1. Bwe tufweti bongelaka bweso bwa sambila Yehova?

 BWESO bwa toma tabaka​—bwa pusana kwe Mvangi wa mutoto na wa mazulu mu lusambulu. Banza’eti: Tulendi ziburila Yehova mutima mu ntangu ni ntangu, mu zu ni zu mpe ka twena na nsatu ko ya toko mu zabikisa. Tulendi mu sambila tûka ku mfulu ya lupitalu peleko ku boloko na lukwikulu ti Tata’eto dia luzolo mbo katuwirikila. Mbo tutomo tondaka mu bungu dia kabu dio.

2. Ngano bwe Davide kasongela ti lusambulu ntalu lweri kwe yandi?

² Mutinu Davide mbo keri bongelaka lusambulu ntiana tima tia ntalu. Mu mukunga wu katangila Yehova watâ ti: ‘Bika lusambulu lwani lwabâ ntiana encens yi bakubikiri ha meso maku.’ (Mik. 141:1, 2) Mu ntangu ya Davide, encens ya mulongo yi beri sarilaka kwe Banganga-Nzambi,mbo beri ya yirikaka na bunkete bwabwansoni. (Ndu. 30:34, 35) Davide mbo keri banzaka na bunsungu bwabwansoni mu misamu mi kaketi tâ bu keri sambilaka Yehova, ntiana kwa bunsungu bu beri sarilaka bu beri kubikaka encens. Beto mpe ni bo tuzololo mu sila. Tuzololo ti tusambulu tweto twayangirika Yehova.

3. Nti tufweti saka bu tupusanaka kwe Yehova mu lusambulu, mpe mu bungu dia nti?

³ Bu tusambilaka Yehova, tufweti bâka na buzitu bwabwingi. Banza bimona-meso bia mona Izaya, Ezekiele, Daniele, na Za. Bimona-meso bio bia swaswana biena, kâ tintwari biena mu musamu wumosi. Babansoni bazonzela Yehova ntiana Mutinu wa nzitukulu. Izaya ‘wamona Yehova wazakala ha muyâlu watomo zangama.’ (Iza. 6:1-3) Ezekiele wamona Yehova wazakala  ha zulu char’andi ya ku mazulu, mpe mutsamina weri ntiana lukandu (arc-en-ciel) weri mu zungirilaka. (Ezk. 1:26-28) Daniele wamona “Mbuta ya bilumbu” walwata binkuti bia mpembe, na tiya tweri tûkaka ku muyâlu’andi. (Dan. 7:9, 10) Mpe Za wamona Yehova wazakala ha muyâlu wu bazungirila mu tima tieri ntiana lukandu lwa émeraude. (Nza. 4:2-4) Bu tudimbitilaka mu mukembo wa nzitukulu wa Yehova, mbo tubambukaka ti bweso bwa bunene bwe neto bwa pusana kwe Yandi mu lusambulu, mpe mbo tumonaka mfunu ya mu sambila na buzitu bwabwansoni. Kâ bwe tulendi sambirila?

4. Nti bitariri lusambulu tulongokaka mu misamu mia mbatukulu mia tâ Yezu mu Matie 6:9, 10?

⁴ Tanga Matie 6:9, 10. Mu tinzonzi ti kasa ha zulu mongo, Yezu walongesa milongoki miandi mpila yi bafweti sambirila yitâka Nzambi nsayi. Bu kamana tâ ti: “Lufweti sambirilaka ebu,” Yezu watoko zonzela misamu mia mfunu mitariri makani ma Nzambi. Watoko zonzela: santukisa nkumbu ya Nzambi, nkwizulu ya Timfumu tia Nzambi tifukisa mbeni za Nzambi, na misamu mia mbote mi kayirika mu bungu dia mutoto na mu bungu dia bantu mu bilumbu bia ku matu. Bu tuzonzelaka misamu mia mpila yo mu lusambulu, mbo tusongelaka ti luzolo lwa Nzambi mfunu lwena ha meso meto.

5. Ngano musamu wa mbote wena mu sambilaka mu bungu dia misamu mia beto beni?

⁵ Mu misamu mieri landaka mu lusambulu lo, Yezu wasongela ti ka bwena bubi ko mu sambilaka mu bungu dia misamu mia beto beni. Tulendi lomba kwe Yehova katuhana bidia bieto bia tilumbu, kalemvokela masumu meto, katukengerela mu ntontolo mpe katukakula mu munkwa-mbi. (Mat. 6:11-13) Bu tulombaka bima bia mpila yo kwe Yehova, mbo tusongelaka ti tuzebi ti nsatu lubakusu lwandi ye neto, mpe tuzololo tamutâ nsayi.

6. Ngano misamu mi tufweti sambirilaka ni mio kwa mie mu lusambulu lwa tifwani? Bangula.

⁶ Yezu keri’ â kêlaka ko ti milongoki miandi miasarila ntelo zi kasarila yandi mu lusambulu lwa tifwani. Mu tusambulu twakaka twa sa Yezu, wazonzela misamu miakaka mieri mfunu kwe yandi mu ntangu yîna. (Mat. 26:39, 42; Za 17:1-26) Mpila mosi mpe, tulendi  sambila mu bungu dia misamu mia beto beni. Mu ntangu yi tubâka na nsatu ya bonga nzengolo, tulendi sambila mu baka ndwenga na mu tomo bakula misamu. (Mik. 119:33, 34) Bu tuzolo batikaka tisalu tia mpasi, tulendi sambila mu baka lenda dia bakula na dia swasikisa. (Bin. 2:6) Bibuti bilendi sambila mu bungu dia bala bawu, bala balendi sambila mu bungu dia bibuti biawu; beto bansoni tulendi mpe tufweti sambilaka mu bungu dia milongoki mieto mia Bibila na mu bungu dia bantu batusamuninaka. Kâ tusambulu tweto ka tufweti’â twasukinaka kwa mu ndombolo ko.

7. Mu bungu dia nti tufweti kembelaka Yehova mu tusambulu tweto?

⁷ Tufweti bambukaka mu kembela Yehova mu tusambulu tweto. Ka kwena muntu ko wuyôkele mu baka mukembo yôka Nzambi’eto. ‘Wa mbote wena mpe zebi lemvokela.’ ‘Tiari tia lemvokela tie nandi na tia mutima, ka kulu’â bakaka nkesi ko mpe wa fuluka wena mu luzolo lwa kwikama na mu matieleka.’ (Mik. 86:5, 15) Misamu mia mbote misaka ti takembela Yehova mu bungu dia timuntu tiandi na mu mio mi kayirikaka.

8. Mu ntia misamu miakaka tulendi tondela Yehova? (Mikunga 104:12-15, 24)

⁸ Tufweti kembelaka Yehova mu tusambulu tweto, kâ mpe tufweti mu tondaka mu bungu dia bima bia toma bi katuhanaka. Mu tifwani, tulendi mu tonda mu bungu dia bifulu bia toma bie na couleurs za nzitukulu, bidia bia mpila na mpila bie na luwu lwalwingi, mpe mu bungu dia bindiku bie neto bitutâka nsayi. Tata’eto dia luzolo mbo katuhanaka bima bio na biakaka ngatu tabâ mu nsayi. (Tanga Mikunga 104:12-15, 24.) Musamu wuyôkele mfunu, mbo tutondaka Yehova mu bungu dia bima biabingi bia timpeve bi katuhanaka, na mu bungu dia tivuvu tia toma tie neto mu bungu dia bilumbu bita kwiza.

9. Nti bilendi tu bakisa mu bambukaka mu tonda Yehova? (1 Bisi-Tesalonike 5:17, 18)

⁹ Wulendi bâ musamu wa fioti mu zimbakana mu tonda Yehova mu miamiansoni mi kayikaka mu bungu dia beto. Ngano nti bilendi ku bambula? Lendi tsoneka misamu mi walomba, mpe ha manima ma bilumbu lendi kwe taluzuri ka bwe Yehova kata mia hanina mvutu. Ha manima sambila Yehova mu mu tonda  mu bungu dia lubakusu lwandi. (Tanga 1 Bisi-Tesalonike 5:17, 18.) Banza’eti musamu ewu: Bu batutondaka mbo tubâka mu nsayi mpe mbo tumonaka ti beto bazololo. Mpila mosi mpe, bu tubambukaka mu tonda Yehova mu bungu dia mvutu zi kahanaka mu tusambulu tweto, mbo tuyangirikaka mutima’andi. (Kol. 3:15) Kâ, ntia musamu wakaka we mfunu wu tufweti tondelaka Nzambi?

10. Tintwari na 1 Piere 2:21, mu bungu dia nti tufweti tondelaka Yehova bu katambika Yezu ha mutoto?

¹⁰ Tanga 1 Piere 2:21. Tufweti tondaka Yehova bu katambika Mwana’andi wa luzolo mu tu longesa. Mbo tukwizi zabaka misamu miamingi mitariri Yehova na mpila yi tulendi mu têla nsayi bu tulongokaka luzingu lwa Yezu. Tamana sarila timinu mu mukayulu wa Kristo, tulendi bâ na tindiku tia ngolo na Yehova Nzambi’eto, mpe tulendi bâ mu tidzunu na Yandi.​—Rom. 5:1.

11. Mu bungu dia nti tufweti sambilaka mu nkumbu ya Yezu?

¹¹ Mbo tutondaka Yehova mu bungu ti lenda die neto dia mu sambila mu nzila ya Mwana’andi. Yezu ni nzila Yehova yi kasola mu hanina ndombolo zeto mvutu. Yehova mbo kawirikilaka mpe mbo kahaninaka tusambulu tweto mvutu bu tumusambilaka mu nkumbu ya Yezu. Yezu wabangula ti: ‘Miamiansoni mi lulomba mu nkumbu’ani, mbo niyirika mio, ngatu Tata kabaka nsangu mu Mwana.’​—Za 14:13, 14.

12. Mu ntia musamu wakaka tufweti tondelaka Yehova mu bungu dia Mwana’andi?

¹² Yehova mbo kalemvokelaka masumu meto mu nzila ya mukayulu wa nkûlulu wa Yezu. Bibila mbo dizonzelaka Yezu ntiana ‘Mfumu-Nganga-Nzambi’eto yizakale ha lubakala lwa muyâlu wa Mfumu ku mazulu.’ (Ebr. 8:1) Yezu ni tibakisi tieto ha matu ma Tata. (1 Za 2:1) Mbo tutomo tondaka Yehova bu katuhana Mfumu-Nganga-Nzambi yi tubakulaka, mpe ye nzonzi’eto! (Rom. 8:34; Ebr. 4:15) Bantu ba masumu twena, buna tala ti mukayulu wa Yezu kâni, ka taketi’â bâ na lenda ko dia pusana kwe Yehova mu lusambulu. Ntembe kâni mbo lutambula mu tâ ti, kani kabwe, ka kwena musamu ko wudelakane wu tulendi tâ mu vutula matondo mu bungu dia kabu dia ntalu dia tu hana Yehova​—kabu dia Mwana’andi wa ntalu!

13. Mu mpimpa ntete lufwa lwandi, bwe Yezu kasongela ti milongoki miandi mia keri zoloko?

¹³ Mpimpa ntete lufwa lwandi, Yezu wayôkesa ntangu yayingi mu sambirila milongoki miandi, walomba kwe Tata’andi mu ba kengerela mu bungu dia nkwa-mbi. (Za 17:15) Diangana Yezu bawu keri tomo zoloko! Ni bu sa ti wazaba ti ntamana mbo kamona mpasi zazingi; watatamana mu belokela bantumwa bandi lwaka.

14. Bwe tulendi songela ti mpangi zeto tuzoloko?

¹⁴ Mu tifwani tia Yezu, ka tutûlaka kwa mabanza mu nsatu zeto ko. Kâ, ntangu zazansoni mbo tusambilaka mu bungu dia mpangi zeto. Bu tusilaka bo, mbo tutumamanaka ntumunu ya Yezu yitâka ti tufweti zolosono beto na beto, mpe mbo tusongelaka kwe Yehova ti mpangi zeto za tutomono zolo. (Za 13:34) Bu tusambirilaka mpangi zeto, ka tuhombesaka ntangu’eto ko. Zu dia Nzambi mbo ditutêlaka ti: ‘Lusambulu lwa muntu wa sungama nguria ngolo lwena.’​—Zaki 5:16.

15. Mu bungu dia nti mpangi zeto zibêlaka na nsatu tusambulu tweto?

¹⁵ Mpangi zeto nsatu ya tusambulu tweto yibâka nawu mu bungu ti misamu miamingi mia  mpasi babwabanaka na mio. Tulendi lomba kwe Yehova kababakisa mu korela bimbevo, catastrophes naturelles, mizingu, nkwamusu peleko misamu miakaka mia mpasi. Tulendi sambila mpe mu bungu dia mpangi zeto zitihanaka mu hana lubakusu kwe bô bê na lo nsatu. Kampe bantu zebi bata bwabana na misamu mia mpila yo. Ngano lendi tâka nkumbu zawu mu tusambulu twaku? Mbo tusongelaka luzolo lwa matieleka bu tulombaka kwe Yehova kababakisa mu korela.

16. Mu bungu dia nti tufweti sambilaka mu bungu dia mpangi ze na madema mu timvuka?

¹⁶ Mpangi ze na madema mu timvuka mbo zitondaka bu basambilaka mu bungu dia bawu, mpe tusambulu twa mpila yo mbo tubabakisaka. Ntumwa Paulo wazaba ti nsatu tusambulu twa bampwana’andi yeri nandi. Watsoneka ti: ‘Sambileno mpe mu bungu dia meno, ngatu nabaka misamu mi nitâ bu nizibula munwa, ngatu nalenda mu zonza na butindi mu ntangu yi nizabikisa nsweki ya santu ya nsangu za mbote.’ (Efz. 6:19) Lumbu ti mpe, mpangi zazingi ze neto zisalaka tisalu tia ngolo, mpe ze na madema ha kati dieto. Mbo tusongelaka ti bawu tuzololo bu tulombaka Yehova kasakumuna tisalu tiawu.

17-18. Mu ntia ntangu balendi tu lomba mu sambila ha lunguri bantu, mpe nti tufweti bambukilaka?

¹⁷ Ntangu zakaka, mbo batulombaka mu sambila ha lunguri bantu. Mu tifwani, mpangi ya yikento yitwarisaka ndongokolo ya Bibila yilendi lomba kwe mpangi yakaka ya yikento yimuturisi mu sambila. Mpangi yimuturisi yilendi lembo tomo zaba mulongoki wa Bibila, buna wulendi bâ musamu wa mbote kasambila ku nsuka ya ndongokolo ya Bibila. Mu mpila yo, ka wubâ musamu wa mpasi ko kwe yandi mu tâ misamu mitariri mulongoki wo mu lusambulu.

¹⁸ Balendi lomba kwe mpangi ya bakala mu sambila mu ntangu ya lukutakanu lwa tisalu tia samuna peleko ya lukutakanu lwa timvuka. Mpangi zi bahanaka bweso bwa mpila yo bafweti bambukilaka kani dia lukutakanu. Lusambulu ka yena nzila ko yi bahaninaka malongi kwe timvuka peleko yi bahaninaka nsangu. Mu tukutakanu twa timvuka twatwîngi,  mbo bavulu hanaka minite 5 mu bungu dia mukunga na lusambulu; buna mpangi yisa lusambulu kena na nsatu ko ya tâ misamu miamingi, nsungula tala ti lusambulu lwa mbatukulu ya lukutakanu lwena.​—Mat. 6:7.

19. Nti bitubakisa mu bâ ba kubama mu bungu dia tilumbu tia mfundusu tia Yehova?

¹⁹ Bu tweka penepene na tilumbu tia mfundusu tia Yehova tufweti tûla lusambulu ha tibuka tia nguria mfunu mu luzingu lweto; mu bungu dia musamu wo Yezu watâ ti: “Buna tatamaneno mu bâ na meso ma tia mpe vulueno yawulaka mu lenda mu vuka mu mio miamiansoni mitula.” (Like 21:36, NWT) Wa matieleka, lusambulu lwa ntangu zazansoni mbo lutubakisa mu tatamana mu bâ na meso ma tia mu timpeve, mpe mbo tubâ ba kubama mu ntangu tilumbu tia mfundusu tia Nzambi titula.

20. Bwe tusambulu tweto tulendi bêla ntiana encens ya nsuka ya mbote?

²⁰ Ngano nti tuzonzele? Mbo tutomo zoloko bweso bwe neto bwa sambila. Misamu mia mfunu mi tufweti sambirilaka ni misamu mie tintwari na makani ma Yehova. Mbo tuvutulaka mpe matondo mu bungu dia Mwana wa Nzambi na mu bungu dia luyalu lwandi mu Timfumu tiandi, mpe, mbo tusambirilaka mpangi zeto za Bakristo. Kâ mpe tulendi sambila mu bungu dia nsatu zeto za tinsuni na za timpeve. Bu tutoko banzaka mu misamu mi tutâ mu tusambulu tweto, mbo tusongelaka ti bweso bo bwa nzitukulu bwa tutomono zolo. Buna misamu mi tutâ mbo mibâ ntiana encens ya mbote mu bungu dia Yehova​—mbo yimutâ nsayi.​—Bin. 15:8.