Bu tukubamaka mu longoka, tulendi tiyula: ‘Ngano nti nita kekolo mu longoka?’ Kâ, tufweti sa keba mu lembo bika ti mio mi tuta kekolo mu longoka miatukanga meso mu mio mita tu longesa Yehova. Bwe tulendi tekela kutu mu mio mita zolo tu longesa Yehova?

Sambila mu baka ndwenga. Lomba kwe Yehova kakubakisa mu bakula mio mi kata zolo walongoka bwawu bu. (Zaki 1:5) Ku sikirilandi kwa mio mi tizabiri.—Bin. 3:​5, 6.

Bika Zu dia Nzambi diasala mu luzingu lwaku. “Zu dia Nzambi dia moyo diena.” (Ebr. 4:​12, NWT) Buna ntangu zazansoni zi tutangaka Bibila, tulendi longoka musamu wa môna mpe wulendi tu bakisa mu mpila za swaswana mu luzingu lweto. Kâ mbo wubêla buna tala ti tutamburi ti tufweti longoka misamu mita tu longesa Nzambi.

Tondaka mu mio miamiansoni mi sarilaka Yehova mu tu longesa. Bidia biandi bia timpeve bie ntiana “malaki ma madia ma mbote.” (Iza. 25:​6, NWT) Kutînandi mu tanga mitu-diambu mita banza ti ku tomono’â mia zolo ko. Mbo bika ti Nzambi kakubakisa mu bâ muntu wa mbote mpe mbo kwizi tomo zolo mu longoka!