1. Ntia ndandu tubakaka bu tuzonzelaka mpila yi tazabila “matieleka”?

 “NGANO bwe wazabila matieleka?” Ntembe kâni, mbala zazingi weka hanina tiyuvu tio mvutu. Timosi tia biyuvu biena bi lendi tu yula mpangi ya Mukristo tala ti tuzololo tazabasana. Mbo tuzoloko mu wirikila mpangi zeto bu batutêlaka ka bwe bazabila mpe babatika mu zolo Yehova, mpe mbo tuzoloko mu ba têla ka mu bungu dia nti tuzololo mu bâ Mbangi za Yehova. (Rom. 1:11) Bimoko bio mbo bitubambulaka ka bwe matieleka me ntalu kwe beto. Nzengolo’eto ya tatamana mu diatila mu matieleka mbo yiyikamaka ngolo​—wuzololo tâ tuzololo tatatamana mu diatila mu mpila yitunatina lusakumunu lwa Yehova, mpe yisa ti katutambula.​—3 Za 4.

2. Nti tuzonzela mu timoko ti?

² Mu timoko ti, mbo tutaluzula misamu misaka ti tazolo matieleka. Mpe mbo tuzonzela ka bwe tulendi tatamana mu songela luzolo lweto mu kabu dio dia ntalu. Ntembe kâni misamu mio mbo mikwizi yika luzolo lweto ngolo mu mio mia yirika Yehova mu tu benda mu matieleka. (Za 6:44) Mbo miyika mpe nsatu’eto ngolo ya samuna matieleka kwe bantu bakaka.

3. Ntia musamu wuyôkele mfunu wusaka ti tazolo matieleka?

³ Misamu miamingi misaka ti tazolo matieleka. Wutomono yôka mfunu, Yehova tuzololo we Titeko tia matieleka. Mu Zu diandi Bibila, tayizi longoka mu mu zaba ntiana Mvangi we  Nkwa-Ngolo-Zazansoni wasala zulu na mutoto, kâ mpe ntiana Tata’eto dia luzolo die ku mazulu ditomo tu kipaka. (1 Pi. 5:7) Tuzebi ti Tata’eto wena “Nzambi yifwilaka tiari mpe ye na tiari tia mutima, yilembo kulu bakaka nkesi, mpe ya fuluka mu luzolo lwa kwikama na mu matieleka.” (Ndu. 34:6, NWT) Yehova buderede kazololo. (Iza. 61:8) Mpasi kamonaka ku mutima bu katumonaka mu mpasi, mpe wa kubama wena​—yee, timina die nandi—​mu tûla nsuka mu mpasi zeto zazansoni mu ntangu yifwanane. (Yer. 29:11) Diangana musamu wa nsayi wena! Ka wena musamu wa nzitukulu ko bu tutomo zoloko Yehova!

4-5. Mu bungu dia nti ntumwa Paulo kafwanakasa tivuvu tieto na tikâlu tia bato?

⁴ Ngano ntia musamu wakaka wusaka ti tazolo matieleka? Matieleka ndandu zazingi matunatinaka. Tabongeno tifwani. Mu kati dia matieleka ma Bibila mwe na tivuvu tieto mu bungu dia bilumbu bita kwiza. Mu tomo songela ntalu ya tivuvu tio, ntumwa Paulo watâ ti: “Tivuvu tio tie neto ntiana tikâlu tia bato mu bungu dia tilundi, tia matieleka mpe tia sikama.” (Ebr. 6:19, NWT) Ntiana tikâlu tisikamasaka bato, tivuvu tieto tisikamanaka mu Bibila, tilendi tu sikamasa bu tubwabanaka na misamu mia mpasi mu luzingu.

⁵ Mu verse yo, Paulo mbo keri zonzelaka tivuvu tia kwe bâ ku mazulu tie na Bakristo ba tumbu. Kâ, misamu mio mbo mitarilaka mpe Bakristo bazinga ha mutoto ntangu zazansoni. (Za 3:16) Diangana, ndongokolo ya tivuvu tia luzingu lwa mankululu yahana nsasa mu luzingu lweto.

6-7. Mu bwe Yvonne kabakila ndandu mu ndongokolo ya matieleka mu bungu dia bilumbu bia ku matu?

⁶ Tabongeno tifwani tia mpangi ya yikento ye na nkumbu Yvonne. Ka kurila mu matieleka ko, mpe bu keri wa fioti bunkuta bweri nandi bwa lufwa. Mbo kabambukilaka musamu wumosi wu katanga wasâla mu mabanza mandi: “Lumbu tie kô ka kuvutu’â sâla mbazi ko.” Têle ti: “Musamu wo wasa ti mu mpimpa nalembana tolo bu ndieri banzaka bilumbu bita kwiza. Nabanza ti ‘Luzingu lufweti bâ na nsasa yakaka. Mu bungu dia nti ndie wa moyo?’ Ka ndieri’â zoloko ko nafwa!”

⁷ Ha manima, bu kayizi bâ ntwenia, Yvonne wayizi bwabana na Mbangi za Yehova. Têle ti: “Nayizi batika mu kwikila ti ndendi bâ na tivuvu tia zinga ntangu zazansoni ku Paradi ha mutoto.” Ngano ndongokolo ya matieleka ntia ndandu yamunatina? Vutulu tâ: “Ka nasala lembane tolo ko mu mpimpa mu bungu dia maniongo ma bilumbu bikwiza peleko ma lufwa.” Ntiana bu lulendi wa bakula, matieleka nkatika ntalu mena kwe Yvonne, mpe nsayi yayingi yibâka nandi mu zonzela tivuvu tiandi mu bungu dia bilumbu bia ku matu kwe bantu bakaka.​—1 Tim. 4:16.

8-9. a) Mu tifwani tia Yezu bwe bakala dimosi kasongela ti timvwama ti kabukila ntalu tieri? b) Bwe bongelaka matieleka?

⁸ Matieleka ma Bibila mbo matarilaka mpe nsangu za mbote za Timfumu tia Nzambi. Yezu wafwanakasa matieleka ma Timfumu tia Nzambi na timvwama tia swamana. Mu Matie 13:44, Yezu watâ ti: ‘Timfumu tia mazulu tiena ntiana timvwama tia swamana ku musitu. Muntu wumosi bu kele tia bukila, [swekele tio; mu nsayi] wele teka biabiansoni bieri nandi, sumbiri musitu wûna.’ Tomoeno bakula ti muntu wo ka bêle’â dingaka timvwama ko. Kâ, bu kabukiri tio, siri miamiansoni mu baka tio. Diangana, tekele bima biabiansoni bibêle nandi. Mu bungu dia nti? Mu bungu ti zebi ntalu ya timvwama ti kabakiri. Timvwama tio tiyôkele bima biabiansoni bi kafweti hombesa mu ntalu.

 ⁹ Ngano nge mpe matieleka ni bo bongelaka mo? Ntembe kâni, ni bo bongelaka mo! Tuzebi ti ka kwena tima ko tilendi tu hana nza yi tidelakana na nsayi yi tubakaka bu tusarilaka Yehova bwawu bu, mpe na bweso bwa luzingu lwa mankululu lu tubaka mu luyalu lwa Timfumu tia Nzambi. Bweso bwe neto bwa bâ na tindiku tia ngolo tia beto beni na Yehova, buyôkele bima biabiansoni bi tulendi hombesa. Mbo tubâka na nsayi yayingi bu tutomo mu yangirikaka.​—Kol. 1:10.

10-11. Nti biatuma Michael mu sa nsobolo mu luzingu lwandi?

¹⁰ Babingi mu beto bahombesa bima bia ntalu ngatu Yehova kabatambula. Bakaka batambula mu lembo vutu bâ nsangu mu nza. Bakaka babika mu landa bimvwama. Bakaka basa nsobolo mu luzingu lwawu lwa mukaka bu bayizi zaba Yehova. Michael ni bo kasa. Ka kurila mu matieleka ko. Bu keri ntwenia, walongoka karate. Têle ti: “Nsayi yeri bâka nani bu ndieri bâka na tipamu tia mbote. Ntangu zakaka, mbo ndieri monaka ti ka kwena muntu ko wulendi kuntwa.” Kâ, bu kabatika mu longoka Bibila, Michael wayizi bakula ka bwe Yehova kabongelaka miangu. (Mik. 11:5) Mu bungu dia mpangi za kwelana zeri longokaka nandi, Michael têle ti: “Kani kabwe ka bakuntêla ko ti nafweti bika karate; kâ batatamana mu kundongesa Bibila.”

¹¹ Michael bu keri kwe longoke mu zaba Yehova, luzolo lwandi mu Yandi lwayizi kula. Tiari tia Yehova mu bisari biandi tiatomo mu simba mutima. Ha manima, Michael wabakula ti wafweti bonga nzengolo mu soba luzingu lwandi. Têle ti: “Nayizi bakula ti mu bika karate mbo waketi bâ musamu wa nkatika wa mpasi kwe meno. Kâ nazaba mpe ti, mbo waketi yangirika Yehova, mpe lukwikulu lweri nani ti mu mu sarila wafwanakana nahombesa bima.” Michael matieleka ma kabaka ma keri tomo zoloko, mpe luzolo lo lwamutuma mu sa nsobolo za zinene mu luzingu lwandi.​—Zaki 1:25.

12-13. Bwe matieleka ma Bibila mabakisila Mayli?

¹² Mu songela ntalu ya matieleka, Bibila mbo difwanakasaka matieleka na mwinda wuta nama mu mbuka ye mpimpa. (Mik. 119:105; Efz. 5:8) Mayli, bâka ku Azerbaïdjan, mbo katomo zoloko lubakusu lu kabaka mu Zu dia Nzambi. Bibuti biandi mabundu ma swaswana meri nawu. Tata’andi Musulman yeri mpe nguri’andi mu dibundu dia Bayuda keri. Têle ti: “Ni bu sa ti mbo ndieri kwikilaka ti Nzambi kô kena, biyuvu biabingi bieri nani. Natiyula: ‘Mu bungu dia nti Nzambi kayirikila bantu? mu bungu dia nti bantu bakaka bamonaka mpasi mu luzingu lwawu lwalwansoni, mpe bakwe yilaka ku benga dia tiya ntangu zazansoni?’ Mu bungu ti bantu mbo batâka ti miamiansoni miyilamaka luzolo lwa Nzambi lwena, nayizi tiyula: ‘Ngano Nzambi mbo kazoloko mu tuma bantu mu ba mwisa mpasi?’”

¹³ Mayli watatamana mu dinga mvutu mu biyuvu biandi. Buna, wayizi tambula ndongokolo ya Bibila, mpe wayizi bâ Mbangi ya Yehova. Têle ti: “Matieleka ma Bibila ma balendi kwikila makumbakisa mu kwizi bâ muntu we mu nsayi yayingi. Mbangululu za delakana zi nabaka mu Zu dia Nzambi mbo zikunatinaka tidzunu tia mutima.” Ntiana Mayli, beto bansoni mbo tukembelaka Yehova, Yandi “wa[t]utêle mbila ku buyongongo mu [tu] kotesa ku mutsamina’andi wa nzitukulu.”​—1 Pi. 2:9.

14. Bwe tulendi yikila luzolo lweto mu matieleka ngolo? (Tala mpe kaku “ Misamu miakaka mifwanakane.”)

¹⁴ Bio mwa bifwani kwa biena bita songela  ntalu ya matieleka. Ntembe kâni, lendi dimbitila mu bifwani biakaka. Mu ndongokolo ya nge beni, lendi dinga misamu miakaka misongelaka ka mu bungu dia nti tufweti zololo matieleka. Bu tukwe zolo matieleka, mbo tukwizi mona mpila zazingi zi tulendi songela ti ma tuzololo.

15. Mu ntia mpila tulendi songela ti matieleka ma tuzololo?

¹⁵ Tulendi songela ti matieleka ma tuzololo bu tulongoka Bibila na mikanda misikamanaka mu Bibila ntangu zazansoni. Diangana, ni bu sa ti tûka ntama twena mu matieleka peleko kâni, beto bansoni misamu miamingi mie kô mi tufweti longoka. Mukanda wa ntete wa Nzo ya Zangama ya Munkengi watâ ti: “Bungungu bwingi kwa bwe mu nza, ntiangu wulendi bâ musamu wa mpasi mu zaba matieleka. Mu dzukula mo, fweti ma taluzula. [. . .] Mu baka mo fweti kondama mu bonga mo. Kudingandi kwa mu bâ na tifulu timosi tia matieleka. [. . .] Ntangu zazansoni, dingaka matieleka ma Bibila makaka.” Ndongokolo tisalu tia mpasi tiena, kâ nguria mfunu yena.

16. Ntia mpila ya longokela monaka ti ya mbote yena? (Bingana 2:4-6)

 ¹⁶ Beto bansoni ka tuzololo’â ko mu tanga na mu longoka. Kâ, Yehova mbo katulombaka mu ‘kwe tombe’ na mu ‘kwe dingi’ ngatu tatomo bakula matieleka. (Tanga Bingana 2:4-6.) Bu tusarilaka ngolo mu mpila yo, ndandu kwa tubakaka. Mu bungu dia ntangulu’andi ya Bibila, Corey têle ti mbo kataluzulaka verse mosi-mosi. Banguri ebu: “Mbo nitangaka note zazansoni, verse zakaka zi baheni mu référence, mpe mbo nidingaka bima biakaka. [. . .] Mpila yo ya sarila ndandu zazingi yikunatinaka!” Tala ti mpila yo tusarilaka peleko yakaka, mbo tusongelaka ti matieleka tuzololo, bu tuyôkesaka ntangu na ngolo mu longoka mo.​—Mik. 1:1-3.

17. Ngano diatila mu matieleka, bwe wuta zolo tâ? (Zaki 1:25)

¹⁷ Wa matieleka, tuzebi ti ka wufweni’â ko mu longoka kwa matieleka. Mu tomo baka ndandu, tufweti diatila mu matieleka, wuzololo tâ tufweti sarila mio mi tulongokaka. Ni mu mpila yo kwa matieleka matunatina nguria nsayi. (Tanga Zaki 1:25.) Bwe tulendi bêla na lukwikulu ti mu matieleka tuta diatila? Mpangi yimosi yatêle ti tufweti titaluzula mu zaba misamu mi tulendaka mu yirika na mio mi tufweti sila nsobolo. Ntumwa Paulo watâ ti: “Ni bu sa ti ka ntia nsobolo tasiri, tatatamana mu diatila mu nzila yo ya yimosi mu mpila ya fwanana.”​—Flp. 3:16, NWT.

18. Mu bungu dia nti tusarilaka ngolo mu diatila mu matieleka?

¹⁸ Banza’eti mu ndandu zi tubakaka bu tusarilaka ngolo mu diatila mu matieleka! Wa matieleka mbo tukwizi tomesaka luzingu lweto, kâ mpe mbo tutâka Yehova na mpangi zeto nsayi. (Bin. 27:11; 3 Za 4) Mio ni misamu mia nguri misaka ti tazolo matieleka, mpe tadiatila mu matieleka!