Yehova zololo ti bantu bole ba kwelana babâ mu nsayi, babâ na tindiku tia ngolo mpe tizingila. (Mat. 19:4-6) Tala ti zololo wakwela, ngano bwe lendi sa mu baka muntu wa mbote wu kwela? Mu bungu ti Yehova watusala, zebi ka nti tufweti sa ngatu tabâ na makwela ma nsayi. Buna, tala ti sariri mitieno mi katuhana, mbo baka ndandu za mbote. Tataluzuleno mwa mitieno miango.

Ntete, tufweti bakula musamu ewu mu bungu dia beto beni: “Mutima wuyôkele bima biabiansoni mu bungungu mpe wulendi yirika musamu ni musamu.” (Yer. 17:9) Bantu bole bata zolo mu kwelana, ha mbatukulu bu bata kwe dingi mu zabasana, tala ti batekese luzolo lwa ngolo, ka babâ na mabanza ma delakana ko. Muntu bu wubongaka nzengolo ya kwela, tala ti mutima’andi kwa wuta mu tuma, lendi kwizi nionga. (Bin. 28:26) Ntiangu wulembo bâ musamu wa ndwenga kwe bantu bole bazololo bakwelana tala ti ha mbatukulu batekese luzolo lwa ngolo ntete batomo zabasana.

Bingana 22:3 yitêle: “Muntu we na meso ma tia musamu wa mbi wumonaka mpe mbo wuswamaka, kâ muntu wulembolo na mayela ku matu wutatamanaka mu kwenda mpe mpasi wumonaka.” Ngano ntia mutambu we ha kati dia site zi bavukasalaka bantu ngatu bakwelana? Musamu wa tiari, bantu bakaka bayizi zabasana na bantu ba balembo zaba mu Internet, mpe babatika mu kwe duki, ha manima bayizi bakula ti huna kwa beri ba hunaka. Musamu wakaka, bambaki mbo basarilaka konte za bungungu mu huna bantu balembo saka keba ngatu babalaba mbongo. Ntangu zakaka, mbaki zo mbo zitâka ti Mbangi za Yehova zena.

Tataluzuleno mutambu wakaka. Bantu bakaka mu site zo mbo basarilaka matematike peleko calcul mu zaba ka nani bafweti vukasa. Kâ, ka kwena tima ko tisongelaka ti mpila zo mbo zitomo simbaka. Ngano mbo tusarila ndwenga mu bâ na lukwikulu mu formile za sala muntu mu bonga nzengolo ya mfunu ntiana musamu wutariri makwela? Kani kabwe, formile za matematike ka zilendi’â zayôka mitieno mia Bibila ko.​—Bin. 1:7; 3:5-7.

Mutieno we mu Bingana 14:15 mbo wutâka ti: “Muntu wulembolo zaba misamu mbo  wutambulaka misamu miamiansoni mi batâka; kâ muntu we na meso ma tia, mbo wukengerelaka ntambi zandi.” Ntete wabonga nzengolo ya kwelana na muntu, toko dinga mu tomo mu zaba. Kâ mu Internet, wulendi bâ musamu wa mpasi mu tomo zaba muntu. Ni bu sa ti foto lukabasanaka, mpe ntangu yayingi luyôkesaka mu moka, ngano lendi tomo zaba muntu wo? Bantu bakaka beri banzaka ti luzolo lwa matieleka babaka, bayizi fwema mu bungu dia misamu mi bamona bu bayizi bwabana na muntu wu basa tindiku mu Internet.

Titsoniki tia Mikunga tiatâ ti: “Ka nisaka tindiku na bambaki ko, mpe bantu baswekaka bifu biawu nidiokaka.” (Mik. 26:4) Bantu babingi babanzaka ti ka wena musamu wa mbi ko mu hana nsangu za bungungu mu site zo zi bavukasalaka bantu, ngatu batomo ba zolo. Balendi sweka bifu biawu bia mbi, peleko bifu biawu bia mbi bilendi lembo moneka mu ntangu yi batsonekenaka bantu bakaka mu Internet. Bantu bakaka balendi tâ ti Mbangi za Yehova zena. Ngano wa matieleka Bakristo ba batusu bena? Ngano ba yela bena mu timpeve? Ngano tindiku tia bawu beni tie nawu na Yehova? Ngano mbo babazitisaka mu timvuka tiawu? Peleko misamu mikondoko ndwenga bayirikaka, peleko ndiku za mbi zena? (1 Kor. 15:33; 2 Tim. 2:20, 21) Ngano tintwari na mitieno mia Bibila, timpwanza tie nawu tia kwela? Fweti zaba misamu mio, kâ musamu wa mpasi wena tala ti kutokolo’â yula Mbangi za Yehova ko zitomono zaba muntu wo. (Bin. 15:22) Mpe Mbangi ya Yehova ya kwikama, ka yilendi’â yakwela muntu ko wulembolo Mbangi ya Yehova.​—1 Kor. 7:39; 2 Kor. 6:14.

Mutambu wena mu sarilaka site zi bavukasalaka bantu ngatu bakwelana, kâ, mpila zakaka ze kô za mbote mu dinga na mu zaba muntu wu lulendi kwelana. Bwe lendi sa mu baka muntu wa mbote wu lulendi kwelana? Mu ntangu yi balembo yiminaka tukutakanu twa bantu babingi, Mbangi za Yehova bweso bu bâka nawu bwa monana na bwa zabasana na bampwana’awu ku tukutakanu twa timvuka, twa tunene na twakaka.

Mu ntangu yi bayiminaka tukutakanu twa bantu babingi, ntiana mu ntangu ya Coronavirus, mbo tusarilaka appareils électroniques mu bâ ku tukutakanu ku tubêlaka na bweso bwa zabasana na Mbangi za Yehova zilembolo za kwela. Mbo bâ na bweso bwa mona ka bwe bahaninaka mvutu ku tukutakanu, mpe ka bwe bazonzelaka timinu tiawu. (1 Tim. 6:11, 12) Lulendi moka mpe ha manima ma tukutakanu. Mu nzila ya appareils électroniques zi tubakisaka mu monana, lendi bakula ka bwe muntu wu ta zolo kabongelaka bampwana’andi, mpe ka ntia timuntu tie nandi. (1 Pi. 3:4) Ntangu bu yikwe yôke, bu lukwe zabasane, mbo lukwizi bakula tala ti makani mamosi me neno, mpe bifu bieno bidelakane ngatu lwakwelana.

Mu ntangu mpangi ze mpumpa zisarilaka mitieno mia Bibila mu dinga muntu wu bakwela, mbo bakwizi tomo bakulaka matieleka me mu tingana titâka ti: “Wô bakiri mukento wa mbote, tima tia mbote kabakiri, mpe bweso bwa Yehova bwe nandi.”​—Bin. 18:22.