Yehova bu katâ ti fuluseno mutoto mpe yâleno wo, mbo keri songela ti mutoto wa mukaka mbo wukwizi bâ Paradi. (Mba. 1:28) Bô bazinga mankululu bafweti mpe tumamana ntumunu yo. Ku mbatukulu, mutoto ka wubâ Paradi ko mu bungu ti nsaba ya Edene ka yasâla kô ko. Ha manima ma Armagedo, mbo tubâ na tisalu tiatingi mu tsemesa mbuka zakaka za ha mutoto zi babebesa. Diangana tisalu tiatingi tifwanakana!

Misamu mio mbo mitubambulaka tisalu tia fweti sala bala ba Israele bu batûka ku Babilone. Ka kweri’â muntu ko weri bêlaka ku hata diawu tûka mvula 70. Kâ Izaya wabikula ti na lusakumunu lwa Yehova mbo baketi lenda mu tomesa hata diawu. Mbikululu mbo yeri tâka ti: ‘Mbo katitula sese ntiana Edene, mboko mukutu’andi (plaine) ntiana nsaba ya Yehova.’ (Iza. 51:3) Bala ba Israele balenda. Mpila mosi mpe, na lusakumunu lwa Yehova bô babiarila mutoto mbo balenda  mu yâla wo, peleko mu sa ti wabâ Paradi. Mpe lumbu ti lendi songela ti zololo wasala tisalu tio.

Mpila mosi yi lendi bwa sila ni mu saka miamiansoni mi lenda mu lunda nzo’aku ya bâka ya tsema, mpe ya kutama. Lendi bwa sa ni bu sa ti bantu ba tizunga tiaku ka basarilaka bunkete ko. Lendi hana mpe lubakusu mu sa bunkete na tomesa Nzo zeto za Nsambululu. Tala ti lenda die naku, lendi fulusa formilere ngatu wahana lubakusu ku tizunga tiaku mu ntangu ya katastrofe. Buna mbo songela ti wa kubama wena mu bakisa mu ntangu yi dinganaka lubakusu. Tiyula: ‘Ngano ndendi longoka bisalu bilendi bâ salu tala ti mbakiri bweso bwa kota ku Paradi?’

Bu kamana vumbula mwana wa mukento wa Zayire, Yezu watâ ti bafweti hana mwana wo tima tia dia. (Mak. 5:42, 43) Kampe ka weri’â musamu wa mpasi ko mu kipa mwana wo weri na mvula 12. Kâ banzeno misamu mifwanakana mu ntangu Yezu yi kalungisa kani diandi ditâka ti: ‘Bantu [babansoni] bê mu mpiema za mbambukulu mbo bawâ zu diandi mpe mbo baduka.’ (Za 5:28, 29) Ni bu sa ti Bibila ka ditomo’â wa zonzelaka ko, tulendi banza ti bantu bavumbuka kwe ba fwa mbo babâ na nsatu lubakusu lweto mu baka bidia, nzo ya bêla na binkuti. Ngano lumbu ti lendi songela ti wa kubama wena mu bakisa? Misamu mie kô mi lendi yirika.

Bu bahanaka nsangu ti munkengi wa tizunga wukwizi tala timvuka tiaku, lendi bonga nzengolo ya mu tikisa ku nzo’aku mu dia tima tintwari. Mu ntangu yi batambikaka mipasuri-nzila mia minene batoko bâ Babetelite mu timvuka tiaku, peleko mu ntangu munkengi wa tizunga wumanisaka tisalu tiandi tia kwe tari bimvuka, ngano lendi ba bakisa mu baka nzo? Tala ti lukutakanu lwa bilumbu bitatu peleko lwa spesiale lukwizi yôka mu tizunga tiaku, ngano lendi tihana mu sala ntete lwabatika peleko ha manima ma lukutakanu lo? Peleko, lendi tula mu ntangu ya fwanakana ngatu wabwana mpangi zi batambikiri?

Ntiana bu tâka wo Bisalu 24:15, mbo tukêlaka ti miliare za bantu zavumbuka kwe ba fwa. Babingi mu bantu bo balembo bâka bweso bwa zaba Yehova ntete bafwa. Mbo bakwizi baka bweso bo ha manima ma mvubukulu’awu kwe ba fwa. a Bisari bia Nzambi bizebi tisalu mbo bibakisa mu longesa bantu bo na kwikama kwakwansoni. (Iza. 11:9) Charlotte, wasamuna ku Europe, ku Amérique du Sud na ku Afrique, mbo kakêlaka ntangu yo na timina. Na nsayi yayansoni têle ti: “Timina die nani mu longesa bantu bavumbuka kwe ba fwa. Bu nitangaka tinsamu tia muntu wazinga mu ntama, mbo nikwizi banzaka ti: ‘Tala ti muntu wû wazaba Yehova, kampe luzingu lwandi ka lwaketi’â bâ bo ko.’ Timina die nani mu zonzela Yehova kwe bantu bavumbuka kwe ba fwa na mu ba têla ti luzingu lwawu mbo lubâ lwa toma bamana mu sarila.”

Bisari bia kwikama bia Yehova, mpe biazinga ntete Yezu kizi ha mutoto mbo bilongoka misamu miamingi. Banza nsayi na bweso bubâ neto bu tubangurila Daniele ndungananu ya mbikululu zi katsoneka, kâ zi kalembo bakula. Peleko bu tubakisa Rite na Noami mu longoka ka bwe kanda diawu diayizi kotela mu makanda manata ku Masiya. Diangana ntia nsayi yibâ neto mu yika moko tisalu tio tia ndongosolo tia nza ya mukaka, mpe ka kubâ tima ko titukabakasa ntiana mu nza yi ya mbi!

Ngano lumbu ti bwe lendi songela ti zololo wakubama mu bungu dia tisalu tia longesa bantu bavumbuka kwe ba fwa? Mpila mosi yi lendi bwa sila ni mu sarila ngolo mu tomesa mpila’aku ya longesa na mu vulu salaka tisalu tia samuna lumbu ti. (Mat. 24:14) Ni bu sa ti kulendi’â watomo samuna buna bu zololo ko mu bungu dia mvula zaku peleko mu bungu dia musamu wakaka, lendi songela ti zololo walongesa bantu bavumbuka kwe ba fwa bu sa miamiansoni mi lenda mu tisalu tia samuna lumbu ti.

Diangana biyuvu bia mfunu ni ebi: Ngano timina die naku mu biarila mutoto? Ngano timina die naku dia sala ngatu mutoto wabâ Paradi, mu bwana bantu bavumbuka kwe ba fwa na mu balongesa? Lendi songela ti wa kubama wena mu bâ ku Paradi lumbu ti bu sala bisalu bidelakane na bio bi sala bu biarila mutoto!