1. Mu bungu dia nti tuhaninaka mvutu ku tukutakanu?

 MU BUNGU dia nti tukwendelaka ku tukutakanu twa timvuka? Musamu wa ntete, ni mu kembela Yehova. (Mik. 26:12; 111:1) Mbo tukwendaka mpe ku tukutakanu ngatu tatindisa mpangi zeto mu ntangu zi za mpasi. (1 Tes. 5:11) Bu tunangunaka koko mu hana mvutu, mbo tulungisaka misamu mio mia miole.

2. Ngano ntia bweso bwe neto bwa hana mvutu ku tukutakanu tweto?

² Tumingu twatwansoni, bweso bubâka neto mu hana mvutu ku tukutakanu tweto. Mu tifwani, ku nsuka ya lumingu, tulendi hana mvutu mu ndongokolo ya Nzo ya Zangama ya Munkengi. Ha kati dia lumingu, tulendi hana mvutu ha titini tia Bimvwama bia timpeve, ndongokolo ya Bibila ya timvuka, na mu bimoko biakaka.

3. Ntia misamu mia mpasi tulendi bwabana na mio, mpe bwe Bahebre 10:24, 25 yilendi tu bakisila?

³ Beto bansoni tuzololo takembela Yehova, mpe tatindisa mpangi zeto. Kâ, bu tudingaka mu hana mvutu, tulendi bwabana na misamu mia mpasi. Tulendi bâ na lwaka mu hana mvutu peleko tulendi bâ na nsatu ya hana mvutu zazingi, kâ ka bata vulu tu bonga ko ntiana bu tuzololo. Ngano bwe tulendi sa mu misamu mio mia miole? Mbo tubakaka mvutu mu mukanda wa ntumwa Paulo kwe Bahebre. Bu kazonzela mfunu ya kutakanaka, watâ ti tufweti toko dingaka mu ‘titindisa mu tintwari.’ (Tanga Bahebre 10:24, 25.) Bu tubakulaka ti bantu bakaka mu Nzo ya Nsambululu balendi  baka lutindusu, ni bu sa ti fioti kwa tuzonzele timinu tieto, mbo tutomo zolo mu hana mvutu. Mpe tala ti ka bata vulu tu bonga ko bu tuta nanguna koko, tulendi bâ mu nsayi mu bungu ti bakaka mu timvuka bweso bwe nawu bwa hana mvutu.—1 Pi. 3:8.

4. Ngano misamu mitatu mi tuzonzela mu timoko ti ni mie?

⁴ Mu timoko ti, mbo tutoko zonzela ka bwe tulendi titindisila mu timvuka tia fioti mwena’eti bantu ndambu kwa banangunaka moko. Ha manima, mbo tuzonzela ka bwe tulendi titindisila mu timvuka tia tinene tie na bantu babingi banangunaka moko mu hana mvutu. Ku nsuka mbo tuzonzela mpila yi tulendi sa ti misamu mi tutâ mu mvutu zeto miatomo tindisa bampwana’eto.

5. Bwe tutitindisilaka tala ti mu timvuka tia fioti twena?

⁵ Mu timvuka tia fioti peleko mu tikunku tia bisamuni, mpangi yitwarisaka ka bâka na bantu babingi ko ba kalendi sola mu hana mvutu. Ntangu zakaka, mbo wufwanakanaka ti kakêla mwa ntangu tii bu nanguna muntu koko. Lukutakanu lulendi moneka lwa peta—mpe tulendi lembo baka lutindusu. Ngano nti lendi sa? Bâ wa kubama mu vulu nangunaka koko. Bu sila bo, lendi kwizi tuma bantu bakaka mu vulu nangunaka koko.

6-7. Bwe tulendi sa mu dimina lwaka lubâka neto mu hana mvutu?

⁶ Ngano nti lendi sa tala ti lwaka lubâka naku mu hana mvutu? Bantu babingi babâka na lo. Kâ, ngatu watomo tindisa mpangi zaku, lendi dinga mpila zi lendi diminina lwaka lwaku mu hana mvutu. Bwe lendi sa?

⁷ Wulendi bâ musamu wa mbote kwe nge mu vutu taluzula bimoko biaduka mu Nzo ya Zangama ya Munkengi. b Mu tifwani, tomo kubamaka. (Bin. 21:5) Bu tomo zaba misamu mi luzonzela, kuvutu’â bâ na lwaka ko mu hana mvutu. Mpe hana mvutu za zikufi. (Bin. 15:23; 17:27) Mvutu ya nkufi ka yikuhana lwaka ko. Bampangi balendi tomo bakula mvutu ya mpila yo, yi lendi hana mu phrase mosi peleko zole na bu heni mvutu ya yila yibâ na mabanza mamingi. Bu hana mvutu ya nkufi mu ntelo za nge beni, mbo kwizi songela ti watomono kubama mpe watomono bakula mabanza ma mutu-diambu.

8. Bwe Yehova kamwinaka ngolo zeto?

⁸ Ngano nti lendi sa tala ti yêlele mu sarila mabanza makaka ma baheni, kâ lwaka kwa lwatiri naku mu hana mvutu zazingi peleko zole? Bâ na lukwikulu ti Yehova mbo kayangalala mu ngolo zi sarila mu sa mio mi lenda. (Like 21:1-4) Bu batâka ti ‘fweti hana bima biaku bia ntalu,’ ka wuzololo’â tâ ko ti fweti tikanga siosio. (Flp. 4:5) Dinga mu zaba ka nti lendi sa, bâ na kani dia lungisa mio milendi sa, mpe sambila mu baka tidzunu tia mutima. Ku mbatukulu, kani dilendi bâ dia hana mvutu ya nkufi.

9. Ntia musamu wa mpasi tulendi bwabana na wo mu bimvuka bia binene?

⁹ Tala ti mu timvuka tiaku bisamuni biabingi bie mô, lendi bwabana na musamu wakaka wa mpasi. Kampe mpangi zazingi zinangunaka moko, mpe, kwa nge ka bavulu’â kwa monaka ko. Mu tifwani, Danielle nsayi yivulu bâka nandi bu kahanaka mvutu  ku tukutakanu. c Mbo kamonaka ti mpila yena ya hana nsambululu kwe Yehova, ya tindisa bampwana’andi na ya yika timinu tiandi ngolo mu matieleka ma Bibila. Kâ bu kayenda mu timvuka tie na bisamuni biabingi, ka beri’â vulu mu solaka ko mu hana mvutu—ntangu zakaka ka beri’â mu solaka ko mu lukutakanu lwa mukaka. Têle ti: “Mu tiari ndieri. Mbo ndieri monaka ntiana meno ndieri kondoko bweso. Misamu mia mpila yo bu mivulu kârilaka lendi batika mu tiyula tala ti ka yena nko ko.”

10. Nti tulendi sa mu bâ na bweso bwabwingi mu hana mvutu?

¹⁰ Ngano mabanza mamosi me naku na Danielle? Tala ti ni bo, lendi kwizi banza mu lembo vutu nanguna koko na mu wâ kwa misamu mi batâ ku lukutakanu. Kâ, kubikandi mu dinga mu hana mvutu. Ngano nti lendi sa? Kampe mbo wubâ musamu wa mbote mu kubika mvutu zazingi mu muna lukutakanu. Tala ti ka bakusolele’â ko mu hana mvutu ku mbatukulu ya ndongokolo, mbo bâ na bweso bwa hana mvutu bu kwe tatamane lukutakanu. Bu kubamaka mu bungu dia ndongokolo ya Nzo ya Zangama ya Munkengi, banza ka bwe mabanza ma muna paragrafe mata kwelana na mutu-diambu. Bu sila bo, ntembe kâni mbo bâ na mabanza ma zonzela mu timoko ti lusa. Musamu wakaka, lendi kubika mvutu mu paragrafe zizonzelaka matieleka ma ndilu me mpasi mu bangula. (1 Kor. 2:10) Mu bungu dia nti? Mu bungu ti kampe bantu ka babingi’â ko bananguna moko mu bitini bio. Kâ, nti lendi sa tala ti ni bu sa ti sariri mabanza ma, mweni ti tukutakanu twatwingi tuyôkele, mpe ka weka’eti bwa bweso ko bwa hana mvutu? Lendi kwe monekena mpangi yitwarisa ntete lukutakanu lwabatika mu mu têla ti zololo wahana mvutu mu tiyuvu eti peleko eti.

11. Ngano Bisi-Filipe 2:4 nti yitutindisaka mu sa?

¹¹ Tanga Bisi-Filipe 2:4. Mu lubakusu lwa mpeve santu, ntumwa Paulo watindisa Bakristo mu dingaka mu lungisa nsatu za bakaka. Bwe tulendi sarila malongi mo ku tukutakanu  tweto? Bu tubambuka ti, ntiana beto, bampwana’eto mpe we nawu bahana mvutu.

12. Ngano ntia mpila ye ya mbote mu tindisa bampwana’eto ku tukutakanu? (Tala mpe tifwani.)

¹² Tabonga’eti tifwani eti. Bu saka bimoko na ndiku zaku, ngano mbo zonzaka bwabwingi, mpe kubabikilaka ntangu yayingi ko ya zonza? Kâni! Wubâka naku bahana mabanza mawu. Mpila mosi mpe, ku tukutakanu mbo tuzoloko ti bantu babîngi babaka bweso bwa zonza. Diangana, mpila mosi mu mpila za mbote za tindisa mpangi zeto ni mu ba hana bweso bwa zonzesa timinu tiawu. (1 Kor. 10:24) Tataleno ka bwe tulendi bwa sila.

13. Bwe tulendi bikila bantu bakaka ntangu ya hana mvutu ku tukutakanu?

¹³ Ku lweka lwakaka, tulendi hana mvutu za nkufi, ngatu babîngi babâ na ntangu ya hana mpe mvutu. Bakuluntu na mpangi zakaka za yela balendi songela tifwani tia mbote. Ni bu sa ti mvutu ya nkufi kwa hana, saka keba mu zonzelaka mabanza mamingi. Tala ti zonzele mabanza mamansoni ma paragrafe, bakaka ka bavutu’â sâla na musamu wa tâ ko. Mu tifwani, mu paragrafe yi, mabanza mole bazonzele—hana mvutu za nkufi, mpe sa keba mu zonzela mabanza mamingi. Tala ti nge ni muntu wa ntete wu basolele mu hana mvutu ya paragrafe, mbo wubâ musamu wa mbote ti wazonzela kwa mabanza mamosi.

14. Nti bilendi tubakisa mu zaba mbala zi tulendi nanguna koko? (Tala mpe tifwani.)

¹⁴ Bâka na mabanza ma delakana bu dingaka mu zaba mbala zi lendi nanguna koko mu hana mvutu. Tamana vulu nanguna koko, ntwarisi lendi mona ti fweti sola kwa beto ni bu sa ti mpangi zakaka ka zeka’eti hana mvutu ko. Musamu wo wulendi nôkesa bantu bakaka bazololo mu nanguna moko.—Ekl. 3:7.

15. a) Bwe tufweti monaka bu balembo tusolaka mu hana mvutu? b) Ngano ntwarisi bwe zilendi songela ti bantu babansoni ba bata kipa? (Tala kaku tie na mutu-diambu “ Tala ti nge ni ntwarisi.”)

 ¹⁵ Bantu babîngi bu banangunaka moko mu ntangu ya timoko tia ndongokolo, balendi lembo tusola buna bu tu zololo. Ntangu zakaka, ntwarisi lendi lembo tu sola tii ku nsuka ya ndongokolo. Musamu wo wulendi nôkesa, kâ ka tufweti’â tafwema ko bu balembo tu solaka.—Ekl. 7:9.

16. Bwe tulendi tindisila bantu bahanaka mvutu?

¹⁶ Tala ti ka wena na bweso ko bwa hana mvutu buna bu zololo, mbo wubâ musamu wa mbote kwe nge mu wirikila bampwana’aku bu bata hana mvutu na mu ba sîka mu bungu dia mvutu zawu ha manima ma lukutakanu. Mpangi zaku zilendi baka butindi bu ba sîka mpila mosi na bu keti hana mvutu. (Bin. 10:21) Mpila yakaka yi tutitindisilaka mu tintwari ni mu ntangu yi tusîkaka bampwana’eto.

17. a) Bwe bibuti bilendi bakisila bala bawu mu hana mvutu za toma? b) Tintwari na video, misamu miyà mi tulendi sarila mu kubika mvutu ni mie? (Tala mpe note.)

¹⁷ Bwe tulendi vutu titindisila mu tintwari ku tukutakanu? Tala ti nge tibuti tiena, bakisa bala baku mu kubika mvutu za toma zidelakane na mvula ze nawu. (Mat. 21:16)  Ntangu zakaka, mbo bazonzelaka misamu mia minene mu ndongokolo, ntiana mitariri makwela peleko ndiatulu, kâ kulendi bâ paragrafe yimosi peleko zole zi lendi hanina mwana mvutu. Bakisa mpe bala baku mu bakula ka mu bungu dia nti balendi lembo ba sola bu banangunaka moko. Bu sila bo, mbo wubabakisa mu lembo nôka bu basolaka bantu bakaka ni bu sa ti moko bananguni.—1 Tim. 6:18. d

18. Bwe tulendi sila keba mu vulu zonzelaka kwa luzingu lweto bu tuhanaka mvutu? (Bingana 27:2)

¹⁸ Beto bansoni tulendi kubika mvutu zikembesa Yehova mpe zitindisa mpangi zeto. (Bin. 25:11) Ni bu sa ti lenda dibâka neto dia zonzela luzingu lweto, tufweti saka keba mu vulu zonzelaka misamu mieto. (Tanga Bingana 27:2; 2 Kor. 10:18) Kani tasila bo, mbo tuvulu zonzelaka Yehova, Zu diandi na kanda diandi. (Nza. 4:11) Diangana, tala ti tiyuvu titulombele tazonzela luzingu lweto, wufwanakane tasila bo. Tifwani tia musamu wo mu paragrafe yita landa tiena.

19. a) Ntia ndandu tubaka bu tubâ na mabanza ma delakana bu tuhanaka mvutu? (Bisi-Rome 1:11, 12) b) Ngano nti zoloko bu hanaka mvutu ku tukutakanu?

¹⁹ Ni bu sa ti ka kwena mitieno ko mitarilaka mpila yi tulendi hanina mvutu, beto bansoni tulendi sarila ngolo mu hanaka mvutu zitindisaka. Wulendi zolo tâ ti tufweti vulu hanaka mvutu. Peleko wulendi zolo tâ ti tufweti yangalala mu ntangu yi batusola mu hana mvutu, mpe tufweti bâ na nsayi mu ntangu bantu bakaka babâka na bweso bwa hana mvutu ntiana beto. Bu tutûla mabanza meto mu bantu bakaka mu ntangu ya lukutakanu lwa timvuka, beto bansoni mbo tubaka lutindusu.—Bisi-Rome 1:11, 12.