1-2. Nti bisaka ti bisari bia Nzambi biabâ mu nsayi? (Zaki 1:22-25)

 YEHOVA na Mwana’andi bazololo ti tabâ mu nsayi. Titsoniki tia Mikunga 119:2 titêle: ‘Nsayi kwe bô balandaka mitieno miandi, bamundingaka mu mutima’awu wa mukaka.’ Yezu watâ: ‘Nsayi kwe bô bawirikilaka Zu dia Nzambi mpe batumamanaka dio!’—Like 11:28.

² Bu twena bisari bia Yehova, nsayi yayingi yibâka neto. Mu bungu dia nti? Misamu miamingi mitutumaka mu bâ mu nsayi, kâ musamu wuyôkele mfunu ni wena’eti Zu dia Nzambi tutangaka ntangu zazansoni mpe ngolo tusaka mu sarila mio mi tulongokaka.—Tanga Zaki 1:​22-25.

3. Ntia ndandu tubakaka mu ntangu yi tusarilaka mio mi tutangaka mu Zu dia Nzambi?

³ Ndandu zazingi tubakaka bu ‘tubâka bantu basarilaka Zu’. Mu tifwani, bu tusarilaka mio mi tulongaka mu Zu dia Nzambi, Yehova tutâka nsayi mpe nsayi wututâka. (Ekl. 12:13) Bu tusarilaka mio mi tulongokaka mu Zu dia Nzambi, luzingu lwa kanda dieto tutomesaka, mpe bindiku bia ngolo tutungaka na mpangi zeto. Kampe musamu wo wayizi lungana mu luzingu lweno. Musamu wakaka, misamu tudiokaka mivulu turilaka bantu bo balembo tumamanaka misiku mia Yehova. Diangana, musamu wo wudelakane na mio mia tâ Mutinu Davide. Bu kamana zonzela mitieno, misiku, na mfundusu za Yehova mu mukunga’andi, ku nsuka watâ: “Zitisa  mio ndandu zazingi kunataka.”—Mik. 19:​7-11, NWT.

4. Mu bungu dia nti wubâka mpasi mu sarila mio mi tulongokaka mu Zu dia Nzambi?

⁴ Ntangu zakaka musamu wa mpasi wubâka mu tanga Zu dia Nzambi na mu sarila mio mi tulongokaka. Ni bu sa ti bisalu biabingi bie neto tufweti kubikaka ntangu mu tanga na mu longakaka Bibila ngatu tabakula mio mi kekoloko Yehova mu beto. Bwawu bu tataluzula misamu milendi tu bakisa mu tangaka Bibila ntangu zazansoni. Mbo tutaluzula mpe nti bilendi tu bakisa mu dimbitila mu mio mi tuta tanga na mu zaba bwe tulendi sarila mio mi tuta longoka mu luzingu lweto.

KUBIKA NTANGU MU TANGA ZU DIA NZAMBI

5. Ntia madema ma bongaka ntangu’eto yayingi?

⁵ Bisari biabîngi bia Yehova tisalu tiatingi tie nawu. Ntangu yayingi tuyôkesaka mu lungisa madema meto ma timpeve. Mu tifwani babîngi ha kati dieto tisalu tie neto mu kipa nsantu zeto na za kanda dieto. (1 Tim. 5:8) Bakristo babingi bakipaka bibuti biawu bie na timbevo peleko bie bia nuna. Mpe beto bansoni tufweti kipa tikolela tieto, mpe musamu wo ntangu wubongaka. Misamu mia mfunu mie kô mpe tulungisaka mu timvuka. Dema dimosi diyôkele mfunu ni mu samuna nsangu za mbote na luhemo lwalwansoni. Na madema mo mamansoni me naku bwe lendi bakila ntangu yavulu tangaka Bibila, ya ndimbitila, na ya sarila mio mi tangaka?

6. Bwe lendi sa ngatu ntangulu ya Bibila yabâ tima tiyôkele mfunu kwe nge? (Tala mpe tifwani.)

⁶ Ntangulu ya Bibila timosi tia bima “biyôkele mfunu” tiena, ntiangu yifweti bâ tima tia ntete mu luzingu lweto. (Flp. 1:​10, NWT) Tikapu tia ntete tia Mikunga, ebu titâka mu muntu we na nsayi: ‘Nsayi’andi mu musiku wa Yehova yena, mpe musiku’andi katangaka mpimpa na mwini mu Zu dia malembe.’ (Mik. 1:​1, 2) Diangana, wuzololo tâ ti tufweti kubika ntangu mu tangaka Bibila. Ntia ntangu ye ya mbote mu tanga Bibila? Mvutu yilendi bâ ya swaswana kwe muna muntu ha  kati dieto. Kâ musamu wa mfunu ni wena’eti tufweti sola ntangu yitubakisa mu vulu tangaka Bibila. Mpangi ye na nkumbu Victor têle: “Mu pari nizoloko mu tangaka BibiIa. Ni bu sa ti ka nzololo’â ko mu vumbukaka mu nkatika pari, ntangu yena yi kulembo bâka bima biabingi bilendi kungubakasa. Mabanza mani ma dzuna mabaka mpe ndendi tûla mutima’ani wawansoni mu mio mi nitangaka.” Ngano nge mpe ni bo silaka? Tiyula’eti: ‘Ngano ntia ntangu ye ya delakana kwe meno mu tangaka Bibila?’

DIMBITILA MU MIO MITA TANGA

7-8. Nti bilendi tu kabakasa mu lembo baka ndandu mu mio mi tuta tanga? Hana mpe tifwani.

⁷ Tala ti kubikiri ntangu mu tanga Bibila, fweti sa keba mu tima tiakaka. Ngano weka tanga tima mpe ntangu fioti ha manima kuta vutu tia bambukila ko? Musamu wo wa weka tuturila beto bansoni. Musamu wa tiari ni wena’eti wulendi tuturila mpe mu ntangulu’eto ya Bibila. Mu tifwani, tulendi bonga nzengolo ya tanga bikapu biabingi bia Bibila lumbu basiri lumbu. Musamu wa mbote wena. Tufweti bâ na makani mpe tufweti sarila ngolo mu lungisa mo. (1 Kor. 9:26) Tala ti tuzololo tabaka ndandu mu ntangulu’eto ya Bibila, ka tufweti’â tasukisina kwa mu ntangulu ya mpamba ko.

⁸ Banza’eti musamu’ewu: Mvula salu yena mu bungu dia luzingu. Kâ, tala ti mvula yayingi yinokene mu mbala mosi, mutoto mbo wufuluka mu mamba. Musamu wô bu wutulaka, mvula zazingi ka zibâka salu ko. Bubote mvula bu yinokene malembe-malembe, buna mamba mbo makota ku nsi’â mutoto mpe mbo mabakisa miti mu mena. Mpila mosi mpe, tufweti sa keba mu lembo tanga Bibila mu ntinu-ntinu ngatu tabâ na lenda dia dimbitila mu mio mi tuta tanga.—Zaki. 1:24.

9. Nti tulendi sa tala ti tifu tie neto tia tangaka Bibila mu ntinu?

⁹ Ngano weka mona ti ntangu zakaka mu ntinu tangilaka Bibila? Nti fweti sa? Dimina ntinu. Sarila ngolo mu dimbitila mu mio mita  tanga peleko mu mio mi tengi ka ntama ko. Musamu wo ka wufweti’â wakutâ bunkuta ko. Tala ti dimbitila musamu wena wuta kutâ bunkuta, bongela wo kwa ntiana nge bata lomba mu banza mu mio mi tengi. Lendi lalumuna ntangu’aku ya ndongokolo mu baka ntangu ya dimbitila. Ku lweka lwakaka, lendi sola mu lembo tanga verse zazingi na mu sarila ntangu yo yi sâla mu dimbitila mu mio mi tengi. Victor wu tutokolo zonzela têle: “Ngolo ni sarilaka ngatu ntangulu’ani ya lembo bonga ntangu yayingi. Kampe tikapu timosi kwa ni tangaka.” Yandi vutulu yika: “Mu bungu ti mu pari nitangaka, lenda die nani dia tatamana mu dimbitila mu mio mi tengi tilumbu tiatiansoni.” Lendi sola mpila za swaswana mu tanga, kâ mfunu wena mu tanga malembe-malembe ngatu wabâ na lenda dia dimbitila mu mio mita tanga.—Mik. 119:97; tala kaku “ Biyuvu bilendi taluzula.”

10. Hana tifwani tita songela mpila yi lendi sarila mio mita longoka. (1 Bisi-Tesalonike 5:​17, 18)

¹⁰ Ntono mpila na ntangu yibongaka mu tanga Bibila, fweti sa ngolo mu dinga mpila zi sarila mio mita tanga. Bu takwe tangi Zu dia Nzambi, tiyula’eti: ‘Bwe ndendi sarila mio mi nita tanga bwawu bu peleko mu bilumbu bita kwiza?’ Mu tifwani, 1 Bisi-Tesalonike 5:​17, 18 ta tanga. (Tanga.) Bu meni tanga verse za zole, lendi kangama mpe dimbitiri mu ndilu ya tusambulu twaku mpe mbala zikwa sambilaka. Lendi dimbitila mpe mu bima bikutumaka mu vutula matondo. Kampe nzengolo bongele ya tonda Yehova mu bungu dia bima bitatu. Ni bu sa ti ntangu fioti kwa tabonga mu dimbitila mu malongi ma Bibila, wulendi kubakisa mu bakula Zu dia Nzambi na mu sarila dio. Tala ti sariri mio mi tangaka bilumbu biabiansoni mu Bibila, ntangu bu yikwe yôke, mbo kwizi tomo bâ tisari tia mbote tia Yehova . Kâ, nti fweti sa tala ti mweni ti misamu miamingi mie kô fweti sila nsobolo?

BÂ NA MAKANI MA DELAKANA

11. Ntangu zakaka, mu bungu dia nti tulendi bâ ba nôka? Hana tifwani.

¹¹ Bu tangaka Bibila, tangu zakaka lendi kwizi nôka mu bungu ti bakuri ti misamu miamingi mie kô fweti sila nsobolo. Banza’eti tinsamu eti: Tilumbu timosi mu ntangulu’aku ya Bibila tengi malongi mata zonzela musamu wutariri munsola. (Zaki. 2:​1-8) Mweni ti lendi tomesa mpila yi bongelaka bantu bakaka; buna bongele nzengolo ya sa nsobolo. Diangana musamu wa mbote wena! Tilumbu tita landa tengi verse zita songela mfunu ya zabirila nzonzolo’aku. (Zaki. 3:​1-12) Bakuri ti ntangu zakaka nzonzolo’aku ka yibâka ya mbote ko. Buna bongele  nzengolo ya tindisa bantu bakaka mu bimoko biaku. Mu ntagulu’aku ya Bibila ya tilumbu tita landa, tengi ndwengosolo zitariri tindiku na nza. (Zaki 4:​4-12) Mweni ti fweti tomo sola misamu mi tangaka, mi talaka mpe mi wâka. Tilumbu tita landa, lendi kwizi mona ti musamu wa mpasi wena mu sa nsobolo mu misamu mio miamiansoni.

12. Mu bungu dia nti fweti lembo bâ wa nôka tala ti ntangulu’aku ya Bibila yisongele ti fweti sa nsobolo? (Tala mpe note.)

¹² Tala ti mweni ti nsobolo zeko fweti sa peleko ntomosono, kunôkandi. Tala ti mweni ti nsobolo zeko fweti sa, musamu wo wusongele ti wa kuluka wena mpe mabanza ma mbote me naku. Muntu wa kuluka mpe we na bunsungu Matsonoko wutangaka mu zaba nsobolo zi kafweti sa. a Kuzimbakanandi ti misamu miamingi midinganaka mu lwata timuntu tia môna. (Kol. 3:10) Nti bikubakisa mu tatamana mu bâ muntu wu wirikilaka Zu dia Nzambi?

13. Bwe lendi bêla na makani ma delakana? (Tala mpe tifwani.)

¹³ Kani wadinga mu sarila misamu miamiansoni mi tengi mu mbala mosi, lendi ndinga mu sarila musamu wumosi peleko miole mu mio mi tengi. (Bin. 11:2) Yêla’eti musamu ewu: Kubika liste za nsobolo zita zolo mu sa mpe sola musamu wumosi peleko miolo mita zolo batikila, mpe sarila miakaka ha manima. Ngano nti ta zolo batikila?

14. Ngano mu tia makani lendi batikila?

¹⁴ Lendi bonga nzengolo ya batikila mu makani mata banza ti ka mena mpasi ko kwe nge mu lungisa peleko lendi sola mu batikila mu musamu wuta mona ti mfunu wena mu tomesa. Bumana sola kani diaku, dinga mu mikanda  mieto bu sarila Index des publications des Témoins de Jéhovah peleko Mukanda wa dingila wa Mbangi za Yehova. Sambila mu bungu dia kani diaku bu lomba kwe Yehova kakuhana “nsatu na ngolo za sarila.” (Flp. 2:​13, NWT) Ha nanima, dinga mu sarila mio mi longokele. Bu kwizi moma ti lendele mu sa nsobolo peleko mu tomesa bifu bia Bakristo, musamu wo mbo wukutuma mu tatamana mu sa nsobolo, mpe ka wukwizi’â bâ musamu wa mpasi ko kwe nge mu sa nsobolo zakaka.

BIKA ZU DIA NZAMBI ‘DIA SALA MU NGE’

15. Bwe kanda dia Yehova die dia swaswana na bantu bakaka batangaka Bibila? (1 Bisi-Tesalonike 2:13)

¹⁵ Bantu babingi basingasaka ti Bibila mbala zazingi beka dia tanga. Kâ ngano mu Bibila batomo kwikilaka? Ngano dia basarilaka peleko dia babikaka ti dianata nsobolo mu luzingu lwawu? Diangana kâni. Ntia mpila luswaswanu na kanda dia Yehova! Ntiana Bakristo ba mu mbandu ya ntete, mbo tutambulaka ti Bibila ‘Zu dia Nzambi’ diena. Mpe ngolo tusarilaka mu songela ti mu luzingu lweto dita sala.—Tanga 1 Bisi-Tesalonike 2:13.

16. Nti bilendi tu bakisa mu bâ bantu basarilaka Zu?

¹⁶ Musamu wa mpasi wubâka ntangu zakaka mu tanga na mu sarila Zu dia Nzambi. Wulendi bâ musamu wa mpasi kwe beto mu baka ntangu ya tanga Bibila. Peleko, tulendi bâ na tifu tia tangaka mu ntinu na dia lembo dimbitilaka mu mio mi tuta tanga. Tulendi kwizi nôka mu bungu dia nsobolo zazansoni zi tufweti sa. Lenda die neto dia lungisa makani meto ni bu sa ti mamingi mena. Na lubakusu lwa Yehova, tulendi ma lungisa. Bika ti tatambula lubakusu lwandi mpe tabâ bantu basarilaka Zu, ka wena ko ti bo kwa bawirikilaka dio. Ntembe kâni, bu tukwe tatamane mu tanga Zu dia Nzambi mpe bu tukwe diasariri mu luzingu lweto, mbo tutomo bâ mu nsayi—Zaki. 1:25.