1-2. Mu bungu dia nti tubêlaka ku Mbambukulu mivu miamiansoni?

 NTAMANA mvula 2 000, tûka Yezu ti kahanina luzingu lwandi mu bungu dia beto, mpe watuhana bweso bwa baka luzingu lwa mankululu. Mpimpa ntete lufwa lwandi, Yezu watâ kwe milongoki miandi ti babambukila moyo mukayulu wa luzolo wu kasa mu nzila ya malaki ma mpamba bu baketi sarila dimpa na vinu.—1 Kor. 11:23-26.

² Mbo tutumamanaka ntumunu ya Yezu mu bungu ti yandi tutomono zololo. (Za 14:15) Mivu miamiansoni mu ntangu ya Mbambukulu, mbo tusongelaka ti mbo tutondaka mu misamu mi kayirika bu tubongaka ntangu ya dimbitila mu mfunu ya lufwa lo na ya sambila. Mbo tuzoloko mpe mu kurisa tisalu tieto tia samuna ngatu tatikisa bantu babingi ku Mbambukulu. Mpe, wa matieleka, mbo tusaka miamiansoni ngatu ka kubândi tima titukabakasa mu bâ ku Mbambukulu.

3. Nti tuzonzela mu timoko ti?

³ Mu timoko ti, mbo tuzonzela ka bwe kanda dia Nzambi diasarila ngolo mu mpila ezi za zitatu zita landa ngatu bakembela Mbambukulu ya lufwa lwa Yezu: 1) bu bakembelaka Mbambukulu mu mpila ya longesa Yezu, 2) bu batikisaka bantu bakaka ku Mbambukulu, na 3) bu bakembelaka Mbambukulu ntono misamu mia mpasi.

4. Ntia matieleka bazonzelaka ku Mbambukulu mivu miamiansoni, mpe mu bungu dia nti matieleka mo mafweti bâ mfunu kwe beto? (Like 22:19, 20)

⁴ Mivu miamiansoni, ku Mbambukulu, mbo tuwâka tinzonzi tisikamanaka mu Bibila tihanaka mvutu za delakana mu biyuvu  biakaka. Mbo tukwizi longokaka ka mu bungu dia nti nza ye na nsatu nkûlulu mpe ka bwe lufwa lwa muntu mosi lulendi katula masumu ma bantu babingi. Mbo batubambulaka nsasa ya dimpa na vinu, mpe ka nani fweti bia dia. (Tanga Like 22:19, 20.) Mbo tudimbitilaka mpe mu tusakumunu tuta kêla bô bê na tivuvu tia bâ ha mutoto. (Iza. 35:5, 6; 65:17, 21-23) Diangana matieleka mo mafweti tatamana mu bâ mfunu kwe beto. Bantu babingi balembo ma bakulaka, mpe ka babakulaka ko ka bwe mukayulu wa Yezu we mfunu. Ka bakembelaka Mbambukulu ko mu mpila ya longesa Yezu. Mu bungu dia nti?

5. Ha manima ma lufwa lwa bantumwa babîngi, ngano bantu bwe bayizi batikila mu kembela lufwa lwa Yezu?

⁵ Ntangu fioti ha manima ma lufwa lwa ntumwa za Yezu, Bakristo ba bungungu bayizi kota mu timvuka. (Mat. 13:24-27, 37-39) Bayizi tâ misamu mia bungungu mu benda milongoki kwe bawu. (Bis. 20:29, 30) Musamu wumosi wa bungungu wu babatika mu longesa ni wena’eti, Yezu ka fweti’â hana nitu’andi mbala mosi ko mu bungu dia masumu meto ntiana bu tâka wo Bibila, kâ wafweti hana mukayulu’andi mbala zazingi. (Ebr. 9:27, 28) Lumbu ti bantu babingi ba nsungu bakwikilaka bungungu bo. Mbo bavulu vukanaka mu eglize—ntangu zakaka bilumbu biabiansoni—mu kembela malaki ma batâka “Mukayulu wa mese.” b Mabundu makaka ka mavulu’â kembelaka lufwa lwa Yezu ko, mpe ka matomo’â bakulaka nsasa ya mukayulu’andi ko. Bakaka balendi tiyula: ‘Ngano lufwa lwa Yezu mbo luzolo tâka ti masumu mani balendi ma lemvokela?’ Mu bungu dia nti bayurilaka tiyuvu tio? Ntangu zakaka mu bungu ti bayizi ba sobesa kwe bantu basaka ntembe ti mukayulu wa Yezu ka wulendi’â wahana nzila mu mulemvo wa masumu ko. Ngano milongoki mia Yezu mia matieleka bwe mibakisilaka bantu mu bakula musamu wo?

6. Mu 1872, tikunku tia Milongoki mia Bibila ntia musamu bayizi bakula?

⁶ Ku nsuka ya mbandu ya 19, tikunku tia Milongoki mia Bibila, tieri na ntwarisi yeri na nkumbu Charles Taze Russell, tiabatika ndongokolo ya Bibila na bunsungu bwabwansoni. Weri nawu bazaba mfunu ya mukayulu wa Yezu na mu zaba mpila yi bafweti kembela lufwa lwandi. Mu 1872, na lubakusu lwa Bibila, bayizi bakula ti Yezu wahana mukayulu mu bungu dia nza ya mukaka. Ka balunda misamu mi balongaka ko mu bungu dia bawu beni. Kâ, bayizi sarila mabuku, zurnale na magazine mu mwangasa nsangu zo. Ntangu ka yayingi’â ko ha manima, ntiana kwa Bakristo ba mu mbandu ya ntete, bayizi batika mu kutakana mbala mosi mu muvu mu kembela Mbambukulu.

7. Bwe tubakilaka ndandu mu ndongokolo ya bunsungu ya sa Milongoki mia Bibila mia ntete?

⁷ Lumbu ti, mbo tubakaka ndandu za ndongokolo ya bunsungu ya sa bantu bô mu ntama. Mu bwe? Yehova watubakisa mu bakula nsasa ya mukayulu wa Yezu na ndandu zi tubaka mu nzila ya mukayulu wo. (1 Za 2:1, 2) Tayizi longoka mpe ti Bibila bivuvu biole dizonzelaka mu bungu dia bantu bayangirikaka Nzambi—luzingu lwa kondo lufwa ku mazulu na luzingu lwa mankululu ha mutoto mu bungu dia milio za bantu. Mbo tutomo pusanaka kwe Yehova bu tubakulaka luzolo lwe nandi mu beto, mpe ka bwe tubakilaka ndandu za mukayulu wa Yezu mu luzingu  lweto. (1 Pi. 3:18; 1 Za 4:9) Buna, ntiana mpangi za kwikama za ntama, mbo tutikisaka bantu bakaka mu kwizi kembela Mbambukulu ya lufwa lwa Yezu na beto mu mpila ya sa longesa Yezu.

8. Ngano Yehova nti kasa ngatu batikisaka bantu bakaka ku Mbambukulu? (Tala tifwani.)

⁸ Tûka mivu miamingi, kanda dia Yehova mbo ditikisaka bantu ku Mbambukulu. Mu 1881, batikisa mpangi za ku États-Unis mu kutakanaka mu nzo ya mpangi zimosi ya ku Allegheny, ku Pennsylvanie, mu bungu dia malaki mô ma nzitukulu. Ha manima, muna timvuka mbo tieri saka Mbambukulu. Mu mars 1940, batêla bisamuni ti lenda dieri nawu dia tikisa bantu ba mu teritware’awu. Mu 1960, mu mbala ya ntete, Betele yatambika mikanda mia mbila kwe muna timvuka. Tûka ntangu yo, miliare za mikanda mio bakaba. Mu bungu dia nti tusarilaka ntangu’eto na ngolo zeto mu tikisa bantu bakaka?

9-10. Nani bakaka ndandu mu ngolo zi tusarilaka mu tikisa bantu ku Mbambukulu? (Za 3:16)

⁹ Musamu wumosi wusaka ti tatikisa bantu bakaka mu kembela Mbambukulu na beto, ni mu bungu ti tuzololo ti bantu ba tutikisaka mu mbala ya ntete, balongoka matieleka matariri misamu mia yirika Yehova na Yezu mu bungu dia beto. (Tanga Za 3:16.) Vuvu tie neto ti misamu mi bamona na mi bawâ ku Mbambukulu, mbo mibatuma mu longoka misamu miakaka na mu kwizi bâ bisari bia Yehova. Kâ bantu bakaka mpe babakaka ndandu.

¹⁰ Mbo tutikisaka mpe bantu babika mu sarila Yehova. Mbo tusilaka bo mu ba bambula  ti Nzambi bawu kwa kazololo. Babingi mu bawu bakwizaka ku Mbambukulu, mpe nsayi yibâka neto mu ba mona. Mbambukulu mbo yibabambulaka nsayi yeri nawu bu beri sarilaka Yehova mu ntama. Tazonzeleno tifwani tia Monica. c Bayizi mu karisa mu timvuka mu ntangu ya COVID-19. Bu kamana bâ ku Mbambukulu mu 2021, têle ti: “Mbambukulu yo nguria mfunu yena kwe meno. Mu mbala ya ntete tûka mvula 20 nayizi bâ na lenda dia samuna na dia tikisa bantu ku Mbambukulu. Nayizi tûla mutima’ani wa mukaka mu musamu wo mu bungu ti mbo nitomo tondaka mu misamu mia yirika Yehova na Yezu mu bungu dia meno.” (Mik. 103:1-4) Bantu ni batambula ni bakala mu kwiza, mbo tutatamanaka mu batikisa ku Mbambukulu mu bungu ti tuzebi ti Yehova ngolo zi tusarilaka za kazoloko.

11. Ngano Yehova bwe kasakumuna ngolo zeto za tikisaka bantu ku Mbambukulu? (Agaye 2:7)

¹¹ Yehova mbo katomo sakumuna ngolo zi tusarilaka mu tikisa bantu ku Mbambukulu. Mu 2021, ntono misiku mia neti COVID-19, tayizi tikisa bantu 21367603; lutangu lo luyôkele lutangu lwa mivu miakaka. Diangana lutangu lo luyôkele lutangu lwa Mbangi za Yehova mbala zole na ndambu! Wa matieleka, Yehova ka kipaka lutangu ko. Yandi bantu kakipaka. (Like 15:7; 1 Tim. 2:3, 4) Lukwikulu lwe neto ti Yehova mbo kasarilaka tisalu tieto tia tikisa bantu mu bakisa bantu ba nsungu.—Tanga Hagaye 2:7.

12. Nti bilendi sa ti wabâ musamu wa mpasi mu kembela Mbambukulu? (Tala tifwani.)

¹² Yezu wabikula ti mu bilumbu bia mansukina mbo tubwabana na mpasi za mpila na mpila. Balendi tu telamana mu kanda, tulendi bwabana na nkwamusu, mizingu, bimbevo na misamu miakaka. (Mat. 10:36; Mak. 13:9; Like 21:10, 11) Ntangu zakaka, misamu mio mbo misaka ti wabâ musamu wa mpasi mu kembela mukayulu wa lufwa lwa Yezu. Ngano mpangi zeto bwe zasa mu telamana misamu mio, mpe Yehova bwe kababakisila?

13. Ngano Yehova bwe kasakumunina butindi bwa sarila Artem mu kembela Mbambukulu ku boloko?

¹³ Boloko. Mpangi zeto ze mu maboloko mbo zisaka miamiansoni mi balendaka mu kembela lufwa lwa Yezu. Tazonzeleno tifwani tia Artem. Mu 2020, mu ntangu ya Mbambukulu, bamutûla mu boloko dieri na 17m² mpe mu kati bantu 5 beri mûna. Ni bu sa ti ku boloko keri, wakutakasa bima bi kaketi sarila ntiana bidimbu bia Mbambukulu mpe wakubama mu hana tinzonzi tia Mbambukulu mu bungu dia bawu beni. Kâ bantu beri boloko dimosi na yandi fumu beri nwaka mpe babatika mu tâ misamu mia mbi. Ngano nti kasa? Artem wabatêla tala ti lenda na dio, bayôkesa heure mosi yi baketi bika mu tâ misamu mia mbi na mu nwa fumu. Musamu wa nzitukulu kwe Artem, bayizi tambula mu bika mu nwa fumu na mu lembo tâ misamu mia mbi mu ntangu ya Mbambukulu. Artem têle ti: “Nayizi ba lomba nswa wa zonzela Mbambukulu.” Bayizi tâ ti ka beri’â zoloko ko babazonzela musamu wo. Kâ bu bamona mpila yeri kembelaka Artem Mbambukulu, mpe bu bawâ tinzonzi, bamuyula biyuvu biabingi.

14. Ngano kanda dia Yehova ntia ngolo diasariri mu kembela Mbambukulu ntono pandémie ya COVID-19?

¹⁴ Pandémie ya COVID-19. Mu bungu dia pandémie, kanda dia Yehova ka diakutakane’â ha mbuka zi batoko kutakanaka  komu Mbambukulu. Kâ musamu wo ka wabakabakase’â ko mu kembela Mbambukulu. d Bimvuka biabêle na lenda dia sarila internet biasiri Mbambukulu mu vidéoconférence. Ngano bantu balembolo bâ na internet bwe basiri? Mu mahata makaka, bayizi sa miamiansoni ngatu tinzonzi tia Mbambukulu tiayôka mu tele na mu radio. Filiale zayizi sa enregistrer tinzonzi tio mu mazu yôka 500 ngatu bantu bê mu mahata me mala bakembela Mbambukulu. Mpe bampangi bayizi sa miamiansoni ngatu bantu beri na nsatu enregistrement zo babaka zo.

15. Nti ta longoka mu tifwani tia mulongoki wa Bibila we na nkumbu Sue?

¹⁵ Nkwamusu za kanda. Kwe bantu bakaka, musamu wa mpasi wubâka mu kembela Mbambukulu mu ntangu kanda dibatelamanaka. Tabongeno tifwani tia mulongoki wa Bibila we na nkumbu Sue. Mu 2021, tilumbu ntete Mbambukulu, Sue watêla muntu weri mu longesaka Bibila ti ka keti’â bâ ku Mbambukulu  ko mu bungu ti bantu ba kanda beri mu telamanaka ku nzo. Mulongi’andi watanga Like 22:44. Ha manima wamubangurila ti bu tubwabanaka na misamu mia mpasi, tufweti landa tifwani tia Yezu bu tusila Yehova mutima mu lusambulu na bu tutûla lukwikulu lweto mu Yandi. Tilumbu tialanda, Sue wakubika dimpa na vinu mpe walanda nsambululu ya pari ya tilumbu tia Mbambukulu mu jw.org. Mpimpa yo, bu keri yandi kaka ku chambre’andi, walanda Mbambukulu mu telefone. Ha manima, Sue watsonekena mulongi’andi wa Bibila ti: “Mazono watomono kuntindisa. Nasiri miamiansoni mi nalendele mu kembela Mbambukulu, mpe Yehova wakumbakisi. Nsayi ye nani ka balendi’â babangula yo ko, mpe mbo nita tomo tonda!” Ngano benzi ti Yehova lendi ku bakisa wamana bwabana na musamu wa mpila yo?

16. Mu bungu dia nti twe na lukwikulu ti Yehova mbo kasakumuna ngolo zi tusarila mu bâ ku Mbambukulu? (Bisi-Rome 8:31, 32)

¹⁶ Yehova mbo katomo zoloko ngolo zi tusarilaka mu kembela Mbambukulu. Tulendi bâ na lukwikulu ti mbo katusakumuna bu tusongela luzolo mu mio mi kasa mu bungu dia beto. (Tanga Bisi-Rome 8:31, 32.) Buna, tabongeno nzengolo ya bâ ku Mbambukulu ya muvu wu mpe yasa miamiansoni mu kurisa tisalu tieto tia timpeve mu ntangu ya Mbambukulu.