1. Ntia ndandu tubakaka bu tukwendaka ku Mbambukulu mivu miamiansoni?

 MBO tambula ti nkûlulu kabu dia nkatika dia dinene diena! (2 Kor. 9:15) Mu bungu ti Yezu wahana luzingu lwandi, lendi bâ na tindiku tia ngolo na Yehova. Lendi bâ mpe na tivuvu tia nzinga mankululu. Ntiangu wufwanane tavutulaka matondo kwe Yehova mu bungu dia nkûlulu na lozolo lwandi lwamutuma mu futa yo! (Rom. 5:8) Mu tu bakisa mu tatamana mu tondaka, mpe mu lembo zimbakana mio mia yirika Yehova na Yezu mu beto, Yezu watulomba mu kwendaka ku Mbambukulu mivu miamiansoni.—Like 22:​19, 20.

2. Ntia misamu tuzonzela mu timoko ti?

² Muvu wu, mbo tukembela Mbambukulu ya lufwa lwa Yezu mu tilumbu tia samedi 12 avril 2025. Ntembe kâni mbo tubâ kûna. Ndandu yayingi tubaka tala ti mu ntangu yo ya Mbambukulu tubongele ntangu ya dimbitila a mu misamu mia yirika Yehova na Mwana’andi mu beto. Mu timoko ti, mbo tuzonzela misamu mita tu longesa nkûlulu mu Yehova na Mwana’andi. Mu timoko tita landa mbo batubakisa mu bakula bwe tulendi bakila ndandu, mpe bwe tulendi vuturila matondo mu nkûlulu.

 NKÛLULU NTI YITULONGESAKA MU YEHOVA

3. Bwe lufwa lwa muntu wumosi lulendi natina nkûlulu kwe millio za bantu? (Tala mpe tifwani.)

³ Nkûlulu Buderede bwa Yehova yitulongesaka. (Lub. 32:4) Mu bwe? Tataleno musamu ewu: Mu ntangu Adame yi kakolama kwe Nzambi, tabiarila masumu manataka ku lufwa. (Rom. 5:12) Mu tu kûla mu masumu na mu lufwa, Yehova wasa ti Yezu kahana nkûlulu. Kâ bwe mukayulu wa muntu wumosi wa lunga wulendi kûrila millio za bantu? Ntumwa Paulo wabangula: “Ntiangu, mu bukolo bwa muntu wumosi [Adame] bantu babingi bayizi sumuka, ntiangu mpe mu tumama kwa muntu wumosi [Yezu Kristo] bantu babingi bakwizi bâ ba sungama.” (Rom. 5:​19, NWT; 1 Tim. 2:6) Mu ntelo yakaka, muntu wumosi wa lunga mpe wakolama wasa ti beto bansoni tabâ bangamba za masumu na lufwa. Ntiangu wafwanana mpe muntu wumosi wa lunga mpe wa kondo bukolo watukûla.

4. Mu bungu dia nti Yehova kalembo bikila kwa bala ba Adame babâ na luzingu lwa mankululu?

⁴ Ngano wafwanana ti Yezu kafwa mu tu kûla? Mu bungu dia nti Yehova kalembo hanina nzila kwe bala ba Adame beri tumamaka mu zinga mankululu? Tulendi banza ti, mpila ya mbote yaketi bâ ya yirikila musamu wo. Kâ musamu wo ka wuta kwelana na buderede bwa lunga bwa Yehova ko. Mpe mbo waketi bâ ntiana’eti Adame kasa disumu dia dinene ko, mpe bala bandi ka babâ bantu basumuka ko, kâ ka wena wa matieleka ko.

5. Mu bungu dia nti tufweti bêla na lukwikulu ti Yehova mbo katatamana mu sarila buderede?

⁵ Musamu wakaka, tala ti Yehovah kafuta nkûlulu ko, mpe wabika bala ba Adame bazinga mankululu ni bu sa ti basumuka beri, Yehova ka keti’â landa misiku miandi ko mitariri mbote na mbi. Buna bantu mbo baketi bâ na bunkuta ti Yehova ka vutuandi landa misiku miandi, mpe ka lungisandi misamu mi katâ mu yirika mu bilumbu bita kwiza. Kâ ka twena na nsatu ko mu bâ na lwaka mu musamu wo. Mu bungu dia nti? Mu bungu ti Yehova wasarila buderede, ni bu sa ti mu sila bo wafwanana ti Mwana’andi wa fwa. Buna lendi bâ na lukwikulu ti mbo katatamana mu sarila buderede.

6. Bwe nkûlulu yisongelaka luzolo lwa Yehova? (1 Za 4:​9, 10)

⁶ Tifu tiakaka tie kô tiatomo tuma Yehova mu tambika Yezu mu fwa mu bungu dia beto, ni luzolo lwandi mu beto. (Za 3:16; tanga 1 Za 4:​9, 10.) Ndongosolo ya nkûlulu mbo yisongelaka ti Yehova zololo tabâ na luzingu lwa mankululu, kâ mpe takota mu kanda diandi. Tala musamu ewu: mu ntangu Adame yi kasumuka, Yehova wamukuma mu kanda dia bisari biandi. Buna beto bansoni ka tabutukila mu  kanda dia Nzambi ko. Kâ mu nzila ya nkûlulu, Yehova masumu meto kalemvokelaka, mbo kanata bantu babansoni basarilaka timinu mu Yandi mpe bamutumamanaka mu kanda diandi. Bwawu bu mpe tulendi bâ na tindiku tia mbote na Yehova, na mpangi zeto za kangama. Wa matieleka, ni beto tubakaka ndandu mu luzolo lwa Yehova!—Rom. 5:​10, 11.

7. Bwe mpasi za mona Yezu zita tu bakisila mu bakula mpila yi tu zololo Yehova?

⁷ Mbo tutomo bakulaka bwe Yehova katuzololo bu tudimbitilaka mu mpila lufwa lwa Yezu lwamumwisina mpasi. Satana mbo katâka ti ka kwena tisari tia Nzambi ko tilendi tatamana mu bâ wa kwikama, tala ti musamu wa mpasi wena mu bâ wa kwikama. Mu songela ti Satana ngungu yena, Yehova wabika ti Yezu kamona mpasi ntete kafwa. (Yobe 2:​1-5; 1 Pi. 2:21) Yehova wamona bantu beri seheselaka Yezu, binwani bieri mu twaka mpe bayizi mu koma ha poto. Yehova wamona Mwana’andi wa fwila mu mpila ya mbi. (Mat. 27:​28-31, 39) Yehova lenda dieri nandi dia kabakasa misamu mio mu ntangu yi kazolo. Mu tifwani, mbeni zandi bu zatâ: ‘Kambo yandi kazololo [Nzambi] ti kamukûla bwawu bu,’ Yehova mbo kaketi sila bo. (Mat. 27:​42, 43) Kâ, tala ti Nzambi wasila bo, ka kwa keti’â bâ nkûlulu ko, mpe ka taketi’â bâ na tivuvu ko. Ntiangu Yehova kabika Mwana’andi kavivirila mpasi zo tii ku lufwa.

8. Ngano Yehova tiari kamona mu ntangu yi beri mwisaka Mwana’andi mpasi? Bangula. (Tala mpe tifwani.)

⁸ Ka tubanzandi ti Nzambi kamonaka tima ku mutima ko mu bungu ti Yandi ni Nkwa-Ngolo-Zazansoni! Mu tifwani tiandi katusarila, watusala na lenda dia mona tiari peleko nsayi, buna Yehova mpe ni bo kamonaka. Bibila mbo ditâka lendi fwema mpe lendi bâ mu bunsana. (Mik. 78:​40, 41) Banza’eti misamu mia bwabana Abrahame na Izake. Abrahame wabaka ntumunu ya hana mwana’andi wa wumosi mu mukayulu. (Mba. 22:​9-12; Ebr. 11:​17-19) Tulendi banza mpila Abrahame yi kafwemena mpe na bunsana bweri nandi ku mutima mu ntangu yi keri kubamaka mu hondaka mwana’andi. Buna, banza’eti bwe Yehova kafwemena mpe kabêla mu bunsana mu ntangu yi keri monaka bantu beri mwisaka Mwana’andi mpasi mpe bamuhonda!—Mu jw.org tala video ya Imitez leur Foi : Abraham, Partie 2.

9. Nti lendi longoka mu luzolo lwa Yehova mu Bisi-Rome 8:​32, 38, 39?

⁹ Nkûlulu mbo yitulongesaka ti ka kwena muntu ko wutomono tu zolo yôka Yehova ni bu wubâ bibuti bieto peleko ndiku’eto ya mutima. (Tanga Bisi-Rome 8:​32, 38, 39.) Ntembe kâni, Yehova tomono tu zolo yôka beto beni. Ngano zololo wazinga mankululu? Yehova tomono wazolo yôka nge beni. Ngano  zololo masumu maku balemvokela mo? Yehova timina die nandi mu kulemvokela. Tima ti kata tu lomba, ni mu tambula kabu diandi dia nzitukulu bu tusarila timinu mpe bu tumutumamana. Nkûlulu kabu dia ntalu diena disongelaka bunene bwa luzolo lwa Yehova mu beto. Mpe mu nza ya môna mbo tutomo longoka lozolo lwa Yehova.—Ekl. 3:11.

NKÛLULU NTI YITULONGESAKA MU YEZU

10. a) Nti biatomo tâ Yezu tiari mu bungu dia lufwa lwandi? b) Mu ntia mpila Yezu kasongela ti Yehova mpemba yabâ nandi? (Tala mpe kaku “ Kangama kwa Yezu kwa sukula nkumbu ya Yehova.”)

¹⁰ Yezu nkumbu ya Yehova katomo belokelaka lwaka. (Za 14:31) Yezu watomo bâ mu tiari bu kabakula ti bantu mbo baketi bâ na mbanzulu za mbi mu Nzambi, bungu ti mbo kaketi fwa ntiana muntu weri vwezaka Nzambi, mpe ntiana timpumbulu. Ntiangu kasambila: ‘Tata, tala ti budelakane, mbungu yi nata yo mala na meno.’ (Mat. 26:39) Mu bungu ti Yezu wa kangama weri kwe Yehova tii ku lufwa lwandi, watomo songela ti misamu miatâ Satana mu Tata’andi mia bungungu kwa mieri.

11. Bwe Yezu kasongela ti bantu ba katomono zolo? (Za 13:1)

¹¹ Nkûlulu mbo yitulongesaka mpe Yezu bantu katomo belokelaka lwaka, nsungula milongoki miandi. (Bin. 8:31; tanga Za 13:1.) Mu tifwani, Yezu wazaba ti misamu miakaka mieri tarilaka tisalu tiandi tia samuna ha mutoto mbo miaketi bâ nkatika mpasi, nsungula lufwa lwandi lwa mpasi. Kâ Yezu walungisa misamu mio miamiansoni mia mpasi mu bungu ti Yehova wamutuma mio, mpe nsungula bantu katomo zolo. Yezu wasongela nguria luzolo kwe bantu, mu ntangu yi keri samunaka, yi keri balongesaka, mpe yi keri babakisaka. Mu tilumbu tia lufwa lwandi, Yezu wabonga ntangu ya sukula malu ma ntumwa zandi, ya batindisa na ya bahana lutwalusu. (Za 13:​12-15)  Mpe mu ntangu yi keri ha poto, Yezu wabonga mwa ntangu mu hana tivuvu kwe timpumbulu tieri fwaka ha lweka lwandi, mpe wakubika misamu ngatu bakipa nguri’andi. (Like 23:​42, 43; Za 19:​26, 27) Buna luzolo lwa lunene lwa Yezu lwatomo moneka mu nzila ya lufwa lwandi, kâ mpe na mu nzila ya misamu mi kayirika ha mutoto.

12. Nti Yezu kata sa mu bungu dia beto bwawu bu?

¹² Ni bu sa ti Yezu wa fwa mbala mosi, misamu miamingi kasaka mu bungu dia beto. (Rom. 6:10) Nti kasaka mu bungu dia beto? Mbo kata tatamana mu sala mu tu hana bima bia mbote mu nzila ya nkûlulu. Tala misamu mi kata yirika. Mutinu’eto wena, Mfumu Nganga-Nzambi’eto yena, mpe Mfumu’eto ya timvuka yena. (1 Kor. 15:25; Efz. 5:23; Ebr. 2:17) Dema die nandi dia vukasa Bakristo ba tumbu na yungi dia bantu, tisalu tio mbo tiwa ntete nsuka ya mpasi ziyôkele. b (Mat. 25:32; Mak. 13:27) Mbo kabakisaka ngamba ya kwikama mu tatamana mu tu hana bio bie neto nsatu mu sarila Yehova na kwikama kwakwansoni mu bilumbu bi bia mansukina. (Mat. 24:45) Mu luyâlu lwandi lwa mvula 1000, mbo katatamana mu lungisa nsatu zeto. Diangana, mu ntangu Yehova yi katuhana Mwana’andi, kamuhana ko kwa ngatu kafwa mu bungu dia beto, kâ ngatu kayirika misamu miamingi miakaka mu bungu dia beto!

KANI KABWE KUBIKANDI MU LONGOKA

13. Bwe dimbitila kulendi kubakisila mu tatamana mu longoka luzolo lwe na Nzambi na Yezu mu beto?

¹³ Lendi tatamama mu longoka lozolo lwe na Yehova na Yezu mu beto tala ti tatamane mu tomo dimbitila mu misamu mi bayirika mu beto. Kampe mu ntangu ya Mbambukulu ya muvu wu, lendi tomo tanga Evanzile yimosi peleko zazingi. Kudingandi mu tanga misamu miamingi mbala mosi. Kani wa sila bo, yenda tangi malembe-malembe, mpe dinga misamu miakaka mikubakisa mu zolo Yehova na Yezu. Mpe zonzela mio mi longoka mu ntangulu’aku kwe bampwana’aku.

14. Tintwari na Mikunga 119:97 mpe na note, bwe recherches zilendi tu bakisila mu tatamana mu longoka misamu mitariri nkûlulu na ndongosolo zakaka? (Tala mpe tifwani.)

¹⁴ Tala ti wa batusu wena tûka mivu miamingi, lendi tiyula tala ti misamu mie kô lendi vutu longoka mia môna mu mio mi zebi mitariri buderede bwa Nzambi, luzolo lwandi na nkûlulu. Wa matieleka, ka kwena ndilu ko mu mio mi tulendi longoka mu misamu mio na  miakaka. Ngano nti lendi sa? Tanga mpe longoka nsangu za toma za Bibila ze mu mikanda mieto. Mu ntangu yi tanga misamu mu Bibila mita lembo bakula, sa recherches. Ha manima, mu tilumbu tio tiamukaka dimbitila mu mio mi dzukuri, na mu mio mi longokele mu Yehova, mu Mwana’andi mpe mu luzolo lwe nawu mu nge.—Tanga Mikunga 119:97 tala mpe note.

15. Mu bungu dia nti tufweti tatamana mu dinga bimvwama bia Bibila?

¹⁵ Kunôkandi tala ti kubakiri’â misamu mia môna ko peleko mitâka nsayi ntangu zazansoni yi tangaka, peleko yi saka recherches. Timona ntiana muntu wuta dinga mu baka ore. Ntangu zakaka, muntu wudingaka ore fweti yôkesa ntangu peleko bilumbu biabingi ntete kabaka ore. Kâ, mbo katatamanaka mu dinga mu bungu ti, muna tibuku tia ore nguria ntalu tiena kwe yandi. Diangana misamu miamiansoni mia môna mi tulongokaka mu Bibila nkatika ntalu miena yôka ore! (Mik. 119:127; Bin. 8:10) Buna, bâ na luvivululu mpe zitisa programe’aku ya ntangulu ya Bibila.—Mik. 1:2.

16. Bwe tulendi landila tifwani tia Yehova na tia Yezu?

¹⁶ Mu ntangu yi longokaka, dinga mpila yi sarila misamu mi longokele. Mu tifwani, landa buderede bwa Yehova bu bongela bantu bakaka na kondo kwa tihambula. Landa luzolo lwabâ na Yezu mu Tata’andi mpe mu bantu bakaka, bu bâ wa kubama mu yirika misamu mita zolo Yehova, mpe bu bakisa bantu bakaka ni bu sa ti misamu mio milendi nata mpasi mu luzingu lwaku. Landa mpe tifwani tia Yezu bu samuna kwe bantu bakaka ngatu bawu mpe babaka bweso mu tambula kabu dia dinene dia Yehova.

17. Nti tutaluzula mu timoko tita landa?

¹⁷ Tamana tatamana mu longoka nsasa ya nkûlulu, luzolo lweto mu Yehova na mu Yezu mbo lutomo kula. (Za 14:21; Zaki 4:8) Mu bungu ti bawu tutomono zolo, bawu mpe mbo batomo tu zolo. Buna tatomo sarila bima bi tu heni Yehova mu tomo longoka ndongosolo ya nkûlulu. Mu timoko tita landa mbo tutaluzula mpila zakaka zi tulendi bakila ndandu mu nkûlulu, mpe mbo tutaluzula bwe tulendi vuturila matondo mu luzolo lwa Yehova.