1. Ntia tifu tia mbote tuvulu monaka kwe kanda dia Yehova?

 TÛKA ntama, Bibila diatitêla ti kanda dia Nzambi mbo diaketi tihana mu luzolo lwa mutima mu tisalu tia Yehova tisalamaka mu lutwalusu lwa Mwana’andi. (Mik. 110:3) Mbikululu yo ya yita lungana lumbu ti. Mivu miamiansoni, bisari bia Yehova bie na luhemo mbo biyôkesaka milio zazingi za heure mu tisalu tia samuna. Mbo basilaka bo na luzolo lwa mutima, ka babafutaka ko. Mbo babongaka mpe ntangu ya bakisa bampwana’awu mu bungu dia nsatu zawu za tinsuni, za luzolo na za timpeve. Bakuluntu na bibakisi mu tisalu mbo bayôkesaka ntangu yayingi mu kubika tukutakanu na mu sala tisalu tia tindisa bampangi. Ngano nti bibatumaka mu sala bisalu bio biabiansoni? Ni luzolo​—luzolo mu Yehova na mu bampwana’awu.​—Mat. 22:37-39.

2. Tintwari na Bisi-Rome 15:1-3, ngano ntia tifwani Yezu kasisa?

² Yezu tifwani tia nzitukulu kasisa bu keri toko kipaka nsatu za bampwana’andi ntete za yandi beni. Mbo tusarilaka ngolo zeto zazansoni mu landa ntambi zandi. (Tanga Bisi-Rome 15:1-3.) Bô balandaka tifwani tiandi, mbo babaka ndandu za mbote. Yezu watâ ti: ‘Kaba kuyôkele kiese na tambula.’​—Bis. 20:35.

3. Ngano nti tutaluzula mu timoko ti?

³ Mu timoko ti, mbo tutaluzula misamu mia yirika Yezu mu bakisa bampwana’andi, mpe ka bwe tulendi landila tifwani  tiandi. Mbo tulongoka mpe ka bwe tulendi kurisila nsatu’eto ya bakisa bampwana’eto.

4. Bwe Yezu katekesela nsatu za bampwana’andi ku matu ntete za yandi beni?

⁴ Yezu wabakisa bampwana’andi ni bu sa ti wa fwatika weri. Dimbitila’eti ka bwe Yezu kasa mu ntangu pôka dia bantu diayizi mu monekena ha mongo, kampe penepene na Kafarnawome. Yezu mpimpa ya mukaka kayôkesa mu sambila. Kampe wa nguria wa fwatika weri, kâ mu ntangu yi kamona pôka dia bantu, wafwila bamputu na bantu beri na bimbevo tiari. Wawasisa bantu beri na bimbevo, kâ mpe watâ tinzonzi tia nzitukulu, tie timosi mu binzonzi bitindisaka biyôkele​—ti batâka nkumbu tinzonzi ha zulu mongo.​—Like 6:12-20.

5. Bwe mfumu za makanda zilendi landila tifwani tia Yezu mu mpila ya songela luzolo bu babâka ba fwatika?

⁵ Bwe mfumu za makanda zilendi landila tifwani tia Yezu. Tabongeno tifwani: Ku nsuka ya tilumbu, mfumu-kanda yisariri tisalu tiatingi kotele ku nzo wa nguria wa fwatika. Ni bu sa ti mabanza me nandi ma sa nsambululu’awu ya kanda mu tilumbu tiakaka yi bafweti sa mu mpimpa yo, sambiri Yehova mu mu hana ngolo ngatu katwarisa yo. Yehova heni mvutu mu lusambulu lwandi, mpe basiri nsambululu ya kanda ntiana bu batoko ya saka tumingu twatwansoni. Bala babakiri malongi ma mfunu mu mpimpa yo, tima tiyôkele mfunu kwe bibuti biawu, ni misamu mia timpeve.

6. Hana tifwani tita songela mpila Yezu yi kasarila ntangu’andi mu bakisa bantu bakaka.

⁶ Yezu mbo keri zoloko mu yôkesa ntangu na bampwana’andi ni bu sa ti bu keri dingaka mu bâ ha yandi kaka. Ngano lendi dimbitila ka bwe Yezu keri monaka ku mutima mu ntangu yi kawâ ti ndiku’andi Za Tibatisi bamuhondele? Kampe tiari tiatingi tieri nandi. Bibila mbo ditâka ti: ‘Yezu, bu kawâ bo wakatuka kûna, wakota bwatu, wayenda kûma kwa wungama.’ (Mat. 14:10-13) Tulendi bakula ka mu bungu dia nti keri dingilaka mu bâ ha yandi kaka. Babingi mu beto bazoloko mu bâ ha bawu kaka bu bafwiluluku muntu. Kâ kwe Yezu misamu ka miaketi’â yôkela bo ko. Pôka dia bantu diaye mu kêla ku mbuka ya wungama ntete katula. Ngano Yezu nti  kasa? Wakipa nsatu zawu, mpe wabafwila tiari. Wamona ti nsatu lutindusu lwa timpeve yeri nawu, mpe wababakisa mu lungisa nsatu zawu. Buna, wabatika mu ba longesa misamu miamingi.​—Mak. 6:31-34; Like 9:10, 11.

7-8. Hana tifwani tita songela ka bwe bakuluntu balandilaka tifwani tia Yezu bu bahanaka lubakusu mu timvuka.

⁷ Bwe bakuluntu balandilaka tifwani tia Yezu. Mbo tutomo zoloko tisalu ti salaka bakuluntu mu bungu dia beto! Vula-vula tisalu ti basalaka, mpangi za timvuka ka zimonaka tio ko. Mu tifwani, bu banataka mpangi ku lupitalu mu ntinu-ntinu, mpangi ze mu Komite yiwisanaka na badoktere (comité de liaison hospitalier) mbo zisaka manzangu mu hana lubakusu. Musamu wo mbo wuvulu tulaka ha kati-kati dia mpimpa! Kâ tiari mu bungu dia mpangi zawu ze mu mpasi, mbo titumaka bakuluntu na makanda mawu mu tûla nsatu za mpangi zawu ha tibuka tia ntete.

⁸ Bakuluntu mbo basalaka mpe mu ntungulu ya Nzo za Nsambululu na ya nzo zakaka ntiana mu ntangu ya catastrophe naturelle. Mpe misamu miamingi tulendi tâ mu bungu dia ntangu yi yôkesaka bakuluntu ba mu timvuka tieto mu tu longesa, tu tindisa na mu tu bakisa. Wufwanakane ti tasîkaka mpangi zo zazansoni na makanda mawu. Bika Yehova kabâ nawu mu ngolo zi basarilaka! Wa matieleka, ntiana kwa bantu babansoni, bakuluntu bafweti bâka na mabanza ma delakana. Ntangu yi bayôkesaka mu kipa bisalu bia timvuka ka yifweti’â yasa ko ti ka babândi na ntangu ya kipa makanda mawu.

9. Tintwari na Bisi-Filipe 2:4, 5, ngano ntia tifu Bakristo babansoni bafweti kurisa?

⁹ Tanga Bisi-Filipe 2:4, 5. Wa matieleka,  beto bansoni ka twena bakuluntu ko, kâ beto bansoni tulendi baka malongi mu tifu tia Yezu tia tekesaka nsatu za bampwana’andi ku matu ntete za yandi beni. Bibila mbo ditâka ti wabonga tifwani tia ngamba. (Flp. 2:7) Dimbitila’eti mu nsasa ya musamu wo. Ngamba ya mbote, peleko tisari mbo tieri dingaka mpila yi kaketi têla mfumu’andi nsayi. Mu bungu ti nge ngamba ya Yehova yena mpe tisari tia mpangi zaku, ntembe kâni mbo ta zolo mu tomo sarila Yehova na mpangi zaku. Lendi bwa sa bu sarila malongi mata landa.

10. Ngano ntia biyuvu tufweti tiyulaka?

¹⁰ Taluzula bifu biaku. Tiyula biyuvu ebi: ‘Ngano mbo nizoloko mu sarila ntangu’ani na ngolo zani mu bakisa bantu bakaka? Mu tifwani tala ti bakundombele ndie natala mpangi ya bakala ya nuna yakota nzo, peleko nanataka mpangi ya nuna ya yikento ku tukutakanu, ngano mbo nitambula? Ngano manzangu nisarilaka mu hana lubakusu mu ntangu yi dinganaka bantu bakipa Nzo ya lukutakanu lwa lunene peleko Nzo ya Nsambululu?’ Yehova nsayi yibâka nandi bu tusarilaka ntangu’eto na bimvwama bieto, bie bima bi tamukanisina, mu bakisa bampwana’eto. Tala ti tumweni ti tufweti sa nsobolo, ngano nti tulendi sa?

11. Bwe lusambulu lulendi tu bakisila mu bâ na tifu tia zolo mu bakisaka bampwana’eto?

¹¹ Sambila Yehova na bunsungu bwabwansoni. Banza’eti, mweni ti fweti tomesa timosi tia bifu biaku, kâ ka wena na ngolo ko mu sa nsobolo zifwanakane. Mu musamu wo, dinga wasambila Yehova na bunsungu bwabwansoni. Têla Yehova ka bwe ta mona, mpe mu lomba kakuhana “nsatu na ngolo za sarila.”​—Flp. 2:13, NWT.

12. Ngano bwe ntwenia ya bakala ya batusu yilendi bakisila timvuka?

¹² Tala ti nge ntwenia ya bakala yena ya batusu, lomba kwe Yehova kakubakisa mu bâ na nsatu yayingi ya bakisa mpangi za mu timvuka tiaku. Mu nsi zakaka, lutangu lwa bakuluntu mbo luyôkaka lwa bibakisi mu tisalu, mpe bibakisi mu tisalu biabîngi bia kula peleko bia nuna biena. Organizasio ya Yehova bu yita kwe yende ku matu, ntwenia za zibakala zita dingana mu bakisa bakuluntu mu kipa mpangi za mu timvuka. Tala ti zololo wabakisa m u mbuka ze na nsatu lubakusu, mbo bâ mu nsayi. Mu bungu dia nti? Mu bungu ti mbo yangirika Yehova, mbo bâ na nkumbu ya mbote, mpe mbo baka nsayi yitûkaka mu tifu tia bakisa bantu bakaka.

13-14. Nti tulendi sa mu bakisa mpangi zeto? (tala tifwani ha tinima tia ntete.)

¹³ Dingaka mu zaba nsatu za bampwana’aku. Ntumwa Paulo watâ kwe Bakristo ba ku Yude ti: ‘Ka luzimbakanandi mu sa bubote, na mu salasana, mu bungu ti mikayulu ni mia mpila yo mitâka nsayi kwe Nzambi.’ (Ebr. 13:16) Malongi mo ma mbote meri! Ntangu fioti kwa yayôka bu bamana baka mukanda wo, Bakristo ba ku Yude basisa nzo zawu, bisalu biawu na bibuti biawu bieri lembo sarilaka Yehova, mpe badioka ku miongo. (Mat. 24:16) Mu ntangu yîna, ntembe kâni wafwanakana bê salasane. Tala ti ntete misamu mio miatula basarila malongi ma hana Paulo mu kabasana bima bieri nawu, ka waketi’â bâ musamu wa mpasi ko kwe bawu mu yukunu na mbelo’awu ya môna.

¹⁴ Mpangi zeto ka bavulu’â tu zonzelaka nsatu zawu ko. Mu tifwani, mpangi ya yibakala yilendi sâla mufwiri. Ngano mpangi’eto nsatu lubakusu ye nandi mu bungu dia bidia, transport na bisalu bia mu nzo? Lendi kuta  kwandi, mu bungu ti ka zololo’â ko katutuma mu ngolo. Kâ, lendi tomo yangalala tala ti mu beto beni tumuheni lubakusu lumufwanakane. Ka tufweti’â tabanzaka ko ti mu mpila ni mpila, misamu miamiansoni mbo bakipa mio peleko ntangu zazansoni muntu we na nsatu lubakusu mbo katuzabikisa ti nsatu lubakusu ye nandi. Tiyula: ‘Tala ti musamu wo wukumbwiriri, ngano ntia lubakusu nizolo bakungana?’

15. Ngano nti tufweti sa tala ti tuzololo tabakisa bampwana’eto?

¹⁵ Bâ muntu wu balendi lembo tîna mu lomba lubakusu. Ntembe kâni, mpangi zebi mu timvuka tiaku zibâka za kubama ntangu zazansoni mu bakisa bampwana’awu. Ka batusongelaka ko ti mu ngolo tubatumaka mu tu bakisa. Tuzebi ti tulendi ba sikirila mu ntangu yi tubâka na nsatu lubakusu, mpe tuzololo tabâ ntiana bawu! Alan we mukuluntu we na mvula yôka 40, zololo ti ka batînakandi mu mu lomba lubakusu. Mu bungu dia tifwani tia Yezu, Alan têle ti: “Yezu keri’â na ntangu yayingi ko, kâ bantu ba nkunku zazansoni mbo beri zoloko mu pusana kwe yandi, mpe ka beri’â tînaka ko mu mu lomba lubakusu. Mbo beri monaka ti lwaka keri tomo ba belokelaka. Mu miamiansoni, nzololo nabâ ntiana Yezu, mpe nazabakana ntiana muntu wu balembo tînaka, we na luzolo, mpe wukipaka nsatu za bampwana’andi.”

16. Bwe Mikunga 119:59, 60 yilendi tu bakisila mu landa tifwani tia Yezu mu mpila yifwanakane?

¹⁶ Ka tufweti’â tanôka ko tala ti ka tuta lenda mu landa tifwani tia Yezu ko mu mpila ya lunga. (Zaki 3:2) Muntu wuta longoka tima ka wulendi’â wabâ ntiana muntu wuta mu longesa ko. Kâ bu kalongoka mu makuba mandi, mpe bu kasarila ngolo mu tomo landa muntu wuta mu longesa, mbo katatamana  mu sa nsobolo za mbote. Mpila mosi mpe, tala ti tusariri misamu mi tulongokaka mu ndongokolo ya Bibila ya beto beni, bu tukwe sariri ngolo mu tomesa bifu bieto bia mbi, tulendi kwizi bâ na lenda dia landa tifwani tia Yezu.​—Tanga Mikunga 119:59, 60.

17-18. Bu tukwe landi tifu tieri na Yezu tia bakisaka bampwana’andi, ngano ntia ndandu tubaka?

¹⁷ Bu tuzoloko mu hana lubakusu, bantu bakaka balendi landa tifwani tieto. Mukuluntu wumosi we na nkumbu Tim watâ ti: “Ntwenia ze neto zayizi sa nsobolo mpe zayizi bâ bibakisi mu tisalu​—bakaka ba fioti kwa bena​—mu bungu ti bayizi landa tifwani tia mpangi zizoloko mu hana lubakusu. Mpangi zo za ntwenia mbo zitomo bakisaka timvuka tieto mpe mbo zitomo yikaka bakuluntu moko.”

¹⁸ Mu nza ya fuluka mu bwimi tubêlaka. Kâ kanda dia Yehova dia swaswana diena. Tifu tieri na Yezu tia bakisaka bampwana’andi mbo titusimbaka mutima, mpe nzengolo tubongele ya landa tifwani tiandi. Ka tulendi’â ta landa tifwani tiandi ko mu mpila ya lunga, kâ tulendi ‘landa ntambi zandi buna bufwanakane.’ (1 Pi. 2:21) Bu tusarila ngolo mu landa tifwani tiandi, beto mpe, mbo tukwizi bâ na nsayi ya zaba ti Yehova beto katambulaka.