1. Bwe tulendi yôkesela ntangu na Yehova?

 TUZOLOLO tayôkesaka ntangu na bantu batukipaka. Bantu ba kwelana bê mu nsayi mbo bazoloko mu vulu yôkesaka ntangu. Bantwenia mbo bazoloko mu bâ tintwari na ndiku zawu. Mpe beto bansoni mbo tubâka mu nsayi bu tuyôkesaka ntangu na mpangi zeto. Kâ wutomono yôka mfunu, mbo tuzoloko mu yôkesa ntangu na Nzambi’eto. Tulendi bwa sa bu tumusambila, bu tutanga Zu diandi na bu tudimbitila mu makani mandi na mu bifu biandi bia mbote. Diangana, ntangu yi tuyôkesaka na Yehova nkatika ntalu yena!​—Mik. 139:17.

2. Ntia misamu mia mpasi tubwabanaka na mio?

² Ni bu sa ti mbo tuzoloko mu yôkesa ntangu na Yehova, ka wubâka musamu wa fioti ko ntangu zazansoni. Mu bungu ti misamu miamingi mibâka neto mu yirika, ntangu zakaka mbo wubâka musamu wa mpasi kwe beto mu bâ na ntangu ya kipa misamu mia timpeve. Tisalu, madema ma kanda na misamu miakaka mia mfunu bilendi dinga ntangu yayingi, buna tulendi banza ti ka twena na ntangu ko ya sambila, ya longoka peleko ya dimbitila.

3. Ntia musamu wakaka wulendi tu bonga ntangu?

³ Tima tiakaka tie kô tilendi tu bonga ntangu. Tala ti ka tusiri’â keba ko, tulendi hana nzila kwe misamu milembolo mia mbi miatulaba ntangu’eto yi tulendi sarila mu pusana kwe Yehova. Tabongeno tifwani mu musamu wutariri nsaka. Mfunu wena mu bâka na ntangu ya saka nsaka. Kâ, nsaka za mbote  mpe zilendi sa ti tabâ na ntangu ya fioti mu bungu dia misamu mia timpeve. Tufweti tûlaka nsaka ha tibuka tiawu.​—Bin. 25:27; 1 Tim. 4:8.

4. Ngano nti tutaluzula bwawu bu?

⁴ Mu timoko ti, mbo tutaluzula ka mu bungu dia nti tufweti tûrilaka misamu miyôkele mfunu ha tibuka tia ntete. Mbo tuzonzela mpe ka bwe tulendi sarila ntangu’eto yi tuyôkesaka na Yehova, mpe ka ntia ndandu tulendi ya bakila.

5. Bwe malongi me mu Bisi-Efeze 5:15-17 malendi bakisila bantwenia mu sa nsololo za mbote mu luzingu?

⁵ Sola luzingu luyôkele bubote. Bantwenia mbo bavulu dingaka mu zaba ka ntia mpila ya mbote balendi natina luzingu lwawu. Baprofesere na bantu ba mu kanda balembolo Mbangi za Yehova balendi ba tuma mu sa lukolo lwa lula ngatu babâ na tisalu tia mbote, mpe babâ na mbongo zazingi. Bamana landa nzila yo, yilendi ba bonga ntangu yayingi. Ku lweka lwakaka, bibuti na ndiku ze mu timvuka balendi tindisa bantwenia mu yôkesa luzingu lwawu mu tisalu tia Yehova. Nti bilendi bakisa ntwenia yizololo Yehova mu bonga nzengolo ya mbote? Mbo wubâ musamu wa mbote kwe yandi mu tanga na mu dimbitila mu misamu mie mu Bisi-Efeze 5:15-17. (Tanga.) Bu kamana tanga verse zo, ntwenia yilendi tiyula biyuvu ebi: ‘Ngano Yehova bwe kazololo? Ntia nzengolo yimutâ nsayi? Ntia nzila yikumbakisa mu sarila ntangu’ani mu mpila ya mbote?’ Bambuka ti ‘ntangu ya mbi yena,’ mpe nza yi ta yâla Satana ntamana mbo yifuka. Mbo wubâ musamu wa ndwenga, bu tusarila luzingu lweto mu mpila yitâ Yehova nsayi.

6. Ntia nsololo Mariya kasa, mpe mu bungu dia nti yeri nsololo ya ndwenga?

⁶ Tûla misamu mia mfunu ha tibuka tia ntete. Ngatu tasarila ntangu’eto mu mpila ya mbote, kampe tufweti sa nsololo ha kati dia bima biole bilembolo bia mbi. Tulendi wa mona mu mio miatula mu ntangu Yezu yi kaye tala Mariya na Marte. Mu nsayi yi keri na yo bu kabwana Yezu, Marte walamba bima biabingi bia toma. Mu ntangu yi keri lambaka, mpangi’andi Mariya, mu baka ndandu mu tala ku bayizi ba tala, waye zakala penepene na Mfumu’andi Yezu mu wirikila ndongosolo yi keri hanaka. Ni bu sa ti Marte mbanzulu za mbote zeri nandi, Mariya ‘wasola tikunku tia mbote.’ (Like 10:38-42) Ntangu bu yayôka, kampe Mariya wazimbakana bima bi badia, kâ tulendi tâ ti kani kabwe ka zimbakana misamu mia tâ Yezu ko. Ntiana kwa Mariya wamona ti mwa ntangu yi kayôkesa na Yezu ntalu yeri, beto mpe tufweti monaka ti ntangu yi tuyôkesaka na Yehova ntalu yena. Bwe tulendi sarila ntangu yo mu mpila ya mbote?

7. Mu bungu dia nti we nkatika mfunu mu sambilaka, mu longokaka na mu dimbitilaka?

⁷ Bakula ti lusambulu, ndongokolo na dimbitila mu kati dia nsambululu’eto biena. Bu tusambilaka, mbo tuzonzaka na Tata’eto die ku mazulu ditomono tu zolo. (Mik. 5:7) Bu tulongokaka Bibila, mbo tukwizi zabaka Tata’eto we Titeko tia ndwenga. (Bin. 2:1-5) Bu tudimbitilaka, mbo tulongokaka misamu mu bifu biandi bia toma na mu kani diandi dia nzitukulu mu bungu dia nza ya mukaka, mpe ka bwe ditutarilaka. Ngano lendi banza ka ntia mpila ya mbote lendi sarila ntangu’aku? Kâ, ngano nti bilendi tu bakisa mu sila bo?

8. Ngano ntia malongi tulendi baka mu mpila Yezu yi kasarila ntangu’andi ku masese?

 ⁸ Tala ti bulendi bâ, sola tibuka tia dzuna. Tataluzuleno tifwani tia Yezu. Ntete kabatika tisalu tiandi ha mutoto, Yezu wayôkesa bilumbu 40 ku masese. (Like 4:1, 2) Ku tibuka tio tia dzuna, Yezu lenda dieri nandi mu sambila Yehova na mu dimbitila mu kani dia Tata’andi mu yandi. Ntembe kâni, mpila yo yakubika Yezu mu bungu dia ntontolo zaketi mu turila ho nkatika bendo. Ntia malongi lendi baka mu tifwani tia Yezu? Tala ti bantu babingi babâka mu kanda dieno, wulendi bâ musamu wa mpasi mu baka tibuka tia dzuna ku nzo. Tala ti ni bo wena, lendi dinga kûma kwakaka kwa dzuna. Julie ni bo kasaka bu kayôkesaka ntangu na Yehova mu lusambulu. Yandi na bakala diandi mu mwa nzo babâka ku France, mpe musamu wa mpasi wena mu bâ ha bawu kaka, mpe mu tidzunu. Julie têle ti: “Buna, mbo nikwe zebaka ku jardin bilumbu biabiansoni. Kûna, mbo nibâka me kaka, mu tidzunu, mpe mbo nitomo zonzaka na Yehova.”

9. Ntono tisalu tiatingi tieri nandi, bwe Yezu kasongela ti tindiku tiandi na Yehova ntalu tieri?

⁹ Yezu tisalu tiatingi tieri nandi bu keri ha mutoto. Bu keri ha mutoto, nzanda bantu yeri kwe mu landi mu mbuka zakaka zi keri kwe yende, mpe bakaka mbo beri dingaka kabakipa. Lumbu timosi, bantu ba mumvuka bayonzama ha mwelo wa zo mu mu mona. Ntono musamu wo, Yezu wabonga ntangu ya kipa tindiku tiandi na Yehova. Mu nkatika pari, wabaka tibuka tia dzuna, ha kaketi yôkesela ntangu na Tata’andi.​—Mak. 1:32-35.

10-11. Tintwari na Matie 26:40, 41, ntia malongi ma mfunu Yezu kahana kwe milongoki miandi ku nsaba ya Ngetesemane, kâ ntia musamu wayôka?

¹⁰ Mu mpimpa’andi ya mansukina ha mutoto, mu ntangu tisalu tiandi tieri waka, Yezu wavutu dinga tibuka tia dzuna mu dimbitila na mu sambila. Wabaka tibuka tio ku nsaba ya Ngetesemane. (Mat. 26:36) Mu ntangu yîna, Yezu wahana malongi ma mfunu matariri lusambulu kwe milongoki miandi.

¹¹ Tataleno musamu wayôka. Mu nkatika mpimpa batula ku nsaba ya Ngetesemane, kampe minuit yatiyôkela. Yezu watâ kwe bantumwa, babâ na meso ma tia, mpe waye sambila. (Mat. 26:37-39) Kâ mu ntangu yi keri sambilaka, bawu babwa tolo. Bu kayizi ba bwana ku tolo, Yezu wavutu ba tindisa mu bâ na meso ma tia na mu tatamana mu sambila. (Tanga Matie 26:40, 41.) Wabakula ti lwaka lwalwingi lweri nawu, mpe ba fwatika beri. Na tiari tiatiansoni, Yezu wabakula ti ‘nitu nkwa bunôkena.’ Kâ ni bu sa ti ni bo, Yezu waye sambila mbala zole, mpe bu keri kâlaka milongoki miandi ku tolo kwa mieri, kani basambila.​—Mat. 26:42-45.

12. Nti tulendi sa tala ti lwaka lwalwingi lwe neto peleko ba nkatika ba fwatika twena mu sambila?

 ¹² Sola ntangu ya mbote. Ntangu zakaka, tulendi bâ na lwaka lwalwingi peleko ba fwatika mu sambila. Tala ti wa wukuturilaka, zaba ti ka wena nge kaka ko. Ngano nti lendi sa? Bantu bakaka babâka na tifu tia pusana kwe Yehova ku nsuka ya tilumbu, mbo bamonaka ti bubote bwena mu yôkesa ntangu mu lusambulu ntangu fioti ntete nkokela yafwana, bu balembo bâka ba nguria ba fwatika. Bantu bakaka mbo babakulaka ti mpila yi basambirilaka mbo yibanatinaka ndandu, mu tifwani mbo bazakalaka peleko mbo bafukamaka. Ngano nti biyôka tala ti lwaka lwalwingi lwe naku peleko wa nkatika wa nôka wena mu sambila? Tâ kwe Yehova ka bwe ta mona. Lendi bâ na lukwikulu ti Tata’eto ditufwilaka tiari mbo kakubakula.​—Mik. 139:4.

13. Ngano bwe appareil électronique zilendi sa ti tabâ na mabanza yeko-yeko bu tuyôkesaka ntangu na Yehova?

¹³ Sarila ngolo mu lembo bâ na mutima kwakaka bu longokaka. Ka mu nzila ya lusambulu’â ko kwa tulendi yikila ngolo tindiku tieto na Yehova. Ndongokolo ya Zu dia Nzambi na tifu tia kwendaka ku tukutakanu bilendi tu bakisa mpe mu pusana kwe Nzambi. Ngano tima tie kô ti lendi sa mu sarila ntangu’aku yi longokaka na yi bâka ku tukutakanu mu mpila ya mbote? Lendi tiyula biyuvu ebi: ‘Ngano nti bisaka ti nabâ na mabanza yeko-yeko bu nibâka ku tukutakanu peleko bu nidingaka mu longoka?’ Ngano lendi baka mbila peleko message mu telefone’aku peleko mu appareil électronique yakaka? Lumbu ti bantu babingi bê na appareil zo. Bantu bakaka ba mayela mbo batâka ti bu tuyêlaka mu tûla mabanza meto mu tima timosi, tala ti telefone ye neto ha ndeko tulendi bâ na mabanza yeko-yeko. Profesere yimosi ya psychologie yatâ ti: “Mabanza maku ka mabâ mu tima ti ta sa ko. Mbo mabâ kwakaka.” Ntete lukutakanu lwa lunene lwabatika, mbo bavulu tu lombaka mu yirika appareil zeto ngatu zalembo kotesela bantu bakaka vwandi. Ngano tulendi sila bo bu tubâka beto kaka, ngatu appareil zalembo tu sila vwandi bu tuyôkesaka ntangu na Yehova, mpe zalembo tu kabakasa?

14. Tintwari na Bisi-Filipe 4:6, 7, bwe Yehova katubakisila mu tûla mabanza meto mu tima ti tuta sa?

¹⁴ Lomba lubakusu kwe Yehova mu tûla mabanza maku mu tima ti ta sa. Mu ntangu yi bâka  ku lukutakanu peleko yi longokaka, tala ti bakuri ti mabanza maku kwakaka mata kwenda, lomba lubakusu kwe Yehova. Tala ti maniongo me naku peleko lwaka, kampe ka wubâ musamu wa fioti ko mu tûla maniongo mo ha ndeko na mu tûla mabanza maku mu misamu mia timpeve, kâ wufwanakane wasila bo. Sambila mu baka tidzunu tikengerela mutima’aku kâ mpe tikengerela mbanzulu zaku.​—Tanga Bisi-Filipe 4:6, 7.

15. Ngano ntia ndandu bakaka bu yôkesaka ntangu na Yehova?

¹⁵ Tala ti bongele ntangu ya zonza, ya wirikila na ya dimbitila mu Yehova, mbo baka ndandu zazingi. Mu bwe? Ya ntete, mbo kwizi bonga nzengolo za mbote. Bibila mbo ditutêlaka ti “wô kwe yende na bantu bê na ndwenga mbo kabâ muntu we na ndwenga.” (Bin. 13:20, NWT) Buna bu kwe yôkese ntangu na Yehova we Titeko tia ndwenga, mbo kwizi bâ na ndwenga zazingi. Mbo kwizi tomo bakula bwe lendi mu têla nsayi, mpe bwe lendi sila keba mu bonga nzengolo zimufwemesaka.

16. Bwe ntangu yi tuyôkesaka na Yehova yitomesenaka ndongosolo’eto?

¹⁶ Ya nzole, mbo kwizi bâ mulongi wa nkatika wa mbote. Bu tulongokaka Bibila na muntu, kani dimosi dia mfunu mu makani meto ni mu mu bakisa mu pusana kwe Yehova. Bu tuvulu kwe sambiri Tata’eto die ku mazulu, luzolo lweto mu Yandi mbo lutomo kwizi kula, mpe mbo tukwizi bâ na lenda diadingi mu longesa mulongoki’eto mu mu zolo. Musamu wo wa matieleka wena mu bungu dia Yezu. Mu bungu ti wazonzela Tata’andi na tiya mpe na luzolo lwalwansoni, milongoki miandi mia kwikama miayizi zolo Yehova.​—Za 17:25, 26.

17. Ngano bwe lusambulu na ndongokolo bitubakisilaka mu yika timinu tieto ngolo?

¹⁷ Ya ntatu, timinu tiaku mbo titomo yikama ngolo. Dimbitila mu mio miyôkaka mu ntangu yi lombaka lutwalusu lwa Nzambi peleko lubakusu lwandi. Ntangu zazansoni Yehova zi kahanina mvutu mu tusambulu twaku, timinu tiaku mu Yandi mbo tikwe kuri. (1 Za 5:15) Ngano nti biakaka bikubakisa mu yika timinu tiaku ngolo? Ni ndongokolo ya nge beni. Bambukaka ti ‘timinu mu ndongosolo titûkaka.’ (Rom. 10:17) Kâ, mu tunga timinu tia ngolo, ka tufweti’â kwa tadinga mu zaba misamu miamingi ko. Ngano nti biakaka tufweti sa?

18. Hana tifwani tita songela ka mu bungu dia nti tufweti dimbitilaka.

¹⁸ Tufweti dimbitilaka mu mio mi tulongokaka. Tataluzuleno tifwani tia titsoniki tia  Mikunga 77. Lwaka lweri nandi mu bungu ti mbo keri monaka ti Yehova keri’â vutu mu tambulaka ko yandi na bala ba Israele bakaka. Mu bungu dia lwaka lwandi keri’â vutu bwaka tolo ko mu mpimpa. (Verse 2-8) Ngano nti kasa? Watêla Yehova ti: “Mbo nidimbitila mu bisalu biaku biabiansoni mpe nzololo nabanza mu nsalulu zaku.” (Verse 12, NWT) Wa matieleka, titsoniki tia Mikunga wazaba misamu mia yirika Yehova mu bungu dia kanda diandi mu ntama, kâ bakala dio weri na lwaka watiyula: “Ngano Nzambi wazimbakane kwa mu fwila tiari? Peleko, mu nkesi, mutima’andi wakengi wo kwa?” (Verse 9, NWT) Titsoniki tia Mikunga tiadimbitila mu bisalu bia Yehova na mu tiari ti kasongela mu ntama. (Verse 11) Ngano ntia ndandu zamoneka? Titsoniki tio tiayizi kwikila ti kani kabwe Yehova ka lendi’â kayambirika kanda diandi ko. (Verse 15) Mpila mosi mpe, timinu mbo tikwizi yikama ngolo bu kwe dimbitiri mu mio Yehova mi keka yirika mu bungu dia kanda diandi, na mu bungu dia nge beni mpe.

19. Mu ntia mpila yakaka tulendi bakila ndandu bu tuyôkesaka ntangu na Yehova?

¹⁹ Ya yà, mpe yiyôkele mfunu, luzolo lwaku mu Yehova mbo lutomo kula. Luzolo, luyôkele bifu biakaka, mbo lukutuma mu tumamana Yehova, mu hombesa bima ngatu wamutâ nsayi na mu korela musamu ni musamu wa mpasi. (Mat. 22:37-39; 1 Kor. 13:4, 7; 1 Za 5:3) Ka kwena tima ko tiyôkele ntalu tindiku tia ngolo na Yehova!​—Mik. 63:1-8.

20. Ngano bwe lendi sârisila ntangu yi yôkesa na Yehova?

²⁰ Bambukaka ti lusambulu, ndongokolo ya Bibila na dimbitila mu kati dia nsambululu’eto biena. Ntiana Yezu, dingaka mbuka na ntangu ya dzuna mu yôkesa ntangu na Yehova. Katula bima bilendi sa ti wabâ na mabanza yeko-yeko. Lomba lubakusu kwe Yehova mu bâ na mabanza maku mamansoni bu yirikaka misamu mia timpeve. Tala ti sariri ntangu’aku mu mpila ya mbote bwawu bu, Yehova mbo katomo ku senda bu kakuhana luzingu lwa mankululu mu nza ya môna.​—Mak. 4:24.