1. Ntia mpila makani ma timpeve ma lendi bâ neto?

 MU BUNGU ti Bakristo ba matieleka twena, Yehova Yandi tutomono zolo. Tuzololo ti tisalu tieto mu bungu dia Yandi tiabâ tia nguria tia mbote. Kâ, tala ti tuzololo tatomo sarila lenda dieto, tufweti bâ na makani ma timpeve ntiana kurisa tifu tia bukristo, longoka bisalu bie mfunu, na mu dinga mpila zi bakisila bampwana’aku. *

2. Mu bungu dia nti tulendi bêla na makani ma timpeve, mpe tufweti sala ngolo mu lungisa mo?

² Mu bungu dia nti tufweti bâka na makani ma timpeve? Ntete-ntete, tuzololo tatâ Tata’eto dia luzolo dia ku mazulu nsayi. Yehova nsayi yibâka nandi bu tusarilaka lenda dieto na misamu mi tuzebi mu tisalu tiandi. Musamu wakaka, tuzololo tabâ na makani ma timpeve ngatu tabakisa mpangi zeto. (1 Tes. 4:9, 10) Ni bu sa ti ntama tweka mu matieleka peleko kâni, beto bansoni tufweti bâ na makani ma timpeve. Tataleno ka bwe tulendi sila bo lumbu ti.

3. Tintwari na 1 Timote 4:12-16, ngano ntumwa Paulo ntia misamu katindisa Timote mu sa?

³ Mu ntangu ntumwa Paulo yi katsoneka mukanda’andi wa ntete kwe Timote, ntwenia yo wayizi tibêla mukuluntu tûka ntama. Kâ, Paulo wamutindisa mu tatamana mu kula mu timpeve. (Tanga 1 Timote 4:12-16.) Bu dimbitila mu misamu mia tâ Paulo, mbo kwizi bakula ti wazolo ti Timote kasa nsobolo  mu mpila zole. Ya ntete: kakurisa bifu bia Bakristo ntiana luzolo, timinu mpe na tifu tia bâ wa verela; ya nzole katomesa lenda diandi mu misamu ntiana ntangulu ha meso ma bantu, tifu tia tindisa na ndongosolo. Na tifwani tia Timote mu mutu, tataleno ka bwe bâ na makani ma delakana kulendi tu bakisila mu kula mu timpeve. Mbo tutaluzula mpe mpila zi tulendi kurisila tisalu tieto tia samuna.

4. Tintwari na Bisi-Filipe 2:19-22, nti biasa ti Timote kabâ tisari tie salu kwe Yehova?

⁴ Nti biasa ti Timote kabâ tisari tie salu kwe Yehova? Ni bifu biandi bia nzitukulu bia bukristo. (Tanga Bisi-Filipe 2:19-22.) Mu mpila yi kamuzonzela, tulendi mona ti Timote muntu weri wa kuluka, wa kwikama, weri salaka na manzangu mamansoni, mpe wu beri sikirilaka. Mbo keri zoloko bampangi, mpe mbo keri ba fwilaka tiari. Ntiangu Paulo keri zoloko Timote, mpe keri lembo tînaka mu mu hana bisalu bia mpasi. (1 Kor. 4:17) Mpila mosi mpe, mbo tukwizi bâka penepene na Yehova, mpe mbo tubakisaka mpangi zeto mu ntangu yi tukurisaka bifu bi zololo Yehova.​—Mik. 25:9; 138:6.

5. a) Ngano bwe lendi solela tifu tia bukristo ti zololo mu kurisa? b) Ntiana bu ta wa songela tifwani, bwe mpangi ya yikento yita sarila ngolo mu lungisa kani diandi dia bâ na tiari tia bakaka?

⁵ Sola kani di lendi lungisa. Taluzula timuntu tiaku, mpe dinga mu zaba ka bwe lendi tia tomesena. Sola tifu timosi ti ta zolo mu tomesa. Ngano lendi kurisa tifu tia tiari tia bakaka, peleko tifu tia zoloko mu bakisa bampangi? Ngano fweti bâ muntu wutomo zoloko mu sa tidzunu, mpe wulemvokelaka? Wulendi bâ musamu wa mbote mu yula kwe ndiku yi kwikilaka ka bwe lendi tomesena timuntu tiaku.​—Bin. 27:6.

6. Bwe lendi sa mu lungisa kani dia kurisa tifu timosi?

⁶ Sala mu lungisa kani diaku. Nti lendi sa? Lendi longoka misamu mitariri tifu ti ta zolo mu tomesa. Mu tifwani, lendi bonga nzengolo ya lemvokelaka bampwana’aku. Lendi batikila mu tanga na mu dimbitila bifwani bia Bibila bia bantu beri zoloko mu lemvokela na beri lembo lemvokelaka. Mu tifwani tazonzeleno Yezu. Mbo keri zoloko mu lemvokela bantu. (Like 7:47, 48) Mbo keri talaka mpe lenda diawu, kani katalaka kwa bifu biawu bia mbi. Kâ, Bafarize mbo beri bongelaka bampwana’awu ntiana bantu ba mpamba-mpamba. (Like 18:9)  Bu mana dimbitila mu bifwani bio, tiyula: ‘Ngano bwe nimwinaka bantu bakaka? Mu ntia bifu biawu bia mbote nitûla mabanza mani?’ Tala ti musamu wa mpasi wena kwe nge mu lemvokela muntu, yêla mu tsoneka bifu biandi biabiansoni bia mbote. Mpe tiyula: ‘Bwe Yezu kamwninaka muntu wu? Ngano mbo kazolo mu mu lemvokela?’ Tamana sila bo, mbo tudinga mu sa nsobolo mu mbanzulu zeto. Ku mbatukulu, tulendi bâ na nsatu ya sarila ngolo zazingi mu lemvokela muntu wutufwemese. Kâ, tala ti tutatamane mu sarila ngolo zo, ntangu bu yiyôka mbo tukwizi zolo mu lemvokela.

7. Tintwari na Bingana 22:29, mu ntia mpila Yehova kasarilaka mpangi zi zebi bisalu lumbu ti?

⁷ Kani diakaka di lendi bâ naku ni dia longoka tisalu tilendi bakisa. Dimbitila mu nzanda bisari bidinganaka mu tunga Betele, Nzo za tukutakanu twa tunene na Nzo za Nsambululu. Mpangi zazingi zayizi longoka mu zaba bisalu bu beri salaka tintwari na mpangi zakaka mu bisalu bio. Ntiana bu ta wa songela tifwani, mpangi za zibakala na za zikento zayizi longoka bisalu bifwanakane ngatu babakisaka mu kipa Nzo za tukutakanu twa tunene na Nzo za Nsambululu. Mu mpila zo na zakaka, Nzambi’eto Yehova, “Mutinu wa ntangu zazansoni,” na Yezu Kristo, Mutinu wa mitinu, mbo bayirikaka misamu mia nzitukulu mu nzila ya bisari bie na lenda. (1 Tim. 1:17; 6:15; tanga Bingana 22:29.) Tuzololo tasala ngolo mpe tasarila bisalu bi tuzebi mu kembesa Yehova, kani tatikembesa beto beni.​—Za 8:54.

8. Bwe lendi songela tima ti zololo mu yirika?

⁸ Sola kani di lendi lungisa. Ntia tima lendi longoka? Yula bakuluntu ba mu timvuka tiaku peleko munkengi wa tizunga tiaku ka ntia tifu bata banza ti lendi tomesa. Mu tifwani, tala ti bakutêlele watomesa nzonzolo’aku na ndongosolo’aku, balomba bakubakisa mu zaba ka ntia bifu fweti tomesa. Mpe sarila ngolo mu sa nsobolo. Bwe lendi bwa sila?

9. Bwe lendi sarila ngolo mu lungisa kani dia longoka tima?

⁹ Sala mu lungisa kani diaku. Mu tifwani, lendi dinga mu tomesa lenda diaku dia longesa. Na bunsungu bwabwansoni, lendi longoka mukanda wa Tomo tihana mu ntangulu na mu ndongosolo. Bu bakuhanaka devware ku lukutakanu lwa luzingu na tisalu tia Bakristo, lendi lomba mpangi ya yela mu ku wirikila ntete wasa yo ku lukutakanu, mpe kakuhana malongi makubakisa mu sa nsobolo. Ka bakuzabilandi kwa mu nkumbu ya muntu we na lenda dia yirika misamu, kâ ntiana muntu wusalaka na manzangu mamansoni mpe wu balendi sikirila.​—Bin. 21:5; 2 Kor. 8:22.

10. Hana tifwani tita songela ka bwe tulendi sila nsobolo tala ti tima tuta zolo longoka.

¹⁰ Ngano bwe tutâ tala ti tima ti ta zolo mu longoka mbo tita tarila tima ti lembolo na tio lenda mu yirika? Kubikandi! Mpangi yimosi ya bakala ye na nkumbu Garry keri’â zabaka mu tanga ko. Mbo kabambukaka ka ntia nsoni zeri nandi bu keri sarilaka ngolo mu tanga mu zu dia tumbu ku tukutakanu twa timvuka. Kâ watatamana mu sarila ngolo. Lumbu ti mbo katâka ti mu bungu dia formasio yi kabaka, lenda die nandi dia tâ binzonzi ku tukutakanu twa timvuka, twa tizunga na twa tunene!

11. Ntiana Timote, ngano nti bilendi tu bakisa mu bâ na lenda dia yirika misamu miamingi?

 ¹¹ Ngano Timote wayizi bâ nzonzi ya mbote peleko mulongi wa nzitukulu? Bibila ka ditâka wo ko. Kâ ntembe kâni, malembe-malembe Timote wayizi bâ na lenda diadingi dia nata madema mandi bu keri kwe landi malongi ma Paulo. (2 Tim. 3:10) Mpila mosi mpe, tamana tomesa lenda dieto, mbo tukwizi yirika misamu miamingi mu tisalu tia Yehova.

12. Ngano bantu bakaka bwe bakubakisila?

¹² Beto bansoni mbo tubakaka ndandu mu lubakusu luhanaka bantu bakaka. Bu tubâka ku lupitalu, mbo tutomo tondaka mu ntangu bakuluntu basalaka mu Komite yiwisanaka na badoktere na tikunku tia bantu batalaka bambevo yi bakwizi tu talaka. Mu ntangu yi tubwabanaka na misamu mia mpasi mu luzingu lweto, mbo tuzoloko ti mukuluntu we na luzolo kayôkesa ntangu neto mu tu wirikila na mu tu tindisa. Mu ntangu yi tubâka na nsatu lubakusu mu twarisa ndongokolo ya Bibila, mbo tumonaka nsayi mu ntangu mpangi ye mupasuri-nzila tûka ntama katambulaka mu twarisa yo na beto, mpe bu katuhanaka malongi. Mpangi zo zazansoni mbo zibâka na nsayi bu batubakisaka. Beto mpe mbo tubâ na nsayi yo tala ti tudingiri mu bâ na nsayi ya sarila mpangi zeto. Yezu watâ ti: ‘Kaba kuyôkele kiese na tambula.’ (Bis. 20:35) Tala ti zololo wakurisa tisalu tiaku mu mpila zo peleko mu mpila zakaka, nti bikubakisa mu lungisa makani maku?

13. Ngano ntia musamu tufweti zaba bu tudingaka mu bâ na makani?

¹³ Kubândi na kani dilembolo dia zabakana. Mu tifwani, lendi tâ ti: ‘Nzololo nayirika misamu miamingi mu timvuka.’ Kâ wulendi bâ musamu wa mpasi mu zaba ka bwe lungisila kani dio, mpe lendi lembo zaba ka ntia ntangu walungisa dio. Buna, sola kani ditomono zabakana. Lendi tsoneka mpe kani diaku na mpila yi lungisila dio.

14. Mu bungu dia nti tufweti bêlaka na mabanza ma delakana bu tusolaka makani?

¹⁴ Tufweti bâka mpe na mabanza ma delakana bu tusolaka mu bâ na makani. Mu bungu dia nti? Mu bungu ti ka tutomono’â zaba ko ka bwe misamu miyôkela ku matu. Mu tifwani: Ntumwa Paulo wahana lubakusu mu kubika timvuka tia môna tia ku Tesalonike. Mpe ntembe kâni, kani dieri nandi dia tatamana mu bâ kô ngatu kabakisa Bakristo bo ba môna. Kâ, bambeni batuma Paulo mu ngolo mu katuka ku mumvuka wo. (Bis. 17:1-5, 10) Paulo bu kaketi tatamana mu bâ kô, mbo kaketi tûla mpangi zandi mu mpasi. Kâ, ka bika  ko. Kani kasila bo, wadinga mu yirika misamu mieri nandi lenda mu ntangu ya nsobolo yo. Ha manima, watambika Timote ngatu kakipa nsatu za timpeve za mpangi zo za môna za ku Tesalonike. (1 Tes. 3:1-3) Diangana mpangi zo za ku Tesalonike, nsayi yeri nawu bu bamona Timote watihana mu sala ku mbuka ni mbuka yeri na nsatu lubakusu!

15. Bwe makani meto malendi sobela mu ntangu yi sobaka misamu? Hana tifwani.

¹⁵ Tulendi longoka misamu miamingi mu misamu miabwabana na Paulo ku Tesalonike. Tulendi bâ na kani, kâ misamu milendi soba mpe milendi tu kabakasa mu lungisa kani dieto. (Ekl. 9:11) Tala ti musamu ni wo we naku, bâ wa kubama mu sola kani diakaka di lendi lungisa. Ted na Hiedi bê ba kwelana ni bo basa. Mu bungu dia timbevo, bafweti bika tisalu tiawu ku Betele. Kâ, luzolo lwawu mu Yehova lwabatuma mu dinga mpila zakaka zi baketi kurisila tisalu tiawu mu bungu dia Yehova. Ntete-ntete, bayizi bâ mipasuri-nzila mia ntangu zazansoni. Ha manima, bayizi ba noma mipasuri-nzila mia minene, mpe Ted bamukubika mu kwizi bâ tibakisi tia munkengi wa tizunga. Ha manima, bayizi soba mvula munkengi wa tizunga zi kalendi bikila mu sala tisalu tio. Ted na Hiedi bayizi bakula ti ka bayizi’â sâla na lenda ko dia sala tisalu tio. Ni bu sa ti banionga, bayizi bakula ti balendi sarila Yehova mu mpila zakaka. Ted têle ti: “Tayizi longoka mu lembo tûlaka mabanza meto mu tisalu timosi.”

16. Ntia malongi tuta baka mu Bisi-Ngalate 6:4?

¹⁶ Ka tulendi’â tazaba misamu mituturila mu luzingu lweto ko. Kâ, musamu wa mfunu wena mu lembo banzaka ti ni madema me neto mu tisalu tia Yehova masaka ti tabâ ntalu kwe Yandi, peleko tafwanakasaka madema meto na ma bantu bakaka. Hiedi banguri ti: “Tidzunu tiaku mbo tiwa tala ti fwanakase luzingu lwaku na luzingu lwa bantu bakaka.” (Tanga Bisi-Ngalate 6:4.) Musamu wa mfunu wena mu dinga mpila zi tulendi bakisila bantu bakaka mpe zi tulendi sarila Yehova. *

17. Ngano nti lendi sa mu bâ na madema mu tisalu tia Yehova?

¹⁷ Mbo kwizi bâ na lenda dia sala tisalu tiatingi mu bungu dia Yehova tala ti katuri misamu milendi nata nkaka mu luzingu lwaku, mpe siri keba mu lembo bâ na mfuka zilembolo salu. Bâ na makani ma fioti-fioti malendi ku bakisa mu lungisa makani maku ma manene. Mu tifwani, tala ti kani die naku dia bâ mupasuri-nzila wa ntangu zazansoni, ngano lendi bâ mupasuri-nzila wa ntangu fioti bwawu bu? Tala ti zololo wabâ tibakisi mu tisalu,  ngano lendi yôkesaka ntangu yayingi mu tisalu tia mu teritware’aku na mu talaka mpangi ze na bimbevo na mpangi za nuna za mu timvuka tiaku? Misamu mi longoka bwawu bu mbo mikubakisa mu nata madema ma manene ku matu. Bonga nzengolo ya sarila ngolo zaku mu tisalu ni tisalu ti bakuhana.​—Rom. 12:11.

18. Ntiana bu ta wa songela tifwani, ngano nti ta longoka mu tifwani tia Beverley?

¹⁸ Kani kabwe, mvula ka zikontaka ko mu bâ na makani ma timpeve na mu lungisa mo. Tabongeno tifwani tia mpangi ya yikento ye na nkumbu Beverley, mpe we na mvula 75. Timbevo tia ngolo tieri nandi tieri saka ti wabâ musamu wa mpasi kwe yandi mu kwe yende. Kâ weri nandi kasala bwabwingi mu ntangu ya campagne ya Mbambukulu moyo ya lufwa lwa Yezu. Buna wayizi sola makani ma kaketi lungisa. Beverley bu kalungisa makani mandi matariri campagne, wayizi bâ na nsayi yayingi. Ngolo zi kasarila zatuma mpangi zakaka mu sala bwabwingi mu tisalu tia samuna. Yehova mbo kazoloko tisalu tia mpangi zeto za nuna, ni bu sa ti misamu miakaka mbo mibakabakasaka mu yirika misamu mi bê na mio lenda.​—Mik. 71:17, 18.

19. Ntia makani ma timpeve tulendi bâ na mo?

¹⁹ Bâ na makani ma lendi lungisa. Kurisa bifu bitâka Yehova nsayi. Longoka bima bisa ti watomo bâ salu kwe Nzambi na kwe organizasio’andi. Dinga mpila zi tomo sarila mpangi zaku. * Ntiana Timote, na lusakumunu lwa Yehova ‘nkululu’aku mbo yimoneka ha meso ma babansoni.’​—1 Tim. 4:15.