1. Lumbu ti bantu ntia musamu babelokela lwaka?

 NGANO wa ta bakula lumbu ti bantu babîngi nsatu za bawu beni kwa babelokelaka lwaka? Mu tifwani, babîngi ha kati diawu mbo basarilaka réseaux sociaux mu tilona na mu songela bima bi basaka. Kâ, lumbu ti, bantu ka babingi’â ko bahanaka mukembo kwe Yehova. Mu timoko ti mbo tumona, hana mukembo kwe Yehova bwe wuta zolo tâ, nti bilendi tu tuma mu sila bo. Mbo tulongoka mpe bwe tulendi hanina mukembo wufwanane kwe Yehova, mpe bwe Yandi beni kahanina mukembo mu nkumbu’andi mu bilumbu bita kwiza.

HANA MUKEMBO KWE YEHOVA BWE WUTA ZOLO TÂ?

2. Bwe Yehova kasongela mukembo’andi ku mongo wa Sinayi? (Tala mpe ha tinima tia ntete.)

² Ngano mukembo ni nti? Mu Bibila, ntêlo ya “mukembo” yilendi songela bima biabiansoni bisaka ti muntu wabâ wa nzitukulu. Bu kamana kûla kanda diandi ku bungamba ku Ezipte, Yehova wasongela mukembo’andi mu mpila ya nzitukulu. Banza’eti fioti: Milio za bala ba Israele bakutakane penepene na mongo wa Sinayi mu wirikila misamu mi batêla Nzambi. Tuti dia ndombi ditensamane ha zulu mongo wa Sinayi. Mu ta-pulukusu, mwisi wuzungiri mongo wa Sinayi—mutoto wuningane mu ngolo—nseremo peleko éclairs zibatikiri, nzazi na lwaza lwa mpungi ya ngolo. (Ndu. 19:16-18; 24:17; Mik. 68:8) Mu ntangu Yehova yi kayirika misamu mio, bala ba Isaraele bayizi  tomo yituku mu mona mu ntia mpila keri wa wunene, keri na ngolo mpe keri wa nzitukulu.

3. Hana mukembo kwe Yehova bwe wuta zolo tâ?

³ Bantu mpe balendi hana mukembo kwe Yehova. Mpila yimosi yi tulendi hanina mukembo’eto kwe Yehova ni mu zonzela ngolo zandi za nzitukulu kwe bantu na bifu biandi bitindisaka. Mbo tuhanaka mukembo kwe Yehova mu ntangu yi tutambulaka na bunsungu bwabwansoni ti mio miamainsoni mi tuyirikaka ni mu ngolo zandi tusilaka mio. (Iza. 26:12) Mutinu Davide tifwani tia mbote tieri mu hana mukembo kwe Yehova. Mu lusambulu lu kasa ha meso ma bala ba Israele, Davide watâ kwe Nzambi: ‘Kwe nge Yehova, bunene, ngolo, butoma, nkengolo, buzitu na mukembo, mu bungu ti biabiakulu bie ku zulu na ha mutoto bia nge biena.’ Davide bu kamanisa mu sambila, ‘timvuka tia mukaka tiakembela Yehova.’—1 Nta. 29:​11, 20.

4. Mu ntia mpila Yezu kahanina mukembo kwe Yehova?

⁴ Mu ntangu yi keri ha mutoto, Yezu wahana mukembo kwe Tata’andi bu katâ kwe bantu ti Yehova wamuhana lenda dia sa bimangu. (Mak. 5:​18-20) Yezu wahana mukembo kwe Yehova mu mpila yi keri mu zonzelaka, mpe mu mpila yi keri bombelaka bantu bakaka. Tilumbu timosi, Yezu bu keri longesaka mu sinagoge, ha kati dia bantu beri mu wirikilaka mweri mukento wumosi wu beri mwisaka mpasi kwe demo tûka mvula 18. Demo yango yamukondamasa, mpe mpila kâni yi kaketi vutu tomo telamana. Musamu wa tiari weri! Na tiari tiatiansoni, Yezu wapusana ha matu mandi, mpe wamutêla: ‘Mukento, timfuma tiaku tiwiri.’ Bu kamutenseka moko, ho nkatika bendo wayizi tomo telama mpe ni ‘kabatika mu hana mukembo kwe Nzambi,’ wayizi vutula matondo mu bungu ti Yehova wamuwasisa mpe wamuhana ngolo! (Like 13:​10-13) Musamu wa nkatika wa mbote wabâ kwe mukento wo mu vutula matondo, beto mpe.

NTI BITUTUMAKA MU HANA MUKEMBO KWE YEHOVA?

5. Ntia misamu mitutumaka mu zitisa Yehova?

⁵ Yehova tukembelaka mu bungu ti yandi tutomo zitisaka. Misamu miamingi mitutumaka mu sila bo. Yehova ni yandi we Nkwa-Ngolo-Zazansoni; mpe ngolo zandi ka zena na ndilu ko. (Mik. 96:​4-7) Ndwenga zandi mbo zitomo monekaka mu bima bi kayirika. Ni Yandi watuhana luzingu na bio biabiansoni bie neto nsatu mu bâ ba moyo. (Nza. 4:11) Wa kwikama wena. (Nza. 15:4) Miamiansoni mi kayirikaka mia milunganaka, mpe makani mandi kalungisaka. (Yos. 23:14) Ntiangu mbikuri Yeremi katâ mu bungu dia Yehova: ‘Ha kati dia bankwa-ndwenga babansoni ba makanda, mu bimfumu biawu mpe biabiansoni, ka kwena muntu ko wufwanakane na nge!’ (Yer. 10:​6, 7) Wa matieleka, misamu miamingi mitutumaka mu zitisa Tata’eto dia ku zulu. Ka tusukinaka ko kwa mu mu zitisa, kâ Yandi mpe tuzololo.

6. Mu bungu dia nti tuzololo Yehova?

⁶ Yehova tukembelaka mu bungu ti yandi tutomono zolo. Tataluzula bifu bia Yehova bitutumaka mu mu zolo. Tiari tia lemvokela tie nandi na tiari tia mutima. (Mik. 103:13; Iza. 49:15) Mu ntangu yi tumonaka mpasi; mpasi mpe kamonaka. (Zka. 2:8) Beto kabakisaka mu mu zaba na mu bâ ndiku zandi. (Mik. 25:14; Bis. 17:27) Yandi mpe wa kuluka wena; “mbo kakondamaka mu tala zulu na mutoto, mpe mbo kabendaka muntu wulembolo mfunu mu mfumfuta [poussière].” (Mik. 113:​6, 7, NWT) Mu bungu dia misamu mio miamiansoni, Nzambi’eto ya yinene tukembelaka.—Mik. 86:12.

7. Ntia bweso bwa nzitukulu bwe neto?

⁷ Yehova tukembelaka mu bungu ti tuzololo ti bantu bakaka bamuzaba. Bantu babingi  balembolo zaba matieleka matariri Yehova. Mu bungu dia nti? Mu bungu ti Satana mayela mawu kayabikaka mu ntangu yi katâka misamu mia bungungu mu Yehova. (2 Kor. 4:4) Satana bantu kawisisaka ti Yehova mbi kakarisaka, mpe ni Yandi tulumunaka mpasi zazansoni ze mu nza. Kâ beto matieleka matariri Nzambi’eto ma tuzebi! Mpe lenda die neto dia songela kwe bantu Yehova ntia mpila Nzambi yena, mpe mu babakisa mu mu kembela. (Iza. 43:10) Tikapu tia Mikunga 96 mbo tisongelaka bwe tulendi hanina mukembo kwe Yehova. Mukunga wo mbo wutulongesa bwe tulendi hanina mukembo wufwanane kwe Yehova.

BWE TULENDI HANINA MUKEMBO WUFWANANE KWE YEHOVA?

8. Bwe tulendi kembela Yehova? (Mikunga 96:​1-3)

⁸ Tanga Mikunga 96:​1-3. Tulendi kembela Yehova mu misamu mi tutâka mu yandi. Mu verse zo kanda dia Yehova batikisi dio mu ‘tangila Yehova mukunga,’ mu ‘kembela nkumbu’andi,’ mu ‘samuna nsangu za mbote za mvukulu,’ mpe mu ‘samuna mukembo’andi kwe makanda mamansoni.’ Zo zena mpila zazingi za tulendi hanina mukembo kwe Tata’eto die ku zulu. Bayuda ba kwikama na Bakristo ba mu mbandu ya ntete, ka beri’â kekamaka ko mu zonzela bantu misamu mia mbote mieri yirikaka Yehova mu bungu dia bawu, mpe mu nwanina nkumbu’andi. (Dan. 3:​16-18; Bis. 4:29) Bwe tulendi landila tifwani tiawu?

9-10. Nti longokele mu misamu mia bwabana na Angelena? (Tala mpe tifwani.)

⁹ Tataleno misamu mia bwabana na Angelena, a mpangi ya yikento yi bâka ku États-Unis. Na butindi bwabwansoni wanwanina nkumbu ya Yehova ku Compagnie yi keri salaka. Bu kabatika mu sala kûna, na bantu bakaka mpe babatika mu sala kûna, babatikisa ku lukutakanu lumosi. Ku lukutakanu lo, muna muntu mu bawu lenda dieri nandi dia zonzela luzingu lwandi na misamu mi kabwabana na mio. Angelena wakutika foto mu songela ntia nsayi yibâka nandi bu kena Mbangi ya Yehova mu luzingu lwandi. Kâ ntete kabatika mu zonza, mpwana’andi ya tisalu yatâ ti yandi mpe bamukurisa ntiana Mbangi ya Yehova. Yandi wabatika mu zonzela bubi bwa Mbangi za Yehova na nkwikulu zawu. Angelena têle: “Nayizi bâ na bunkuta bwabwingi. Mpe nayizi tiyula: ‘Ngano mbo nibika muntu wu katâ bungungu mu bungu dia Yehova peleko mbo ni nwanina nkumbu ya Yehova?’”

 ¹⁰ Mu ntangu mpwana’andi yi kamanisa mu zonza, Angelena wasambila mu ntinu ku nsi’â mutima. Na bulembami bwabwansoni wamutêla: “Luzingu lwani lufwanakane na luzingu lwaku. Meno mpe bakunkurisa ntiana Mbangi ya Yehova, mpe tii lumbi ti Mbangi ya Yehova ndiena.” Ni bu sa ti mitima mia bantu mu zulu mieri, na tidzunu tiatiansoni, Angelena wasongela kwe bampwana’andi ba ku tisalu foto zandi na za ndiku zandi beri sarila Yehova na nsayi yayansoni, mpe wabangula nkwikulu zandi na buzitu bwabwansoni. (1 Pi. 3:15) Ntia ndandu za moneka? Mu ntangu Angelena bu kamanisa mu zonza, bakala dio wayizi dzuna. Yandi wayizi tambula ti mbo kabambukilaka misamu mia mbote mi kabwabana na mio bu keri Mbangi ya Yehova mu buleke bwandi. Angelena têle: “Yehova fwanane banwanina nkumbu’andi, bweso bwena mu zonzela nkumbu’andi.” Bweso bwena kwe beto mpe mu kembela Yehova na mu mu hana mukembo ni bu sa ti bantu bakaka ka bamukembelaka ko.

11. Ntangu zazansoni mu ntia mpila bisari bia matieleka bilandilaka misamu mie mu Mikunga 96:8?

¹¹ Tanga Mikunga 96:8. Tulendi kembela Yehova na bima bieto bia ntalu. Ntangu zazansoni bisari bia matieleka mbo bakembelaka Yehova mu mpila yo. (Bin. 3:9) Mu tifwani, bala ba Israele bayika moko mu ntungulu na mu sa bunkete bwa Tempelo. (2 Mit. 12:4, 5; 1 Nta. 29:​3-9) Milongoki miakaka mia Yezu miahana bimvwama biawu ngatu yandi na ntumwa zandi babâ na bima bieri nawu nsatu (Like 8:​1-3) Bibila ditêle ti, mu ntangu Bakristo bakaka yi beri monaka mpasi mu bungu dia nsatu ya ngolo yakota ha hata, mpangi zawu zeri mu mbuka zakaka babatambikila mbongo. (Bis. 11:​27-29) Lumbu ti mpe, tulendi hana mukembo kwe Yehova bu tuhanaka makabu mu mutima wumosi.

12. Bwe makabu meto ma haninaka mukembo kwe Yehova? (Tala mpe tifwani.)

¹² Tabongeno tifwani tia musamu wumosi wuta songela bwe makabu meto ma kembelaka Yehova. Rapore ya 2020 yazonzela misamu mianata kondo kwa mvula (sécheresse) tûka ntangu yayingi ku Zimbabwe. Bantu babingi baketi fwa mu bungu ti ka beri’â na bidia ko, mu kati dia bantu bo mweri na mpangi yimosi ye na nkumbu Prisca. Ni bu sa ti nsatu yeri kô, Prisca watatamana mu samuna bilumbu bia mercredi na bia vendredi, tifu mpe ni tio tieri nandi mu ntangu ya sala misitu. Bampwana’andi babatika mu mu sehesela mu bungu ti ku  tisalu tia samuna keri kwendaka, kani kendi kasala ku misitu. Mpe bamutêla: “Mbo fwa mu nsatu.” Prisca wabahana mvutu na lukwikulu lwalwansoni ti: “Yehova ka yambirikaka bisari biandi ko.” Ntangu fioti ha manima mu nzila ya makabu meto, Prisca wayizi baka bidia na bima biakaka bieri nandi nsatu. Bantu beri seheselaka Prisca bayizi tomo yituku mpe bamutêla: “Nzambi ka kuyambirikiri’â ko, beto mpe we neto tazaba misamu miamingi mitariri Nzambi’aku.” Mu kati dia bantu bo, ba 7 babatika mu kwizaka ku tukutakanu twa timvuka.

13. Bwe ndiatulu’eto yilendi hanina mukembo kwe Yehova? (Mikunga 96:9)

¹³ Tanga Mikunga 96:9. Tulendi kembela Yehova mu ndiatulu’eto. Banganga-Nzambi beri salaka ku Tempelo ya Yehova bafweti bâ ba verela mu tinsuni. (Ndu. 40:​30-32) Beto mpe tufweti bâ ba verela, ka mu tinsuni’â ko kwa, kâ mpe tufweti sa keba mu yirika misamu mi lembo zoloko Yehova. (Mik. 24:​3, 4; 1 Pi. 1:​15, 16) Tufweti sarila ngolo mu losa “timuntu tia ntama”—wuzololo tâ, ndiatulu’eto na nsalulu zeto za mbi—mpe tufweti lwata “timuntu tia môna”—wuzololo tâ tufweti bâ na mabanza na nsalulu zisongelaka bifu bia mbote bia Yehova. (Kol. 3:​9, 10) Na lubakusu lwa Yehova, bantu bê na bifu bia mbi mpe bê na miangu balendi soba, mpe balendi lwata timuntu tia môna.

14. Nti ta longoka mu tifwani tia Jack? (Tala mpe tifwani.)

¹⁴ Mu tifwani, Jack miangu miamingi mieri nandi mpe timpumbulu tieri, bamuhana nkumbu ya le Demon. Mu bungu dia misamu mia mbi mi kayirika, Jack bayizi mu zengela lufwa. Kâ mu ntangu yi keri kêlaka lufwa lwandi, Jack wayizi tambula ndongokolo ya Bibila na mpangi yimosi yeri samunaka ku boloko di keri. Ni bu sa ti Jack misamu mia mbi kayirika, wayizi losa timuntu tiandi tia ntama mpe wayizi kubama mu baka bateme. Jack wayizi tomo soba, mpe tilumbu tia lufwa lwandi, bantu bakaka beri kêlaka boloko bayizi dila mu ntangu yi beri muhanaka mbote ya mansukina. Mfumu yimosi (sergent) yeri salaka ku boloko yatâ: “Jack mu ntama muntu weri wa nguria wa mbi ku boloko di, kâ bwawu bu weka muntu wuyôkele bubote mu babansoni.” Lumingu lwa landa lufwa lwa Jack, mpangi zo zakâla mu twarisa lukutakanu lwa ha kati dia lumingu ku boloko, babwabana na muntu wumosi weri ku boloko wayiza ku lukutakanu mu mbala ya ntete. Ngano nti biamutuma mu kwiza ku lukutakanu? Wayizi tomo yituku mu nsobolo za sa Jack mpe wadinga  mu zaba nti kafweti sa mu kembela Yehova. Wutomono moneka ti ndiatulu’eto yilendi hana mukembo kwe Tata’eto die ku zulu!—1 Pi. 2:12.

BWE YEHOVA KAHANINA MUKEMBO MU NKUMBU’ANDI MU BILUMBU BITA KWIZA?

15. Mu ntia mpila Yehova katomo hanina mukembo mu nkumbu’andi mu bilumbu bita kwiza? (Mikunga 96:​10-13)

¹⁵ Tanga Mikunga 96:​10-13. Verse za mansukina za Mikunga 96 mbo zisongelaka Yehova ntiana Mfundisi mpe Mutinu wa Buderede. Bwe Yehova kahanina mukembo mu nkumbu’andi mu bilumbu bita kwiza? Ni mu nzila ya mfundusu zandi. Ntamana mbo kafukisa Babilone ya yinene mu bungu ti bungungu kalongesaka mu nkumbu’andi. (Nza. 17:​5, 16; 19:​1, 2) Bantu bakaka bamona mfukulu ya Babilone ya yinene, balendi bonga nzengolo ya sarila Yehova na beto mu matieleka. Diangana, mu Armagedo Yehova mbo kafukisa timvuka tia Satana, mbo kakatula bô babansoni bamutelamanaka na bavwezaka nkumbu’andi. Kâ mbo kavukisa bô bamuzoloko, bamutumamanaka mpe bamuhanaka mukembo. (Mak. 8:38; 2 Tes. 1:​6-10) Ha manima ma ntontolo ya mansukina mu luyalu lwa mvula 1000 lwa Kristo Yezu, nkumbu ya Yehova mbo yikwizi tomo bâ ya santu. (Nza. 20:​7-10) Muna ntangu yîna, ‘mutoto nsi mbo wufuluka mu luzabu lwa mukembo wa Yehova ntiana mamba bu mafulusaka mubu.’—Hab. 2:14.

16. Ntia nzengolo bongele? (Tala mpe tifwani.)

¹⁶ Diangana musamu wa mbote wubâ mu ntangu bantu babansoni yi bahana mukembo wufwanane kwe Yehova! Kâ tii ntangu yi tula tilumbu tio, tufweti sa miamiansoni mi tulenda mu hana mukembo kwe Yehova ntangu zazansoni. Mu tu bakisa mu bakula ti musamu wo mfunu wena, Timvuka titwarisaka tisolele Mikunga 96:8 mu bâ verse ya muvu wa 2025 yitêle: “Haneno Yehova mukembo wufwanane na nkumbu’andi.”