TIMOKO TIA NDONGOKOLO 5
MUKUNGA 108 Luzolo lwa kwikama lwa Nzambi
Bwe tulendi bakila ndandu mu luzolo lwa Yehova
‘Kristo Yezu wayiza mu nza mu kûla basumuki.’—1 TIM. 1:15.
MABANZA MA NGURI
Bwe tulendi bakila ndandu mu nkûlulu, mpe bwe tulendi vuturila matondo kwe Yehova.
1. Nti tulendi sa mu tâ Yehova nsayi?
BANZA’ETI heni kabu dia ntalu mpe dia toma kwe muntu wuzololo, di kalendi sarila. Tiari tiatingi tibâ naku tala ti muntu wo bongele kabu dio wele dia tûla huma mpe kata vutu dia kipa ko! Kâ nsayi yayingi yibâ naku tala ti kabu dio dia kata tomo sarila, mpe mbo kavutulaka matondo mu bungu dia kabu dio. Mu bungu dia nti tuta zonzela tifwani ti? Mu bungu ti Yehova Mwana’andi kahana mu beto. Yehova nsayi yayingi yibâka nandi mu ntangu yi tuvutulaka matondo mu bungu dia kabu dio dia ntalu, mpe mu bungu dia luzolo lwamutuma mu hana nkûlulu!—Za 3:16; Rom. 5:7, 8.
2. Nti tuzonzela mu timoko ti?
2 Kâ ntangu bu yita kwe yôke, tulendi kwizi bongela nkûlulu ntiana kabu dilembolo ntalu. Mbo wubâ ntiana’eti beto twe tûla kabu dia Nzambi ha mbuka yi tulembo dia kipila. Nsayi ye neto mu baka kabu dio, kâ twe dia sweka. Mu lembo sweka kabu dio tufweti sarila ngolo ntangu zazansoni mu vutulaka matondo kwe Yehova na kwe Yezu mu mio mi bayirika mu beto. Timoko ti mbo titubakisa mu sila bo. Mbo tumona bwe tulendi bakila ndandu mu nkûlulu bwawu bu na mu bilumbu bita kwiza. Mbo tutaluzula mpe bwe tufweti tondela mu luzolo lwa Yehova, nsungula mu ntangu yi ya Mbambukulu.
BWAWU BU NTIA NDANDU TUTA BAKA MU NKÛLULU
3. Bwawu bu bwe tulendi bakila ndandu mu nkûlulu?
3 Bwawu bu ndandu tuta baka mu mukayulu wa Yezu Kristo. Mu tifwani, mu nzila ya nkûlulu, Yehova masumu meto kalemvokelaka. Yehova kena na nsatu ko bamutuma mu tu lemvokela, kâ zololo mu tu lemvokela. Titsoniki tia Mikunga wavutula matondo bu katâ: “Mu bungu ti Nge, Ô Yehova, wa mbote wena mpe zololo mu lemvokela.”—Mik. 86:5; 103:3, 10-13 NWT.
4. Kwe banani Yehova kahana nkûlulu? (Like 5:32; 1 Timote 1:15)
4 Bantu bakaka balendi banza ti ka bafwanane’â ko ti Yehova kabalemvokela. Wa matieleka, beto bansoni ka tufwanane’â ko batulemvokela. Ntumwa Paulo wabakula ti ‘ka fwanana ko mu bâ na nkumbu ya ntumwa.’ Kâ, wayika: ‘Mu bweso bwa Nzambi ndie bu bu ndiena.’ (1 Kor. 15:9, 10) Mu ntangu yi tufungulaka masumu meto, Yehova lemvokela ka tulemvokelaka. Mu bungu dia nti? Ka wena ko ti wufwanakane katulemvokela, kâ beto kalemvokelaka mu bungu ti beto kazololo. Tala ti wa nôka wena mu bungu ti mbo banzaka ti Yehova ka lendi’â kakulemvokela ko, bambuka ti Yehova kahana nkûlulu ko mu bungu dia bantu ba lunga, kâ mu bungu dia bantu ba masumu basobaka mabanza.—Tanga Like 5:32; 1 Timote 1:15.
5. Ngano Yehova fweti tu lemvokela? Bangula.
5 Ka tufweti’â tabanza ko ti Yehova fweti tu lemvokela mu bungu ti tûka mvula zazingi tumusarilaka. Wa matieleka, kwikama kweto nsayi ku mu tâka. (Ebr. 6:10) Nkûlulu ya mpamba katuhana, ka tu hana yo ko mu tu futa mu bungu dia misamu mia mbote mi tuyirikaka mu Yandi. Buna ka wudelekane’â ko mu banza ti Yehova fweti tu lemvokela mu bungu ti misamu miamingi tayirika mu Yandi, tamana banzila bo, wuzololo tâ ka twena na nsatu nkûlulu ko.—Fwanakasa na Bisi-Ngalate 2:21.
6. Mu bungu dia nti Paulo kasala bwabwingi mu tisalu tia Yehova?
6 Paulo wazaba ti Nzambi ka keti’â mu tambula ko. Kâ, mu bungu dia nti kasala bwabwingi mu tisalu tia Yehova? Kasila bo ko mu songela ti wafwanakana ba mulemvokela, kâ mu vutula matondo mu bweso bwa nzitukulu bwa muhana Yehova. (Efz. 3:7) Ntiana Paulo, mbo tutatamanaka mu sarila Yehova na luhemo lwalwansoni, ka mu mu songela ko ti wufwanane katulemvokela, kâ ni mu mu vuturila matondo.
7. Mpila yakaka yi tulendi bakila ndandu mu nkûlulu bwawu bu ni ye? (Bisi-Rome 5:1; Zaki 2:23)
7 Mpila yakaka ya bakila ndandu mu nkûlulu bwawu bu, ni mu bâ na tindiku tia mbote na Yehova. a Ntiana bu batêle wo mu timoko tiayôkele, mu ntangu yi tubutukaka ka tubâka ndiku za Nzambi ko. Mu nzila ya nkûlulu tulendi bâ na lenda dia bâ mu “tidzunu na Nzambi” mpe dia pusana kwe Yandi.—Tanga Bisi-Rome 5:1; Zaki 2:23.
8. Mu bungu dia nti tufweti vuturilaka matondo kwe Yehova bu katuhana bweso bwa mu sambila?
8 Tataleno tima tiakaka tiyôkele mfunu mu tindiku tieto na Yehova—bweso bweto bwa sambila. Yehova lusambulu lu tusaka bu tuvukanaka na bampangi kawâka, kâ mpe na lusambulu lu tusaka bu tubâka beto kaka. Lwaka lweto mbo ludiminaka mu ntangu yi tusambilaka, kâ ndandu ka yena kwa yo ko mu bungu dia lusambulu. Lulendi kurisa tindiku tieto na Yehova. (Mik. 65:2; Zaki 4:8; 1 Za 5:14) Mu ntangu yi keri ha mutoto, Yezu bwabwingi keri sambilaka mu bungu ti wazaba ti Yehova lusambulu lwandi keri wâka, mpe lusambulu tindiku tiandi na Tata’andi lweri kurisaka. (Like 5:16) Diangana, matondo mamingi tuvutulaka mu bungu ti mu nzila ya mukayulu wa Yezu lenda die neto diabâ ndiku za Yehova, mpe dia mu zonzela mu nzila ya lusambulu!
BWE TULENDI BAKILA NDANDU MU NKÛLULU MU BILUMBU BITA KWIZA
9. Mu bilumbu bita kwiza, ntia ndandu nkûlulu yinata kwe bisari bia kwikama?
9 Bwe bisari bia kwikama bia Yehova bi bakila ndandu mu nkûlulu mu bilumbu bita kwiza? Mbo babaka luzingu lwa mankululu. Bantu babingi babanzaka ti ka bulendi’â bwa bâ ko, mu bungu ti tûka mivu bantu fwa bafwaka. Kâ, tûka ku mbatukulu Yehova wawaya ti bantu bazinga mankululu. Tala ti Adame ka sumuka ko, bantu ka baketi’â banza ko ti zinga mankululu musamu wa nzitukulu wena. Ni bu sa ti zinga mankululu musamu wa nzitukulu wena lumbu ti, tulendi wakwikila mu bungu ti tuzebi ti Yehova wafuta ntalu yiyôkele, luzingu lwa Mwana’andi, ngatu tazinga mankululu.—Rom. 8:32.
10. Bakristo ba tumbu na bimeme biakaka nti bata kêla na timina diadiansoni?
10 Ni bu sa ti luzingu lwa mankululu kabu diena di kwiza mu bilumbu bita kwiza, Yehova zololo ti twe dia kêle tûka bwawu bu. Bakristo ba tumbu mbo bakêlaka na timina diadiansoni luzingu lwa toma ku zulu mu ntangu yi bayâla mutoto na Yezu. (Nza. 20:6) Bimeme biakaka tivuvu tie nawu mu zinga ku paradi yibâ ha mutoto ku kondo mpasi na tiari. (Nza. 21:3, 4) Ngano nge mpe mu kati dia bimeme biakaka wena bie na tivuvu tia zinga mankululu ha mutoto? Yehova wasala bantu ngatu babâ ha mutoto. Ntiangu luzingu lwa mankululu ha mutoto mbo lutunatina nsayi yayingi.
11-12. Ntia tusakumunu tubaka ku Paradi? (Tala mpe bifwani.)
11 Banza’eti kabwe luzingu lwaku lubêla ku Paradi. Kuvutu’â bâ na lwaka ko mu bungu dia malari peleko lufwa. (Iza. 25:8; 33:24) Yehova mbo katomo lungisa nsatu zaku zazansoni. Ngano mbo dinga mu tomo zaba bibulu? Ngano mbo zolo mu longoka mu sika ngoma peleko tima tiakaka tia mizike? Ngano mbo dinga mu longoka mu sa dessin? Ntembe kâni, mbo tubâ na nsatu bantu bazebi desina nzo (architectes), bazebi tunga, mpe bazebi sala misitu. Mbo tubâ mpe na nsatu bantu bazebi lamba, bazebi yirika bisalulu (outils), bazebi kuna bifulu, mpe bazebi kipa bima bio. (Iza. 35:1; 65:21) Ntangu yayingi yibâ naku mu sala bisalu biabiansoni bi zololo, mu bungu ti mbo zinga mankululu.
12 Diangana nguria nsayi yibâ mu bwana bantu bavumbuka kwe bafwa! (Bis. 24:15) Banza ka ntia nsayi yibâ naku butomo longoka mu zaba Yehova, bu kwe taluzuri bima biabingi bi kasala. (Mik. 104:24; Iza. 11:9) Musamu wakaka wa mbote ni wena’eti, mbo tubâ na nsayi mu sarila Yehova na ngindu ya mbote! Ngano mbo tambula mu soba tusakumu to na “nsayi ya ntangu fioti ya masumu”? (Ebr. 11:25, NWT) Kani kabwe kutambula ko! Luzingu lu tubaka luyôkele bubote mio miamiansoni mi tulendi baka bwawu bu. Bambuka ti, kani dia Paradi ka ditatamana ko mu bâ tivuvu. Kâ mbo yibâ mbuka yi tubêla bilumbu biabiansoni. Misamu mio miamiakulu mbo milungana mu bungu ti Yehova watomo tu zolo bu katuhana kabu dia nkûlulu!
Ku Paradi ntia tusakumunu ta kêla na timina diadiansoni? (Tala paragrafe 11-12)
SONGELA TI TONDA TONDAKA MU LUZOLO LWA YEHOVA
13. Bwe tusongelaka ti tonda tutondaka mu luzolo lwa Yehova? (2 Bisi-Korente 6:1)
13 Bwe tulendi vuturila matondo kwe Yehova mu nkûlulu yi katuhana? Ni mu ntangu yi tutûla tisalu tiandi ha tabuka tia ntete mu luzingu lweto. (Mat. 6:33) Mu bungu ti Yezu wafwa “ngatu bô bazingaka ka bavutuandi zinga mu bungu dia bawu beni, kâ mu bungu dia yandi wafwa mu bungu dia bawu mpe wu bavumbula” (2 Kor. 5:15, NWT) Yehova watusongela mbote, mpe watulemvokela. Bu tu sa miamiansoni mi tulenda mu mu sarila, mbo tusongela ti miamiansoni tubakulaka mi kayirika mu beto, mpe mbo tutomo mu tondaka.—Tanga 2 Bisi-Korente 6:1.
14. Bwe tulendi songela timinu mu lutwalusu lwa Yehova?
14 Tulendi songela luzolo lweto mpe kwe Yehova bu tumukwikila mpe bu tulanda lutwalusu lwandi. Mu ntia mplila? Mu ntangu yi tubongaka nzengolo ntiana ntia lukolo tusa, peleko ntia tisalu tufweti tambula, tufweti dinga mu zaba nti Yehova kata zolo tasa. (1 Kor. 10:31; 2 Kor. 5:7) Mu ntangu yi tubongaka nzengolo zisikamanaka mu timinu tieto mu Yehova—timinu tieto na tindiku tieto na Yandi mbo bikwizi bâ ngolo, mpe tivuvu tieto tia luzingu lwa mankululu mbo titomo yikama ngolo.—Rom. 5:3-5; Zaki 2:21, 22.
15. Bwe tulendi tondela mu ntangu ya Mbambukulu?
15 Tulendi vutula matondo kwe Yehova mu mpila yakaka. Tufweti sa miamiansoni mi tulenda ntete Mbambukulu na ha manima ma Mbambukulu, mu songela kwe Yehova ti tonda tutondaka mu nkûlulu. Bu tukwe kubame mu bâ ku Mbambukulu, tulendi tikisa mpe bantu bakaka. (1 Tim. 2:4) Bangurila bantu batikisa bwe Mbambukulu yiyôkelaka. Basongela mpe video ye mu jw.org ye na mutu-diambu Mu bungu dia nti Yezu kafwila? mpe video ye na mutu-diambu Bambukila lufwa lwa Yezu. Bakuluntu bafweti sa miamiansoni mu tikisa bampangi bakota tiozi mu timpeve. Banza’eti nsayi yibâ ku zulu na ha mutoto tala ti bimeme bia Yehova bia zimbakana babakisi bio mu kâla mu twila diandi! (Like 15:4-7) Ku Mbambukulu tufweti tomo bwana mpangi zeto, kâ nsungula bô bakwiza mu mbala ya ntete, mpe bô balembo vutu kwizaka ku lukutakanu tûka ntama. Tuzololo babâ mu nsayi bu tutomo babwana!—Rom. 12:13.
16. Mu bungu dia nti tufweti bongela nzengolo mu sala bwabwingi mu ntangu ya Mbambukulu?
16 Ngano lendi vutu sala bwabwingi mu tisalu tia Yehova ntete tumingu twa Mbambukulu na ha manima ma Mbambukulu? Mpila yena ya mbote mu vutula matondo kwe Nzambi na kwe Yezu mu misamu mi bayirika mu beto. Bu tusala bwabwingi mu tisalu tia Yehova mbo tumona lubakusu lwandi, mpe lukwikulu lweto mu Yandi mbo lutomo kula. (1 Kor. 3:9) Tomo landa ntangulu ya Bibila ya Mbambukulu ye mu mukanda wa Taluzulaka Matsonoko Bilumbu Biabiansoni, peleko mu tablo ye mu mukanda wa Luzingu na tisalu tia Bakristo. Lendi sarila verse zo za Bibila mu bungu dia ndongokolo ya nge beni.
17. Nti bitâka Yehova nsayi? (Tala mpe kaku “ Bwe lendi vuturila matondo mu luzolo lwa Yehova.”)
17 Wa matieleka, misamu miaku kampe ka mita kuhana lenda ko mu tomo sala bwabwingi ntiana bu bazonzele wo mu timoko ti. Bambuka ti Yehova ka fwanakasaka lenda diaku ko na lenda dia bantu bakaka; kâ mutima’aku katalaka. Nsayi yayingi yibâka nandi bu kamonaka ti mbo tomo vutulaka matondo mu bungu dia kabu dia nkûlulu.—1 Sam. 16:7; Mak. 12:41-44.
18. Mu bungu dia nti tufweti vuturila matondo kwe Yehova na kwe Yezu?
18 Mu nzila ya nkûlulu Yehova kalemvokelaka masumu meto, twe na tindiku na yandi, mpe twe na tivuvu tia baka luzingu lwa mankululu. Tatamana mu vutula matondo kwe Yehova, mu bungu dia luzolo lwandi lwamutuma mu tu hana tusakumunu to twatwansoni. (1 Za 4:19) Tatomo vutula mpe matondo kwe Yezu watomo tu zolo mpe wahana luzingu lwandi mu bungu dia beto!—Za 15:13.
MUKUNGA 154 Nkatika luzolo
