1. Ntia musamu wa mpasi beto bakulu tubwabanaka na wo?

 BILUMBU biabiansoni nzengolo tubongaka. Zakaka ka zibâka mpasi ko mu bonga, ntiana nti tudia mu pari peleko ntia ntangu tufweti bwa tolo. Nzengolo zakaka mpasi zibâka mu bonga. Nzengolo zi tubongaka zilendi nata nsobolo mu tikolela tieto, mu nsayi’eto, kâ mpe kwe kanda dieto na mu lenda dieto dia sarila Yehova. Tuzololo ti beto na kanda dieto tabaka ndandu mu nzengolo zi tubongaka. Musamu wuyôkele mfunu ni wena’eti tuzololo ti nzengolo zeto zatâ Yehova nsayi.—Rom. 12:​1, 2.

2. Nti bilendi kubakisa mu bonga nzengolo za mbote?

² Mbo bâ na bweso mu bonga nzengolo za mbote tala ti 1) dingiri mu zaba misamu miamiansoni, 2) dingiri mu zaba mbanzulu za Yehova mu musamu wo, mpe 3) dimbitiri bubote mu muna musamu. Timoko ti mbo tizonzela mpila zo za zitatu, mpe mbo titubakisa mu zaba mu ntia mpila tulendi kurisila lenda dieto dia swasikisa.—Bin. 2:11.

ZABA MISAMU MIAMIANSONI

3. Bangula mu bungu dia nti fweti toko zabila misamu miamiansoni ntete wabongo nzengolo.

³ Tima tia ntete ti tufweti sa mu bonga nzengolo ya mbote ni  mu zaba misamu miamiansoni. Mu bungu dia nti we mfunu? Banza’eti tala ti mbevo ye monekena doktere mu bungu dia timbevo tiandi tia ngolo. Ngano doktere mbo kabonga nzengolo ya mu hana bilongo tala ti ka taluzuri’â mbevo ko peleko ka mu yuriri’â biyuvu ko? Kâni. Nge mpe mbo bonga nzengolo za mbote tala ti tokolo dinga mu zaba misamu mita kwelana na mio mita bwabana na mio lumbu ti. Bwe lendi bwa sila?

4. Tintwari na Bingana 18:13, nti lendi sa mu zaba misamu miamiansoni? (Tala mpe tifwani.)

⁴ Lendi zaba misamu miamingi bu yulaka biyuvu. Mu tifwani tala ti bakutêle mbila ku malaki. Ngano mbo kwenda? Tala ti kuzebi’â muntu siri malaki ko, peleko kuzebi’â mpila yi mayôkela ko, lendi yula: “Kwe, mpe ntia ntangu malaki mo masalama? Ntia bunene ma bêla? Nani twarisa malaki mo? Banani babâ kô? Nti biyôka kô? Ntia malavu banwa kô?” Mvutu za biyuvu bio mbo zikubakisa mu bonga nzengolo ya mbote.—Tanga Bingana 18:13.

5. Nti fweti sa bu mana taluzula misamu miamiansoni?

⁵ Ha manima, bu mana zaba misamu miamiansoni, tomo dimbitila mu musamu wo. Mu tifwani, ngano nti bilendi yôka tala ti bantu balembo zitisaka mitieno mia Bibila babâ ku malaki mo, peleko malavu mamingi bahanina nzila kwe bantu mu nwa? Ngano benzi ti malaki mo mbo makwizi beba? (1 Pi. 4:3) Ku lweka  lwakaka, nti biyôka tala ti ntangu yiyôka malaki mo yikwelane na ntangu yi kwenda ku lukutakanu peleko ku tisalu tia samuna? Mu ntangu yi taluzula misamu mio miamiansoni mbo kwizi bâ na lenda dia bonga nzengolo ya mbote. Kâ musamu wakaka we kô fweti sa. mpila yi ta mwina musamu ya zebi; kâ Yehova bwe kata wamwina?—Bin. 2:6.

DINGA MU ZABA MBANZULU ZA YEHOVA

6. Ntiana buta wasingasa Zaki 1:​5, mu bungu dia nti tufweti sambila Yehova mu baka lubakusu lwandi?

⁶ Lomba Yehova kakubakisa mu zaba mabanza mandi. Yehova tu kanisini mu tu hana ndwenga mu bakula misamu mimutâka nsayi. Yehova ndwenga kahanaka ‘kwe babansoni na lukabu yandi ka sembe.’—Tanga Zaki 1:​5, NWT.

7. Bwe lendi zabila mbanzulu za Yehova? Hana tifwani.

⁷ Bu mana sambila Yehova ngatu kakutwarisa, tomo sa keba mu mvutu’andi. Mu tifwani: tala ti zimbakane nzila ku hata dia bunzenza, lendi lomba lubakusu kwe muntu wubâka ku hata dio. Kâ ngano mbo kwenda tala ti kuwiri’â mvutu ko? Diangana kâni. Mbo tomo teka kutu mu lutwalusu lu kakuhana. Mpila mosi mpe, bu mana lomba ndwenga kwe Yehova, dinga mu bakula mvutu’andi bu taluzula misiku na mitieno mia Bibila mita tarila musamu’aku. Mu tifwani, mu ntangu yi bonga nzengolo mu kwenda ku malaki ma tuzonzele,  lendi kwizi taluzula misamu mitâka Bibila mu bungu dia malaki, mu bungu dia tintwari na bantu balembolo Mbangi za Yehova, mpe na mfunu ya tûla Timfumu tia Nzambi ha tibuka tia ntete, ntete nsatu za beto beni.—Mat. 6:33; Rom. 13:13; 1 Kor. 15:33.

8. Nti tulendi sa tala ti nsatu lubakusu ye neto mu baka mvutu mu misamu mi tuta dinga? (Tala mpe tifwani.)

⁸ Ntangu zakaka, lendi bâ na nsatu lubakusu mu baka mvutu mu misamu mi ta dinga. Lendi yula mbanzulu za mpangi yimosi ya yela. Kâ, mbo baka mpe ndandu bu sa recherches za nge beni. Mu bisalulu bieto bia ndongokolo malongi mamingi me mô, ntiana Mukanda wa dingila wa Mbangi za Yehova na Versets pour la vie chrétienne. Kuzimbakanandi, kani diaku ni dia bonga nzengolo yitâ Yehova nsayi.

9. Bwe tulendi bêla na lukwikulu ti nzengolo’eto mbo yitâ Yehova nsayi? (Bisi-Efeze 5:17)

⁹ Bwe tulendi bêla na lukwikulu ti nzengolo’eto mbo yitâ Yehova nsayi? Ntete, tufweti longoka mu tomo mu zaba. Bibila mbo ditâka “luzabu lwa Wô Yôkele Busantu, mô ni mayela.” (Bin. 9:​10, NWT) Nguria mayela mu luzabu lwa bifu bia Yehova, bia kani diandi, bia misamu mi kazololo peleko mi kayinaka matukaka. Tiyula tiyuvu eti: ‘Mu mio mia nzebi mu Yehova ntia nzengolo ndendi bonga yimutâ nsayi?’—Tanga Bisi-Efeze 5:17.

10. Mu bungu dia nti misiku mia Bibila miyôkele mfunu tikulu tia makanda meto?

¹⁰ Ntangu zakaka, mu tâ Yehova nsayi tufweti niongesa ndiku zeto. Mu tifwani, na mbanzulu za mbote bibuti bilendi sa tiya kwe bala bawu babakento mu kwela bakala die na mbongo—mpe dilendi hana dot ya ntalu—ni bu sa ti kasalaka bwabwingi ko mu tisalu tia Yehova, peleko kasirilaka ngolo ko mu kurisa tindiku tiandi na Yehova. Wa matieleka, we nawu mwana’awu ka kondo’andi tima ku makwela mandi, kâ nani mu bakisa mu kula mu timpeve? Mabanza ma Yehova ni me? Mbo tubaka mvutu mu Matie 6:33. Mu verse yo, balwengese Bakristo mu tatamana mu “toko dinga Timfumu tia Nzambi.” Ni bu sa ti bibuti bieto na bantu batuzungurilaka tuzitisaka, musamu wuyôkele mfunu kwe beto ni mu tâ Yehova nsayi.

DIMBITILA BUBOTE MU MUNA MUSAMU

11. Tifu ti bata zonzela mu Bisi-Filipe 1:​9, 10 bwe tilendi tu bakisila mu tomo taluzula misamu?

¹¹ Ha manima, bu tomo bakula mitieno mia Bibila mitariri nzengolo’aku, tomo dimbitila mu muna musamu. (Tanga Bisi-Filipe 1:9, 10.) Tifu tia swasikisa mbo tikubakisa mu taluzula muna musamu wulendi tula. Ntangu zakaka ka wubâka musamu wa mpasi ko mu bonga nzengolo. Kâ nzengolo zakaka mpasi zibâka mu bonga. Lenda dia swasikisa mbo dikubakisa mu bonga nzengolo ya ndwenga ni bu sa ti musamu wa nguria wa mpasi wena.

12-13. Bwe lenda dia swasikisa dilendi kubakisila mu bonga nzengolo ya ndwenga mu musamu wutariri tisalu?

¹² Banza’eti musamu ewu. Tisalu takwe dingi ngatu wakipa kanda diaku. Bakusongele bisalu biole. Taluzuri misamu miamiansoni, ntia tisalu tiena, ntia ntangu tikumbonga, ntia ntangu yifwanane ngatu watula kûna. Bisalu bia biole Mukristo lendi bia sala. Kampe lendi sola tisalu mu bungu ti tia kazololo peleko mbongo zazingi kabaka. Kâ misamu miakaka kafweti taluzula ntete kabonga nzengolo.

¹³ Ngano timosi tia bisalu bio mbo tikukabakasa mu kwenda ku tukutakanu twa timvuka? Ngano timosi tia bisalu bio mbo tidimina ntangu’aku ya kipa nsatu za luzolo na za timpeve za kanda diaku? Bu tiyula biyuvu bio mbo bikubakisa mu bâ wa kangama “mu misamu miyôkele mfunu”—ntiana nsambululu’aku mpe na nsatu za kanda diaku ntete wadinga kwa  mbongo. Buna mbo bonga nzengolo Yehova yi kasakumuna.

14. Bwe lenda dia swasikisa na luzolo bilendi tu bakisila mu lembo tesa bantu bakaka makuba?

¹⁴ Lenda dia swasikisa mbo ditubakisa mu tomo dimbitila mu nsobolo zilendi nata nzengolo’eto kwe bantu bakaka, ngatu kabatandi makuba. (Flp. 1:10) Mfunu wena mu ntangu yi tubongaka nzengolo zita tutarila ntiana mpila’eto ya lwatila na ya monekena. Mu tifwani, tulendi zolo mpila yimosi ya lwatila mpe ya monekena. Kâ nti biyôka tala ti bantu bê ku mbazi peleko bê mu timvuka batêle makuba? Lenda dia swasikisa mbo ditubakisa mu zitisa mbanzulu zawu. Luzolo mbo lututuma mu dinga bubote bwa bampwana’eto, mpe mu zaba ndilu zeto. (1 Kor. 10:23, 24, 32; 1 Tim. 2:9, 10) Mbo tukwizi bonga nzengolo yi sikamana mu luzolo na buzitu mu bampwana’eto.

15. Mu ntia musamu fweti dimbitila ntete wabonga nzengolo ya mfunu?

 ¹⁵ Tala ti nzengolo ya mfunu bonga dimbitila mu misamu milendi yirika mu lungisa yo. Yezu watulongesa mu zaba ntalu ya tima. (Like 14:28) Dimbitila mu ntangu, mu bima na mu ngolo zifwanakane mu lungisa nzengolo yo. Ntangu zakaka, lendi moka na kanda diaku mu zaba nti muna muntu kafweti sa mu lungisa nzengolo yo. Mu bungu dia nti we mfunu mu sila bo? Mpila yo yilendi songela tala ti nzengolo yo bafweti vutu ya taluzula peleko bafweti ya soba. Mu ntangu yi dinga mu zaba mabanza ma kanda diaku, mpe yi tomo bawirikila, ka wubâ musamu wa mpasi ko kwe bawu mu sala naku tintwari mu lungisa nzengolo yo.—Bin. 15:22.

BONGA NZENGOLO YILUNGANA

16. Ntia misamu lendi yirika mi kubakisa mu bonga nzengolo yi lungana? (Tala kaku “ Bwe lendi bongela nzengolo za mbote.”)

¹⁶ Tala ti lendi misamu miamiansoni mi tuzonzele, dieka bo wa kubama wena mu bonga nzengolo ya ndwenga. Bakuri misamu miamiansoni, taluzuri mitieno mikubakisa mu bonga nzengolo yitâ Yehova nsayi. Bwawu bu, lendi lomba kwe Yehova kakubakisa mu lungisa nzengolo’aku.

17. Nti bie mfunu mu bonga nzengolo ya mbote?

¹⁷ Ni bu sa ti nzengolo zazingi wabonga mu ntama za lungana, bambuka ti musamu wuyôkele mfunu mu bonga nzengolo za mbote ni mu lembo sikirila ndwenga zaku peleko luzabu lwaku, kâ ni mu bâ na lukwikulu mu ndwenga za Yehova. Ni Yandi kwa lendi kuhana luzabu lwa matieleka, mayela na lenda dia swasikisa—bio ni bima bia mfunu mu bâ na ndwenga. (Bin. 2:​1-5) Yehova lendi kubakisa mu bonga nzengolo zimutâka nsayi.—Mik. 23:2, 3.