Nti bilendi ku bakisa mu longokaka tumingu twatwansoni
NGANO musamu wa mpasi wena kwe nge mu longokaka Bibila tumingu twatwansoni? Ngano ntangu zakaka mbo monaka ti ndongokolo ya Bibila bubolo yikuhanaka peleko ka yikutâka nsayi ko? Kampe beto bansoni ni bo tuvulu monaka. Banza’eti misamu mi tuvulu yirikaka bilumbu biabiansoni, ntiana yebela. Yebela ntangu na ngolo kubongaka, kâ ha manima bubote tumonaka! Ndongokolo ya Bibila mpe yilendi bâ ntiana yebela mu nzila ya Zu dia Nzambi. (Efz. 5:26) Tataluzuleno mwa mabanza malendi tu bakisa:
Kubika programe. Tuzebi ti ndongokolo ya Bibila ya beto beni timosi tia bima biyôkele mfunu tiena bi tufweti sa. (Flp. 1:10) Mu kubakisa mu lembo zimbakana ntangu yi saka ndongokolo’aku ya Bibila, lendi tsoneka tilumbu na heure ha papier, ha manima namikini yo ha mbuka yi mwina yo. Peleko lendi tûla alarme mu telefone yikubambula ndongokolo’aku ntete ntangu ya fwana.
Sola ntangu na mpila ya longokela yikufwanakane. Ndongokolo’aku bwe zololo mu silaka yo? Mu tifwani ngano musamu wa fioti wena kwe nge mu tûla mabanza maku mu ndongokolo tala ti yôkese heure 1? Peleko zololo mu yôkesaka ntangu ya fioti kâ walongoka mbala zazingi? Tima tiyôkele bubote mu bungu dia nge tia zebi. Buna kubika programe’aku ya ndongokolo, mpe lunda yo mu mabanza maku. Tala ti kekama ta kekama mu sa ndongokolo’aku ntangu bu yifwanaka, ngano kulendi’â wayôkesa kwa minite 10 ko mu sa ndongokolo’aku? Mu bungu ti wamana yôkesa minite 10 mu sa ndongokolo’aku lendi longoka misamu miamingi. Kampe ha manima ma minite 10 lendi kwizi ya zolo, mpe lendi tatamana mu yôkesa ntangu yayingi.—Flp. 2:13.
Sola misamu mi longoka. Tala ti solole musamu wu longoka mu ntangu yisa ndongokolo, ‘kusarila ntangu’aku ko mu mpila yiyôkele bubote’ (Efz. 5:16) Ngano lendi kubika liste ya bimoko peleko ya mitu-diambu mi zololo mu longoka? Mu ntangu tiyuvu ti kukwizila tsoneka tio. Mpe ku nsuka ya muna ndongokolo lendi yika mabanza makaka mu liste’aku mu mio mi zololo mu longoka.
Sa nsobolo zifwanane mu programe’aku. Musamu wuyôkele mfunu ni mu saka ndongokolo tumingu twatwansoni. Mu sila bo, tala ti wufwanane, sa nsobolo mu tilumbu mpe mu heure yi saka ndongokolo, peleko mu misamu mi longokaka. Ndandu yayingi tubaka tamana longoka bilubu biabiansoni.
Tala ti ndongokolo tusaka tumingu twatwansoni, ndandu za mbote tubaka. Tindiku tieto na Yehova mbo tiyikama ngolo, mbo tulongoka mu bonga nzengolo za mbote mu luzingu lweto, mpe mbo tubaka lutindusu.—Yos. 1:8.
