1. Nti bituhanaka nsayi yayingi?

 YEHOVA zololo ti tabâ mu nsayi. Wa tuzebi mu bungu ti nsayi mu mbutu ya mpeve’andi ya santu yena. (Nga. 5:22) Mu bungu ti kaba nsayi yayingi kutâka na baka, mbo tubâka na nsayi yayingi bu tusalaka bwabwingi mu tisalu tieto tia bukristo na bu tubakisaka mpangi zeto mu mpila ni mpila.​—Bis 20:35.

2-3. a) Tintwari na Bisi-Ngalate 6:4, ntia bima biole bilendi tu bakisa mu tatamana mu bâ mu nsayi mu tisalu tia Yehova? b) Nti tutaluzula mu timoko ti?

² Ntiana bu tâka wo Bisi-Ngalate 6:4, ntumwa Paulo wazonzela misamu miole mitubakisa mu tatamana mu bâ mu nsayi. (Tanga.) Wa ntete, kani difweti bâ neto ni mu sa miamiansoni mi tulenda mu bungu dia Yehova. Tala ti tusiri miamiansoni mi tulenda, tufweti bâ mu nsayi. (Mat. 22:36-38) Wa nzole, tufweti saka keba mu tifwanakasa na bantu bakaka. Ni bu sa ti tikolela tia mbote tie neto peleko kâni, lukolo lwa lula tasa peleko kâni, mpe lenda diadingi die neto peleko kâni, tufweti tondaka Yehova. Bu tutomo tala, bima biabiansoni bie neto ni Yandi watuhana bio. Ku lweka lwakaka, tala ti bantu bakaka batuyôkele mu misamu miakaka mu tisalu tia samuna, tufweti yangalalaka mu bungu ti ka basarilaka lenda diawu ko mu moneka peleko mu lungisa nsatu za bawu beni, kâ mbo basarilaka dio mu kembela Yehova. Kani tabasila timbanda, tufweti longoka mu tifwani tiawu.

³ Mu timoko ti, mbo tumona ka bwe tulendi sa mu ntangu yi tulembo lendaka musamu mu tisalu tieto. Mbo tutaluzula mpe ka bwe tulendi sarila lenda di lendi bâ neto, mpe ka bwe tulendi bakila malongi mu tifwani tia bantu bakaka.

4. Ntia musamu wulendi tu nôkesa? Hana tifwani.

⁴ Bisari biakaka bia Yehova mbo binôkaka mu bungu ti ka balendi’â basa mio mi bazololo ko mu tisalu tiandi mu bungu dia bununu bwawu peleko mu bungu dia bimbevo bie nawu. Musamu ni wo waturila Carol wabwa bweso bwa samuna mu mbuka yeri dinganaka bisamuni. Mu ntangu yîna, walongoka Bibila na bantu 35, mpe babingi ha kati diawu bayizi tihana kwe Yehova mpe bayizi batusu. Diangana tisalu tia Carol nguria mbutu tieri butaka! Ha manima wayizi tomo bêla, mpe wafwanakana kabâka kwa ku nzo. Carol têle ti: “Nzebi ti mu bungu dia tikolela tiani ka ndiena na lenda ko dia yirika misamu mi lendi yirika bantu bakaka. Kâ, mbo nimonaka ntiana’eti bawu ba kwikama bena yôka meno. Ka ndiena na lenda ko dia yirika misamu miamiansoni mi nzololo, mpe musamu wo mbo wukunôkesaka.” Carol zololo mu sa miamiansoni mi kalenda mu bungu dia Yehova. Musamu wo, wa nguria wa mbote wena! Tulendi bâ na lukwikulu ti Nzambi’eto ye na tiari tia mutima, mbo kazoloko mabanza mandi ma mbote.

5. a) Ntia musamu tufweti bambukilaka tala ti tunôkene mu bungu dia misamu mi tulembo lendaka? b) Ntiana bu ta wa songela tifwani, bwe mpangi ya yibakala yisilaka miamiansoni mi kalenda mu tisalu tia Yehova?

⁵ Tala ti ntangu zakaka mbo nôkaka mu bungu dia misamu mi lembo lendaka, tiyula: ‘Ngano Yehova nti kakekoloko kwe meno?’ Yehova zololo ti wasa miamiansoni mi lenda midelakane na misamu miaku. Tabongeno tifwani: Mpangi ya yikento ye na mvula 80 mbo yinôkaka mu bungu ti ka lendi’â kavutu sala buna bu keri sarilaka mu tisalu tia samuna ko mu ntangu yi keri na mvula 40. Mbo kabanzaka ti ni bu kasa kwa miamiansoni mi kalenda, Yehova ka yangalalaka ko. Ngano wa matieleka wena? Banza’eti. Tala ti mpangi yo bu keri na mvula 40, mbo keri saka miamiansoni mi kalenda, bwawu bu mpe bu ke na mvula 80, ni bo kwa kasaka, wuzololo tâ ti ka bikaka mu sa miamiansoni mi kalenda ko. Tala ti tubatikiri mu mona ti tisalu tieto ka tiena tiatingi ko mu tâ Yehova nsayi, tufweti bambukaka ti ni Yehova zebi misamu mimutâka nsayi. Tala ti tusiri miamiansoni mi tulenda, Yehova mbo kayangalala!​—Fwanakasa na Matie 25:20-23.

6. Nti tulendi longoka mu tifwani tia Maria?

⁶ Ka wubâ musamu wa mpasi ko mu bâ mu nsayi tala ti tutûriri mabanza meto mamansoni mu misamu mi tulendi yirika, kani tatûla mo mu mio mi tulendi lembo yirika. Tabongeno tifwani tia mpangi ya yikento ye na nkumbu Maria. Timbevo tie nandi timukabakasaka mu tomo sala mu tisalu tia samuna. Ha mbatukulu, wayizi nôka mpe wabanza ti kena salu ko. Kâ ha manima, bu kadimbitila mu tifwani tia mpangi yimosi ya yikento yeri na timbevo tieri saka ti kabâka kwa ku mfulu, Maria wabonga nzengolo ya bakisa mpangi yo. Têle ti: “Nayizi kubika misamu ngatu tasamunaka mu nzila ya telefone na ya mikanda. Ntangu zazansoni zi tweri salaka, mu nsayi ndieri bu ndieri kâlaka ku nzo mu bungu ti nayizi bakisa mpangi’ani.” Beto mpe tulendi yika nsayi’eto ngolo bu tutûla mabanza meto mu mio mi tulendi yirika, kani tatûla mo mu mio mi tulendi lembo lenda mu yirika. Kâ, ngano nti biyôka tala ti tulendi sala bwabwingi peleko tala ti mbo tusalaka bubote mu misamu miakaka mu tisalu tia Yehova?

7. Ntia malongi ntumwa Piere kahana kwe Bakristo?

⁷ Mu mukanda’andi wa ntete, ntumwa Piere watindisa mpangi zandi mu sarila makabu mawu peleko lenda diawu mu tindisa mpangi zakaka. Piere watsoneka ti: ‘Muna muntu kahana buna bu têla kabu di kabakiri, mu sarisa  bampwana’andi, ntiana bisari bia mbote bia bweso bwa Nzambi bwa mpila na mpila.’ (1 Pi. 4:10) Tufweti saka miamiansoni mi tulenda mu sarila lenda dieto, mpe ka tutînakandi ti bantu bakaka batusila timbanda peleko bizi banôka. Tamana lembo sa miamiansoni mi tulenda mu bungu ti lwaka lwe neto mu mio mi mona bantu bakaka, ka tuhana bima bieto bia mbote ko kwe Yehova.

8. Tintwari na 1 Bisi-Korente 4:6, 7, mu bungu dia nti tufweti sila keba mu tilonaka mu makabu me neto?

⁸ Tufweti tomo sarilaka lenda dieto, kâ ka wena ko ti mu tilona. (Tanga 1 Bisi-Korente 4:6, 7.) Mu tifwani, lendi tomo bâ na lenda dia batikaka ndongokolo za Bibila. Kufweti’â watîna ko mu sarila lenda dio! Kâ luswaswanu lwe ha kati dia tifu tia sarila lenda na tifu tia tilona mu bungu dia lenda. Mu tifwani, bwabane na musamu mu tisalu tia samuna wusiri ti wabatika ndongokolo ya Bibila; timina die naku mu zonzela wo kwe mpangi ze mu tikunku tiaku tia tisalu tia samuna. Kâ bu ta dinga mu zonzela wo, mpangi ye kô ya yikento yita zonzela musamu wusiri ti kakaba zurnale kwe muntu. Yandi zurnale kakabiri mboko nge ndongokolo ya Bibila batikiri. Ngano bwe sa? Zebi ti wamana zonzela musamu wu bwabane na wo mpangi zaku mbo zibaka lutindusu, kâ lendi bonga nzengolo ya zonzela wo tilumbu tiakaka, ngatu walembo katula nsayi ya mpangi’aku yikabiri zurnale. Bu sila bo mbo songela nsayi. Mu mpila ni mpila kubikandi mu batikaka ndongokolo za Bibila. Lenda die naku​—sarila dio!

9. Ngano bwe tufweti sarilaka makabu meto?

⁹ Tufweti bambukaka ti lenda ni lenda di lendi bâ neto kabu dia Nzambi diena. Tufweti sarilaka makabu meto mu tunga timvuka, ka wena ko ti mu moneka. (Flp. 2:3) Bu tusarila ngolo zeto na lenda dieto mu sarila luzolo lwa Nzambi, mbo tubâ mu nsayi​—ka wuta zolo tâ ko ti tuyôkele bantu bakaka peleko beto babote na bawu, kâ mu bungu ti tuzololo mu sarila makabu meto mu kembela Yehova.

10. Mu bungu dia nti wulembolo musamu wa delakana mu tifwanakasa na bantu bakaka?

¹⁰ Tala ti muntu ka wusiri’â keba ko, lendi fwanakasa misamu mi kena na mio lenda na misamu mi lembo lendaka muntu wakaka. Mu tifwani, mpangi yimosi yilendi bâ ngolo mu tâ binzonzi bia mbote. Ku mutima’andi, lendi tsâla mpangi yimonaka mpasi mu tâ binzonzi. Kâ mpangi yo yilendi bâ ngolo mu tifu tia songelaka ndiambu, tia kubikaka bala bandi peleko tia bâ na luhemo mu tisalu tia samuna.  Diangana mbo tutondaka mpangi zeto zisarilaka makabu mawu mu sarila Yehova na mu bakisa mpangi zawu!

11. Mu bungu dia nti tufweti yêla mu landa tifwani tia Yezu?

¹¹ Ni bu sa ti tufweti saka keba mu tifwanakasa na bantu bakaka, tulendi baka malongi mu bifwani bia bisari bia Yehova. Tabongeno tifwani tia Yezu. Ni bu sa ti keri’â na masumu ko, tulendi baka ndongosolo mu bifu biandi bia mbote na mu nsalulu zandi. (1 Pi. 2:21) Bu tusaka miamiansoni mi tulenda mu landa tifwani tia Yezu buna bufwanakane, mbo tubâ bisari bia mbote bia Yehova, mpe mbo tusala bubote mu tisalu tia samuna.

12-13. Ntia malongi tulendi baka mu tifwani tia mutinu Davide?

¹² Mu Bibila, mbo tubakaka bifwani bia bakento na babakala ba kwikama bi tulendi landa, ni bu sa ti masumu meri nawu. (Ebr. 6:12) Banza’eti mutinu Davide, Yehova wamutâ ‘muntu we buna bu zololo mutima’ani’ peleko, ntiana bu tâka ntelo yakaka ya Bibila, “mpila muntu yi ntomono zolo.” (Bis. 13:22) Kâ, Davide muntu wa masumu weri. Fote mpe za zinene zazingi kayirika. Ntono fote zo, tifwani tia mbote tiena kwe beto. Mu bungu dia nti? Mu bungu ti bu bamusungika, ka dinga ko mu tinwanina. Kani kasila bo, watambula malongi ma ngolo ma bamuhana, mpe watomo soba mabanza mu mio mi kayirika. Ha manima, Yehova wamulemvokela.​—Mik. 51:3, 4, 10-12.

¹³ Tulendi baka malongi mu tifwani tia Davide bu tutiyula: ‘Ngano bwe nibongelaka malongi? Ngano mbo nitambulaka fote zani, peleko mbo nidingaka mu songela ti mpemba ye nani? Ngano bantu bakaka nivulu baminaka? Ngano mbo nisarilaka ngolo mu lembo vutu kârila fote zani?’ Lendi tiyula biyuvu bia mpila yo, bu tanga bifwani bia bantu ba kwikama bie mu Bibila. Ngano misamu mi babwabana na mio midelakane na misamu miaku? Ntia bifu bia mbote basongela? Mu muna tifwani tiyulaka: ‘Bwe ndendi bêla ntiana tisari tio tia Yehova tia kwikama?’

14. Ngano ntia ndandu tulendi baka mu bifwani bia mpangi zeto?

¹⁴ Tulendi baka mpe ndandu bu tulanda bifwani bia mpangi zakaka za nuna na za ntwenia. Ngano lendi dimbitila mu tifwani tia mpangi ye mu timvuka tiaku yita korela nkwamusu na kwikama kwakwansoni​—ntiana nkwamusu za bampwana’andi, za kanda,  peleko timbevo? Ngano bifu bie kô bia mbote bia mpangi yo zololo mu landa? Bu landa tifwani tiandi tia mbote, lendi baka malongi makubakisa mu korela nkwamusu zaku. Diangana mbo tutomo tondaka mu bungu dia bifwani bia timinu bia mpangi zeto!​—Ebr. 13:7; Zaki 1:2, 3.

15. Ntumwa Paulo ntia malongi kahana mu tu bakisa mu tatamana mu bâ mu nsayi mu tisalu tieto tia Yehova?

¹⁵ Muna muntu mu beto fweti sa miamiansoni mi kalenda mu singasa tidzunu na bumosi mu timvuka. Tabongeno tifwani tia Bakristo ba mu mbandu ya ntete. Makabu na madema ma swaswana meri nawu. (1 Kor. 12:4, 7-11) Musamu wo ka wasa ko ti habâ timbanda ha kati diawu peleko habâ tihambula. Paulo wabatindisa mu sa miamiansoni mia mfunu ‘mu tunga nitu ya Kristo.’ Paulo watsoneka kwe Bisi-Efeze ti: “Mu ntangu muna tinama tisalaka bubote, mbo tibakisa nitu mu kula na mu titunga yawu beni mu luzolo.” (Efz. 4:1-3, 11, 12, 16, NWT) Bô bayizi sarila bo, bayizi singasa tidzunu na bumosi​—bi tumonaka mu bimvuka bieto lumbu ti.

16. Ntia nzengolo tufweti bonga? (Bahebre 6:10)

¹⁶ Bonga nzengolo ya sa keba mu tifwanakasaka na bantu bakaka. Kani wasila bo, longoka tifwani tia Yezu, mpe sarila ngolo mu landa bifu biandi. Baka malongi mu bifwani bie mu Bibila na bia bantu bê na timinu lumbu ti. Buna, bu takwe se miamiansoni mi lenda, bâ na lukwikulu ti Yehova ‘ka kondolo’â buderede ko mu zimbakana tisalu’ tiaku. (Tanga Bahebre 6:10.) Tatamana mu yangalala bu takwe sariri Yehova, zaba ti ngolo zi sarilaka mu mu tâ nsayi za kazololo.