MU NTANGU ya Bibila, bakala mbo keri hanaka dote kwe bankwezi bu beri mana tambulaka ti makwela mabâ. Mbo beri sarilaka bima bia ntalu, bibulu peleko mbongo mu futa dote. Ntangu zakaka, mbo weri fwanakana ti bakala diasala mu futa dote, ntiana bwa sa Yakobe watambula mu yôkesa mvula 7 mu sarila tata dia Rasiele ngatu mukento wamutabikila. (Mba. 29:17, 18, 20) Ngano mu bungu dia nti beri futilaka dote?

Carol Meyers longokaka misamu mia Bibila watâ ti: “Kampe, dote mbo yeri futaka tisalu tieri lembo vutu salaka mwana wa mukento, nsungula mu makanda meri salaka misitu.” Kampe dote yo mbo yeri bakisaka mpe makanda ma mole mayizi vukana mu makwela, mu bâ na tindiku tia ngolo. Tindiku tio kampe mbo tieri saka ti makanda mo masalasana mu ntangu za mpasi. Musamu wakaka, dote mbo yeri songelaka ti mukento wuta kwela luwawanu kasiri, mpe tamburi ti muntu weka mu sansa mpe weka mu kengerela ni bakala diandi, ka tata’andi’â ko.

Mfutulu ya dote ka yeri’â zolo tâka ko ti mukento tima tiena ti balendi sumba peleko ti balendi teka. Buku dia Luzingu na misiku mia ku Israele ya ntama (mu anglais) mbo ditâka ti: “Kwe kanda dia mukento, ndombolo ya futa mbongo, peleko tima tilendi fwa ntalu ya mbongo zo, mbo yi zolo songelaka ntiana eti mukento sumba beri wa sumbaka mu makwela ma bala ba Israele. Kampe ka weri’â bo ko, kâ, [dote] mbo yeri monekenaka ntiana tima tieri yingasaka mwana mukento ti beri hanaka kwe kanda diandi.”

Lumbu ti, mu nsi zakaka, bantu mbo batatamanaka mu landa tikulu tia dote. Bibuti bie Bakristo bu bilombaka dote, mbo basongelaka kwe bantu babansoni ti mabanza ma delakana me nawu bu balembo lomba bima bifwa ntalu yayingi. (Flp. 4:5; 1 Kor. 10:32, 33) Mu mpila yo, mbo basongelaka ti ka bena na luzolo lwa mbongo ko peleko bundiafu. (2 Tim. 3:2) Ku lweka lwakaka, tala ti bibuti bie Bakristo ka balombele’â bima bia ntalu ko mu bungu dia dote, bakala dita zolo kwela kena na nsatu ko yakwe sobe tilumbu tia makwela ngatu katoko baka mbongo zazingi mu futa dote. Peleko bakala dita zolo kwela ka fweti’â kabanza ko ti fweti toko bika tisalu tiandi tia mupasuri-nzila mu baka tisalu ti kasarila tûka pari tii nkokela ngatu kabaka mbongo zi kafutila dote ya kula.

Mu nsi zakaka, luyalu watitûrila misiku mitariri ntalu ya dote. Tala ti ni bo, bibuti bia Bakristo mbo bizitisaka misiku mio. Mu bungu dia nti? Zu dia Nzambi mbo dilombaka kwe Bakristo mu tumamana tuyalu na mu zitisa misiku milembo telamanaka misiku mia Nzambi.​—Rom. 13:1; Bis. 5:29.