Tilumbu timosi, mpangi yimosi ya yikento ku Nouvelle-Zélande yatala video « Soucions-nous les uns des autres, » yizonzelaka ka bwe Yehova kamwinaka tiari tia mutima kâ mpe kasongelaka tio. (Iza. 63:​7-9) Wabonga nzengolo ya sarila misamu mi kalongoka mu hana lubakusu lwa fwanana. Ha manima mu tilumbu tio kwa, bu kaye sumba bima bia yandi beni, wamona mukento wumosi weri sekelaka ku mbazi, mpe wamutêla ti weri nandi kamusumbila tima tia dia. Mukento wo watambula. Mpangi ya yikento bu kakâla na bidia, wamusamunina bu kasarila trakte yitêle Ngâno lumbu tsieko mpasi mbo zi wa’ê?

Mukento wo ka lenda ko mu kanga mansangaza. Banguri ti bibuti biandi bieri Mbangi za Yehova biamulongesa matieleka, kâ ka simbirila mo ko. Kâ, ka ntama ko, wayizi sambila Yehova mu mu bakisa ngatu kamukârila. Mpangi yo wahana mukento wo Bibila, mpe bayirika programe ya ndongokolo ya Bibila. a

Tulendi landa tiari tia mutima tie na Yehova kwe bantu, mu kati na bantu ba kanda dieto mpe na mpangi zeto za mu timvuka. Mpe tulendi songela tiari tia mutima bu tudinga mpila za samunina bantu bakaka.