1. Ntia misamu mia mbote ntwenia zazingi zeka lungisa?

 MIVU miamiansoni, mafunda ma bantwenia mabatusuku. Ngano titini tio tia weka yôka? Tala ti ni bo, mpangi zaku za timpeve na Yehova nsayi yayingi ye nawu mu bungu dia nge! (Bin. 27:11) Banza’eti fioti mu misamu miamiansoni mia mbote mi weka yirika. Kampe tûka mivu miamingi, wayizi longoka Bibila na bunsungu bwabwansoni. Ndongokolo’aku yayizi ku hana lukwikulu ti Bibila Zu dia Nzambi diena. Kâ wuyôkele mfunu, wayizi longoka mu zaba na mu zolo muntu wuvwiri buku dio dia santu. Luzolo lwaku mu Yehova lwayizi kula, ntiangu bwawu bu we mu lutangu lwa bisari biandi bia batusu. Nzengolo ya nguria ya mbote wabongele!

2. Nti tuzonzela mu timoko ti?

 ² Ntete wabatusu, ntembe kâni timinu tiaku tiayizi kota mu ntontolo mu mpila zazingi. Kâ bu ta kwe kuri, mbo kwizi bwabana na ntontolo za môna. Satana mbo kayêla mu wolesa luzolo lwaku mu Yehova na mu ku kabakasa mu mu sarila. (Efz. 4:14) Kufweti’â wabika ko ti musamu wo watula. Nti bilendi ku bakisa mu tatamana mu bâ wa kwikama kwe Yehova na mu lungisa kani di wamusila? Fweti tatamana mu sarila ngolo mu kwizi bâ Mukristo wa yela. (Ebr. 6:1) Kâ, ngano bwe lendi bwa sila?

3. Bakristo babansoni nti bafweti sa ha manima ma bateme?

³ Ha manima ma bateme, beto bansoni tufweti landa malongi ma hana Paulo kwe Bakristo ba ku Efeze. Wabatindisa  mu kwizi bâ Bakristo ba yela. (Efz. 4:13) Mu mpila yakaka watâ ti: ‘Tatamaneno mu kula.’ Tulendi bakula misamu mia tâ Paulo bu kafwanakasa nkululu ya timpeve na nkululu ya mwana. Mwana wubutukiri ka ntama ko, bibuti biandi yandi bazoloko, mpe nsayi wutomo ba tâka. Kâ, ka lendi’â katatamana ko mu kwe bê kwa bebe. Ntangu bu yikwe yôke, fweti bika mu yirika misamu mia bala ba fioti. (1 Kor. 13:11) Mpila mosi mpe na Bakristo. Ha manima ma bateme, tufweti tatamana mu kula. Tataluzuleno mabanza malendi tu bakisa mu kula.

4. Ntia tifu tilendi tu bakisa mu kula mu timpeve? Bangula. (Bisi-Filipe 1:9)

⁴ Kurisa luzolo lwaku mu Yehova. Diangana Yehova Yandi tomo zoloko. Kâ luzolo lwaku mu Yandi lulendi vutu tomo kula. Mu bwe? Ntumwa Paulo wazonzela mpila yimosi mu Bisi-Filipe 1:9. (Tanga.) Paulo wasambila ngatu luzolo lwa Bisi-Filipe ‘lwasampa nguria sampa.’ Buna, tulendi kurisa luzolo lweto mu Yehova. Tulendi lwa kurisa bu tubaka luzabu lwa matieleka na lenda dia swasikisa dia lunga. Luzabu lweto mu Yehova bu lukwe kuri, luzolo lweto mpe mu Yandi mbo lukwe kuri, mpe mbo tukwizi zolo timuntu tiandi na mpila yi kayirikilaka misamu. Nsatu’eto ya mu tâ nsayi mbo yikula, mpe kani kabwe ka tuzolo’â ko mu mu niongesa. Mbo tusarilaka ngolo mu bakula luzolo lwandi, mpe ka bwe tulendi lwa sarila.

5-6. Bwe tulendi kurisila luzolo lweto mu Yehova? Bangula.

⁵ Tulendi kurisa luzolo lweto mu Yehova bu tutomo zaba Mwana’andi, wulandaka timuntu tia Tata’andi mu mpila ya lunga. (Ebr. 1:3) Mpila yiyôkele bubote mu zaba Yezu ni mu longoka Evanzile za ziyà. Tala ti ka wena na tifu ko tia tangaka Bibila bilumbu biabiansoni, ngano kulendi’â wabatika ko bwawu bu? Bu kwe tangi binsamu bitariri Yezu, tûla mabanza maku mu bifu biandi. Bantu mbo beri zoloko mu bâ nandi na mu mu zonzesa; na luzolo lwalwansoni wabonga bala ba fioti mu moko mandi. (Mak. 10:13-16) Yezu nsayi yeri nandi; mpe milongoki miandi ka mieri’â tînaka ko mu mu têla mio mieri nawu ku mutima. (Mat. 16:22) Mu mpila yo, Yezu walanda tifwani tia Tata’andi dia ku mazulu. Ka wena musamu wa mpasi ko mpe mu pusana kwe Yehova. Tulendi pusana kwe Yandi mu lusambulu. Bu tumusambilaka, tulendi mu têla mio miamiansoni mie neto ku mutima. Lukwikulu lwe neto ti ka tu semba ko. Beto kazololo; beto kafwilaka tiari.​—1 Pi. 5:7.

⁶ Yezu tiari tieri nandi tia bantu. Ntumwa Matie watâ ti: ‘Bu kamona kumbu dia bantu, tiari tiamubaka, mu bungu ti [babaniekona mpe babayambirika] ntiana bimeme bikondolo [muvungi].’ (Mat. 9:36) Mpe Yehova bwe kamonaka? Yezu watâ ti: ‘Tata’eno mpe we ku mazulu ni bo kazololo ti kani wumosi mu bala ba ka wufukandi.’ (Mat. 18:14) Diangana nkatika lutindusu lwena! Bu tutomo kwe longoke mu zaba Yezu, luzolo lweto mu Yehova mbo lutomo kula.

7. Bwe tifu tia sa tindiku na Bakristo ba yela tilendi ku bakisila?

⁷ Lendi longoka mpe mu songela luzolo na mu bâ Mukristo wa yela bu sa tindiku na Bakristo ba yela bê mu timvuka tiaku. Dinga mu zaba ka nti bibatâka nsayi. Ka baniongaka ko mu nzengolo yi babonga ya sarila Yehova. Ba lomba mu zonzela misamu mi  babwabana na mio mu tisalu tia Yehova. Bu dingaka mu bonga nzengolo ya mfunu, ba lombaka malongi. Bambukaka ti, ‘mvukulu mu nzanda milongi yena.’​—Bin. 11:14.

8. Tala ti ntembe ze naku mu mio mi tâka Bibila, ngano nti lendi sa?

⁸ Katula ntembe zaku. Ntiana bu tumweni wo mu  paragrafe 2, Satana mbo kayêla mu ku kabakasa mu bâ na timinu tia nkatika ngolo na mu pusana kwe Yehova. Mpila yimosi yi kalendi bwa sila ni mu ku nata mu bâ na ntembe mu ndongosolo zakaka za Bibila. Mu tifwani, kampe bantu bakaka mbo bayêla mu ku wisa ti ka Nzambi’â ko watusala, kâ tala ti ba moyo twena mu bungu ti bima mu ta-pulukusu biayilamana. Kampe bu weri mwana fioti ka weri’â wa banzaka ko, kâ lumbu ti musamu wo wa bakulongesaka ku lukolo. Kampe mbo monaka ti mio mi longesaka milongisi miaku mia delakana miena. Wulendi bâ ti ka beka’eti taluzula bidimbu ko bisongelaka ti Mvangi we kô. Bambukaka mutieno we mu Bingana 18:17 wutâka ti: ‘Zonza wa ntete ku mfundu, mbo kamoneka wa sungama; kâ tinwanisi tiandi bu kakwiza, ni yandi beka fimpa.’ Kani wakwikilaka mu miamiansoni mi longokaka ku lukolo, fweti longoka Bibila na bunsungu bwabwansoni. Dinga mu mikanda mieto. Zonza na mpangi zeri kwikilaka ti bima mu ta-pulukusu biayilamana. Ba yula ka nti biasa ti bakwikila ti Mvangi we kô wutuzololo. Bimoko bia mpila yo bilendi ku bakisa mu baka bidimbu bisongelaka ti Mvangi we kô.

9. Nti ta longoka mu tifwani tia Melissa?

⁹ Mpangi ya yikento ye na nkumbu Melissa watomo baka ndandu bu kalongoka musamu wutariri ndiyilukulu *, mpe ndongokolo yo yamubakisa mu katula ntembe. Têle ti: “Ku lukolo, mu mpila yiwisaka balongeselaka mabanza matâka ti bima mu ta-pulukusu kwa biayilamana. Ha mbatukulu, ka ndieri’â zoloko ko mu sa recherches, mu bungu ti bunkuta bweri nani ti musamu wo wabâ wa matieleka. Kâ nayizi bakula ti, Yehova zololo ti tabâ na bidimbu bia mbote mu nkwikulu zeto. Buna, nayzi batika mu sa recherches. Nayizi tanga buku dia Y a-t-il un Créateur qui  se soucie de vous? na mukanda wa La vie a-t-elle été créée? na wa Cinq questions à se poser sur l’origine de la vie. Bima ni bio bieri nani nsatu. Wafwanakana nasila bo tûka ntama.”

10-11. Nti bilendi ku bakisa mu bâ na ndiatulu ya verela? (1 Bisi-Tesalonike 4:3, 4)

¹⁰ Losa ndiatulu ya mbi. Bu we ntwenia, nsatu ya vukasa nitu yilendi bâ nkatika ngolo, mpe ntangu zakaka bantu mbo bayêla mu ku nata mu sarila bo. Satana zololo ti walungisa nsatu zaku. Ngano nti bikubakisa mu bâ na ndiatulu ya verela? (Tanga 1 Bisi-Tesalonike 4:3, 4.) Mu tusambulu twaku, zonzela misamu miaku kwe Yehova. Mu têla mio mie naku ku mutima, mpe mu lomba kakuyika ngolo. (Mat. 6:13) Bambukaka ti Yehova zololo ti kakubakisa, ka zololo’â ko ti kakusemba. (Mik. 103:13, 14) Bibila mpe dilendi ku bakisa. Melissa, wu tuzonzele, musamu wa mpasi weri kwe yandi mu telamana mbanzulu za mvindu. Têle ti: “Ntangulu ya Bibila ya bilumbu biabiansoni yakumbakisa mu tatamana mu telamana nsatu zani za mbi. Musamu wo wakumbakisa mu bambuka ti Yehova kumvwiri, nzololo namusarila mu luzingu lwani.”​—Mik. 119:9.

¹¹ Kuyêlandi mu yirika misamu mu nge beni. Zonzela misamu miaku kwe bibuti biaku. Wa matieleka, ka wena musamu wa fioti ko mu zonzela misamu mitutariri, kâ mfunu wena mu sila bo. Melissa têle ti: “Nayizi sambila mu baka butindi, mpe nazonzela musamu’ani kwe tata’ani. Ha manima, nayizi mona bubote. Nazaba ti Yehova wayangalala mu bungu dia meno.”

12. Bwe lendi bongela nzengolo za mbote?

¹² Bika mitieno mia Bibila miakutwarisa. Bu kwe kuri, bibuti biaku mbo bikuhana nzila ya bonga nzengolo zaku nge beni. Kâ misamu miamingi mie kô mi lembolo zaba. Bwe lendi sila keba mu lembo yirika musamu wubebesa tindiku tiaku na Yehova? (Bin. 22:3) Mpangi ya yikento ye na nkumbu Kari banguri ka nti biamubakisa mu bonga nzengolo za mbote. Wabakula ti Mukristo wa yela ka wena na nsatu misiku ko mu misamu miamiansoni mia luzingu. Têle ti: “Nsatu yeri nani ya bakula mitieno mia Bibila, kani nabakula kwa misiku.” Bu tangaka Bibila tiyulaka biyuvu ebi: ‘Verse yi nti yita kundongesa mu mbanzulu za Yehova? Ngano mitieno mie mô milendi kumbakisa mu bâ na ndiatulu ya sungama? Tala ti ni bo, ntia ndandu nibaka bu nisarila ndongosolo za Bibila?’ (Mik. 19:7; Iza. 48:17, 18) Bu kwe tangi Bibila na bu kwe dimbitiri mu mitieno miandi, mbo wubâ musamu wa fioti mu bonga nzengolo zitâka Yehova nsayi. Bu tatamana mu kwe kuri mu timpeve, mbo kwizi mona ti ka wena na nsatu ko ya misiku mu misamu miamiansoni, mu bungu ti mbo bakula mabanza ma Yehova.

13. Ngano ndiku za mbote ntia nsobolo zilendi ku natina? (Bingana 13:20)

¹³ Sola ndiku ze na luzolo mu Yehova. Ntiana bu tuzonzele wo, ndiku zi sola zilendi ku bakisa mu bâ Mukristo wa yela. (Tanga Bingana 13:20.) Mpangi ya yikento ye na nkumbu Sara wabatika mu hombesa nsayi’andi. Tima tie kô tiamubakisa mu vutu bâ na nsayi yayingi. Sara têle ti: “Nayizi baka ndiku za mbote mu ntangu ya mbote. Na mpangi yimosi ya yikento ya ntwenia mbo tweri vukanaka mu longoka Nzo ya Zangama ya Munkengi. Ndiku zani zakaka zakumbakisa mu hanaka mvutu ku tukutakanu.  Na lubakusu lwa ndiku zani, nayizi batika mu bongelaka ndongokolo ya me beni na lusambulu na bunsungu bwabwansoni.”

14. Julien bwe kasa mu bâ na ndiku za mbote?

¹⁴ Ngano bwe lendi sa mu bâ na ndiku zilendi ku sobesa mu mpila ya mbote? Julien, we mukuluntu, têle ti: “Bu ndieri ntwenia, nayizi bâ na ndiku za mbote bu tweri kwe samuni nawu. Ndiku zo luhemo lweri nawu, mpe zakumbakisa mu mona ka bwe tisalu tia samuna tie tia tibote. Nayizi bâ na kani dia sala tisalu tia samuna tia ntangu zazansoni. Nayizi bakula ti musamu wasa ti ka nabândi na ndiku za mbote, ni wena’eti mbo ndieri dingaka kwa ndiku zi tweri mvula zimosi. Ha manima, nayizi bâ na ndiku za mbote ku Betele. Tifwani tiawu tiakumbakisa mu sola nsaka za mbote na mu bâ penepene na Yehova.”

15. Ntia ndwengosolo Paulo kahana kwe Timote mu bungu dia bindiku? (2 Timote 2:20-22)

¹⁵ Ngano nti fweti sa tala ti bakuri ti muntu we kô mu timvuka wulembolo ndiku ya mbote mu bungu dia nge? Paulo wazaba ti bantu bakaka mu timvuka ka beri’â na mbanzulu peleko ka beri’â na nsalulu za Bakristo ko, ntiangu kalomba kwe Timote ti kabâ mala na bawu. (Tanga 2 Timote 2:20-22.) Tindiku tieto na Yehova ntalu tiena. Ngolo zazingi tasarila mu bâ penepene na Yehova, buna ka tufweti’â tabâ na ndiku ko zibebesa tindiku tieto na Yehova.​—Mik. 26:4.

16. Ntia makani malendi bâ naku?

¹⁶ Bâ na makani ma mfunu. Bâ na makani mayika timinu tiaku ngolo, mpe makubakisa mu bâ Mukristo wa yela. (Efz. 3:16) Mu tifwani, lendi bonga nzengolo ya tomesa ndongokolo’aku ya nge beni na ntangulu’aku ya Bibila. (Mik. 1:2, 3) Peleko lendi yêla mu vulu sambilaka mu mutima’aku wawansoni. Kampe nsatu ye naku ya bâ na tifu tia tiyimina mu nsololo ya nsaka zaku na mu mpila yi sarilaka ntangu’aku. (Efz. 5:15, 16) Yehova bu kamona ti ngolo ta sarila mu kwenda ku matu, mbo kayangalala.

17. Tifu tia bakisaka bantu bakaka bwe tilendi ku bakisila?

¹⁷ Mbo kwizi bâ Mukristo wa yela bu kwe  bakisi bantu bakaka. Yezu watâ ti: ‘Kaba kuyôkele kiese na tambula.’ (Bis. 20:35) Mbo bâ mu nsayi tala ti sariri ntangu’aku na ngolo zaku mu bakisa bantu bakaka. Mu tifwani, lendi bâ na kani dia bakisa bantu ba nuna na bô bê na bifuma mu timvuka tiaku. Kampe lendi kwe ba sumbila tima peleko lendi ba bakisa mu sarila appareils électroniques. Tala ti nge mpangi ya bakala yena, bâ na kani dia bâ tibakisi mu tisalu, ngatu watomo bakisa mpangi zaku. (Flp. 2:4) Mbo songela mpe luzolo kwe bantu balembolo mu timvuka bu ba samunina nsangu za mbote za Timfumu. (Mat. 9:36, 37) Tala ti bulendi bâ, sarila Yehova mu tisalu tia ntangu zazansoni.

18. Bwe tifu tia sala tisalu tia ntangu zazansoni tilendi ku bakisila mu kula?

¹⁸ Tisalu tia ntangu zazansoni tilendi ku bakisa mu kula mu timpeve. Bu bâ mupasuri-nzila, lendi bwa bweso bwa sa Lukulo lwa bisamuni bia Timfumu. Lendi sala ku Betele peleko mu bisalu bia ntungulu. Mpangi mosi ya yikento ye na nkumbu Kaitlyn têle ti: “Tifu tia yôkesaka ntangu mu tisalu tia samuna na bampangi bazebi misamu miamingi tiakumbakisa mu kula mu timpeve ha manima ma bateme’ani. Tifwani tiawu tiakumbakisa mu tomo longoka Bibila na mu tomesa lenda diani dia longesa.”

19. Tala ti tatamane mu kula mu timpeve ntia tusakumunu baka?

¹⁹ Bu tatamana mu kula mu timpeve, mbo baka tusakumunu twatwingi. Buna kusarila ngolo zaku ko mu yirika misamu milembolo salu. (1 Za 2:17) Kumona mpasi ko zi nataka nzengolo za mbi. Mbo baka nsayi ya matieleka. (Bin. 16:3) Tifwani tiaku tia mbote mbo titindisa mpangi zaku za nuna na za ntwenia. (1 Tim. 4:12) Mpe wuyôkele mfunu, mbo baka tidzunu na nsayi mu bungu ti Yehova yangirikaka, mpe mbo bâ na tindiku tia ngolo na Yandi.​—Bin. 23:15, 16.