala babâ na mayela mamingi peleko na lenda diandingi yôka bakento. Nzambi bawu kawirikilaka, mabanza na lwaka lwawu kakipaka. Mpe bawu kakwikilaka mu sala tisalu tiandi mu mpila ya mbote.—w24.01, bin. 15-16.

Bwe tulendi sarila Bisi-Efeze 5:​7, yitâka: ‘Ka lusanganandi nawu misamu’?

Ntumwa Paulo watulwengesa mu lembo sa tintwari na bantu batukabakasa mu zitisa mitieno mia Nzambi. Tintwari tio tia mbi, mbo titarilaka bantu ba tuyôkesaka ntangu bu tumonanaka nawu, na bô ba tumokaka mu nzila ya médias sociaux.—w24.03, bin. 22-23.

Ntia binsamu bia bungungu tufweti tikengerela?

Tufweti sa keba mu binsamu bi tûkaka kwe mpangi zeto bi balembolo tomo taluzula, mu e-mail zi tulembo dingaka zi tûkaka kwe bantu batulembolo zaba, na kwe ba-aposta basongelaka ntiana’eti bazololo mu wâ nsangu zeto.—w24.04, tin. 12.

Nti tuzebi mpe nti tulembolo zaba mu mpila Yehova yi kafundisila mutinu Salomo, bantu bafwa ku Sodome na Gomore na mu delize?

Kâ tutomono’â zaba na lukwikulu lwalwansoni ko tala ti Yehova wafukisa bantu bo mankululu. Kâ, tuzebi ti misamu miamiansoni mia kazebi, mpe tiari tia lemvokela tiatingi tie nandi.—w24.05, bin. 3-4.

Mu bungu ti Nzambi ‘Tari’ diena ntia lukwikulu lwe neto? (Lub. 32:4)

Tulendi dinga tiswamunu kwe Yehova. Tulendi mu kwikila, ntangu zazansoni makani mandi kalungisaka. Mpe ka sobaka ko, timuntu tiandi na kani diandi, kani kabwe ka bisobaka ko.—w24.06, bin. 26-28.

Nti bilendi ku bakisa mu yukunu na timvuka tia môna?

Sikirila Yehova, mbo kakubakisa ntiana bu kabakisa bisari biandi bia mu ntama. Bika mu fwanakasa timvuka tiaku tia ntama na timvuka tiaku tia môna. Bâ na tisalu tiatingi mu timvuka tiaku tia môna, mpe bâ na ndiku za môna.—w24.07, bin. 26-28.

Ntia malongi madukaka mu bifwani bitatu bie mu Matie tikapu 25?

Tifwani tia bimeme na bankombo tifu tia kwikama na tia kangama titomo zonzelaka. Tifwani tia ndumba ze na ndwenga na ze bizoba mbo titomo songelaka tifu tia bâ wa kubama na tia bâ na meso ma tia. Mpe tifwani tia talanta mbo titomo songelaka mfunu ya bâ bantu basalaka mpe bê na luhemo.—w24.09, bin. 20-24.

Ngano mbuka ya nkotolo ya tempelo ya Salomo ntia mutela yabâ?

Mu 2 Ntangu 3:​4, mu mikanda miakaka mia ntama mbo batâka “moko 120,” ntiangu nkotolo ya tempelo ye mu 53 m mu bula. Kâ matsonoko makaka mbo matâka “moko 20,” buna bula bwa nkotolo ya tempelo mu 9 m bweri. Kampe lutangu ni lo lu delakane na bula bwa mbuka ya nkotolo.—w24.10, tin. 31.

“Bâ bakala dia mukento wumosi” bwe wuta zolo tâ kwe tibakisi mu tisalu? (1 Tim. 3:​12, NWT)

Wuzololo tâ mukento wumosi kwa kafweti kwela, mpe ka fweti’â kasa bunsuza ko. Kâ mpe, ka fweti’â kazolo bakento bakaka ko.—w24.11, tin. 19.

Mu bungu dia nti tulendi têla ti Za 6:53 ka tieri’â tifwani tia ndia ya Mfumu ko?

Za 6:53 mbo yizonzelaka mfunu ya dia musunia wa Yezu na ya nwa menga mandi. Yezu watâ musamu wo mu muvu wa 32 M.B., ku Galile kwe Bayuda beri na nsatu ya kwikila mu yandi. Kâ, ndia ya Mfumu ha manima ma mvula mosi babatika yo ku Yerusaleme. Yezu kwe bô bayâla ku zulu kazonzela.—w24.12, bin. 10-11.