Ngano wa wazaba?
Mu ntia mpila tipusu Musi-Etiopi keri mu ntangu Filipe yi kamulanda?
NTELO ya Greke yi babangula mu “char” mu Traduction du monde nouveau mbo yizolo zonzelaka tipusu tia mpila ni mpila. (Bis. 8:28, 29, 38) Kâ, kampe Musi-Etiopi mu tipusu tia nguria tia tinene keri, tiyôkele char yi beri nwaninaka mizingu peleko yi beri silaka nsaka za ntinu. Tataleno mwa misamu mineti mbanzulu zo.
Musi-Etiopi mfumu ya yinene yeri yasa nzietolo mu titini tia tila. Weri “muntu wa wunene weri sarilaka Kandase, mutinu wa ku Etiopi; ni yandi weri kipaka bimvwama biandi.” (Bis. 8:27, NWT) Mu Etiopi ya ntama mweri Soudan ya lumbu ti na mwa lweka lwa Egypte ya lumbu ti lwe nguria penepene na mubu wa Méditéranée. Ni bu sa ti kampe bakala dio ka sila nzietolo yayansoni mu kaminio yimosi ko, wafweti bâ na matsulu mu bungu dia nzietolo’andi. Mu bipusu bi beri sarilaka mu mbandu ya ntete M.B. mu bungu dia nzietolo, mweri na bipusu bieri bia kangama mpe bieri na mifumba miyà. Buku die na mutu-diambu Acts—An Exegetical Commentary ditêle: “Tipusu tia mpila yo mbo tieri hanaka bantu lenda dia nata bima biabingi, bantu mbo beri mwa silaka nzietolo mu mpila ya mbote, kampe mbo tieri ba hanaka mpe lenda dia sa nzietolo mu bitini bia bila.”
Musi-Etiopi tanga keri tangaka Filipe bu kayizi mu bakila. Tinsamu mbo titâka ti: “Filipe wayenda mu ntinu penepene na tipusu, ni kawâ Musi-Etiopi weri tangaka mukanda wa mbikuri Izaya mu zu dia ngolo.” (Bis. 8:30, NWT) Bipusu bi beri silaka nzietolo ka basala bio ko ngatu biendaka ntinu. Mwendo wo wa malembe wabakisa Musi-Etiopi mu tanga, kâ mpe wabakisa Filipe mu bakila tipusu ni bu sa ti mu malu keri.
Musi-Etiopi “walomba kwe Filipe mu naka na mu zakala na yandi.” (Bis. 8:31) Mu tipusu ti beri silaka nsaka za ntinu, bô beri tia nakaka ba telama beri bâka. Kâ, mu tipusu tia nzietolo, kampe tibuka tieri mô ngatu Musi-Etiopi na Filipe bazakala.
Tintwari na tinsamu ti batsoneka mu Bisalu 8 mu nzila ya mpeve santu na bidimbu bia bima bia ntama bie neto lumbu ti, mabuku meto mayizi monekesa Musi-Etiopi weri mu tipusu tia tinene kani kabâ kwa mu char ya muzingu peleko ya nsaka za ntinu.
