Kâni. Misamu mia tsoneka Davide mia delakana mieri.

Tataluzuleno misamu mi katsoneka mu verse yo na mu verse zakaka za mpila yo: “Mbo nikembela nkumbu’aku mankululu mu mikunga, mpe bilumbu biabiansoni mbo nitswikisa ndefi zani.” “Nikukembele mu mutima’ani wawansoni, ô Yehova Nzambi’ani, mpe nzololo nakumbisa nkumbu’aku mankululu.” ‘Nkumbu’aku mpe nisakumuna ntangu zazansoni tii mankululu.’​—Mik. 61:8, NWT; 86:12, NWT; 145:1, 2.

Davide bu katsoneka misamu mio, keri’â banzaka ko ti, kani kabwe, ka sa fwa ko. Wazaba ti bantu bafweti fwa mu bungu dia masumu. Mpe Davide wazaba ti muntu wa masumu weri. (Mba. 3:3, 17-19; Mik. 51:4, 5) Wazaba ti bantu ba kwikama ntiana Abrahame, Izake, na Yakobe bafwa mpe. Davide wazaba ti yandi beni mpe mbo kaketi fwa. (Mik. 37:25; 39:4) Kâ misamu mi katsoneka mu Mikunga 61:8 mbo mieri tarilaka nsatu’andi ya kembela Nzambi mankululu, wuzololo tâ ntangu yayansoni yi kaketi zinga.​—2 Sam. 7:12.

Misamu miakaka mia tsoneka Davide mbo mieri zonzelaka misamu mi keri bwabanaka na mio mu luzingu lwandi, ntiana bu tulendi wa mona mu misamu mia mbatukulu ya Mikunga 18, 51, na 52. Mu Mikunga 23, Davide wafwanakasa Yehova na muvungi wuhanaka lutwalusu, wulembekaka mpe wukengerelaka. Davide muvungi wa mpila yo weri. Mpe weri nandi kasarila Nzambi ‘bilumbu biabiansoni bia luzingu’ lwandi.​—Mik. 23:6.

Mpe ka luzimbakanadi ti ni Yehova watuma Davide mu tsoneka misamu mi katsoneka. Mu misamu mi katsoneka mweri mbikululu zeri zonzelaka misamu miaketi tûla ku matu. Mu tifwani, mu Mikunga 110, Davide watsoneka misamu mitariri ntangu Mfumu’andi kazakala ha lubakala lwa Nzambi ku mazulu, mpe yi bamuhana lutumu lwalwingi. Mu bungu dia nti bamuhanina lutumu? Mu tûla mbeni za Nzambi ha malu mandi na mu lungisa mfundusu zandi kwe makanda ma ha mutoto. Davide nkaka ya Masiya yeri, yandi yâla ku mazulu mpe bâ Nganga-Nzambi mankululu. (Mik. 110:1-6) Yezu wasingasa ti mbikululu ye mu Mikunga 110 ni yandi yeri tarilaka mpe mbo yaketi lungana ku matu.​—Mat. 22:41-45.

Wa matieleka, Yehova watuma Davide mu tsoneka misamu mia ntangu’andi na misamu miaketi kwiza ku matu mu ntangu yi baketi mu vumbula kwe ba fwa, mpe yi kaketi kunda Nzambi mankululu. Buna kampe verse za Mikunga 37:10, 11, 29 mbo zizonzelaka misamu miayôka mu ntangu yi batsoneka zo na misamu miaketi tula ku matu. Verse zo zalungana mu ntangu ya ntama ku Israele, mpe mbo zivutu tomo lungana ku matu mu ntangu yi lungisa Nzambi makani mandi.​—Tala timoko tie na mutu-diambu “Mbo bâ na meno ku Paradi” tie mu kati mo.

Mikunga 61:8 na verse zakaka za mpila yo mbo zisongelaka ti Davide weri nandi kakembela Yehova mu ntangu ya Israele tii ku lufwa lwandi. Mpe na mabanza ma delakana mbo zizonzelaka misamu mi yirika Davide ku matu mu ntangu yi bamuvumbula kwe ba fwa.