1. Ntete lufwa lwandi, Yezu bwe katâ kwe timpumbulu tieri ha lweka lwandi? (Like 23:39-43)

 YEZU na bimpumbulu biole bieri ha lweka lwandi lwa lubakala na lwa lukento mpasi beri monaka bu beri fwaka malembe-malembe. (Like 23:32, 33) Bimpumbulu bio biasehesela Yezu, buna ka babâ milongoki miandi ko. (Mat. 27:44; Mak. 15:32) Kâ mosi wasoba mutima’andi. Watâ ti: “Yezu, kumbambukila moyo bu kwiza mu Timfumu tiaku.” Yezu wamuvuturila ti: “Wa matieleka nita ku têla lumbu ti, mbo bâ na meno ku Paradi.” (Tanga Like 23:39-43.) Ka kwena tima ko tisongelaka ti timpumbulu tio tiatambula nsangu za ‘Timfumu tia Nzambi’ zeri samunaka Yezu ntete kafwa. Mpe kani kabwe Yezu ka tâ kwe bakala dio ko ti mbo kakota mu Timfumu. (Mat. 4:17) Yezu Paradi yibâ ha mutoto keri zonzelaka. Mu bungu dia nti tuta têla bo?

2. Nti bita songela ti timpumbulu tiasoba mabanza Muyuda weri?

² Kampe timpumbulu tiasoba mabanza Muyuda weri. Timpumbulu tio tiatâ kwe mpwana’andi ti: ‘Nge ka wena na kani na lwaka lwa Nzambi ko, bu bakuzengele mambu nsinsa na yandi?’ (Like 23:40) Bayuda Nzambi mosi kwa beri sambilaka, kâ bantu ba makanda makaka nzambi zazingi beri kwikilaka. (Ndu. 20:2, 3; 1 Kor. 8:5, 6) Tala ti bimpumbulu bio bantu ba makanda makaka beri, kampe tiyuvu ebu kaketi tia yurila: “Nge ka wena na kani na lwaka lwa bazambi ko?” Musamu wakaka, Yezu ka bamutambika kwe bantu ba makanda makaka ko, kâ kwe bimeme biazimbakana bia kanda dia Israele. (Mat. 15:24) Nzambi wazabikisa kwe bala ba Israele ti mbo kaketi vumbula bantu ba fwa. Kampe timpumbulu tiasoba, musamu  wo wa kazaba, mpe ntiana bu ta wa songela misamu mi katâ, wabanza ti Yehova mbo kaketi vumbula Yezu kwe ba fwa ngatu kayâla mu Timfumu tia Nzambi. Kampe timpumbulu tio tivuvu tieri nandi ti Nzambi mbo kaketi mu vumbula kwe ba fwa.

3. Kampe timpumbulu tiasoba mabanza ntia musamu kabakula Yezu bu kazonzela Paradi? Bangula. (Mbatukulu 2:15)

³ Bu keri Muyuda, kampe timpumbulu tiasoba mabanza Adame na Eva bawu kazaba, na Paradi Yehova yi kabatula. Buna, timpumbulu tio tiabakula ti Paradi yeri zonzelaka Yezu mbuka ya toma yena yibâ ha mutoto.—Tanga Mbatukulu 2:15.

4. Misamu mia tâ Yezu kwe timpumbulu nti mifweti tu tuma mu sa?

⁴ Misamu mia tâ Yezu kwe timpumbulu mifweti tu tuma mu dimbitila mu luzingu ku Paradi. Tulendi longoka misamu mitariri Paradi mu nzila ya luyâlu lwa mutinu Salomo. Tulendi bâ na tivuvu ti Yezu, yandi yôkele Salomo, mbo kasala tintwari na bantu ba kayâla na bo mu sa ti luzingu lwabâ lwa toma ha mutoto. (Mat. 12:42) Buna, “bimeme biakaka” bifweti dinga mu zaba ka nti bafweti sa mu bwa bweso bwa bâ ku Paradi.—Za 10:16.

5. Ntia mabanza mabâka naku mu luzingu ku Paradi?

⁵ Bu dimbitilaka mu luzingu ku Paradi, ngano nti banzaka? Kampe mbuka ya toma, ntiana nsaba ya Edene. (Mba. 2:7-9) Kampe mbikululu ye mu mukanda wa Mika ya bambukilaka, mbikululu yango mbo yitâka ti muna muntu mu kanda dia Nzambi mbo wuzakala “ku nsi’a muti’andi wa vinu mpe ku nsi’a muti’andi wa fige.” (Mika 4:3, 4, NWT) Lendi bambukila mpe verse zitâka ti mutoto mbo wufuluka mu bima bia dia. (Mik. 72:16; Iza. 65:21, 22) Buna, lendi timona ku mbuka ya toma, wa zakala ha meza yifulukiri mu bidia. Lendi banza nsunga ya toma ya miti na bifulu. Lendi banza mpe kanda diaku na ndiku zaku, mu kati na bantu bavumbukiri kwe ba fwa, bata yôkesa ntangu mpe bata seha tintwari. Ka yena ndozi ko. Ntembe kâni, misamu mio mbo miyilama ha mutoto. Kâ, luzingu ku Paradi mbo lubâ mpe na bisalu bia nsayi.

6. Ngano nti tusa ku Paradi? (Tala tifwani.)

⁶ Yehova watusala ngatu tamonaka nsayi ya tisalu tieto. (Ekl. 2:24) Mu ntangu ya luyâlu lwa mvula 1 000 lwa Kristo, mbo tubâ na bisalu bi tusala. Bantu bavuka ku mpasi ziyôkele, na milio za bantu bavumbuka kwe ba fwa, mbo babâ na nsatu binkuti, bidia na nzo. Diangana mu lungisa nsatu zo, tisalu tiatingi tusala tia mbote! Ntiana kwa Adame na Eva baketi kipa mutoto, mbo tubâ na bweso bwa kipa mutoto mu sobesa wo mu Paradi. Banza’eti ka ntia mpila nsayi yibâ bu tulongesa milio za bantu bavumbuka kwe ba fwa  balembo tomo zaba Yehova na makani mandi, mpe na mu bakisa bisari bia kwikama biazinga ntete mbandu ya Yezu mu zaba misamu miamingi.

7. Ntia musamu tulendi bela na lukwikulu, mpe mu bungu dia nti?

⁷ Tulendi bâ na lukwikulu ti ku Paradi mbo tubâ mu tidzunu, bio biabiansoni bibâ neto nsatu mbo tubaka bio, mpe luzingu ka lubâ mu vwandi ko. Mu bungu dia nti? Mu bungu ti, mu nzila ya luyâlu lwa mutinu Salomo Yehova watusongela ka bwe luzingu lubâ mu ntangu ya luyâlu lwa Mwana’andi.

8. Ngano bwe misamu mie mu Mikunga 37:10, 11, 29 mia tsoneka Mutinu Davide, miayizi lungana? (Tala timoko tia “Biyuvu bia bitangi” tie mu kati mu.)

⁸ Mu ndwengosolo ya mpeve santu, mutinu Davide watsoneka ka bwe luzingu lwaketi bâ mu ntangu yaketi yâla mutinu wa kwikama we na ndwenga. (Tanga Mikunga 37:10, 11, 29.) Mbo tuvulu tangaka Mikunga 37:11 na bantu bu tuzonelaka Paradi yikwiza. Musamu wo wa delakana wena, mu bungu ti Yezu verse yo ya kazonzela mu tinzonzi tiandi tia ha zulu mongo, bu kâta ti mbo yaketi lungana mu bilumbu bikwiza. (Mat. 5:5) Kâ misamu mia Davide miasongela mpe ka bwe luzingu lwaketi bâ mu ntangu ya mutinu Salomo. Salomo bu keri yâlaka ku Israele, kanda dia Nzambi mu tidzunu dieri, mpe mu timvwama dieri ku nsi ya ‘fuluka mu mabeni (lait) na mafuta ma niosi.’ Nzambi watâ ti: ‘Lwamana landa misiku miani [. . .], mbo nitûla tidzunu ku nsi’eno, mbo luseka na kani tima tia nsisi.’ (Lev. 20:24; 26:3, 6) Makani mo malungana mu ntangu ya luyâlu lwa Salomo. (1 Nta. 22:9; 29:26-28) Mpe Yehova wakanisina ti bankwa-mbi mbo baketi fuka. (Mik. 37:10) Buna, misamu mie mu Mikunga 37:10, 11, 29 miatoko lungana mu ntama mpe mbo milungana mu bilumbu bita kwiza.

9. Mutinu wa ku Seba bwe katâ mu bungu dia luyâlu lwa mutinu Salomo?

⁹ Nsangu za tidzunu na za timvwama tieri na bala ba Israele mu ntangu ya luyâlu lwa Salomo zatula kwe mutinu wa ku Seba. Mutinu  wo wadiata titini tia tila mu kwiza ku Yerusaleme, ngatu ka wubândi musamu ntêla. (1 Mit. 10:1) Bu kamana taluzula timfumu tia Salomo, watâ ti: ‘Ka nakwikiri’â ko [. . .] kiese kwe bantu baku, kiese kwe bisari biaku bawu babâka na nge ntangu zazansoni, bawu bawâka ndwenga zaku!’ (1 Mit. 10:6-8) Kâ misamu mieri mu luyâlu lwa Salomo tifwani kwa tieri tia misamu mi yirika Yehova mu bungu dia bantu mu ntangu ya luyâlu lwa Mwana’andi, Yezu.

10. Mu ntia mpila Yezu kayôkele Salomo?

¹⁰ Yezu yôkele Salomo mu miamiansoni. Salomo masumu meri nandi, mpe wasa fote za zinene zanatina kanda dia Nzambi mpasi. Kâ Yezu, Mfumu ya lunga yena, yilembo saka fote. (Like 1:32; Ebr. 4:14, 15) Yezu wabwabana na ntontolo za mpasi zatûka kwe Satana. Kristo wasongela ti kani kabwe ka lendi’â kayirika misamu ko mimwisa bantu bandi ba kwikama mpasi. Musamu wa nguria wa nsayi wena bu kena Mutinu’eto.

11. Banani babakisa Yezu mu yâla?

¹¹ Yezu na bantu 144 000 mbo basala tintwari mu kipa bantu na mu lungisa kani dia Yehova mu bungu dia mutoto. (Nza. 14:1-3) Mu bungu timpasi zazingi bamona bu beri ha mutoto, mbo babâ na lenda dia bakula misamu mieto mia mpasi. Ngano ntwarisi zo ntia tisalu basala?

12. Ntia tisalu Yehova kahana kwe bantu 144 000?

¹² Tisalu ti bahana kwe Yezu na kwe bantu bayâla nandi tiyôkele bunene na tisalu tieri na Salomo. Mutinu Salomo wafweti kipa milio za bantu beri bâka kwa ku nsi yimosi. Kâ, bô bayâla mu Timfumu tia Nzambi mbo bahana lubakusu mu kipa miliare za bantu mu nza yayansoni. Diangana, bweso bwa bunene Yahova kahanaka kwe bantu 144 000!

13. Bantu bayâla na Yezu ntia dema dia nzitukulu die nawu?

¹³ Ntiana Yezu, bantu 144 000 mbo babâ mitinu na Banganga-Nzambi. (Nza. 5:10) Mu ntangu ya Musiku wa Mose, ni Banganga-Nzambi batoko bâ na dema dia kengerela tikolela tia bantu, na dia ba bakisa mu bâ penepene na Yehova. Musiku wa Mose tifwani tieri tia misamu miaketi tula, buna wa delakana wena mu tâ ti bantu bayâla na Yezu mbo babakisa bantu mu bâ na tikolela tia mbote, na mu bâ na tindiku na Yehova. (Ebr. 10:1) Tufweti kêla mu zaba ka bwe mitinu mio mibâ mpe Banganga-Nzambi bazonzela na bantu babâ mu lutumu lwa Timfumu ha mutoto. Misamu ni misamu mi yirika Yehova, tulendi bâ na lukwikulu ti ku Paradi bantu mbo babaka malongi mabâ nawu nsatu.​—Nza. 21:3, 4.

14. Ntia tintwari tie ha kati dia “bimeme biakaka” na mpangi za Kristo?

¹⁴ Yezu wahana nkumbu ya “twila dia fioti” kwe bô bayâla nandi. (Like 12:32) Wazonzela mpe tikunku tiakaka, ti katâ “bimeme biakaka.” Bikunku bio bia bole twila dimosi kwa diena. (Za 10:16) Bikunku bio mbo bisalaka tintwari lumbu ti, mpe mbo bitatamana mu sala mu ntangu mutoto bu wukwe bê Paradi malembe-malembe. Bô bê mu “twila dia fioti” mbo bakwenda ku mazulu, mpe bô bê mu kati dia bimeme biakaka mbo babaka bweso bwa mona nsayi ya luzingu ha mutoto mankululu. Kâ misamu mie kô mifweti yirika bimeme biakaka mu bâ ku Paradi.

15. a) Ngano “bimeme biakaka” bwe biyikilaka mpangi za Kristo moko? b) Bwe tulendi landila tifwani tia mpangi ye mu magasin? (Tata tifwani.)

¹⁵ Timpumbulu tiasoba mabanza tiayizi fwa  ntete kabaka bweso bwa songela ti mbo keri tondaka misamu mia yirika Kristo mu bungu dia yandi. Kâ beto, “bimeme biakaka,” bweso bwe neto lumbu ti bwa songela ka bwe tubongelaka Yezu. Mu tifwani, mbo tusongelaka ti yandi tuzololo mu mpila yi tubongelaka Bakristo ba tumbu. Yezu watâ ti mbo kafundisa bimeme mu musamu wo. (Mat. 25:31-40) Tulendi yika mpangi za Kristo moko bu tubabakisa na luhemo mu tisalu tia samuna na tia kubika bisamuni. (Mat. 28:18-20) Ntiangu tuzoloko mu tomo sarila bisalulu bia ndongosolo bi batuhanaka ntiana buku dia Bâ mu nsayi ntangu zazansoni! Tala ti ka weka’eti baka muntu ko wulongoka na wo buku dio, lendi bâ na kani dia lomba kwe bantu babingi mu longoka naku Bibila.

16. Nti tulendi sa bwawu bu mu kubama mu zinga mu Timfumu tia Nzambi?

¹⁶ Ka twena na nsatu ko ya kêla ti takota ku Paradi mu kwizi bâ mpila ya bantu Yehova yi kazololo ti babêla kûna. Tulendi sarila ngolo bwawu bu mu bâ bantu bê na bunsungu mu nzonzolo na mu nsalulu, mpe bê na luzingu lwa delakana. Mpe tulendi bâ ba kwikama kwe Yehova, kwe muntu wu takwela na kwe mpangi zeto. Bu tutomo kwe sariri ngolo mu landa mitieno mia Yehova mu nza yi ya mbi, ka wubâ musamu wa mpasi ko kwe beto mu landa mitieno mio ku Paradi. Tulendi kurisa mpe lenda peleko bifu bisongela ti mbo tukubamaka mu zinga ku Paradi. Tala timoko tie na mutu-diambu: Ngano wa kubama wena mu “biarila mutoto?” tie mu kati mu.

17. Ngano tufweti bâka na lwaka mu bungu dia masumu meto ma ntama? Bangula.

¹⁷ Tufweti mpe sarila ngolo mu bika lwaka lulendi bâ neto mu bungu dia masumu ma manene ma tayirika mu ntama. Wa matieleka, ka tubongelaka nkûlulu ko ntiana mulemvo wutuhanaka nzila ya yirika masumu. (Ebr. 10:26-31) Kâ tufweti bâ na lukwikulu ti tala ti tulombele mulemvo mu bungu dia masumu ma manene ma tayirika, tala ti tayizi dinga lubakusu lu hanaka Yehova, mpe tala ti tasobele mabanza, Yehova watomo tu lemvokela. (Iza. 55:7; Bis. 3:19) Bambukileno misamu emi mia tâ Yezu kwe Bafarize: “Diangana ka ba sungama  ko nayizi tâ mbila, kâ bankwa-masumu.” (Mat. 9:13, NWT) Diangana ngolo za nkûlulu zilendi zibika masumu maku mamansoni.

18. Ntia musamu zololo wazonzela na timpumbulu tiafwa ha lweka lwa Yezu?

¹⁸ Ngano lendi banza ti na timpumbulu tiazonza na Yezu ta zonza ku Paradi? Ntembe kâni beno bole mbo luzonzela nsayi’eno mu bungu dia mukayulu wa Yezu. Lendi mu yula katomo ku têla mpila yayôkela misamu mu ntangu ya mansukina yayôkesa Yezu ha mutoto mpe ka bwe kamona mu ntangu Yezu kamuhanina mvutu. Ku lweka lwakaka, lendi ku yula ka bwe bantu beri bêlaka mu bilumbu bia mansukina bia nza ya Satana. Diangana, mbo wubâ musamu wa mbote mu longoka Zu dia Nzambi na bantu ba mpila yo!​—Efz. 4:22-24.

19. Mu bungu dia nti tulendi têla ti luzingu ku Paradi mbo lubâ lwa nsayi ko? (Tala tifwani ha tinima tia ntete.)

¹⁹ Luzingu ku Paradi ka lubâ lwa tiari ko. Ntangu zazansoni mbo tubwabana na bantu batutâ nsayi, mpe mbo tusala tisalu tia mbote. Musamu wuyôkele mfunu, bilumbu biabiansoni mbo tulongoka mu tomo zaba Tata’eto dia ku mazulu na mu yangalala mu bima bi katuhana. Ka tukondo’â mu longoka misamu mu Yandi, mpe misamu miamingi tulongoka mu bima bi kasala. Bu tutomo zinga ntangu yayingi, luzolo lweto mu Yehova mbo lukwizi tomo kula. Diangana, mbo tutomo tondaka Yehova na Yezu mu kani di batuhana dia zinga mankululu ku Paradi!