1-2. Ntia misamu mia mpasi bisari bia kwikama bia Yehova bilendi bwabana na mio?

 MISAMU mia mpasi milendi soba luzingu lweto mu ta-pulukusu. Mu tifwani, mpangi yimosi ya bakala ya kwikama, ye na nkumbu Luis a bayizi mu baka na kansere yimosi yilembolo tomo zabakana. Doktere wamutêla ti ngonda fioti kwa za sâla nandi mu zinga. Monika na bakala diandi bwabwingi beri salaka mu tisalu tia Yehova. Kâ lumbu timosi, Monika wayizi bakula ti bakala diandi, dieri mukuluntu, masumu keri sarilaka mu mansweki tûka ntama. Olivia, mpangi ya yikento ya mpumpa, wafweti sisa nzo’andi mu bungu dia titembo tia ngolo tieri kwizaka. Bu kakâla, wayizi mona nzo’andi yamwangana mu titembo. Mu ntangu fioti kwa, luzingu lwa bantu bo lwayizi tomo soba. Ngano lendi bakula misamu mi babwabana na mio? Ngano musamu wa mpasi wabwabane na wo wasobese luzingu lwaku mu ta-pulukusu?

² Ni bu sa ti bisari bia kwikama bia Yehova twena, mbo tubwabanaka na misamu mia mpasi mpe mbo tubakaka bimbevo, ntiana kwa bantu babansoni. Tulendi korela mpe nkwamusu peleko mfietokoso zitûkaka kwe bantu bayinaka kanda dia Nzambi. Ni bu sa ti Yehova ka kabakasaka misamu mio ko ngatu mialembo tu turila, mbo kakanisinaka ti mbo katubakisa. (Iza. 41:10) Na lubakusu lwandi, tulendi tatamana mu bâ mu nsayi, mu bonga nzengolo za mbote na mu tatamana mu bâ ba kwikama kwe Yandi ni bu sa ti bu tubâka mu mpasi za ngolo. Mu timoko ti, mbo tutaluzula mpila 4 Yehova zi katubakisilaka bu tubâka mu mpasi za ngolo. Mbo tutaluzula mpe ka nti tufweti sa mu baka lubakusu lu kahanaka.

 YEHOVA MBO KAKUKEBA

3. Bu tubwabanaka na musamu wa mpasi, nti bilendi bâ mpasi kwe beto mu sa?

³ Musamu wa mpasi. Bu tubwabanaka na musamu wa tiari, wulendi bâ musamu wa mpasi kwe beto mu bâ na mbanzulu za delakana na mu bonga nzengolo. Mu bungu dia nti? Mutima’eto wulendi mona mpasi zazingi. Tulendi bâ na lwaka lwa yôka. Tulendi mona ntiana beto tuzimbakane ku sangi, mpe ka tuta zaba nzila yi tukwenda ko. Tataleno ka bwe mpangi za zole za zikento zi tutokolo zonzela zamona ku mutima mu misamu miawu mia mpasi. Olivia têle: “Titembo tia ngolo bu tiamana mwangasa nzo’ani, nayizi bâ na mabanza yeko-yeko, mpe lwaka lwalwingi lweri nani.” Mu bungu dia bungungu bwa bakala diandi, Monika têle: “Ka ndieri’â kwa wa nionga ko. Nguria mpasi ndieri monaka zatomo kunôkesa ku kati. Ka ndieri’â vutu zabaka ko ka ntia mbelo yaketi bâ nani. Kani kabwe ka ndieri’â banzaka ko ti musamu wa mpila yo mbo waketi kunturila.” Bwe Yehova kakanisinaka ti mbo katubakisa bu tubâ na mabanza yeko-yeko?

4. Tintwari na Bisi-Filipe 4:​6, 7, nti Yehova katukanisinaka?

⁴ Yehova nti kasaka. Mbo kakanisinaka ti mbo katuhana “tidzunu tia Nzambi,” ntiana bu tâka Bibila. (Tanga Bisi-Filipe 4:​6, 7.) Tidzunu tio mbo titarilaka tidzunu tia mutima tibutukaka mu tindiku tia ntalu tie neto na Yandi. Tidzunu tio “tiyôkele mabanza mamansoni”; diangana tia nguria tia nzitukulu tiena. Ngano weka yituku mu bungu dia tidzunu tiayizi bâ naku bu wamana sambila Yehova na bunsungu bwabwansoni? Tio ni “tidzunu tia Nzambi.”

5. Bwe tidzunu tia Nzambi tikebelaka mbanzulu zeto na mitima mieto?

⁵ Verse yo mbo yitâka mpe ti tidzunu tia Nzambi “mbo tikeba,” peleko mbo tikengerela, “mitima mieno na mbanzulu zeno.” Ntelo yi basarila ku mbatukulu yizololo tâ “keba,” ntelo yena yi beri sarilaka kwe binwani, mpe mbo yeri monekesaka tinwani tieri kêlaka mumvuka, na mu kengerela wo mu bambeni. Bantu beri bêlaka ku mumvuka wu beri kêlaka mbo beri sekaka mu tidzunu, mu bungu ti bazaba ti binwani bieri ha mielo. Mpila mosi mpe, tidzunu tia Nzambi bu tikebaka mitima mieto na mbanzulu zeto, mbo tukwizi bâka ba lembama, mu bungu ti tuzebi ti ka tufweti’â tabâ na bunkuta ko. (Mik. 4:8) Ntiana mu tinsamu tia Ana, ni bu sa ti musamu’eto ka weka’eti wa ko, tulendi bâ na tidzunu. (1 Sam. 1:​16-18) Mpe bu tubâka ba dzuna, ka wubâka musamu wa mpasi ko kwe beto mu bâ na mabanza ma delakana na mu bonga nzengolo za ndwenga.

6. Nti tulendi sa mu baka tidzunu tia Nzambi? (Tala mpe tifwani.)

 ⁶ Nti tufweti sa. Bu bâka na mabanza yeko-yeko, tâka tikêri mbila. Mu bwe? Sambila tii bu mona ti weka na tidzunu tia Nzambi. (Like 11:9; 1 Tes. 5:17) Luis, wu tutokolo zonzela, banguri ka bwe yandi na mukento’andi, Ana, babêla na lenda dia lembo nôka bu bawâ ti Luis ngonda fioti kwa za sâla nandi mu luzingu. Têle ti: “Mu ntangu za mpila yo, nguria mpasi wubâka mu bonga nzengolo zitariri mpila ya bukila na mu misamu miakaka. Kâ lusambulu nguria mfunu lweri kwe beto mu lenda mu bâ na tidzunu mu ntangu yo yayansoni.” Luis na mukento’andi batâ ti bayizi sambila bwabwingi na bunsungu bwabwansoni, mbo beri lombaka Yehova mu ba hana tidzunu tia kati, mu ba lembeka mitima, na mu ba hana ndwenga za bonga nzengolo za mbote. Mpe bayizi mona lubakusu lwandi. Tala ti musamu wa mpasi ta bwabana na wo, tatamana mu lusambulu, mpe mbo kwizi baka tidzunu tia Yehova tikengerela mutima’aku na mbanzulu zaku.—Rom. 12:12.

YEHOVA MBO KAKUSIKAMASA

7. Bwe tulendi mona bu tubwabanaka na musamu wa mpasi?

⁷ Musamu wa mpasi. Bu tubwabanaka na musamu wa mpasi, mbanzulu zeto, nsalululu zeto na mpila yi tumonaka ku mutima bilendi lembo bâ bia delakana ntiana bu bitoko bâka. Tulendi mona ntiana’eti beto tweka mabaluka-ntangu. Ana, wu tutokolo zonzela, têle ti mbanzulu zazingi za swaswana zayizi bâ nandi ha manima ma lufwa lwa Luis. Têle ti: “Mbanzulu za bukaka bu zeri kunturilaka, mbo ndieri batikaka mu banza ka bwe kwani nibwana. Mbo ndieri bâka mpe mu nkesi mu bungu ti wayizi fwa.” Musamu wakaka, Ana mbo keri timonaka yandi kaka mpe mu tiari mu bonga nzengolo mu misamu Luis mi keri zabaka. Ntangu zakaka mbo keri monaka ntiana yandi weri ku nsi’a titembo tia ngolo mu mubu. Bwe Yehova katubakisilaka mu ntangu mbanzulu za mpila yo zibatikaka mu tu turila?

8. Tintwari na Izaya 33:​6, Yehova ntia lukwikulu katuhanaka?

⁸ Yehova nti kasaka. Mbo katuhanaka lukwikulu ti mbo katusikamasa. (Tanga Izaya 33:6.) Mu ntangu bato yibwabanaka na titembo tia ngolo, yilendi batika mu sa mwendo-kâla mu mpila ya mbi. Mu telamana ningana kô, bato zazingi zibâka na bima bisikamasaka zo bibâka mu lubanzi ku nsi’a mamba. Bima biango bilendi tomo sikamasa bato, mpe bantu bê mu kati balendi bâ mu tidzunu mpe balendi tomo vivirila. Kâ, bima biabingi bisikamasaka bato bisalaka bubote tala ti bato mbo yita tatamana mu kwenda ku matu. Mpila  mosi mpe, Yehova mbo katusikamasa tala ti tutatamane mu kwenda ku matu na kwikama kwakwansoni mu ntangu za mpasi.

9. Bwe bisalulu bi tudingilaka bilendi tu bakisila mu bâ ba sikama? (Tala mpe tifwani.)

⁹ Nti tufweti sa. Bu bâka na lwaka lwalwingi mu bungu ti mbanzulu za swaswana ze naku, sarilaka ngolo mu zitisa programe’aku ya timpeve. Wa matieleka, kampe kuvutu’â sa miamingi ko ntiana bu weri toko saka, kâ bambuka ti Yehova mabanza ma delakana me nandi. (Fwanakasa na Like 21:​1-4.) Mu programe’aku ya timpeve, sârisa ntangu yi sa ndongokolo ya Bibila ya nge beni na yi dimbitila. Mu bungu dia nti? Mu nzila ya organizasio’andi, mu JW Library^®, Index des Publications des Témoins de Jéhovah na Guide de recherche pour les Témoins de Jéhovah, Yehova watuhana nsangu za nzitukulu zilendi tu bakisa mu tatamana. Monika, wu tutokolo zonzela têle ti, waye dinga mu bisalulu bieto ngatu kabaka malongi mu ntangu yi keri bâka na mabanza yeko-yeko. Mu tifwani, wayizi dinga ntelo ya “nkesi.” Ntangu zakaka, mbo keri dingaka ntelo ya “bumbaki” (trahison) peleko “Kwikama.” Buna, mbo keri tangaka tii bu keri monaka bubote. Têle ti: “Bu nabatika mu sa recherche zani, lwaka lwalwingi lweri nani. Kâ bu natatamana mu tanga nayizi mona ntiana Yehova weri tomo kumbumbaka. Bu ndieri kwe tangi, nayizi bakula ti Yehova mbanzulu zazansoni za keri bakulaka, mpe meno keri bakisaka.” Lubakusu lo lutûkaka kwe Yehova, lulendi ku bakisa mpe mu tatamana mu bâ wa sikama tii bu kwizi bâ wa lembama.—Mik. 119:​143, 144.

YEHOVA MBO KAKUBAKISA

10. Bwe tulendi mona ha manima ma musamu wa mpasi?

¹⁰ Musamu wa mpasi. Ha manima ma musamu wa mpasi, kulendi bâ bilumbu bi tumona ti ba nôka twena mu nitu peleko mu mbanzulu. Tulendi kwizi timona ntiana muntu wusaka sport ya dioka we na ntinu zazingi wizi lwala, mpe weka tsuringa mu kwe yende. Misamu mialembo bâ mpasi kwe beto mu ntama, milendi kwizi bâ mpasi, mpe tulendi kondo manzangu ma yirika misamu mi tweri zoloko mu yirika. Ntiana Eliya, wulendi kwizi bâ musamu wa mpasi kwe beto mu vumbuka, mu bungu ti tuzololo tabâ kwa ba seka. (1 Mit. 19:​5-7) Yehova nti kakanisini mu sa bu tubâka ba nôka?

11. Mu ntia mpila yakaka Yehova katubakisilaka? (Mikunga 94:18)

¹¹ Yehova nti kasaka. Mbo kakanisinaka ti  mbo katubakisa. (Tanga Mikunga 94:18.) Muntu wusaka sport ya dioka wulwele mbo kabâ na nsatu lubakusu mu kwe yende, beto mpe tulendi bâ na nsatu lubakusu mu tatamana mu sala tisalu tia Yehova. Mu ntangu za mpila yo, Yehova tu kanisini ti: ‘Meno, ni Yehova Nzambi’aku, nsimbiri koko kwaku kwa lubakala, ta ku têla ti: “Kutînandi, meno ni tibakisi tiaku.”’ (Iza. 41:13) Mutinu Davide lubakusu lo lwa kamona. Bu keri bwabanaka na misamu mia mpasi, mpe bu keri na bambeni, watâ kwe Yehova: “Koko kwaku kwa lubakala kukunsimbiriri.” (Mik. 18:​35, NWT) Kâ bwe Yehova katubakisilaka?

12. Nani Yehova kalendi sarila mu tu hana lubakusu bu tubâka ba nôka?

¹² Yehova mbo kavulu tu yikaka moko bu katumaka mpangi zeto mu tu bakisa. Mu tifwani, tilumbu timosi Davide bu kayizi bâ wa nôka, ndiku’andi Yonatane wayizi mu tala mu mu yika ngolo na mu mu tindisa. (1 Sam. 23:​16, 17) Mpila mosi mpe, Yehova wasola Elize ngatu kahana lubakusu kwe Eliya. (1 Mit. 19:​16, 21; 2 Mit. 2:2) Lumbu ti, Yehova lendi sarila kanda, ndiku, peleko bakuluntu mu tu bakisa. Bu tubâka ba fwema, tulendi dinga mu bâ ha beto kaka. Mbo tudinga batubika mu tidzunu. Musamu wa delakana wena. Nti tulendi sa mu baka lubakusu lwa Yehova?

13. Nti tufweti sa mu baka lubakusu lwa Yehova? (Tala mpe tifwani.)

¹³ Nti tufweti sa. Telamana nsatu ya bâ ha nge kaka. Bu tubâka ha beto kaka, mbo tubâka na mabanza ma makufi, mpe beto beni kwa tuvulu banzilaka na misamu mie neto. Mbanzulu za mpila yo zilendi sobesa nzengolo zi tubonga. (Bin. 18:1) Wa matieleka, ntangu zakaka beto bansoni mbo tubâka na nsatu ya bâ ha beto kaka, nsungula bu tubwabanaka na misamu mia tiari. Kâ, tamana vulu yôkesa ntangu yayingi yi tubâ beto kaka, tulendi kabakasa mpila zi sarila Yehova mu tu bakisa. Buna, ni bu sa ti mu ntangu za nkatika za mpasi wena, fweti tambula lubakusu lwa kanda diaku, lwa ndiku zaku na lwa bakuluntu. Ba bongela buna bu bena—mpila yi sarilaka Yehova mu ku bakisa.—Bin. 17:17; Iza. 32:​1, 2.

YEHOVA MBO KAKUTINDISA

14. Ntia misamu mitâka bunkuta tulendi bwabana na mio?

¹⁴ Musamu wa mpasi. Kulendi bâ ntangu yi tubâ mu bunkuta. Mu Bibila, bisari bia kwikama bia Nzambi mbo bizonzelaka ntangu yi beri mu tiari peleko mu bunkuta mu bungu  dia mbeni zawu peleko mu misamu miakaka. (Mik. 18:4; 55:​1, 5) Mpila mosi, beto mpe balendi tu kwamisa ku lukolo, ku tisalu, kwe kanda peleko kwe guvernema. Tulendi kêla mpe lufwa mu bungu dia timbevo. Tulendi kwizi timona ntiana mwana fioti wulembolo na ngolo. Bwe Yehova kalendi tu bakisila mu ntangu za mpila yo?

15. Ntia lukwikulu Mikunga 94:19 yituhanaka?

¹⁵ Yehova nti kasaka. Mbo katubombaka mpe mbo katulembekaka mitima. (Tanga Mikunga 94:19.) Mukunga wo wulendi tu hana mabanza ma mwana wa fioti wa mukento we na bunkuta, mpe wuta lembo baka tolo mu bungu dia mvula ya ngolo ye na nzazi zazingi. Tulendi banza tata’andi diziri, mu bongele mu moko mandi, mpe mu simbiri tii bu kabwiri tolo. Ni bu sa ti titembo ngolo kwa tita tatamana mu pupa, mpila yi mu bumbiri tata’andi yimutindisi, mpe yimanisi bunkuta bwandi. Bu tubwabanaka na misamu mitutâka bunkuta, tulendi bâ na nsatu Tata’eto dia ku mazulu, ngatu katusimba tii bunkuta bweto bu buwa. Bwe tulendi bakila mbombolo yo kwe Yehova?

16. Nti tulendi sa mu baka lutindusu lwa Yehova? (Tala mpe tifwani.)

¹⁶ Nti tufweti sa. Ntangu zazansoni tabâka tintwari na Yehova—bu tumusambila, mpe bu tutanga Zu diandi. (Mik. 77:​1, 12-14) Buna, wamana bâ na lwaka, mabanza maku ma ntete mbo matoko kwenda kwe Tata’aku dia ku mazulu. Zonzela bunkuta bwaku na maniongo maku kwe Yehova. Mu bika kakuzonzela mpe kakubomba mu nzila ya Matsonoko mandi. (Mik. 119:28) Lendi kwizi mona ti bitini biakaka bia Bibila bilendi tomo ku tindisa bu bâka na bunkuta. Mu tifwani, lendi baka lutindusu mu buku dia Yobe, dia Mikunga, dia Bingana na mu misamu mia tâ Yezu mu Matie 6. Bu sambila Yehova, mpe bu tanga Zu diandi, mbo kwizi baka lutindusu lwandi.

17. Ntia lukwikulu lulendi bâ neto?

¹⁷ Tulendi bâ na lukwikulu ti Yehova mbo kabâ neto mu ntangu za mpasi za luzingu lweto. Kani kabwe ka tubâ beto kaka ko. (Mik. 23:4; 94:14) Yehova tu kanisini mu tu keba, mu tu sikamasa, mu tu bakisa na mu tu tindisa. Izaya 26:3 mbo yitâka ebu mu bungu dia Yehova: “Mbo kengerela bô basikamanaka kwa mu nge; mbo ba hana tidzunu tia sikama, mu bungu ti nge basikirilaka.” (NWT) Buna, sikirila Yehova, mpe dinga mu baka ndandu mu mpila zi kasarilaka mu ku bakisa. Wamana sila bo, mbo kwizi vutu bâ na ngolo ni bu sa ti mu ntangu za mpasi.