Biyuvu bia bitangi
Bwe timoko tia Nzo ya Zangama ya Munkengi tie na mutu-diambu “Bika nkumbu’aku yabâ ya santu” titomo bangurilaka nkwikulu zeto mu nkumbu ya Yehova na lutumu lwandi lwa tomo zangama?
Mu timoko tio tayizi longoka ti musamu wumosi kwa wa nguria wa mfunu wanata nsobolo kwe bantu na kwe bambazi: ni santukisa nkumbu ya yinene ya Yehova. Musamu wutariri mpila yi twarisilaka Yehova, ni bu sa ti mu mpila ya mbote kasilaka bo peleko kâni, tintwari wena na tifu tia santukisa nkumbu ya Yehova. Mpila mosi mpe, musamu wutariri kwikama kwa bantu mbo wutarilaka mpe musamu wo wa wunene.
Mu bungu dia nti bwawu bu tuta vulu têla ti musamu wa wunene ni nkumbu ya Yehova na santukisa kwa nkumbu yo? Tazonzeleno misamu mitatu.
Satana wahunisina nkumbu ya Nzambi misamu tûka bukolo bwa ku nsaba ya Edene
Musamu wa ntete, Satana watelamana nkumbu ya Yehova, ku nsaba ya Edene. Tiyuvu tia yula Satana kwe Eva, musamu wa swekama weri, mpe mbo tieri zolo tâka ti Yehova Nzambi yena yilembo tomo kabaka, mpe misiku milembolo mia delakana kahanaka kwe bantu ba katumaka. Satana watelamana mpe misamu mia tâ Yehova, buna watâ ti Nzambi ngungu yena. Wahunisina nkumbu ya Yehova misamu. Bayizi mu tâ “Diabulu,” wuzololo tâ “ngungu.” (Za 8:44) Mu bungu ti Eva wakwikila bungungu bwa Satana, wayizi kolamana Nzambi na lutumu lwandi lwa tomo zangama. (Mba. 3:1-6) Tii lumbu ti, Satana mbo kahunisinaka nkumbu ya Nzambi misamu, bu kakwe mwangase bungungu mu timuntu tia Yehova. Ka wena musamu wa mpasi ko kwe bô bakwikilaka bungungu bo mu kolamana Yehova. Buna, kwe kanda dia Nzambi kondo kwa buderede kuyôkele ni bu bahunisinaka nkumbu ya santu ya Yehova misamu. Wo ni musamu wa nguri wasa ti kwa bâ mpasi na mbi mu nza.
Wa nzole, mu bungu dia mbote ya bivangu biabiansoni, Yehova wabonga nzengolo mu zabikisa nkumbu’andi, mu sukula yo mu bungungu bwabwansoni. Wo ni musamu wuyôkele mfunu kwe Yehova. Têle ti: “Mbo nisantukisa nkumbu’ani ya yinene.” (Ezk. 36:23, NWT) Mpe Yezu wasongela ka nti biafweti tekela mu ntangu bisari biabiansoni bia kwikama bia Yehova bu bisambilaka. Watâ ti: “Bika nkumbu’aku yabâ ya santu.” (Mat. 6:9, NWT) Bibila mbo divulu zonzelaka mfunu ya kembela nkumbu ya Yehova. Tabongeno kwa mwa bifwani: ‘Haneno kwe Yehova nsangu za nkumbu’andi.’ (1 Nta. 16:29; Mik. 96:8) ‘Tangileno mukembo wa nkumbu’andi mikunga.’ (Mik. 66:2) ‘Mbo ni kembesa nkumbu’aku mankululu.’ (Mik. 86:12) Mbala mosi Yehova Yandi beni yi kazonza tûka ku mazulu, ni ku Tempelo ya Yerusaleme, kûna Yezu watâ ti: ‘Tata wâkasa nsangu za nkumbu’aku!’ Yehova wamuvuturila: ‘Nsangu zani za nawâkase, za mpe nivutu wâkasa.’—Za 12:28. a
Wa ntatu, kani dia Yehova dia bilumbu bia ku matu mbo ditarilaka nkumbu’andi. Ha manima ma ntontolo ya mansukina yikwiza ha manima ma Luyalu lwa mvula 1000, ngano nti bikwizi yôka? Ngano bambazi na bantu mbo batatamana mu bâ ba hambana mu tiyuvu tia mfunu, titariri santukisa kwa nkumbu ya Yehova? Mu hanina tiyuvu tio mvutu, tabambukila misamu miole mie tintwari—kwikama kwa bantu na lutumu lutariri nza ya mukaka. Ngano bantu basongela ti ba kwikama bena mbo batatamana mu telamana misamu mia mpasi ngatu batatamana mu bâ ba kwikama? Kâni. Mbo babâ ba lunga, kâ ntete mbo batoko ba tonta. Ti bakêla ni luzingu lwa ntangu zazansoni. Ngano lutumu lutariri nza ya mukaka, mbo lutatamana mu bâ musamu wuyôkele mfunu mu bimoko, peleko wuhambasaka bambazi na bantu? Kâni. Nswa na lutumu luyôkele lwa Yehova mbo bizabakana mankululu. Mu ntangu yîna, ngano nkumbu ya Yehova mbo yitatamana mu bâ tima tia mfunu kwe kanda diandi?
Nkumbu ya Yehova mbo yibâ ya nguria ya santu yayansoni, ka ku vutu’â bâ na kani bungungu ko mu nkumbu yo. Kâ, mbo yitatamana mu bâ mfunu kwe bisari biabiansoni bia Yehova bia mazulu na bia ha mutoto. Mu bungu dia nti? Mu bungu ti mbo bamona Yehova tatamana mu yirika misamu mia nzitukulu. Mu bungu ti na kuluka kwakwansoni Yezu mbo kakârisa timfumu tiatiansoni kwe Yehova, Nzambi mbo ‘kabâ biabiansoni mu babansoni.’ (1 Kor. 15:28) Ha manima, bantu bê ha mutoto mbo bayangalala mu ‘timpwanza tia nsangu tia bala ba Nzambi.’ (Rom. 8:21) Mpe Yehova mbo kalungisa kani diandi dia vukasa mbazi za ku mazulu na bantu ba ha mutoto ngatu babâ kanda dia dinene die mu bumosi.—Efz. 1:10.
Bwe misamu mio minatina nsobolo kwe kanda dia Yehova ku mazulu na ha mutoto? Ntembe kâni mbo tubâ na nsatu yayingi ya kembela nkumbu ya Yehova. Mu lutwalusu lwa mpeve santu, Davide watsoneka: ‘Kakemboso Yehova Nzambi [. . .] Yakemboso mankululu nkumbu’andi ye nsangu!’ (Mik. 72:18, 19) Mbo tutatamana mu baka misamu mia môna na mia nzitukulu mu kembela nkumbu ya Yehova ntangu zazansoni.
Diangana, nkumbu ya Yehova mbo yimonekesa biabiansoni bimutariri. Musamu wa nguri, nkumbu’andi mbo yitubambulaka luzolo lwandi. (1 Za 4:8) Mbo tutatamana mu bambuka ti Yehova watusala mu luzolo lwandi, wahana mukayulu wa nkûlulu mu luzolo lwandi, mpe wasongela ti mu buderede na mu luzolo kayârilaka. Mbo tutatamana mu mona ka bwe Yehova kafulusilaka bivangu biandi mu luzolo. Mbo tubâ na nsatu ya pusana kwe Yandi we Tata’eto, mpe mbo tumutangila mikunga mu kembela nkumbu’andi ntangu zazansoni.—Mik. 73:28.
