1-2. a) Mu ntia ntangu tuvulu bambukilaka muntu wu tuzololo wu tafwilulu? b) Nti Yezu kasa mu mpimpa ntete kafwa?

 NI BU sa ti bantu tafwilulu tûka ntama, mbo tubabambukilaka moyo. Vula-vula, mbo tubabambukilaka moyo mu tilumbu ti bafwa.

² Mivu miamiansoni, mbo tubâka mu lutangu lwa bantu bavukanaka mu bambukila moyo lufwa lwa muntu wu tutomono zolo​—Yezu Kristo. (1 Pi. 1:8) Mbo tukutakanaka mu bambukila moyo muntu wahana luzingu lwandi mu nkûlulu mu tu kûla mu masumu na mu lufwa. (Mat. 20:28) Yezu wazolo ti milongoki miandi miabambukilaka lufwa lwandi. Mu mpimpa ntete kafwa, wasa ndia ya nkokela mpe watâ ti: ‘Mbo lwese bo, mu kumbambukilaka moyo.’​—Like 22:19.

3. Nti tutaluzula mu timoko ti?

³ Mwa tikunku tia bantu babâka ku Mbambukulu ya lufwa lwa Kristo bê na tivuvu tia kwe bâ ku mazulu. Kâ bantu babingi mpe bê na tivuvu tia bâ ha mutoto babâka kô. Mu timoko ti mbo tutaluzula misamu misaka ti bikunku bio bia biole biabâ na timina dia bâka ku Mbambukulu mivu miamiansoni. Mbo tutaluzula mpe ndandu zi tubakaka bu tukwendaka ku Mbambukulu. Ntete-ntete, Tazonzeleno misamu misaka ti Bakristo ba tumbu babâ ku Mbambukulu.

4. Mu bungu dia nti Bakristo ba tumbu badilaka dimpa mpe banwinaka vinu ku Mbambukulu?

⁴ Mivu miamiansoni, Bakristo ba tumbu mbo babâka na timina dia bâ ku Mbambukulu mu dia dimpa na mu nwa vinu.  Mu bungu dia nti badilaka dimpa mpe banwinaka vinu? Mu hanina tiyuvu tio mvutu, tataleno misamu miayôka mu mpimpa ya mansukina ya yôkesa Yezu ha mutoto. Ha manima ma ndia ya Pake, Yezu wayizi sa ndia yakaka yayizi zabakana mu nkumbu ya Ndia ya Nkokela ya Mfumu. Wayôkesa dimpa na vinu kwe ntumwa za 11 za kwikama mpe wabatêla badia mpe banwa. Wabazonzela tuwawanu tole​—luwawanu lwa môna na luwawanu lwa Timfumu. * (Like 22:19, 20, 28-30) Tuwawanu to, twahana nzila kwe bantumwa na kwe tikunku tiakaka tia fioti mu kwe bâ mitinu na Banganga-Nzambi ku mazulu. (Nza. 5:10; 14:1) Bakristo ba tumbu kwa batiri ha mutoto bê mu kati dia tuwawanu to badiaka dimpa mpe banwaka vinu ku Mbambukulu.

5. Bakristo ba tumbu ntia musamu wutariri tivuvu tiawu bazebi?

⁵ Musamu wakaka wusaka ti Bakristo ba tumbu babâ ku Mbambukulu ni ewu: bu babâka ku Mbambukulu, mbo babâka na bweso bwa dimbitila mu tivuvu tiawu. Yehova wabahana tivuvu tia nzitukulu​—ka bavutu’â fwa ko mpe nitu zawu ka zivutu’â beba ko ku mazulu, mbo bayâla tintwari na Yezu Kristo na Bakristo ba tumbu bakaka, mpe nsungula, mbo babâ tintwari na Yehova! (1 Kor. 15:51-53; 1 Za 3:2) Bakristo ba tumbu mbo bazabaka ti mbila babatâ mu bâ na madema ku mazulu. Kâ mu kwe bâ ku mazulu bafweti bâ ba kwikama tii ku lufwa. (2 Tim. 4:7, 8) Bakristo ba tumbu nsayi yayingi yibâka nawu bu babanzaka tivuvu tiawu tia ku mazulu. (Tite 2:13) Kâ bwe tutâ mu bungu dia “bimeme biakaka”? (Za 10:16) Ntia misamu misaka ti babâ ku Mbambukulu?

6. Mu bungu dia nti bimeme biakaka bibêlaka ku Mbambukulu mivu miamiansoni?

⁶ Bimeme biakaka mbo bikwendaka ku Mbambukulu. Ka bidiaka dimpa ko mpe ka binwaka vinu ko, kâ mbo bitalaka kwa. Mu 1938, bô beri na tivuvu tia bâ ha mutoto babatikisa mu mbala’awu ya ntete mu bâ ku Mbambukulu. Nzo ya Zangama ya Munkengi ya 1^er mars 1938 (Français) mbo yeri tâka ti: “Musamu wa delakana wena kwe bimeme biakaka mu bâka ku lukutakanu lwa mpila yo na mu talaka ka bwe misamu mikwe yilamane. [. . .] Ntangu yo yifweti bâ ntangu ya nsayi; na kwe bawu mpe.” Ntiana kwa bantu ba batikisaka ku malaki ma makwela mpe babâka mu nsayi, bimeme biakaka mbo bibâka mu nsayi bu bikwizaka ku Mbambukulu.

7. Mu bungu dia nti bimeme biakaka bikêlelaka tinzonzi tia Mbambukulu na nsayi yayansoni?

⁷ Bimeme biakaka mbo bidimbitilaka mpe mu tivuvu tiawu. Mbo bakêlaka mpe na timina diadiansoni tinzonzi tia Mbambukulu mu bungu ti mbo tizonzelaka misamu mi yirika Kristo tintwari na Bakristo 144 000 mu bungu dia bantu ba kwikama mu ntangu ya luyalu lwa funda (1 000) dia mivu. Mu lutwalusu lwa Mfumu Yezu Kristo, mfumu zo za ku mazulu mbo zihana lubakusu mu sobesa mutoto mu Paradi na mu bakisa bantu batumamaka mu kwizi bâ ba lunga. Ntia mpila nsayi kwe milio za bantu bakwizaka ku Mbambukulu, mu dimbitila mu mbikululu ze mu Bibila zilungana mu bilumbu bikwiza ntiana zo ze mu Izaya 35:5, 6; 65:21-23; na Nzabukusu 21:3, 4. Bu batimonaka mu nza ya môna na bantu ba bazololo, mbo bayikaka tivuvu tiawu ngolo mu bungu dia bilumbu bita kwiza, mpe mbo babongaka nzengolo ya tatamana mu sarila Yehova.​—Mat. 24:13; Nga. 6:9.

8. Ntia musamu wakaka wusaka ti bimeme biakaka biabâ ku Mbambukulu?

 ⁸ Tataluzuleno musamu wakaka wusaka ti bimeme biakaka biabâ ku Mbambukulu. Mbo bazoloko mu songela luzolo lwawu na mu yika moko kwe Bakristo ba tumbu. Zu dia Nzambi diabikula ti, tintwari tia ngolo tiaketi bâ ha kati dia Bakristo ba tumbu na bô bê na tivuvu tia bâ ha mutoto. Ngano mu bwe? Tataluzuleno mwa bifwani.

9. Tintwari na mbikululu ye mu Zakari 8:23 bwe bimeme biakaka bimonaka ku mutima mu bungu dia Bakristo ba tumbu?

⁹ Tanga Zakari 8:23. Mbikululu yo mbo yitomo songelaka ka bwe bimeme biakaka bimonaka ku mutima mu bungu dia mpangi zawu za tumbu. Ntelo ya “Muyuda” na ya “beno” mbo zizonzelaka Bakristo ba tumbu batiri ha mutoto. (Rom. 2:28, 29) “Babakala kumi ba mazu mamansoni ma makanda” ni bimeme biakaka. Mbo basimbaka​—batomo simbaka na kwikama kwakwansoni—​Bakristo ba tumbu, mpe mbo babalandaka mu nsambululu ya verela. Buna mu nkokela ya Mbambukulu, bimeme biakaka mbo bisongelaka kwikama kwawu kwe Bakristo ba tumbu bu babâka ku Mbambukulu.

10. Yehova nti kasa mu lungisa mbikululu ye mu Ezekiele 37:15-19, 24, 25?

¹⁰ Tanga Ezekiele 37:15-19, 24, 25. Mu bungu dia ndungananu ya mbikululu yo, Yehova wakutakasa Bakristo ba tumbu na bimeme biakaka ngatu babâ na tintwari tia ngolo na bumosi. Mbikululu yo mbo yizonzelaka bibâsa biole bia miti. Bô bê na tivuvu tia kwe bâ ku mazulu ni tibâsa tia “Yuda” (dieri kanda di beri solelaka mitinu ku Israele), mpe bô bê na tivuvu tia bâ ha mutoto ni tibâsa tia “Efrayime.” * Yehova mbo kaketi vukasa bikunku bio bia biole ngatu biabâ tibâsa timosi tia muti. Wuzololo tâ mbo basarilaka Mutinu’awu Yezu Kristo mu bumosi. Mivu miamiansoni, Bakristo ba tumbu na bimeme biakaka mbo babâka ku Mbambukulu, ka wena ko ti ntiana bikunku bia swaswana, kâ ntiana ‘twila dimosi’ die mu lutwalusu lwa ‘muvungi wumosi.’​—Za 10:16.

11. Bwe “bimeme” bi bazonzelaka mu Matie 25:31-36, 40 biyikilaka mpangi za Kristo moko?

¹¹ Tanga Matie 25:31-36, 40. “Bimeme” bia mu tifwani tia Yezu ni bantu ba sungama ba mu ntangu ya mansukina bê na tivuvu tia bâ ha mutoto​—wuzololo tâ bimeme biakaka. Mbo bayikaka mpangi za Kristo za tumbu zatiri ha mutoto moko, na kwikama kwakwansoni, bu babakisaka mu lungisa dema diawu dia dinene dia samuna na dia kubika milongoki mu nza ya mukaka.​—Mat. 24:14; 28:19, 20.

12-13. Mu ntia mpila zakaka bimeme biakaka biyikilaka mpangi za Kristo moko?

¹² Mivu miamiansoni, tumingu tutekelaka ntete Mbambukulu, bimeme biakaka mbo biyikaka mpangi za Kristo moko bu basaka campagne yisalamaka mu nza yayansoni mu tikisa bantu bazololo mu kwiza ku Mbambukulu. ( Tala kaku tie na mutu-diambu “Ngano mbo ta kubama mu bungu dia Mbambukulu?”) Mbo bahanaka mpe lubakusu bu bakubikaka misamu miamiansoni mifwanakane, mu sa Mbambukulu mu bimvuka biabiansoni bia mu nza ya mukaka, ni bu sa ti mu bimvuka biabîngi ka mu bâka muntu ko wudiaka dimpa peleko wunwaka vinu. Bimeme biakaka mbo biyangalalaka bu bayikaka mpangi za Kristo moko mu mpila yo. Bimeme biakaka bizebi ti misamu mi bayirikaka kwe mpangi za Yezu za tumbu, ntiana kwe yandi kwa bayirikaka mio.​—Mat. 25:37-40.

¹³ Ntia misamu miakaka misaka ti beto bansoni  tabâ ku Mbambukulu ni bu sa ti tivuvu tia kwe bâ ku mazulu peleko tia bâ ha mutoto tie neto?

14. Ngano Yehova na Yezu bwe basongela luzolo lwalwingi mu beto?

¹⁴ Mbo tutondaka Yehova na Yezu mu luzolo lu batusongela. Yehova wasongela luzolo lwandi mu mpila zazingi, kâ mpila yimosi ye kô yiyôkele mpila zazansoni. Nzambi’eto watusongela luzolo mu mpila yiyôkele bu katambika Mwana’andi mu kwizi mona mpasi na mu kwizi fwa mu bungu dia beto. (Za 3:16) Tuzebi ti Yezu mpe wasongela luzolo lwandi lwalwingi bu katambula mu hana luzingu lwandi mu bungu dia beto. (Za 15:13) Kani kabwe, ka tulendi’â tafuta Yehova na Yezu ko mu bungu dia luzolo lu batusongela. Kâ tulendi songela ti tonda tutondaka mu mpila yi tunatinaka luzingu lweto bilumbu biabiansoni. (Kol. 3:15) Mbo tubâka ku Mbambukulu mu bambukila luzolo lwawu mu beto, na mu songela ti bawu tuzololo.

15. Mu bungu dia nti nkûlulu ye nguria mfunu kwe Bakristo ba tumbu na kwe bimeme biakaka?

¹⁵ Mbo tutomo tondaka mu bungu dia kabu dia nkûlulu. (Mat. 20:28) Bakristo ba tumbu mbo batomo zoloko nkûlulu mu bungu ti ni yo yisaka ti babâ na tivuvu tia toma. Yehova watâ ti ba sungama bena, mpe wasa ti babâ bala bandi mu bungu ti timinu tie nawu mu mukayulu wa Kristo. (Rom. 5:1; 8:15-17, 23) Bimeme biakaka mbo bitondaka mpe mu bungu dia nkûlulu. Mu nzila ya timinu tiawu mu menga ma tsamuna Kristo, tibuka tia mbote tie nawu ha meso ma Nzambi, balendi mu sarila tisalu tia santu, mpe tivuvu tie nawu ti mbo basabuka mpasi ziyôkele. (Nza. 7:13-15) Bakristo ba tumbu na bimeme biakaka mbo basongelaka ti tonda batondaka mu bungu dia nkûlulu, bu babâka ku Mbambukulu mivu miamiansoni.

16. Ntia musamu wakaka wusaka ti tabâ ku Mbambukulu?

¹⁶ Musamu wakaka wusaka ti tabâ ku Mbambukulu ni wena’eti tuzololo mu tumamana Yezu. Tivuvu ni tivuvu tie neto mu bungu dia bilumbu bia ku matu, muna muntu mu beto mbo kazoloko mu tumamana ntumunu ya hana Yezu mu mpimpa yi kasa Mbambukulu. Ntumunu yo mbo yitâka ti: ‘Yendeno se bo mu kumbambukilaka moyo.’​—1 Kor. 11:23, 24.

17. Bwe Mbambukulu yitubakisilaka mu pusana kwe Yehova?

¹⁷ Mbo tutomo pusanaka kwe Yehova. (Zaki 4:8) Ntiana bu tulongokele wo, Mbambukulu mbo yituhanaka bweso bwa dimbitila mu tivuvu tia tu hana Yehova, na mu dimbitila mpe mu luzolo lwa lunene lu katusongela. (Yer. 29:11; 1 Za 4:8-10) Bu tudimbitilaka mu tivuvu tieto na mu luzololo lwa Nzambi lulembolo na nsuka, luzolo lweto mu Yehova mbo lukulaka, mpe tindiku tieto na yandi mbo tiyikamaka ngolo.​—Rom. 8:38, 39.

18. Dimbitila mu tifwani tia Yezu nti kututumaka mu sa?

¹⁸ Tuzololo mu landa tifwani tia Yezu. (1 Pi. 2:21) Mu bilumbu bitekelaka ntete Mbambukulu, mbo tutûlaka mabanza meto mamansoni mu binsamu bie mu Bibila bitariri lumingu lwa mansukina lwa yôkesa Yezu ha mutoto, lufwa lwandi na mvumbukulu’andi kwe ba fwa. Mpe mu nkokela yibâka Mbambukulu, tinzonzi mbo titubambulaka luzolo lwa Yezu mu beto. (Efz. 5:2; 1 Za 3:16) Bu tukwe tangi na bu tukwe dimbitiri mu mukayulu wahana Yezu, mbo tukwizi mona ti tufweti kwe diatiri ntiana bwa diatila yandi.​—1 Za 2:6.

19. Bwe tulendi tatamana mu bâ mu luzolo lwa Nzambi?

 ¹⁹ Nzengolo tubongele ya tatamana mu bâ mu luzolo lwa Nzambi. (Yude 20, 21) Mbo tutatamanaka mu bâ mu luzolo lwa Nzambi bu tusaka miamiansoni mi tulenda mu mu tumamana, mu santukisa nkumbu’andi, na mu yangirika mutima’andi. (Bin. 27:11; Mat. 6:9; 1 Za 5:3) Bu tukembelaka Mbambukulu, mbo tubongaka nzengolo ya zinga bilumbu biabiansoni mu mpila yisongelaka ti kwe Yehova tuta tâ ti: ‘Nzololo natatamana mu bâ mu luzolo lwaku mankululu!’

20. Ntia misamu mia mbote misaka ti tabâ ku Mbambukulu?

²⁰ Ni bu tubâ na tivuvu tia kwe bâ ku mazulu peleko tia bâ ha mutoto, misamu miamingi mia mbote misaka ti tabâ ku Mbambukulu. Mivu miamiansoni, bu tukutakanaka mu tilumbu tio mbo tubambukilaka lufwa lwa muntu wu tutomono zolo, Yezu Kristo. Kâ nsungula, mbo tubambukilaka luzolo lwalwingi lwa tu songela Yehova bu kahana Mwana’andi mu mukayulu. Mu muvu wu, Mbambukulu mbo yibâ mu nkokela ya vendredi 15 avril 2022. Yehova na Mwana’andi bawu tuzololo, buna tilumbu tia Mbambukulu bu titula ka kwena tima ko tilendi tu kabakasa mu bâ kô.