1-2. a) Bwe tulendi mona ku mutima bu tumbitila mu luzingu na tisalu tia sala Yezu? b) Nti tuzonzela mu timoko ti?

 BU TUFWILULUKU muntu wu tuzololo, mbo tumonaka ti bulu dia dinene kasisiri mu mutima’eto! Ha mbatukulu, tulendi bâ mu tiari bu tubanza bilumbu bia mansukina ntete kafwa, nsungula tala ti mpasi katokolo mona ntete kafwa. Kâ, ntangu bu yikwe yôke, tulendi bâ mu nsayi bu tubambukila tima ti katulongesa peleko musamu wu katâ mu tu tindisa peleko mu tu tâ nsayi.

² Mpila mosi mpe, tulendi bâ mu tiari bu tutangaka mpasi za mona Yezu ntete lufwa lwandi. Mu ntangu ya Mbambukulu, mbo tuvulu bongaka ntangu mu dimbitila mu mfunu ya mukayulu wa nkûlulu. (1 Kor. 11:24, 25) Kâ, mbo tubâka na nsayi yayingi bu tudimbitilaka mu misamu mia tâ Yezu na mi kayirika bu keri ha mutoto. Mbo tuzoloko mpe mu dimbitila mu mio mi kayirikaka lumbu ti, na mu mio mi kayirika mu bilumbu bita kwiza. Dimbitila mu misamu mio na mu luzolo lwa Yezu, mbo kututuma mu songela ti mbo tutondaka, ntiana bu tumona wo mu timoko ti.

3. Ntia misamu misaka ti tatonda mu bungu dia nkûlulu?

³ Mbo tutondaka bu tudimbitilaka mu luzingu lwa Yezu na mu lufwa lwandi. Ntangu yayansoni yi kasala tisalu tiandi ha mutoto, Yezu walongesa tusakumunu tu nata Timfumu tia Nzambi. Mbo tutomo zoloko matieleka mô ma Timfumu.  Mbo tutondaka mu bungu dia nkûlulu mu bungu ti mbo yituhanaka bweso bwa bâ na tindiku tia ngolo na Yehova mpe na Yezu. Bô basarilaka timinu mu Yezu, tivuvu tie nawu tia zinga mankululu na tia vutu mona bantu ba bazolo bafwa. (Za 5:28, 29; Rom. 6:23) Ka tayirika musamu ko mu baka tusakumunu tô; kani kabwe ka tulendi’â tafuta Nzambi na Kristo ko mu mio mi bayirika mu beto. (Rom. 5:8, 20, 21) Kâ, tulendi songela ti mbo tutomo ba tondaka. Mu bwe?

4. Bwe Mariya dia ku Magdala kasongela ti watonda mu bungu dia misamu mia yirika Yezu mu yandi? (Tala tifwani.)

⁴ Tabongeno tifwani tia mukento wumosi wa Muyuda weri na nkumbu ya Mariya dia ku Magdala. Mpasi zazingi zeri nandi mu bungu ti demo za 7 zeri mu potesaka mpasi. Kampe wayizi mona ti ka kweri’â muntu ko waketi mu bakisa. Buna, banza’eti ka bwe kayizi tondela Yezu bu kamukûla mu lutumu lwa bademo bo! Tifu tiandi tia tonda tiamutuma mu bâ mulongoki wa Yezu, na mu sarila ntangu’andi, ngolo zandi, mpe na bimvwama biandi mu yika moko mu tisalu tia Yezu. (Like 8:1-3) Ni bu sa ti Mariya watomo tonda mu mio mia yirika Yezu mu bungu dia yandi, kampe keri’â tomo bakulaka ko misamu mia minene mia keti yirika Yezu mu bungu dia yandi ku matu. Mbo kaketi hana luzingu lwandi mu bungu dia bantu, ngatu bô basarilaka timinu mu yandi bamona nienze ya luzingu lwa mankululu. (Za 3:16) Kâ, Mariya wasongela ti watonda Yezu, bu kabâ wa kwikama. Mu ntangu Yezu yi keri monaka mpasi ha poto dia matimuna, Mariya ha ndeko keri mu bungu ti Yezu keri belokelaka lwaka, mpe wazolo mu tindisa bantu bakaka beri hô. (Za 19:25) Ha manima ma lufwa lwa Yezu, Mariya na bakento bole bakaka, banata bima bi baketi yebesa Yezu mu mpiema’andi. (Mak. 16:1, 2) Kwikama kwa Mariya batomo kwa senda. Nsayi yeri nandi bu kabwabana na Yezu ha manima ma mvumbukulu’andi kwe  ba fwa, na bu kazonza nandi—diangana milongoki miamingi mialembo baka bweso bo.—Za 20:11-18.

5. Bwe tulendi songela ti mbo tutondaka mu miamiansoni mia yirika Yehova na Yezu mu beto?

⁵ Beto mpe tulendi songela ti mbo tutondaka mu miamiansoni mia yirika Yehova na Yezu mu beto bu tusarila ntangu’eto, ngolo zeto na mbongo zeto mu yika moko tisalu tia Timfumu. Mu tifwani, tulendi hana lubakusu mu tisalu tia ntungulu na tia sa bunkete ku Nzo za Nsambululu.

6. Mu bungu dia nti tulendi têla ti nkûlulu kabu diena di bahana kwe muna muntu?

⁶ Bu tubakulaka luzolo lwa Yehova na Yezu mu bungu dia beto, beto mpe mbo tukwizi ba zoloko. (1 Za 4:10, 19) Luzolo lo mbo lukwizi yikamaka ngolo, bu tubakulaka ti Yezu wafwa mu bungu dia muna muntu mu beto. Ntumwa Paulo wabakula musamu wo, mpe watonda bu katsoneka kwe Bisi-Ngalate ti: “Mwana Nzambi [. . .] wakunzolo mpe watihana yandi beni mu bungu dia meno.” (Nga. 2:20, NWT) Mu nzila ya nkûlulu, Yehova wakubenda kwe Yandi ngatu wabâ ndiku’andi. (Za 6:44) Ngano musamu wo ka wukuyangirikaka ko bu zebi ti Yehova wamona tima tia mbote mu nge, mpe wafuta ntalu yiyôkele ngatu wabâ ndiku’andi? Ngano musamu wo ka wuyikaka luzolo lwaku ngolo ko mu Yehova na mu Yezu? Musamu wa mbote wena mu tiyulaka tiyuvu eti: ‘Ngano luzolo lo nti lukuntumaka mu sa?’

7. Ntiana bu ta wa songela tifwani, bwe beto bansoni tulendi songela luzolo lweto mu Yehova na mu Yezu? (2 Bisi-Korente 5:14, 15; 6:1, 2)

⁷ Luzolo lweto mu Nzambi na mu Kristo mbo lututumaka mu songela luzolo mu bampwana’eto. (Tanga 2 Bisi-Korente 5:14, 15; 6:1, 2.) Mpila yimosi yi tusongelaka luzolo,  ni mu ntangu yi tusamunaka na luhemo lwalwansoni. Mbo tuzonzaka kwe bantu babansoni ba tubwabanaka na bo. Ka tusolaka bantu ko mu bungu dia mukanda nitu’awu, zu diawu, bimvwama biawu peleko lukolo lu basa. Mu mpila yo, mbo tusalaka tintwari na kani dia Nzambi ‘zololo ti bantu babansoni bavuka, batula mpe ha luzabu lwa butieleka.’—1 Tim. 2:4.

8. Bwe tulendi songela luzolo mu mpangi zeto?

⁸ Tulendi songela mpe luzolo lweto mu Nzambi na mu Kristo bu tusongela luzolo lweto mu mpangi zeto. (1 Za 4:21) Mbo tusongelaka ti bawu tubelokelaka lwaka bu tubayikaka moko mu ntangu ya mpasi. Mbo tubatindisaka bu bafwiluluku muntu wu bazololo, mbo tukwe ba talaka bu bâka na timbevo, mpe bu tusarilaka ngolo mu ba tindisa bu bâka ba nôka. (2 Kor. 1:3-7; 1 Tes. 5:11, 14) Mbo tutatamanaka mu ba sambirila bu tubambukaka ti ‘lusambulu lwa muntu wa sungama nguria ngolo lwena.’—Zaki 5:16.

9. Ngano mpila yakaka yi tulendi songela luzolo mu bampwana’eto ni ye?

⁹ Mbo tusongelaka mpe luzolo mu mpangi zeto bu tusarilaka ngolo mu lunda tidzunu ha kati dieto. Mbo tusarilaka ngolo mu landa tifwani tia Yehova mu tifu tia lemvokela. Tala ti Yehova wa kubama weri mu bika Mwana’andi wafwa mu bungu dia beto, ngano ka tufweti’â tabâka na manzangu ko ma lemveloka mpangi zeto bu batuyirikaka musamu wa mbi? Ka tuzololo’â ko tabâ ntiana ngamba ya mbi ya tifwani tia Yezu. Ni bu sa ti mfumu’andi yamuyamburila mfuka ya yinene yeri nandi, ngamba yo ka yalenda ko mu yamburila mpwana’andi ngamba yeri mu defaka mbongo za fioti. (Mat. 18:23-35) Tala ti na muntu wamingane mu timvuka, ngano lendi bâ muntu wa ntete mu kwe sa tidzunu ntete wenda ku Mbambukulu? (Mat. 5:23, 24) Musamu wo mbo wusongela luzolo lwaku mu Yehova na mu Yezu.

10-11. Bwe bakuluntu balendi songela luzolo mu Yehova na Yezu? (1 Piere 5:1, 2)

¹⁰ Bwe bakuluntu balendi songela luzolo lwawu mu Yehova na Yezu? Mpila ya mfunu yi balendi lwa songela ni mu kipa bimeme bia Yezu. (Tanga 1 Piere 5:1, 2.) Musamu ni wo Yezu katâ kwe ntumwa Piere. Bu kamana kala Yezu nkumbu tatu, kampe Piere watomo nionga bu kalembo songela luzolo lwandi mu Yezu. Ha manima ma mvumbukulu’andi, Yezu wayula tiyuvu eti kwe Piere: ‘Simo mwana Za, ngano me zololo?’ Tulendi bâ na lukwikulu ti Piere mbo kaketi yirika musamu ni musamu mu songela luzolo lwandi mu Mfumu’andi. Yezu watâ kwe Piere ti: ‘Dikila bimeme biani.’ (Za 21:15-17) Ha manima, Piere watomo kipa bimeme bia Mfumu, mu songela luzolo lweri nandi mu Yezu.

¹¹ Bakuluntu, mu ntangu ya Mbambukulu, bwe lulendi songela ti misamu mia tâ Yezu kwe Piere, mfunu miena kwe beno, mpe ka luzimbakanaka mio ko? Lulendi songela luzolo lweno mu Yehova na Yezu bu lutomo tihana mu tisalu tia tindisaka bampangi, na bu lusarila ngolo zazingi mu bakisa mpangi za kota tiozi mu kâla kwe Yehova. (Ezk. 34:11, 12) Lulendi mpe songela luzolo kwe milongoki mia Bibila na kwe bantu ba môna bakwizaka ku Mbambukulu, bu lusa miamiansoni mi lulenda ngatu bantu bo, balendi kwizi bâ milongoki mia Yezu, ka batimonandi banzenza.

12. Mu bungu dia nti tifu tia dimbitila misamu mia tâ Yezu mu mpimpa ntete lufwa lwandi mituhaninaka butindi? (Za 16:32, 33)

¹² Mu mpimpa ntete kafwa, Yezu watâ kwe  milongoki miandi ti: “Mu nza mbo lubâ na nkwamusu, kâ bêno na butindi! Meno nanungini nza.” (Tanga Za 16:32, 33, NWT.) Nti biabakisa Yezu mu telamana mbeni zandi na butindi bwabwansoni na mu tatamana mu bâ wa kwikama tii ku lufwa? Yehova keri sikirilaka. Bu kazaba ti milongoki miandi mbo miaketi bwabana na ntontolo za mpila yo, Yezu walomba Yehova mu ba kengerela. (Za 17:11) Mu bungu dia nti musamu wo wutuhaninaka butindi? Mu bungu ti Yehova yôkele mbeni zeto zazansoni mu ngolo. (1 Za 4:4) Miamiansoni mia kamonaka. Lukwikulu lwe neto ti tala ti tusikiriri Yehova, tulendi telamana bunkuta bweto, mpe tulendi bâ na butindi.

13. Bwe Yozefe dia ku Arimate kasongela butindi?

¹³ Tabongeno tifwani tia Yozefe dia ku Arimate. Bayuda yandi beri tomo zitisaka. Na Sanedre keri salaka, yeri nzo ya mfundusu ya yinene ya Bayuda. Kâ, mu ntangu ya tisalu tia Yezu, Yozefe keri’â na butindi ko. Za watâ ti ‘weri mpe mulongoki wa Yezu, kâ mu mansweki mu bungu dia lwaka lwa Bayuda.’ (Za 19:38) Ni bu sa ti Yozefe nsangu za Timfumu za keri zoloko, keri’â zabikisaka kwe bantu ko ti timinu tieri nandi mu Yezu. Kampe bunkuta bweri nandi ti bantu ka bavutuandi mu zitisa mu bungu dia nkumbu yeri nandi. Kâ Bibila mbo ditâka ti ha manima ma lufwa lwa Yezu, Yozefe wayizi ‘sarila butindi, waye monekena Pilate mu mu lomba nitu ya Yezu.’ (Mak. 15:42, 43) Yozefe ka yizi’â vutu swekela bantu ko ti mulongoki wa Yezu weri.

14. Nti fweti sa tala ti bunkuta bwa bantu bwe naku?

¹⁴ Ngano nge mpe bunkuta bwe naku ntiana bwa Yozefe? Ngano ku lukolo peleko ku tisalu nsoni monaka mu zabikisa kwe bantu ti nge Mbangi ya Yehova yena? Ngano mbo tînaka mu bonga nzengolo ya bâ tisamuni peleko ya batusu mu bungu ti lwaka lwe naku mu misamu mi banza bantu mu nge? Kubikandi mbanzulu za mpila yo zakukabakasa mu yirika misamu mi zebi ti mia mbote miena. Sambila Yehova na bunsungu bwabwansoni. Mu lomba kakuhana butindi bwa sarila luzolo lwandi. Bu mona mvutu za Yehova mu tusambulu twaku, mbo kwizi tomo bâ na ngolo mpe na butindi bwabwingi.—Iza. 41:10, 13.

15. Nti nsayi yatuma milongoki mia Yezu mu sa bu kamana ba monekena? (Like 24:52, 53)

¹⁵ Milongoki tiari tiatingi tieri nawu Yezu bu kafwa. Yêla mu bâ ha tibuka tiawu. Ka bahombesa kwa muntu wu bazolo ko, kâ mbo  beri monaka mpe ti ka kwa vutu’â sâla tivuvu ko mu bungu dia bawu. (Like 24:17-21) Kâ, Yezu bu kayizi ba monekena, wabonga ntangu ya ba bakisa mu bakula ka bwe keri lungisilaka mbikululu za Bibila. Wabahana mpe tisalu tia mfunu. (Like 24:26, 27, 45-48) Ha manima ma bilumbu 40, Yezu bu kamana naka ku mazulu, milongoki ka miavutu’â bâ mu tiari ko, kâ bayizi bâ na nsayi yayingi. Nsayi yayingi yeri nawu bu bazaba ti Mfumu’awu wa moyo weri, mpe wa kubama weri mu ba bakisa mu sala tisalu tiawu tia môna. Nsayi’awu yabatuma mu tatamana mu kembela Yehova.—Tanga Like 24:52, 53; Bis. 5:42.

16. Bwe tulendi landila tifwani tia milongoki mia Yezu?

¹⁶ Bwe tulendi landila tifwani tia milongoki mia Yezu? Tulendi bâ mu nsayi bu tusarilaka Yehova mu Mbambukulu, kâ mpe muvu wawansoni. Wuzololo tâ tufweti tûlaka Timfumu tia Nzambi ha tibuka tia ntete mu luzingu lweto. Mu tifwani, babingi bayizi delakasa programe’awu ya tisalu ngatu babâ na ntangu ya samuna, ya bâ ku tukutakanu na ya saka nsambululu ya kanda. Bantu bakaka babonga nzengolo ya lembo dinga bimvwama bi banzaka bantu bakaka ti mfunu biena, ngatu babâ na lenda dia tomo bakisa timvuka peleko dia sala ku tizunga tie na nsatu bisamuni biabingi. Ni bu sa ti tifu tia korela tie neto nsatu mu tatamana mu sarila Yehova, tu kanisini ti mbo katusakumuna tala ti tutûriri Timfumu tiandi ha tibuka tia ntete mu luzingu lweto.—Bin. 10:22; Mat. 6:32, 33.

17. Ntia nzengolo bongele mu ntangu yi ya Mbambukulu? (Tala tifwani.)

¹⁷ Timina die neto mu kembela Mbambukulu mu tilumbu tia mardi 4 avril. Kâ, kukêlandi kwa tilumbu tio mu dimbitila mu luzingu na lufwa lwa Yezu, mpe na mu luzolo lu batusongela yandi na Yehova. Sarila bweso bwabwansoni bu moneka mu ntangu ya Mbambukulu mu sila bo. Mu tifwani, bonga ntangu ya tanga na ya dimbitila mu misamu mie mu Appendice B12 ye na mutu-diambu “La dernière semaine de Jésus sur la terre” mu La Bible. Traduction du monde nouveau. Bu kwe siri bo, dinga verse za Bibila ziyika ngolo tifu tiaku tia tonda, luzolo lwaku, butindi bwaku na nsayi’aku. Ha manima, dinga mpila zi songela ti mbo tomo tondaka. Bâ na lukwikulu ti Yezu mbo katomo zolo miamiansoni mi sa mu mu bambukila moyo mu ntangu ya Mbambukulu.—Nza. 2:19.